2 CORINTIOS 13 - Chatino Tataltepec

Liñi nchcui' Pablo lo'o ngu' lo'o ndye nguscua yu quityi

¹ Cua tya'a ti sna quiya' juani cha' ca̱a̱ na'a̱ na' ji'i̱ cu'ma̱. Ndi'ya̱ cua'ni na juani: Xcui' nga'a̱ cha' cua'ni cuayá' na ji'i̱ ñati̱ cuxi lo'o tucua sna tya'a ñati̱ nu cua na'a̱ ji'i̱ cha' cuxi bi'.

² Bi' laca cha' nu nchcui' na' lo'o lcaa cu'ma̱ ngu' Corinto nu cua ngusñi cha' ji'i̱ Jesucristo, lo'o jua'a̱ nchcui' na' lo'o cu'ma̱ ngu' taju ji'i̱ Jesús ca ndacua nu ngua'ni cha' cuxi tya tsubi' la. Nu lo'o ñaa na' nu ndyaca tyucuaa quiya' ni, cua laca nda na' cha' re lo'o cu'ma̱ li', pana juani lo'o ndi'i̱ na' tyijyu', tya chaca quiya' chcui' na' cha' bi' lo'o ma̱, cha' ni sca ñati̱ nu ndu'ni cha' cuxi ná nga'a̱ cha' clyaá ngu' lo'o ca̱a̱ na' chaca quiya'; cua'ni cuayá' na' ji'i̱ lcaa ngu' bi'.

³ Ca li' caca cuayá' ti' ma̱ cha' ycui' Cristo laca nu nda cha' nu nchcui' na'; lo'o jua'a̱ si'i na xti ti cña nchca ji'i̱ Cristo lo'o xcube' Ni ji'i̱ ma̱, masi lye tsa cua'ni Ni cña cha' chcube' ma̱ li'.

⁴ Chañi tsa cha' ndye juersa ji'i̱ Cristo nu lo'o ndyujuii ngu' ji'i̱, lo'o ngujui'i̱ ca'a̱ ngu' ji'i̱ lo crusi; pana tlyu tsa cña ngua'ni ycui' Ndyosi cuentya ji'i̱ yu, bi' cha' laca cha' ña'a̱ ti tya lu'ú yu juani. Ñi'ya̱ nti' Cristo, cha' ná nguxlyú cha' hichu̱' ñati̱ nu ndyujuii ji'i̱, la cui' jua'a̱ cuare, si'i na lye tsa nclyo ya cña ji'i̱ cu'ma̱ nquicha'; pana juani caca cuayá' ti' ma̱ cha' ña'a̱ ti tya lu'ú ya xi, cha' la cui' chacuayá' ji'i̱ ycui' Ndyosi ndya'a̱ lo'o ya lijya̱ ya, la cui' tya'a chacuayá' nu ntsu'u ji'i̱ Cristo.

⁵ Cua'ni cuayá' ma̱ ji'i̱ ycui' ca ma̱ lacua, cha' ca cuayá' ti' ma̱ si chañi cha' tya ndyanu tyucui cha' ji'i̱ Jesucristo ne' cresiya ji'i̱ ma̱. Nga'a̱ cha' tyi'u ti' ma̱ cha' ndyanu Xtyi'i Jesucristo ne' cresiya ji'i̱ sa scaa ma̱; sca ti si cua ngunu'u̱ cresiya ji'i̱ ma̱ lo'o ycui' Ndyosi tsiya' ti, nga'aa tyanu Ni lo'o ma̱ li'.

⁶ Lo'o jua'a̱ nti' na' cha' caca cuayá' ti' ma̱ cha' ji'i̱ cuare, cha' si'i na ngunu'u̱ cresiya ji'i̱ ya lo'o Ni.

⁷ Lu'ba ti ndijña ya cha' ji'i̱ ycui' Ndyosi, cha' ná ta Ni chacuayá' cha' cua'ni ma̱ xa' la cha' cuxi; na cua nti' ya cha' xtyucua Ni ji'i̱ ma̱ cha' tso'o ti caca tyiquee ma̱. Ná ndube ti' ya, masi ñacui̱ ngu' cha' ná nchca ji'i̱ ya tsiya' ti.

⁸ Ná ntsu'u cha' cua'ni tyaala ya lo'o ma̱ si ña'a̱ ti tya ndyanu tso'o cha' ne' cresiya ji'i̱ ma̱, nu cha' ji'i̱ Jesús nu cua ngusñi ma̱; pana si ndyu'ni ñu'u̱ ca ma̱ ji'i̱ nu cha' ji'i̱ Jesús bi', li' cua'ni tyaala ya lo'o ma̱.

⁹ Si tso'o tsa ndyanu tachaa cha' ji'i̱ ycui' Ndyosi ne' cresiya ji'i̱ ma̱, tso'o tsa nti' ya li', masi xti ti cha' nchca ji'i̱ ycui' ya; bi' cha' ndijña ya cha' ji'i̱ ycui' Ndyosi cuentya ji'i̱ cu'ma̱ lacua, cha' jua'a̱ caca tyucui la ti' tyiquee ma̱ ña'a̱ ma̱ ji'i̱ ycui' Ndyosi.

¹⁰ Lo'o jua'a̱ nscua na' quityi re, masi tyijyu' tsa ndi'i̱ na' cuentya ji'i̱ cu'ma̱, cha' ná caca tyaala na' lo'o cu'ma̱ nu lo'o cua ndyalaa na' ca quichi̱ tyi ma̱. Chañi cha' cua nda ycui' nu Xu'na na chacuayá' 'na, pana ndi'ya̱ ndyu'u cha' bi': cua'ni na' cha' caja ñi'ya̱ tyanu tachaa la cha' bi' ne' cresiya ji'i̱ ma̱; ná ntsu'u chacuayá' 'na cha' cua'ni ñu'u̱ lyiji na' ji'i̱ cu'ma̱.

¹¹ Cu'ma̱ tya'a ngusñi na cha' ji'i̱ Jesucristo, chcui' salya' na' lo'o ma̱ juani, nu lo'o cua tye ti xcua se'i̱ cha' nu nscua na' lo quityi re. Cua'ni lyiji ma̱ ñi'ya̱ nu nga'a̱ cha' cua'ni ma̱ cha' laca ma̱ ñati̱ ji'i̱ ycui' Ndyosi. Cua'a̱ jyaca̱ ma̱ ji'i̱ lcaa cha' nu nda na' lo quityi re. Cua'ni ma̱ cha' caca stu'ba tyiquee ma̱ lo'o xa' ñati̱ tya'a ma̱. Tso'o ti tyi'i̱ ma̱ lo'o lcaa ñati̱. Lo'o li' la cui' ycui' Ndyosi laca nu tyi'i̱ lo'o ma̱ lcaa tsa̱; ntsu'u tsa tyiquee Ni ña'a̱ Ni ji'na, lo'o jua'a̱ ndu'ni Ni cha' ti̱ ti tyi'i̱ tyiquee na.

¹² Chcuicha' ma̱ ji'i̱ tya'a ma̱ tyucui tyiquee ma̱, quityi ma̱ ji'i̱ tya'a ma̱ chacuayá' ji'i̱ Cristo.

¹³ Lcaa ngu' tya'a ngusñi na cha' ji'i̱ ycui' Ndyosi ca nde, cua nti' ngu' ta ngu' xlyo ni'i̱ ji'i̱ lcaa ngu' tya'a ma̱ nu ndi'i̱ cajua.

¹⁴ Lo'o juani nti' tsa na' cha' ná tye cha' stu'ba cha' ji'i̱ lcaa cu'ma̱ cajua lo'o Jesucristo nu Xu'na na, la cui' Ni laca nu quiña'a̱ tsa cha' tso'o ndu'ni lo'o na lcaa tsa̱. Jua'a̱ nti' na' cha' lcaa tsa̱ caca stu'ba cha' ji'i̱ ma̱ lo'o ycui' Ndyosi, la cui' Ni laca nu ntsu'u tsa tyiquee Ni ña'a̱ Ni ji'na. Jua'a̱ nti' na' cha' tyanu Xtyi'i ycui' Ndyosi ne' cresiya ji'i̱ ma̱, la cui' Ni laca nu ndu'ni cha' stu'ba ntsu'u cha' ji'na lo'o Ni, jua'a̱ lo'o xa' la ngu' tya'a ngusñi na cha' ji'i̱ ycui' Ndyosi. Jua'a̱ caca cha' lacua.