2 CORINTIOS 6 - Chatino Tataltepec

¹ Ngu' tya'a ndyu'ni na cña ji'i̱ ycui' Ndyosi laca ma̱; bi' cha' nchcui' tsa ya lo'o cu'ma̱, cha' ná culiji ma̱ cha' tso'o jua'a̱ ti, cha' tso'o nu cua nda Ni cha' tyanu ne' cresiya ji'i̱ ma̱. Na cua ngusñi ma̱ cha' bi' tsaca quiya', bi' cha' ña'a̱ ti taquiya' ma̱ ji'i̱ cha' bi' juani.

² Ndi'ya̱ nchcui' sca cha' nu nscua lo quityi ji'i̱ ycui' Ndyosi sa'ni la: Cua nti' tsa na' cha' cua'ni cho'o na' cresiya ji'i̱ ma̱, nacui̱ ycui' Ndyosi, bi' cha' ntucuá na' cha' ji'i̱ ma̱ lo'o nchcui' ma̱ lo'u̱. Cua nti' na' cha' cua'ni lyaá na' ji'i̱ ma̱, bi' cha' nguxtyucua tsa na' ji'i̱ ma̱. Jua'a̱ nacui̱ ycui' Ndyosi. Lo'o nu juani cua laca tyempo cha' cua'ni cho'o Ni cresiya ji'i̱ ma̱, juani cua laca la cui' tyempo cha' cua'ni lyaá ycui' Ndyosi ji'i̱ ma̱ ji'i̱ nu cuxi.

³ Ná nti' ya cha' xtyí lo'o ngu' ji'i̱ ya xqui'ya cña nu ndyu'ni ya, cha' lo'o ji'i̱ ycui' Ndyosi xtyí lo'o ngu' bi' li'; bi' cha' ná ta ya chacuayá' cha' tyu'u tucua sca cha' cuxi, nu xqui'ya bi' taca chcui' ngu' ji'i̱ ya.

⁴ Tso'o la nti' ya si caca cuayá' ti' ngu' cha' ndya'a̱ ya lo cña ji'i̱ ycui' Ndyosi, nu lo'o ña'a̱ ngu' cña nu ndyu'ni ya cuentya ji'i̱ Ni. Ndalo tsa ya ji'i̱ cha' ti'í nu ndu'ni ngu' lo'o ya, masi ntsu'u tsa na nu lyiji ji'i̱ ya, masi ntsu'u tsa cha' tucui nu ndyaca ji'i̱ ya.

⁵ Cua ngujui'i̱ juata ngu' ji'i̱ ya, jua'a̱ cua ngusu'ba ngu' ji'i̱ ya ne' chcua̱; cua ndyu'u ti'i̱ tsa tlyu ti ñati̱ ca slo ya cha' cua'ni lya' ti' ngu' ji'i̱ ya; lo'o jua'a̱ ntsu'u quiya' nteje tacui ya cuayá' cña nu ndyu'ni ya, ntsu'u quiya' ná nchca caja' ya, ntsu'u quiya' nu lye tsa ntyute' ya.

⁶ Pana ndi'ya̱ ca cuayá' ti' ngu' cha' cña ji'i̱ ycui' Ndyosi laca nu ndya'a̱ ya lo'o: na cua ngua lubii cresiya ji'i̱ ya cuentya ji'i̱ ycui' Ni; liñi tsa nchca cuayá' ti' ya cha' ji'i̱ Ni; ndalo tsa tyiquee ya ña'a̱ ya ji'i̱ ngu', cha' ndyanu Xtyi'i ycui' Ndyosi ne' cresiya ji'i̱ ya, lo'o jua'a̱ chañi cha' ntsu'u tsa tyiquee ya ña'a̱ ya ji'i̱ tya'a ñati̱ ya;

⁷ liñi tsa cha' ji'i̱ ycui' Ndyosi nu nchcui' ya lo'o ñati̱, lo'o jua'a̱ tyucui chacuayá' ji'i̱ ycui' Ndyosi nda Ni nu ndya'a̱ lo'o ya. Bi' cha' nu lo'o ña'a̱ ngu' lcaa cha' nu ndyaca ji'i̱ ya, li' taca ca cuayá' ti' ngu' cha' cña ji'i̱ ycui' Ndyosi laca nu ndya'a̱ ya lo'o. Na cua ngua tso'o cresiya ji'i̱ ya juani cuentya ji'i̱ ycui' Ni, bi' cha' cua ngujui juersa ji'i̱ ya cha' taca xu̱u̱ tya'a ya lo'o nu xña'a̱; jua'a̱ taca cua'a ya ji'i̱ nu bi', cha' ná cua'ni ñu'u̱ nu bi' ji'i̱ ya.

⁸ Ntsu'u quiya' nu ndu'ni chi̱ ngu' loo ya; xa' la tyempo, li' nchcui' ngu' cha' ti'í ji'i̱ ya. Nchcui' ngu' cha' tso'o ji'i̱ ya, lo'o jua'a̱ nchcui' ngu' cha' cuxi ji'i̱ ya. Nchcui' ngu' cha' nu cuiñi tsa ya; xa' la tyempo, li' nchcui' ngu' cha' liñi tsa cha' nu nchcui' ya.

⁹ Ntsu'u quiya' ndu'ni ngu' cha' ndyuloo ngu' ji'i̱ ya; xa' la quiya', li' ndu'ni ngu' cha' ná nslo ngu' ji'i̱ ya tsiya' ti. Ntsu'u quiya' ndya'a̱ ya su cua cajaa ti ya nchca, pana ña'a̱ ti tya lu'ú ya; nchcube' tsa ngu' ji'i̱ ya, pana ná nchca cujuii ngu' ji'i̱ ya.

¹⁰ Masi xñi'i̱ tsa ti' ya xqui'ya cha' ti'í nu ndyacua ji'i̱ ya tu'ni, pana ña'a̱ ti chaa ti' ya; ti'i tsa ya tu'ni, pana ndyiji juersa ji'i̱ ya cha' xtyucua ya ji'i̱ tyu̱u̱ tya'a ñati̱. Masi ná sca na ntsu'u ji'i̱ ya tsiya' ti lo'o ndi'i̱ ya nde chalyuu; pana ycui' Ndyosi nxtyucua ji'i̱ ya, lcaa na ntsu'u ji'i̱ ya li'.

¹¹ Cu'ma̱ ngu' tya'a na, ngu' Corinto, ntsu'u tsa tyiquee ya ña'a̱ ya ji'i̱ ma̱, bi' cha' cua liñi tsa nchcui' ya lo'o cu'ma̱ lcaa cha' nu ntsu'u tyiquee ya.

¹² Si'i na nga'aa nti' ya xtyucua ya ji'i̱ ma̱, la cui' cu'ma̱ laca nu lqui'ya tsa ntaja'a̱ ma̱ xtyucua ma̱ ji'i̱ ya;

¹³ bi' cha' juani tya'na tsa nchcui' na' lo'o cu'ma̱. Ndi'ya̱ nti' na' chcui' na' lo'o cu'ma̱, ñi'ya̱ nchcui' ngu' lo'o sñi' ngu': Cui'ya ma̱ cha' clyu ti' ji'i̱ ya, tyucui tyiquee ma̱ cua'ni cho'o ma̱ tyiquee ma̱ ña'a̱ ma̱ ji'i̱ ya.

Tyaca'a tsa na ji'i̱ ycui' Ndyosi nu lu'ú ca

¹⁴ Ná clyana ma̱ ñi'ya̱ caca quiñi cha' ji'i̱ ma̱ lo'o ñati̱ nu ná ntsu'u cha' ji'i̱ lo'o ycui' Ndyosi, ná cua'ni tya'a ma̱ lo'o ñati̱ bi' tsiya' ti. Ná taca ca stu'ba cha' ji'i̱ ma̱ lo'o ngu' bi', cha' nu ñati̱ nu cua ngua lubii cresiya ji'i̱ cuentya ji'i̱ ycui' Ndyosi ni, ná taca cua'ni tya'a ngu' lo'o ñati̱ nu ná ndaquiya' ji'i̱ Ni tsiya' ti; lo'o jua'a̱ ñati̱ nu ntsu'u xee ji'i̱ ycui' Ndyosi ne' cresiya ji'i̱, ná taca ca stu'ba cha' ji'i̱ ngu' bi' lo'o ñati̱ nu ndiya la ti' chalyuu talya.

¹⁵ Ná taca tsiya' ti ca stu'ba cha' ji'i̱ Cristo lo'o Satanás; lo'o jua'a̱ ñati̱ nu cua ngusñi cha' ji'i̱ Cristo ni, ná taca cua'ni tya'a ngu' lo'o ñati̱ nu ná ntaja'a̱ xñi cha' bi' tsiya' ti.

¹⁶ Ñi'ya̱ nti' cu'ma̱ nu tyaca'a tsa ma̱ ji'i̱ ycui' Ndyosi ni, ná taca cua'ni tya'a ma̱ lo'o xa' ñati̱ nu ngusñi cha' ji'i̱ cua ña'a̱ ca jo'ó; tyaca'a tsa na ji'i̱ ycui' Ndyosi nu lu'ú ca xqui'ya cha' ndyanu Xtyi'i ycui' Ndyosi ne' cresiya ji'na. Ndi'ya̱ nacui̱ ycui' Ndyosi: Tyi'i̱ na' ca slo ñati̱ bi', lo'o jua'a̱ tya'a̱ na' lo'o ñati̱ bi'; caca na' ycui' Ndyosi cuentya ji'i̱ ngu' bi', bi' cha' taca caca ngu' bi' ñati̱ 'na. Jua'a̱ nacui̱ Ni.

¹⁷ Lo'o jua'a̱ nchcui' ycui' nu Xu'na na chaca quiya' lo'o na, nu ngusñi na cha' ji'i̱ Ni. Ndi'ya̱ nacui̱ Ni: Tyu'utsu' ma̱ nde su ndi'i̱ ngu' cuxi; ná cua'ni tya'a ma̱ lo'o nu ngu' cuxi bi', cha' ná tyatí̱ cha' ji'i̱ ma̱ lo'o cha' cuxi nu ndyu'ni ngu' bi'. Li' quiñi cha' 'na lo'o ma̱,

¹⁸ caca na' Sti ma̱; jua'a̱ cu'ma̱ caca ma̱ sñi' na', masi nu cuna'a̱, masi nu qui'yu. Jua'a̱ nacui̱ ycui' Ndyosi nu Xu'na ma̱, nu lcaa tsiya' ti cña nchca ji'i̱ Ni.