2 PEDRO 2 - Chatino Tataltepec

Ñati̱ nu nclu'u cha' cuiñi ji'i̱ ngu'

¹ Cua ntsu'u xi ngu' cuiñi nu nguti'i̱ laja ngu' Israel sa'ni la; tu'ba ji'i̱ ycui' Ndyosi ngua ngu', nacui̱ ycui' ngu' cuiñi bi'. La cui' jua'a̱ tyu'u tucua ñati̱ cuiñi laja cu'ma̱ nde loo la; li' culu'u ngu' cuiñi bi' ji'i̱ ma̱, culu'u ngu' cua ña'a̱ ca cha' nu ca'ya hique ycui' ca ngu'. Lo'o li' ñacui̱ ngu' bi' cha' cuentya ji'i̱ ycui' Ndyosi nchcui' ngu'. Si cuna ma̱ cha' nu chcui' ngu' bi', li' xana cha' cusu̱u̱ ji'i̱ ma̱ lo'o tya'a ma̱ ña'a̱ cuayá' nu tya'be tya'a ma̱. Li' caca ma̱ tucua latya ma̱ xqui'ya cha' cuiñi bi'. Tlyu tsa cña nu ngua'ni ycui' nu Xu'na na cha' cua'ni lyaá Ni ji'i̱ lcaa na lo'o ji'i̱ ngu' bi', pana ná nti' nu ngu' cuiñi bi' cha' caca ycui' Ndyosi Xu'na ngu' bi' tsiya' ti; ná ntsu'u cha' tsiya' ti ji'i̱ ngu' bi' lo'o ycui' Ndyosi, bi' cha' yala ti tye cha' ji'i̱ nu ngu' cuiñi bi'.

² Lo'o jua'a̱ cua nscua cha' taquiya' tyu̱u̱ tya'a ngu' tya'a na ji'i̱ cha' nu nchcui' nu ngu' cuiñi bi'; lo'o ngu' tya'a na bi' cua'ni ngu' cha' suba' lo'o tya'a ngu' li', ñi'ya̱ nu culu'u ngu' cuiñi bi' ji'i̱ ngu' cha' cua'ni ngu'. Ná tso'o jua'a̱. Nu ngu' nu ná ngusñi cha' ji'i̱ ycui' Ndyosi tsiya' ti ni, quiña'a̱ tsa cha' cuxi chcui' ngu' bi' ji'na li'.

³ Lo'o jua'a̱ ndacui tsa ti' ngu' cuiñi bi' ji'i̱ na nu ntsu'u ji'i̱ ma̱; nti' tsa ngu' cua'ni ngu' ngana ji'i̱ ma̱, bi' cha' tajua' ti chcui' ngu' cha' cuiñi ti lo'o ma̱. Pana ntsu'u cha' xcube' Ni ji'i̱ ngu' cuiñi bi', cha' cua sa'ni cua nchcui' Ni cha' ná tso'o cua'ni ngu' cha' cuxi jua'a̱. Si'i na laja' ycui' Ni; jlo ti' Ni ñi'ya̱ ndu'ni ngu' cuiñi bi', lo'o jua'a̱ cua'ni tye Ni ji'i̱ ngu' bi' yala ti.

⁴ Nu cua sa'ni ni, ná ngua'ni clyu ti' ycui' Ndyosi ji'i̱ nu ngu' xca̱ ji'i̱ Ni nu ntsu'u qui'ya ji'i̱; nguxcua̱a̱ Ni ji'i̱ ngu' xca̱ nu xña'a̱ bi', ndyaa ngu' nde ca bilyaa, ca su talya ña'a̱ tsiya' ti. Ndyaaca̱' ngu' xca̱ bi' lo'o ju̱u̱ chcua̱, cha' ca bi' tyanu ngu' ña'a̱ cuayá' nu cua'ni cuayá' Ni ji'i̱ lcaa ñati̱ chalyuu, lo'o ji'i̱ ngu' xca̱ bi'.

⁵ Lcaa ñati̱ chalyuu nu ngua tya sa'ni la nu ná ndaquiya' ji'i̱ ycui' Ndyosi ni, ná ngua'ni clyu ti' Ni ji'i̱ ngu' bi'; ngua'ni Ni cha' ngua'ya tyo clyaa, ñi'ya̱ ndacha' Ni ji'i̱ ngu' bi' cha' caca. Cua nchcui' jyo'o Noé cha' ji'i̱ ycui' Ndyosi lo'o lcaa ñati̱, pana ná nduna ngu' bi'. Ngujuii lcaa ngu' bi' li'; sca ti nu Noé bi' lo'o cati tya'a ñati̱ ji'i̱, ngua'ni lyaá Ni ji'i̱ ngu' bi', cha' ngua'a̱ jyaca̱ ngu' bi' ji'i̱ cha' nu nchcui' Ni lo'o ngu'.

⁶ La cui' ti cha' ngua cuxi ji'i̱ ngu' quichi̱ Sodoma lo'o ji'i̱ ngu' quichi̱ Gomorra, cha' cuxi tsa ngua'ni ngu' bi'; ngua'ni ñu'u̱ Ni tsiya' ti ji'i̱ tyucuaa quichi̱ bi'. Lo'o ndye ndyaqui̱ quichi̱ bi', jii lo'o nchcubi' tya ndyanu su nscua quichi̱ bi' nquicha'. Jua'a̱ ngua'ni ycui' Ndyosi nu ngua li', cha' ca cuayá' ti' lcaa ñati̱ nu ndiya ti' ndu'ni lcaa lo cha' cuxi, masi juani ti, masi nde loo la; xcube' Ni ji'i̱ ngu' bi' ña'a̱ cuayá' nu tye cha' ji'i̱ ngu' bi' tsiya' ti.

⁷ Sca ti jyo'o Lot, ngulo Ni ji'i̱ yu cha' ngutu'u yu quichi̱ Sodoma bi'; bi' cha' sca ti nu cusu' Lot bi' ná ngujuii yu lo'o ndye cha' ji'i̱ quichi̱ Sodoma bi'. Ñati̱ tso'o ngua Lot; bi' cha' ngulacua tsa ti' yu, lye tsa ngua xñi'i̱ ti' yu, xqui'ya lcaa cha' suba', lcaa cha' cuxi nu ngua'ni lcaa ñati̱ quichi̱ bi'.

⁸ Tso'o tyiquee ycui' Lot bi', lcaa tsa̱ lye tsa ndube ti' yu lo'o na'a̱ yu lcaa cha' cuxi bi'; quiña'a̱ tsa ngulacua ti' yu lo'o ndyuna yu lcaa cha' suba' nu nchcui' ngu' quichi̱ bi'.

⁹ Jua'a̱ caca cuayá' ti' na cha' nchca ji'i̱ ycui' nu Xu'na na cua'ni lyaá Ni ji'i̱ ñati̱ nu tso'o cresiya ji'i̱, cha' ná tyiji̱loo nu cuxi ji'i̱ ngu' bi'. Nu lo'o cua'ni cuayá' Ni ji'i̱ lcaa ñati̱ ni, jlo ti' Ni ti ji'i̱ xcube' Ni. Cua jlo ti' Ni tilaca laca nu ntsu'u cha' cuxi tyiquee.

¹⁰ Lo'o ñati̱ nu xcui' cha' suba' ndu'ni ni, lye la xcube' Ni ji'i̱ ngu' bi', cha' ná ndaquiya' ngu' bi' tsiya' ti ji'i̱ ngu' nu laca loo ji'i̱ ngu'; ná ndube ti' ngu' bi' tsiya' ti, cha' tyixi tsa tyiquee ngu'. Ná ntsi̱i̱ ngu' bi', masi chcui' ca'a̱ ngu' ji'i̱ ngu' xca̱ ji'i̱ ycui' Ndyosi.

¹¹ Pana nu ngu' xca̱ ji'i̱ ycui' Ndyosi ni, nguula la ngu' xca̱ bi', nchca la ji'i̱ ngu' xca̱ que ñati̱ chalyuu ti; ni ná nchcui' ngu' xca̱ cha' suba' ji'i̱ ñati̱ chalyuu, ná nsta bi' qui'ya hichu̱' nu ngu' cuxi slo ycui' nu Xu'na na.

¹² Ñi'ya̱ laca na'ni quixi̱' nu ná nchca culacua ti', jua'a̱ laca nu ñati̱ cuxi bi', cha' xcui' cha' suba' nchcui' ngu' bi' ji'i̱ lcaa cha' nu ná nchca cuayá' ti' ngu' ji'i̱. Nxñi na ji'i̱ na'ni tyaala nu ntsu'u ne' quixi̱', ndyujuii na ji'i̱ ni' li'. Lo'o jua'a̱ nu ngu' cuxi bi', tyaala ngu' cha' nti' ngu' cua'ni ñu'u̱ ngu' ji'i̱ lcaa lo na tso'o; pana tye cha' ji'i̱ ngu' bi' tsiya' ti nde loo la,

¹³ chcube' ngu' bi' ñi'ya̱ nu nguxcube' ycui' ngu' ji'i̱ xa' ñati̱. Tsa̱ lo'o talya ndu'ni suba' ngu' cuxi bi', cha' ná nchca taja ti' ngu' bi' ndu'ni ngu' cha' cuxi bi'; ná nchca tyuju'u ti' ngu' bi' tsiya' ti, masi cuxi tsa cña nu ndyu'ni ngu'. Lo'o jua'a̱ stu'ba ti ndyu'u ti'i̱ ngu' bi' lo'o ma̱ lo'o ndyu'ni ma̱ ta'a, ñi'ya̱ si chañi cha' tya'a na laca ngu' bi'.

¹⁴ Xcui' cha' suba' nda'ya hique ngu' cuxi bi' lo'o ña'a̱ ngu' ji'i̱ sca nu cuna'a̱, cha' ná tye cha' nti' ngu' bi' cua'ni suba' ngu' lo'o. Lo'o jua'a̱ hora ti culu'u ngu' bi' cha' cuxi ji'i̱ xa' ñati̱ nu bilya ca cuayá' tso'o ti' cha' ji'i̱ Jesucristo. Lye tsa ngua tsa'a̱ ngu' cuiñi bi' ji'i̱ lcaa lo cha' cuxi, bi' cha' lye tsa ndacui ti' ngu' bi'; ná nga'a̱ cha' tyaala' ji'i̱ ngu' bi' tsiya' ti. Pana cua nda ycui' Ndyosi yabe' ji'i̱ ngu' cuiñi bi';

¹⁵ cua nguxtyanu ngu' bi' tyucui̱i̱ su tsaa na ca slo ycui' Ndyosi, xa' tyucui̱i̱ ngusñi ngu' bi'. Lo'o jua'a̱ nguna' tsa ndya'a̱ ngu' bi' juani, cha' la cui' tyucui̱i̱ su nguta'a̱ jyo'o cusu' Balaam sñi' Beor ndya'a̱ ngu' bi' juani. Nu Balaam bi' ngua tiji̱' tsa ti' ji'i̱ cñi, bi' cha' ngua'ni yu cña cuxi, cha' caja la cñi ji'i̱ yu ngua ti' yu.

¹⁶ Tu'ba ji'i̱ ycui' Ndyosi ngua nu Balaam bi' nquicha'; bi' cha' ngua'ni ycui' Ni cha' nchcui' huru ji'i̱ yu lo'o yu bi', cha' xcutsi̱i̱ ni' ji'i̱ yu bi', cha' nga'aa cua'ni la yu cña cuxi bi'.

¹⁷ Taca chcui' na cha' laca nu ngu' cuiñi bi' ñi'ya̱ laca sca pilya nu ngüityi tsiya' ti, nu nga'aa ntsu'u hitya ne'. La cui' jua'a̱ laca ngu' bi' ñi'ya̱ laca sca coo ngati̱ ti, nu nxna tsa xqui'ya cui'i̱, pana ná ndu'ni bi' cha' ca'ya tyo; na ndya'a̱ ti bi' nde cua̱. Lo'o nu ngu' cuiñi bi' ni, ná ntsu'u cha' tso'o tyiquee ngu' tsiya' ti, bi' cha' ntsu'u cha' tsaa ngu' bi' ca su talya tsa ña'a̱; ca jua cua ngüiñá ycui' Ndyosi sca se'i̱ nu cuxi tsa ña'a̱, su tsaa ngu' nu ndu'ni jua'a̱.

¹⁸ Jlo tsa ti' nu ngu' cuiñi bi' ñi'ya̱ chcui' ngu' sca cha' tso'o, pana tucua lo cha' ntsu'u tyiquee ngu' bi'; na cñilo'o ngu' bi' ji'i̱ ngu' nu ngusñi ca ti cha' tso'o ji'i̱ Jesucristo, cha' lo'o ngu' cua'ni suba' ngu' chaca quiya' nti' nu ngu' cuiñi bi'. Ñi'ya̱ ngua'ni ngu' cha' cuxi tya tsubi' la, nu lo'o bilya cuna ngu' cha' tso'o ji'i̱ ycui' Ndyosi, jua'a̱ nti' ngu' cuiñi bi' cha' cua'ni ngu' chaca quiya'.

¹⁹ Nchcui' nu ngu' cuiñi bi' lo'o xa' la ngu' cha' ná ntsu'u cha' taquiya' ngu' ji'i̱ lcua ti cña nu culo ycui' Ndyosi ji'i̱ ngu', cha' cua ngulaá ngu' ji'i̱ cha' bi', nacui̱ ngu' cuiñi bi'; pana bilya ca cuayá' ti' nu ngu' cuiñi bi', cha' ycui' ca ngu' laca ngu' msu ji'i̱ lcaa cha' cuxi nu ndu'ni ngu'. Cua ña'a̱ ca ñati̱ nu ta chacuayá' ji'i̱ nu cuxi cha' tyiji̱loo ji'i̱, la cui' hora bi' laca nu cuxi xu'na ñati̱ bi' li'.

²⁰ Cuxi la caca ji'i̱ ñati̱ nu cua nguxtyanu ji'i̱ cha' cuxi tsaca quiya', lo'o li' ta chacuayá' ji'i̱ nu cuxi cha' tyiji̱loo ji'i̱ chaca quiya'; na cua ngulaá ñati̱ bi' ji'i̱ lcaa cha' cuxi nu ntsu'u nde chalyuu nquicha', na cua ngua tsa'a̱ ji'i̱ Jesucristo nu Xu'na na, cha' bi' laca nu ngua'ni lyaá ji'na.

²¹ Tso'o la si ná ngua tsa'a̱ ngu' tsiya' ti ji'i̱ tyucui̱i̱ liñi su tsaa na ca slo ycui' Ndyosi; ná tso'o si ngua cuayá' ti' ngu', lo'o li' nguxtyanu ngu' tyucui̱i̱ liñi su tsaa na ca slo Ni. Nga'aa ndaquiya' ngu' bi' ji'i̱ cha' nu cua nda Cristo lo'o na li'.

²² Lo'o ña'a̱ na ji'i̱ ñati̱ nu cua nguxtyanu cha' ji'i̱ Cristo, li' caca cuayá' ti' na cha' liñi tsa ndyu'u cha' nu nchcui' ngu' ndi'ya̱: “Sca xne' nu ndyacui̱ na nu ndyacu ni', hora ti tsaa ni' cacu ni' na nu ndyacui̱ ni' chaca quiya'. Lo'o jua'a̱ sca cube' tana ni, lo'o cua ndyaata ni' chcu, hora ti xtyu̱u̱ ni' ca su ntsu'u nana' cha' xtyii ni' chaca quiya'.”