2 CORINTIOS 9 - Chatino Tataltepec

Msta̱ nu nda ma̱ cha' xtyucua ji'i̱ tya'a ñati̱ ma̱

¹ Nga'aa nti' cha' chcui' la na' lo'o cu'ma̱ cuentya ji'i̱ msta̱ nu nxti'i̱ ma̱ cha' xtyucua ji'i̱ ngu' tya'a ma̱ nu ntsu'u cha' ji'i̱ lo'o Cristo,

² cha' cua jlo ti' na' cha' tso'o ti nti' ma̱ ña'a̱ ma̱ ji'i̱ ngu'. Lu'ba ti nchcui' na' lo'o ngu' ca tyi re, ca loyuu su cuentya Macedonia re, cha' tso'o tsa ndyu'ni ma̱, cu'ma̱ ngu' ca tyi nde loyuu su cuentya Acaya bi'; ni na' ji'i̱ ngu' cha' yala tsa ti' cu'ma̱, cha' tya yija̱ na ngua'ni cña ti' ma̱ cha' xti'i̱ ma̱ msta̱ bi'. Lo'o nu ngu' Macedonia re ni, cua ngua chaa la ti' tyiquee ngu' lo'o na'a̱ ngu' cha' yala tsa ndyu'ni ma̱ cña.

³ Masi jua'a̱ ña'a̱ ti tya ta na' ji'i̱ ngu' tya'a na bi', cha' ca̱a̱ ngu' ca slo ma̱. Li' taca cua'ni ma̱ tsa ña'a̱ nu cua nacui̱ na' ji'i̱ ngu' cha' ndu'ni ma̱, si'i cha' laja ti nchcui' na' ji'i̱ ma̱ lacua. Bi' cha' cua'ni ma̱ cha' xti'i̱ ma̱ msta̱ bi', cha' cua laca ti nguscua se'i̱ cha' bi' nu lo'o ca̱a̱ na'.

⁴ Ná jlo ti' na' si lo'o xi tya'a na nu laca ngu' Macedonia re ca̱a̱ na' li'. ¿Ñi'ya̱ cua'ni na li', si ña'a̱ ngu' cha' ná ngua'ni yala ma̱? Ca tyuju'u tsa ti' ya li', cha' cua nchcui' ya lo'o ngu' cha' tso'o tsa ndu'ni ma̱; jua'a̱ cu'ma̱ caca tyuju'u ti' ma̱ li'.

⁵ Bi' cha' cua nchcui' na' lo'o ngu' tya'a na re, cha' tsaa ngu' nde loo la que na', cha' xtyucua ngu' ji'i̱ ma̱ cha' cua'ni cho'o ma̱ msta̱, ñi'ya̱ nu nacui̱ ma̱ 'na cha' ta ma̱; cua laca nscua se'i̱ ti cha' bi' lo'o ca̱a̱ na' li'. Jua'a̱ laca bi' sca cña tso'o nu ngua'ni ma̱ xqui'ya cha' ndiya ti' ma̱ ndu'ni ma̱ ji'i̱, si'i sca cña nu ndatsaa tsa ya ji'i̱ ma̱ laca nu ngua'ni ma̱ li'.

⁶ Tyi'u ti' ma̱ ñi'ya̱ ndyaca lo'o ntyaa na na cuiñii. Si xti ti si'yu na cuiñii bi' cataa na, xti ti cha' tso'o tyu'u ji'na li'; pana si quiña'a̱ si'yu cataa na, quiña'a̱ la cha' tso'o tyu'u li'.

⁷ La cui' jua'a̱ lo'o ta na cñi xlya'be ti, nga'a̱ cha' quiñi ti' na ni tsa lo ta scaa na. Ná tso'o si cha' cuiñi ti na ta na ji'i̱, la cui' ti ná tso'o si cha' juersa ti ta na ji'i̱; ndiya la ti' ycui' Ndyosi si tso'o ntsu'u tyiquee na ta na ji'i̱.

⁸ Taca xtyucua ycui' Ndyosi ji'i̱ ma̱ lo'o quiña'a̱ tsa cha', lo'o li' tyu'u scua ji'i̱ ma̱ lcaa cha' nu lyiji ji'i̱ ma̱; lo'o jua'a̱ tya caja la ñi'ya̱ xtyucua ma̱ ji'i̱ xa' ñati̱ lo'o cua ña'a̱ ca cña tso'o.

⁹ Ndi'ya̱ nchcui' cha' nu nscua lo quityi cusu': Sca ñati̱ nu ndaquiya' tso'o ji'i̱ ycui' Ndyosi, quiña'a̱ tsa cha' xlya'be nda yu ji'i̱ ngu' ti'i tya'a yu; bi' cha' lcaa tyempo tyi'u ti' ngu' ji'i̱ cña tso'o nu ndu'ni yu.

¹⁰ Nda ycui' Ndyosi na cuiñii cataa na, jua'a̱ nda Ni na cacu na; la cui' jua'a̱ ta Ni lcaa na nu lyiji ji'i̱ ma̱ cha' cua'ni ma̱ sca cña tso'o lo'o ñati̱ chalyuu. Lo'o jua'a̱ xtyucua Ni ji'i̱ ma̱ cha' tyu'u scua cha' tso'o nu ndyu'ni ma̱, cha' xqui'ya bi' caca tso'o tyiquee ñati̱.

¹¹ Bi' cha' jua'a̱ ndyaca, cha' cua ndyiji lcaa na ji'i̱ ma̱, ña'a̱ cuayá' taca ta ma̱ cha' xlya'be ji'i̱ xa' ñati̱. Lo'o cua ndye, li' tso'o tsa tya ngu' xlya'be ji'i̱ ycui' Ndyosi xqui'ya msta̱ nu cua nda ma̱, nu tsaa lo'o ya ji'i̱ cha' tyalaa ca su ndi'i̱ ngu' ti'i bi'.

¹² Nu lo'o nda ma̱ na nu xtyucua ji'i̱ ngu' tya'a na ni, li' caja na nu lyiji cha' tyiji̱ yu'u ji'i̱ ngu' bi' chalyuu; jua'a̱ tso'o tsa caca tyiquee ngu' bi'. Lo'o chcui' ngu' lo'o ycui' Ndyosi,

¹³ cua'ni tlyu ngu' ji'i̱ ycui' Ndyosi li'. Taca ña'a̱ ngu' bi' ji'i̱ ma̱, cha' chañi cha' ndaquiya' ma̱ ji'i̱ cha' tso'o nu cua nda Cristo lo'o ma̱; ca cuayá' ti' ngu' cha' bi' lo'o ña'a̱ ngu' cña nu cua ngua'ni ma̱ cha' caja xlya'be ji'i̱ ngu' bi'. Cua'ni chi̱ ngu' loo ycui' Ndyosi li', xqui'ya cha' tso'o tsa nda ma̱ msta̱ ji'i̱ ngu' bi', la cui' ñi'ya̱ nu nda ma̱ ji'i̱ lcaa ñati̱.

¹⁴ Li' chcui' ngu' bi' lo'o ycui' Ndyosi cuentya ji'i̱ ma̱, cha' tso'o tsa ntsu'u tyiquee ngu' ña'a̱ ngu' ji'i̱ ma̱; tyi'u ti' ngu' cha' quiña'a̱ tsa cha' tso'o ndu'ni ycui' Ndyosi lo'o ñati̱ xqui'ya msta̱ nu cua nda ma̱ ji'i̱ ngu' bi'.

¹⁵ Tso'o tsa laca si tya na xlya'be ji'i̱ ycui' Ndyosi lacua, cha' tlyu tsa cha' tso'o laca nu cua nda Ni ji'na, ni nga'aa nchca ca cuayá' ti' na cha' bi'.