2 TIMOTEO 2 - Chatino Tataltepec

Tlyu cua'ni tyiquee Timoteo, nti' Pablo

¹ Sñi' na', nti' na' cha' ta na' chaca cui̱i̱ lo'o nu'u̱ juani: Caca tlyu tyiquee nu'u̱ xqui'ya Jesucristo nu xcui' cha' tso'o ndu'ni lo'o na.

² Cua ndyuna nu'u̱ lcaa cha' nu ngulu'u na' ji'i̱ tyu̱u̱ tya'a ñati̱; nu juani la cui' ñi'ya̱ nu ngulu'u na', jua'a̱ culu'u nu'u̱ ji'i̱ ñati̱ nu tyucui tyiquee nti' ngu' culu'u ngu' cha' bi' ji'i̱ xi xa' la ñati̱, cha' ca tsa'a̱ tso'o nu xa' la ngu' bi' cha' ji'i̱ ycui' Ndyosi.

³ Ñi'ya̱ ndalo sca sendaru lo'o ndya'a̱ yu cusu̱u̱, jua'a̱ talo nu'u̱ si cajá cha' ti'í jinu'u̱ lo'o ndyu'ni lya' ti' ngu' jinu'u̱, cha' sendaru ji'i̱ Jesucristo laca nu'u̱ juani.

⁴ Sca ti cña sendaru caca cua'ni sendaru; ná caca cua'ni yu xi xa' lo cña, si nti' yu cha' ca tso'o tyiquee xu'na yu lo'o yu, cha' bi' laca nu cua ngusubi ji'i̱ yu cha' caca yu sendaru.

⁵ Jua'a̱ si ntsu'u sca cha' cuijya ji'i̱ ngu' lo'o tya'a ngu' ni, cua laca nscua cha' ñi'ya̱ nu tso'o la quijya ngu', cha' taca cua'ni tsaca yu ngana ji'i̱ tya'a yu. Si ná taquiya' ngu' ji'i̱ cha' nu cua nscua bi', li' ná caja cha' xlya'be ji'i̱ ñati̱ nu cua ngua'ni ngana ji'i̱ tya'a yu lo'o cua ndye cha' cuijya ji'i̱ ngu' li'.

⁶ Chaca cha' ni, sca ñati̱ nu tlyu tsa cña ngua'ni lo xtya̱ ji'i̱ yu, clyo cacu ycui' yu na nu ndyu'u lo xtya̱ bi'.

⁷ Culacua xi ti' nu'u̱ ji'i̱ cha' nu ngulu'u ca ti na' jinu'u̱, lo'o jua'a̱ xtyucua ycui' nu Xu'na na jinu'u̱ cha' ca cuayá' ti' nu'u̱ lcaa cha' bi'.

⁸ Tyi'u ti' nu'u̱ ji'i̱ Jesucristo, cha' ycui' laca nu ndyu'ú chaca quiya' lo'o ngujuii yu. Tya'a ñati̱ ji'i̱ jyo'o David laca yu bi'. La cui' cha' tso'o ji'i̱ Jesús nu lu'ú ca nda na' lo'o ñati̱,

⁹ bi' cha' ndu'ni lya' ti' ngu' 'na juani. Ñi'ya̱ nu nchcube' ngu' ji'i̱ sca ñati̱ cuxi, jua'a̱ ngusca̱' ngu' jna' ne' chcua̱ juani. Ngusu'ba ngu' jna' ne' chcua̱ tu'ni, pana ná nchca ji'i̱ ngu' su'ba yacu̱' ngu' ji'i̱ cha' tso'o ji'i̱ ycui' Ndyosi jua'a̱;

¹⁰ bi' cha' talo tyiquee na' ji'i̱ ngu', masi nchcube' tsa ngu' jna'. Talo na' ji'i̱ cha' cuxi bi' cuentya ji'i̱ ca ta'a ñati̱ nu ngusubi ycui' Ndyosi ji'i̱, cha' lo'o ñati̱ bi' ngua'ni lyaá Jesucristo ji'i̱, cha' caja chalyuu nu ná nga'a̱ cha' tye ji'i̱ ñati̱ bi'. Caca tyi'i̱ ngu' bi' ca slo ycui' Ndyosi su tso'o tsa ña'a̱ lcaa cha'.

¹¹ Nga'a̱ cha' xñi tso'o ma̱ cha' liñi nu ndi'ya̱ nchcui': Si cajaa na cha' laca na ñati̱ ji'i̱ Jesucristo, lo'o ti tyaa na tyi'i̱ na lo'o ycui' Ndyosi li'.

¹² Si talo na lo'o xcube' ngu' ji'na xqui'ya cha' ji'i̱ Ni, li' caja su tyi'i̱ na lo'o ycui' Jesús ca su laca Ni loo ca bi'. Si ñacui̱ na cha' ná ntsu'u cha' ji'na lo'o Jesucristo, jua'a̱ ycui' Ni, ñacui̱ Ni cha' ná ntsu'u cha' ji'i̱ Ni lo'o na.

¹³ Masi tya'a̱chu̱' na ji'i̱ ycui' Ni, ña'a̱ ti tya tso'o tsa ndu'ni Jesucristo lo'o na; ná ncha'a̱ cha' ji'i̱ Jesús, ña'a̱ ti tya cua'ni Ni ñi'ya̱ nu cua nacui̱ ycui' Ni cha' cua'ni Ni.

Ñati̱ nu tso'o tsa cña ndyu'ni

¹⁴ Lu'ba ti chcui' nu'u̱ lo'o ngu' cha' taquiya' ngu' lcaa cha' nu nscua na' re. Cua jlo ti' ycui' nu Xu'na na lcaa ña'a̱ nu ndyu'ni scaa ngu', bi' cha' culo nu'u̱ cña cha' nga'aa xtyacui ngu' cha' lo'o tya'a ngu' cuentya ji'i̱ cua ña'a̱ ca cuentyu nu nchcui' ñati̱. Ná tso'o tsiya' ti jua'a̱, cha' lye tsa quichi̱ cha' hique ngu' nu ndyuna cha' bi'.

¹⁵ Lye tsa cua'ni nu'u̱ cña nu cua nda ycui' Ndyosi jinu'u̱, cha' ná ca tyuju'u ti' nu'u̱ xqui'ya cña nu ngua'ni nu'u̱ nu lo'o tsaa nu'u̱ tyi'i̱ ca slo Ni. Chañi tsa laca cha' ji'i̱ ycui' Ndyosi, bi' cha' tya culu'u la nu'u̱ cha' liñi bi' ji'i̱ ngu' lacua; tso'o ti caca tyiquee Ni ña'a̱ Ni jinu'u̱ li'.

¹⁶ Ná cua'a̱ jyaca̱ nu'u̱ tsiya' ti ji'i̱ cha' cuxi nu nchcui' nu ngu' cuiñi bi', cha' tyijyu' tsa ndya'a̱chu̱' ngu' bi' ji'i̱ ycui' Ndyosi; nga'aa ndya'a̱ ngu' bi' tyucui̱i̱ ji'i̱ ycui' Ndyosi tsiya' ti.

¹⁷ Cha' cuxi laca nu nclu'u ngu' bi', lo'o jua'a̱ tlyu la caca cha' cuxi bi' nde loo la. Ñi'ya̱ ndyaluu sca quichu' tyaala nu nga'a̱ lo cuaña' na, ña'a̱ cuayá' cua'ni ñu'u̱ ji'i̱ ña'a̱ tsaca cuaña' na, la cui' jua'a̱ laca cha' cuiñi nu nclyu'u yu Himeneo lo'o yu Fileto bi'.

¹⁸ Nguxtyanu ngu' bi' cha' liñi ji'i̱ ycui' Ndyosi, lo'o nu juani nacui̱ ngu' bi' cha' nga'aa tyu'ú na chaca quiya': “Na cua ndyu'ú ngu' chaca quiya', lcaa ngu' nu ntsu'u cha' tyu'ú”, nacui̱ ngu' cuiñi bi'. Pana ntsu'u xi ngu' tya'a na nu cua ngusñi cha' nu nchcui' ngu' bi', lo'o juani nga'aa jlo tso'o ti' ngu' ni cha' nu jlya ti' ngu' tya clyo.

¹⁹ Liñi tsa laca cha' nu nchcui' ycui' Ndyosi; cua'ni Ni cha' ná xtyanu na cha' bi', si jlya ti' na cha' nu nchcui' ycui' Ndyosi ndi'ya̱: “Cua nslo ycui' nu Xu'na na tilaca laca ñati̱ ji'i̱ Ni”. Lo'o chaca cha' nchcui' ndi'ya̱: “Cua ña'a̱ ca ñati̱ nu ntsu'u cha' ji'i̱ lo'o Cristo ni, ntsu'u cha' xtyanu ngu' bi' lcaa cha' cuxi”. Jua'a̱ nacui̱ quityi ji'i̱ ycui' Ndyosi.

²⁰ Ntsu'u tsa ya' xña ne' cosiña ji'i̱ sca ni'i̱ tlyu: ntsu'u na oro, jua'a̱ ntsu'u na plata, jua'a̱ ntsu'u na yaca, lo'o jua'a̱ ntsu'u na yuu. Xcui' cña tso'o ti ndu'ni ngu' lo'o ca'ña oro, lo'o ca'ña plata; pana ná ndube ti' ngu' ji'i̱ ca'ña yaca, ji'i̱ ca'ña yuu, cha' tsa'ña ti nga'a̱ bi'.

²¹ Ñi'ya̱ nti' ya' xña nu ntsu'u ne' cosiña, jua'a̱ laca ñati̱ ji'i̱ Jesucristo; nti' na cha' cua'ni ycui' nu Xu'na na cha' tso'o lo'o na, cha' cube ti' Ni ji'na ñi'ya̱ lo'o ndube ti' xu'na ni'i̱ ji'i̱ ca'ña ji'i̱, nu quiña'a̱ tsa nga'a̱. Ná caca cua'ni na cha' tso'o bi' si ná lubii cresiya ji'na; bi' cha' ndu'ni cha' xtyanu na lcaa cha' cuxi cha' caca lubii cresiya ji'na, cha' sca ti cña nu nda ycui' Ndyosi ji'na cua'ni na li'.

²² Ngu' cuañi' laca nu'u̱, lo'o jua'a̱ ntsu'u tsa cha' cuxi nu ndiya ti' ngu' cuañi'; pana nga'aa cua'ni nu'u̱ cha' bi'. Ña'a̱ ti tya cua'ni nu'u̱ cha' tso'o ndi'ya̱: xñi tso'o nu'u̱ cha' liñi bi', tso'o ti tyu'u tyiquee nu'u̱ ña'a̱ nu'u̱ ji'i̱ ñati̱; tso'o ti tyi'i̱ nu'u̱ lo'o tya'a ma̱ nu cua ngua lubii cresiya ji'i̱ ngu', la cui' tya'a ntsu'u cha' ji'i̱ ma̱ lo'o ycui' nu Xu'na na.

²³ Nga'aa xacui̱ nu'u̱ cha' ji'i̱ ñati̱ nu ná jlo ti' tsiya' ti ñi'ya̱ laca sca cha' liñi; ná sca cha' jlo ti' ngu' bi', pana nti' ngu' xu̱u̱ tya'a ngu' lo'o nu'u̱ xqui'ya sca cha' laja ti.

²⁴ Nu ñati̱ nu ndyu'ni cña ji'i̱ ycui' nu Xu'na na ni, ná tso'o si xcui' nxu̱u̱ ti ngu' ndi'i̱ ngu' lo'o tya'a ngu'; ntsu'u cha' chcui' tso'o ti ngu' bi' lo'o lcaa ñati̱. Tso'o si nchca ji'i̱ ngu' bi' culu'u ngu' cha' ji'i̱ ycui' Ndyosi ji'i̱ xa' ñati̱; jua'a̱ ntsu'u cha' talo tyiquee ngu' bi' ji'i̱ ñati̱ nu cua'ni lya' ti' ji'i̱ ngu',

²⁵ jua'a̱ ji'i̱ ñati̱ nu ñasi̱' ji'i̱ ngu'. Tso'o ti chcui' ngu' bi' lo'o ñati̱ nu ñasi̱', cha' jua'a̱ taca cua'ni ycui' nu Xu'na na cña ne' cresiya ji'i̱ ñati̱ nu ñasi̱' bi', cha' taca culu'u Ni ji'i̱ ngu' ñi'ya̱ laca lo'o cha' liñi bi'. Tso'o tsa si culochu̱' ñati̱ nu ñasi̱' bi' lcaa cha' cuxi nu ndyu'ni ngu',

²⁶ cha' li' taca culo Ni ji'i̱ ngu' ya' nu xña'a̱. Na cua ngusñi nu xña'a̱ ji'i̱ ñati̱ nu ñasi̱' bi' tya tsubi' la cha' cua'ni ngu' cña cuxi cuentya ji'i̱.