2 PEDRO 1 - Chatino Tataltepec

¹ Simón Pedro laca na'; ndyu'ni na' cña ji'i̱ Jesucristo, cha' cua ngusubi Ni 'na cha' tsa'a na' ta na' cha' tso'o ji'i̱ Cristo lo'o ngu' xa' quichi̱. Lo'o nu juani nscua na' quityi re cha' tsaa slo lcaa ñati̱ nu ngusñi cha' ji'i̱ ycui' Ndyosi ñi'ya̱ nu ngusñi na ji'i̱. Xcui' cha' liñi ndu'ni ycui' Ndyosi nu Xu'na na, la cui' Jesucristo nu ndyu'ni lyaá ji'na ji'i̱ nu cuxi laca bi'; bi' cha' stu'ba ti laca lcaa na cuentya ji'i̱ ycui' Ndyosi, tso'o tsa ndyaca ji'i̱ lcaa na cuentya ji'i̱ Ni.

² Cua nchca cuayá' tso'o ti' ma̱ cha' ji'i̱ ycui' Ndyosi, lo'o jua'a̱ nchca cuayá' ti' ma̱ cha' ji'i̱ Jesús nu Xu'na na; bi' cha' ndi'ya̱ nti' na': ña'a̱ ti cua'ni Ni cha' tso'o lo'o ma̱ lcaa tsa̱, lo'o jua'a̱ cua'ni Ni cha' ti̱ ti tyi'i̱ tyiquee ma̱ lcaa hora.

Ñi'ya̱ ntsu'u cha' caca sca ñati̱ ji'i̱ Jesucristo

³ Cua nda Ni chacuayá' ji'na cha' caja chalyuu nu ná nga'a̱ cha' tye ji'na, jua'a̱ cua nda Ni chacuayá' ji'na cha' tyi'i̱ na chalyuu ñi'ya̱ nu nti' Ni cha' tyi'i̱ ñati̱ ji'i̱ Ni; bi' cha' nchca ji'na, cha' nxtyucua Ni ji'na. Cua ngusubi Ni ji'na, cua nda Ni chacuayá' ji'na cha' tyuloo na ji'i̱ ycui' Ni; lo'o jua'a̱ cua ngua cuayá' ti' na cha' nga'aa ntsu'u chaca nu tlyu la, nga'aa ntsu'u chaca nu nchca la ji'i̱.

⁴ Tlyu tsa ycui' Ndyosi, lo'o jua'a̱ nchca ji'i̱ Ni cua'ni Ni lcaa lo cña; jua'a̱ nchca cuayá' ti' na cha' xcui' cha' liñi laca nu nchcui' ycui' Ndyosi. Lo'o jua'a̱ ndu̱ ti' na cha' caja cha' tlyu bi' ji'na nu cua nchcui' Ni lo'o na cha' tyacua ji'na. Cua ngua'ni lyaá Ni ji'na ji'i̱ nu cuxi nu ntsu'u ji'na, cha' nga'aa caca cua'ni cha' cuxi bi' ngana ji'na; lcaa cha' cuxi nu ndiya tsa ti' na ji'i̱, bi' laca nu ndu'ni ñu'u̱ ji'na nde chalyuu. Pana juani ndu'ni Ni cha' tyaja'a̱ tyiquee na cua'ni na lcaa cha' tso'o, ñi'ya̱ nu nti' ycui' Ndyosi cha' cua'ni na.

⁵ Bi' cha' tyucui tyiquee ma̱, lo'o tyucui juersa ji'i̱ ma̱, cua'ni ma̱ xcui' cha' tso'o bi', cha' culu'u ma̱ ji'i̱ xa' ñati̱ cha' chañi cha' cua ngusñi ma̱ cha' ji'i̱ Jesucristo. Lo'o jua'a̱ ntsu'u cha' caca cuayá' la ti' ma̱ lcaa cha', ña'a̱ cha' nu ndiya la ti' ycui' Ni.

⁶ Ntsu'u cha' ca cuayá' la ti' ma̱ ñi'ya̱ ntsu'u cha' ji'i̱ ycui' Ndyosi; li' taca cua'a tso'o ma̱ ji'i̱ ycui' ca ma̱, cha' nga'aa cua'ni nu cuxi ngana ji'i̱ ma̱. Si taca cua'a tso'o ma̱ ji'i̱ ycui' ca ma̱, li' talo tsa ma̱ ji'i̱ nu cuxi. Nu lo'o taca talo ma̱ ji'i̱ lcaa cha' cuxi, li' taca tyi'i̱ ma̱ ñi'ya̱ nti' ycui' Ni cha' tyi'i̱ ma̱ nde chalyuu.

⁷ Si jua'a̱ nti' ma̱ cha' tyi'i̱ ma̱ chalyuu, li' nga'a̱ cha' cua'ni tyaca'a ma̱ ji'i̱ tya'a ñati̱ ma̱; ntsu'u cha' tso'o ti caca tyiquee ma̱ ña'a̱ ma̱ ji'i̱ lcaa ñati̱.

⁸ Si ndu'ni ma̱ lcaa lo cña bi', si jua'a̱ ti ndu'ni ma̱ lo'o ndi'i̱ ma̱ chalyuu, li' caca cuayá' la ti' ma̱ ñi'ya̱ ntsu'u lcaa cha' ji'i̱ Jesucristo nu Xu'na na. Ná ca taja ti' ma̱, cha' tso'o tsa cua'nijo'o ma̱ ji'i̱ ycui' Ndyosi li'.

⁹ Pana si ná ndu'ni ma̱ lcaa lo cha' bi', si ná ndi'i̱ tso'o ma̱ jua'a̱, laca ma̱ ñi'ya̱ laca sca nu cuityi̱' nu ndacu̱' ycui' ca ti yu cloo yu. Nga'aa nti' yu cuityi̱' bi' tyi'u ti' yu ñi'ya̱ ngua'ni lubii ycui' Ndyosi ne' cresiya ji'i̱ yu, nu lo'o ngüityi̱ Ni cha' cuxi nu ntsu'u ne' cresiya ji'i̱ yu.

¹⁰ Bi' cha' ña'a̱ ti tya cua'ni la ma̱ lcaa cha' tso'o bi', ñi'ya̱ nu nguscua na' tya clyo; jua'a̱ tyi'u la ti' ma̱ cha' cua ngusubi ycui' Ndyosi ji'i̱ ma̱, cha' caca ma̱ ñati̱ ji'i̱ ycui' Ni. Lo'o li' ná nga'a̱ cha' chcuna' ma̱, si jua'a̱ cua'ni ma̱ lcaa lo cha' tso'o bi';

¹¹ ndya'a̱ ma̱ lo tyucui̱i̱ ji'i̱ ycui' Ndyosi li'. Jua'a̱ caca ycui' Jesucristo nu Xu'na na loo ji'i̱ ma̱, bi' laca nu ndyu'ni lyaá ji'na; ná nga'a̱ cha' tye tsa̱ cha' laca ycui' Ni loo, lo'o li' tso'o ti tyatí̱ na ca su ntucua ycui' Ni.

¹² Tya tyu̱u̱ quiya' nti' na' chcui' na' lo'o ma̱ cuentya ji'i̱ lcaa cha' liñi ji'i̱ ycui' Ndyosi, masi cua jlo ti' ma̱ cha' bi'. Lo'o jua'a̱ jlo ti' na' cha' ngusñi tso'o ma̱ lcaa cha' nu nscua na' bi';

¹³ pana laja lo'o tya lu'ú na', cua'ni na' cha' ná cjlyaa ti' ma̱ ji'i̱ cha' liñi bi'. Tso'o la si cua'ni na' jua'a̱, nti' na',

¹⁴ cha' cua jlo ti' na' cha' cua tye ti cha' jna' nde chalyuu; cua ndacha' Jesucristo nu Xu'na na 'na cha' cua ngulala ti cajaa na'.

¹⁵ Pana cua'ni na' cha' tyanu cha' bi' lo'o ma̱, cha' taca tyi'u ti' ma̱ cha' tso'o ji'i̱ Jesucristo bi' lcaa tsa̱, masi cua ngujuii na'.

Nu ngu' nu cua na'a̱ cha' tlyu tsa cha' ntsu'u ji'i̱ ycui' Jesucristo

¹⁶ Si'i cña cua̱ nu ngua'ya hique ti ya ngua cha' nu nchcui' ya lo'o ma̱, nu lo'o ndacha' ya ji'i̱ ma̱ cha' tlyu tsa cha' caca ji'i̱ ycui' Jesucristo nu Xu'na na nu lo'o ca̱a̱ yu chaca quiya'. Ycui' cuare cua na'a̱ ya ji'i̱ Jesús lo'o tlyu tsa cha' ntsu'u ji'i̱ yu;

¹⁷ ngua'ni tlyu ycui' Ndyosi Sti Jesús ji'i̱ yu, ndubi tsa ña'a̱ ngua tyucui ña'a̱ loo Jesús lo'o xee ji'i̱ ycui' Ni li'. Masi ná na'a̱ ya ji'i̱ ycui' Ndyosi nu laca loo ji'i̱ lcaa xu'na chalyuu, pana jlo ti' ya cha' nguti'i̱ Ni cacua ti tsa̱ bi', cha' li' ndyuna ya lo'o nchcui' Ni lo'o ngu'. Ndi'ya̱ nacui̱ Ni: “Nu nde laca Sñi' na' nu tyaca'a tsa 'na. Tso'o tsa ntsu'u tyiquee na' ña'a̱ na' ji'i̱ yu”, nacui̱ Ni.

¹⁸ Ycui' cuare cua ndyuna ya cha' nu nchcui' Xtyi'i Ni nu ntucua nde cua̱, cha' lo'o cuare nguti'i̱ ya lo xlya ca'ya bi' nu ngua tsa̱ bi'.

¹⁹ Jua'a̱ ngua cha' taca ca cuayá' ti' na cha' liñi tsa laca lcaa cha' nu cua nchcui' jyo'o cusu' nu ngua tu'ba ji'i̱ ycui' Ndyosi cua sa'ni la. Tso'o si taquiya' na ji'i̱ cha' bi', cha' ñi'ya̱ laca sca xee ndubi nu tso'o tsa ntyiji'i̱ xee su talya ña'a̱, jua'a̱ laca cha' ji'i̱ Jesús bi'. Culu'u bi' tyucui̱i̱ tso'o su nga'a̱ cha' tsaa na ña'a̱ cuayá' nu quixee tsa̱ bi'. Li' tyu'u tucua sca cuii tlyu nu ntyucua nde nguxee; bi' laca ñi'ya̱ laca Cristo, cha' nda yu xee nu tyu'ú ne' cresiya ji'na.

²⁰ Ntsu'u cha' ca cuayá' ti' ma̱ cha' ná tucui caca culu'u ji'i̱ ñati̱ ñi'ya̱ nu ndyu'u sca cha' nu nguscua jyo'o cusu' ji'na lo quityi ji'i̱ ycui' Ndyosi sa'ni la. Sca ti si xtyucua Xtyi'i ycui' Ndyosi ji'i̱ ngu' cha' caca cuayá' tso'o ti' ngu', li' taca culu'u ngu' cha' bi' ji'i̱ xa' ñati̱ cuentya ji'i̱ ycui' Ni.

²¹ Lcaa ñati̱ nu ngua tu'ba ji'i̱ ycui' Ndyosi sa'ni la ni, ná nchcui' ngu' cua ña'a̱ ca cha' nu ndiya ti ti' ngu', nu lo'o nchcui' ngu' cuentya ji'i̱ ycui' Ndyosi; xcui' cha' nu nda Xtyi'i ycui' Ndyosi lo'o ngu' bi', bi' laca cha' nu nchcui' ngu' cuentya ji'i̱ ycui' Ni.