2 PEDRO 3 - Chatino Tataltepec

Ndi'ya̱ caca lo'o ca̱a̱ ycui' nu Xu'na na

¹ Cu'ma̱ ngu' tya'a tso'o na, cua nguscua na' sca quityi ndyaa slo cu'ma̱ tya tsubi' la. Nu juani nde nscua na' chaca quityi, cha' ca tyi'u ti' ma̱ lcaa cha' nu ji'i̱ Cristo, cha' jua'a̱ caca culacua tso'o ti' ma̱ lcaa hora.

² Ntsu'u cha' tyi'u ti' ma̱ cha' nu cua nchcui' ngu' nu ngua tu'ba ji'i̱ ycui' Ndyosi cua sa'ni la; tso'o si tyi'u ti' ma̱ cha' bi' lu'ba ti, lo'o jua'a̱ ji'i̱ cha' nu cua nchcui' ycui' nu Xu'na na nu ngua'ni lyaá ji'na. Cua ngusubi ycui' nu Xu'na na ji'i̱ ya cha' culu'u ya cha' ji'i̱ ycui' Ni ji'i̱ cu'ma̱, bi' cha' tso'o si taquiya' ma̱ ji'i̱ lcaa cha' nu cua ndyuna ma̱ lo'o ngulu'u ya ji'i̱ ma̱.

³ Tya clyo ntsu'u cha' ca cuayá' ti' ma̱ cha' lo'o cua tyalaa ti tsa̱ nu tye chalyuu, li' tyu'u tucua ngu' nu xtyílo'o tsa ji'i̱ cha' ji'i̱ ycui' Ndyosi. Cua'ni ngu' bi' cua ña'a̱ ca cha' cuxi nu ndiya ti' ycui' ca ngu' cha' cua'ni ngu'.

⁴ Li' ndi'ya̱ ñacui̱ ngu' bi' ji'i̱ ma̱: “¿Ni hora ca̱a̱ Cristo lacua? ¿Ni cha' laca tya ndu̱ ti' ma̱ ji'i̱ yu cha' ca̱a̱ yu? Cua nteje tacui tsa tyempo bi', cha' cua ngujuii lcaa ngu' cusu' ji'na, lo'o jua'a̱ cua ngusu' na juani. Ña'a̱ ti ndyaca chalyuu re, ñi'ya̱ nu ndyaca tya lo'o nguxana chalyuu clyo.”

⁵ Jua'a̱ ñacui̱ ngu' cuiñi bi', cha' ná nti' ngu' tyi'u ti' ngu' ji'i̱ cña nu cua ngua'ni ycui' Ndyosi. Nu ngua clyo ná ntsu'u chalyuu tsiya' ti, lo'o li' nchcui' ycui' Ndyosi; cuati ngüiñá Ni lcaa na nu ntsu'u nde cua̱. Lo'o hitya ti ngüiñá Ni tyucui ña'a̱ chalyuu, lo'o jua'a̱ cla'be la lo hitya nscua yuu chalyuu tya clyo.

⁶ Pana ca tiya' la xi ndye ngüityi̱ Ni ji'i̱ chalyuu bi' lo'o hitya, nu lo'o ngua'ya tyo clyaa.

⁷ Ca tiya' la li' xa' ngulo ycui' Ndyosi cña cha' ña'a̱ ti tyanu lcaa na nu ntsu'u nde cua̱, ña'a̱ ti tyanu lcaa lo na nu ntsu'u nde chalyuu, ña'a̱ cuayá' tyalaa tsa̱ nu cua'ni cuayá' Ni ji'i̱ lcaa na. Li' tye tyaqui̱ lcaa na bi', lo'o jua'a̱ tye cha' ji'i̱ lcaa ñati̱ nu ná ntsu'u cha' ji'i̱ lo'o ycui' Ndyosi.

⁸ Cu'ma̱ ngu' tya'a tso'o na, tso'o la si culacua ti' ma̱ cha' ñi'ya̱ nti' sca tsa̱ ti, jua'a̱ laca sca mil yija̱ cuentya ji'i̱ ycui' Ndyosi; ntsu'u quiya' cha' ñi'ya̱ nti' sca mil yija̱, jua'a̱ laca sca tsa̱ ti cuentya ji'i̱ ycui' Ni.

⁹ Si'i na tiya' tsa ti' ycui' Ndyosi cha' cua'ni Ni cña nu nacui̱ Ni cha' cua'ni ycui' Ni nde loo la; pana na ntajatya tsa Ni ji'na ñati̱ chalyuu na, cha' ná nti' Ni cha' chcuna' ni sca ñati̱ ji'i̱ ycui' Ni. Nti' tsa Ni cha' ca cuayá' ti' lcaa ñati̱ cha' ntsu'u cha' cuxi ji'i̱ ngu'; lo'o li' ca tyuju'u ti' ngu' ji'i̱ cha' cuxi bi', culochu̱' ngu' ji'i̱ cha' cuxi bi' li'. Jua'a̱ caca ji'i̱ ngu' nti' ycui' Ndyosi.

¹⁰ Chañi cha' tyalaa tsa̱ bi' lo'o ca̱a̱ ycui' nu Xu'na na chaca quiya', pana ná jlo ti' na ni tsa̱ caca bi'. Ñi'ya̱ laca si cua ca̱a̱ ti sca nu cuaana to' tyi na lo'o ná jlo ti' na, jua'a̱ caca tsa̱ bi'. Cati̱ jua'a̱ ti lcaa na nu ntsu'u nde cua̱, lye tsa cañi cha' bi'; lo'o li' tye tsiya' ti tyaqui̱ lcaa na nu ntsu'u nde cua̱. Jua'a̱ tyucui ña'a̱ chalyuu ni, tye tsiya' ti li'.

¹¹ Cua nscua cha' tye lcaa na lo'o tyalaa tsa̱ bi', bi' cha' ntsu'u cha' caca ma̱ ñati̱ nu lubii cresiya ji'i̱, cha' caca ma̱ ñati̱ nu ngua tso'o tyiquee ma̱ cuentya ji'i̱ ycui' Ndyosi.

¹² Jua'a̱ nga'a̱ cha' caca ma̱ laja lo'o tya lyiji caca tsa̱ bi' nu lo'o ca̱a̱ ycui' Ndyosi, cha' jua'a̱ taca xtyucua ma̱ ji'i̱ ycui' Ni lo'o cña ji'i̱ Ni nde chalyuu. Tsa̱ bi' tyaqui̱ tyucui ña'a̱ nde cua̱, ña'a̱ cuayá' nu tye tyalá lcaa na nu ntsu'u nde cua̱; tye tsiya' ti lcaa cha' bi' li'. Cuii lo'o cualya, lo'o cuichaa, lo'o co', lo'o lcaa na ni, tye bi' tyalá.

¹³ Pana xa' cuiñá Ni chaca chalyuu cucui, lo'o jua'a̱ cuiñá Ni lcaa lo na nu ntsu'u nde cua̱; cuiñá Ni sca chalyuu nu tso'o tsa ña'a̱, su xcui' tso'o ti cua'ni ngu' lo'o tya'a ngu' li'. Jua'a̱ nacui̱ Ni cha' caca; jlo ti' na cha' jua'a̱ caca bi', xqui'ya cha' xcui' cha' liñi nchcui' ycui' Ni. Bi' cha' ndu̱ ti' na ji'i̱ cha' bi' lacua.

¹⁴ Cu'ma̱ tya'a tso'o na, na ndu̱ ti' ma̱ ji'i̱ cha' bi', bi' cha' ntsu'u cha' cua'ni ma̱ xcui' cha' tso'o ti, xcui' cha' lubii ti lo'o tya'a ñati̱ ma̱, cha' ti̱ ti tyi'i̱ tyiquee ma̱ cuentya ji'i̱ ycui' Ni.

¹⁵ Tyi'u ti' ma̱ cha' ndalo tsa tyiquee ycui' Ndyosi ña'a̱ Ni ji'na, cua nda tsa Ni tyempo ji'na cha' clyaá na ji'i̱ nu cuxi. Jua'a̱ Pablo tya'a na ni, la cui' tya'a cha' nguscua yu lo quityi; ñati̱ tya'a tso'o na laca yu bi', lo'o jua'a̱ tso'o tsa nchcui' quityi nu nguscua yu nu cua ndyalaa slo ma̱. Ycui' Ndyosi laca nu ngulu'u ji'i̱ yu lcaa ña'a̱ cha' tso'o nu nguscua yu lo quityi bi'.

¹⁶ Tyu̱u̱ tya'a quityi nguscua Pablo bi', pana sca ti cuayá' nchcui' ca ta'a quityi bi' ji'i̱ cha' ji'i̱ ycui' Ndyosi nu cua nchcui' na ji'i̱ juani. Ntsu'u xi cha' nu nguscua nu Pablo bi' nu tucui xi cha' caca cuayá' tso'o ti' na ji'i̱; lo'o jua'a̱ ntsu'u ngu' nu lye tsa nclyu'u cha' cuiñi xqui'ya quityi bi', cha' ná nchca cuayá' ti' ngu' bi' cha' bi' tsiya' ti. Ná ngua tsa'a̱ tso'o ngu' bi', cha' bilya ca cuayá' tso'o ti' ngu' cha' bi'; bi' cha' ni sca quityi ji'i̱ ycui' Ndyosi ná liñi nclu'u ngu' bi' ji'i̱. Pana tye cha' ji'i̱ ngu' bi' tsiya' ti xqui'ya cha' cuiñi nu nclu'u ngu' ji'i̱ tya'a ñati̱ ngu'.

¹⁷ Cu'ma̱ ngu' tya'a tso'o na ni, cua nguscua na' lcaa cha' bi' cha' ca tii ti' ma̱, cha' ná ta ma̱ chacuayá' ji'i̱ nu ngu' cuiñi bi' cha' culu'u ngu' ji'i̱ ma̱. Cha' liñi laca nu ngua tsa'a̱ ma̱ clyo, lo'o juani ná tso'o si taquiya' ma̱ ji'i̱ cha' cuiñi nu nclyu'u ngu' bi'; ná tso'o tya'a̱chu̱' ma̱ ji'i̱ cha' liñi bi' li'.

¹⁸ Pana tso'o la ca tsa'a̱ la ma̱ cha' tso'o ji'i̱ Jesucristo nu Xu'na na, nu cua ngua'ni lyaá ji'na; li' taca tyi'i̱ tso'o la tyiquee ma̱ cuentya ji'i̱ ycui' nu Xu'na na. Cua'ni tlyu na ji'i̱ ycui' Ni nde chalyuu, lo'o jua'a̱ ná nga'a̱ cha' tye tsa̱ nu cua'ni tlyu na ji'i̱ Ni ca slo ycui' Ni. Jua'a̱ caca cha' lacua.