2 CORINTIOS 8 - Chatino Tataltepec

Nda ngu' cñi cha' caca msta̱ cuentya ji'i̱ Cristo

^1-2 Cu'ma̱ tya'a ngusñi na cha' ji'i̱ Cristo, juani ta na' sca cha' lo'o ma̱ cuentya ji'i̱ la cui' ngu' tya'a na, nu ñati̱ ji'i̱ Cristo nu ndi'i̱ ca loyuu Macedonia. Tso'o tsa ngua ti' ca ta'a ngu' nu ndi'i̱ tyu̱u̱ quichi̱ su cuentya Macedonia bi'; cua tlyu tsa msta̱ nu nguxti'i̱ ngu' bi', ñi'ya̱ laca si na culiya' tsa ngu'. Masi lye tsa ngua ti' ngu' bi' xqui'ya cha' ti'í nu cua ndyacua ji'i̱ ngu', pana ña'a̱ ti tso'o tsa ntsu'u tyiquee ngu' li'. Lo'o jua'a̱ ngua ji'i̱ ngu' nda ngu' msta̱ bi' xqui'ya cha' quiña'a̱ tsa cha' tso'o ngua'ni ycui' Ndyosi lo'o ngu' jua'a̱ ti, jua'a̱ ngulacua ti' ngu' bi'.

³ Chañi tsa cha' nu ta na' lo'o ma̱ cuentya ji'i̱ ngu' bi': Cha' tso'o ti tyiquee ngu' bi' ni, cua nda ngu' lcaa ña'a̱ nu ngujui ti xi ji'i̱ ngu'; lo'o jua'a̱ tya quiña'a̱ la cñi nda ngu', masi ná ndyu'u scua cñi nu ndyanu ji'i̱ ngu'.

⁴ Hasta ngüijña ngu' chacuayá' ji'i̱ ya cha' ta ngu' msta̱ bi', cha' xtyucua ngu' ji'i̱ xa' la tya'a ñati̱, ngu' nu cua ngusñi cha' ji'i̱ Jesús ca xa' quichi̱ su ntsu'u tsa na nu lyiji ji'i̱ ngu'.

⁵ Ni ná ngulacua ti' ya cha' ta ngu' jua'a̱. Tya clyo ntaja'a̱ ngu' tyucui tyiquee ngu' cha' cua'ni ngu' ñi'ya̱ nu nti' ycui' Ndyosi; lo'o li' nacui̱ ngu' cha' cua'ni ngu' ñi'ya̱ nu nti' ya cha' cua'ni ngu' chacuayá' ji'i̱ ycui' Ndyosi.

⁶ Bi' cha' cua nchcui' ya lo'o yu Tito bi', cha' cua'ni lyiji yu cha' xti'i̱ yu msta̱ nu nda cu'ma̱ cha' tso'o ntsu'u tyiquee ma̱, cha' tya tsubi' la cua nguxana nxti'i̱ yu msta̱ bi'.

⁷ Nu cu'ma̱ ni, tso'o tsa jlya ti' ma̱ ji'i̱ ycui' Ndyosi, tso'o tsa nchca ji'i̱ ma̱ culu'u ma̱ cha' ji'i̱ ycui' Ndyosi ji'i̱ xa' ñati̱, tso'o tsa nchca cuayá' ti' ma̱ ñi'ya̱ ndyu'u sca cha'; na cua nti' tsa ma̱ xtyucua ma̱ ji'i̱ ngu', la cui' jua'a̱ ntsu'u tsa tyiquee ma̱ ña'a̱ ma̱ ji'i̱ ya. Nchca tsa ji'i̱ ma̱ cuentya ji'i̱ lcaa cña, nti' ya; bi' cha' nclyacua ti' ya cha' ná tyiquee' yala tsa cua'ni ma̱ cha' xti'i̱ ma̱ cñi bi'.

⁸ Si'i na nclyo na' cña ji'i̱ ma̱ re; nu lo'o ña'a̱ ma̱ ji'i̱ xa' la ngu' tya'a na, cha' nti' tsa ngu' xtyucua ngu' ji'i̱ tya'a ñati̱ ji'i̱ Cristo, li' taca cua'ni cuayá' ma̱ ji'i̱ ycui' ca ma̱ si chañi ca cha' ntsu'u tyiquee ma̱ ña'a̱ ma̱ ji'i̱ la cui' ngu' tya'a ma̱.

⁹ Cua jlo ti' ma̱ ñi'ya̱ ndu'ni Jesucristo nu Xu'na na, cha' xcui' tso'o tsa ndu'ni Ni lo'o ñati̱. Lcaa na cua ntsu'u ji'i̱ Ni, pana cua ntaja'a̱ Ni ngua Ni sca ñati̱ ti, ñi'ya̱ nti' sca ñati̱ ti'i nu ná sca na ntsu'u ji'i̱ tsiya' ti. Xqui'ya cu'ma̱, bi' cha' ngua'ni Ni jua'a̱, cha' tiya' la li' taca caja lcaa na nu ntsu'u ji'i̱ ycui' Ni ji'i̱ ma̱.

¹⁰ Ndi'ya̱ nti' na', tso'o la si cua'ni ma̱ cha' xcua se'i̱ cña bi' lacua, cha' tya yija̱ na ndyu'ni ma̱ ji'i̱. Si'i la xña cua'ni ti ma̱ ji'i̱; pana xqui'ya cha' ndiya ti' ma̱ ndu'ni ma̱ jua'a̱, bi' cha' ta ma̱ msta̱ bi'.

¹¹ La cui' jua'a̱ cua'ni ma̱ cña bi', ña'a̱ cuayá' nu xcua se'i̱ cña bi'. Tso'o tsa ngua ti' ma̱ nu lo'o nguxana cña bi', lo'o jua'a̱ tso'o si tyucui tyiquee ma̱ cua'ni lyiji ma̱ ji'i̱, tsa ña'a̱ cuayá' cha' tso'o nu ntsu'u ji'i̱ scaa ma̱ ta ma̱ msta̱ bi'.

¹² Si chañi cha' ntsu'u tyiquee ngu' ta ngu' tsa ña'a̱ nu ntsu'u xi ji'i̱ ngu', tso'o ti xñi ycui' Ndyosi msta̱ bi' ji'i̱ ngu', ñi'ya̱ nu nchca ti ji'i̱ ngu' li'; ná nti' Ni cha' ta ngu' msta̱ si ná sca na ntsu'u ji'i̱ ngu'.

¹³ Ná nti' na' cha' lyiji tsa na ji'i̱ ma̱ laja lo'o ta ma̱ cñi, cha' caja na nu lyiji ji'i̱ ngu' ti'i tya'a na.

¹⁴ Laca cha' cua ngujui xi cha' tso'o ji'i̱ ma̱ juani ti, bi' cha' ntsu'u ñi'ya̱ nu taca xtyucua ma̱ ji'i̱ xa' la ngu' tya'a na nu lyiji tsa cha' ji'i̱. Nde loo la li', si lyiji ñi'ya̱ nu tyiji̱ yu'u ji'i̱ ma̱ chalyuu, ná tyiquee' lo'o ngu' bi' taca xtyucua ngu' ji'i̱ cu'ma̱ li', cha' jua'a̱ caca stu'ba cha' ji'i̱ ma̱ lo'o xa' la ngu' tya'a ngusñi na cha' ji'i̱ ycui' Ndyosi.

¹⁵ La cui' jua'a̱ nscua lo quityi ji'i̱ ycui' Ndyosi. Ndi'ya̱ nacui̱: “Masi nteje tacui cuayá' nguxuti'i̱ ngu' na cacu ngu', nga'aa ntyucua la ji'i̱ ngu' tsiya' ti li'; lo'o nu ngu' nu nguxuti'i̱ xti ti cha' bi', nga'aa lyiji ji'i̱ ngu' tsiya' ti lo'o cua ndye cha' li'”.

Sca cha' cuentya ji'i̱ Tito lo'o tya'a ndya'a̱ yu

¹⁶ Tso'o tsa nti' ya lo'o nchcui' ya lo'o ycui' Ndyosi, cha' nu Tito, tya'a ndya'a̱ ya cña bi' ni, nti' tsa yu xtyucua yu ji'i̱ ma̱. Stu'ba ti nti' yu lo'o na' cha' xtyucua ya ji'i̱ cu'ma̱.

¹⁷ Tso'o tsa ntsu'u tyiquee yu ngua'ni yu cña nu cua ni na' ji'i̱ yu; lo'o juani nti' tsa yu xtyucua yu ji'i̱ ma̱, bi' cha' tsaa yu tsaa na'a̱ yu ji'i̱ cu'ma̱ chaca quiya', cha' ji'i̱ ti yu.

¹⁸ Lo'o yu ta ya chaca yu tya'a ntsu'u cha' ji'na lo'o Cristo, cha' ca̱a̱ lo'o Tito ji'i̱ yu ca slo ma̱. Cua laca ndyuloo ma̱ ji'i̱ yu bi', cha' tso'o tsa nchcui' ngu' ji'i̱ yu macala su ndyu'u ti'i̱ ngu' cuentya ji'i̱ Cristo, cha' tso'o tsa nda yu cha' ji'i̱ Cristo lo'o ngu'.

¹⁹ La cui' jua'a̱ nu ñati̱ ji'i̱ Cristo nu ndyu'u ti'i̱ lcaa quichi̱ cua ngusubi ngu' ji'i̱ yu tya'a na bi', cha' tya'a̱ yu lo'o ya, cha' xtyucua yu ji'i̱ ya lo'o ndyu'ni ya cña cha' xti'i̱ ya msta̱ nu nda ngu'. Ndyu'ni ya cña bi' cuentya ji'i̱ nu Xu'na na, cha' jua'a̱ taca cua'ni chi̱ ya loo Ni; lo'o jua'a̱ nti' ya cha' yala ti cua'ni ma̱ cña bi', xqui'ya cha' ndiya ti' ma̱ ndu'ni ma̱ jua'a̱.

²⁰ Li' ná taca chcui' ngu' ji'i̱ ya xqui'ya cha' cua nxti'i̱ ya cñi nu nda ma̱ cha' xlya'be ti bi'.

²¹ Ndube ti' ya ji'i̱ ycui' nu Xu'na na, lo'o jua'a̱ ndube ti' ya ñi'ya̱ nu chcui' ñati̱; bi' cha' nti' ya cha' xcui' lubii ti cua'ni ya lcaa cña bi'.

²² Lo'o jua'a̱ tya nda ya chaca yu tya'a ntsu'u cha' ji'na lo'o Cristo cha' stu'ba ti ca̱a̱ yu lo'o nu xa' ñati̱ ngu' tya'a na bi'. Quiña'a̱ tsa cña cua ngua'ni yu cuentya ji'i̱ nu Xu'na na, bi' cha' jlo ti ya cha' ndiya ti' yu cua'ni yu cña lo'o na. Masi juani tyaca̱' tyijyu' cha' ndyi'u tsa ti' yu ji'i̱ ma̱.

²³ Bi' cha' juani si xcuane ngu' ji'i̱ ma̱ ni cña laca ndya'a̱ Tito, ndi'ya̱ ñacui̱ ma̱ ji'i̱ ngu': Tya'a ndya'a̱ na cña laca yu re. Lo'o jua'a̱ xacui̱ ma̱ cha' ji'i̱ ngu' cha' stu'ba ndyu'ni yu cña lo'o cua cuentya ji'i̱ cu'ma̱. La cui' jua'a̱ si xcuane ngu' ji'i̱ ma̱, ni cña laca nu ndya'a̱ xa' la tya'a ndya'a̱ Tito bi', ndi'ya̱ xacui̱ ma̱ cha' ji'i̱ ngu' li': Ndya'a̱ ngu' bi' cuentya ji'i̱ lcaa latya ngu' xa' quichi̱ nu ndyu'ni tlyu ji'i̱ Cristo, cha' ndu'ni chi̱ ngu' loo Cristo.

²⁴ Bi' cha' chcui' tso'o ma̱ lo'o ngu' bi' lacua, cha' ca cuayá' ti' xa' la ngu' tya'a na cha' chañi cha' ntsu'u tyiquee ma̱ ña'a̱ ma̱ ji'i̱ Tito lo'o tya'a ndya'a̱ yu. Lo'o jua'a̱ tso'o tsa nti' ya lo'o ña'a̱ ya ñi'ya̱ nu ndyu'ni ma̱ lo'o ngu' bi'. Ca tiya' la li' caja cha' bi' ji'i̱ lcaa taju ñati̱ nu cuentya ji'i̱ Cristo bi'.