2 CORINTIOS 12 - Chatino Tataltepec

Ngulu'uloo ycui' Ndyosi ji'i̱ Pablo laja xcalá yu

¹ Tya nti' cha' chcui' na' la xi cha' ji'i̱ ycui' ca ti na', masi ná tso'o chcui' na' jua'a̱ lo'o xa' ñati̱. Juani ta na' sca cha' lo'o ma̱ ñi'ya̱ nu cua nchcui' xcalá na' tsaca quiya'. Laja xcalá ti na', li' ngulu'uloo ycui' nu Xu'na na 'na, lo'o jua'a̱ nda Ni sca cha' lo'o na' li'.

² Sca ñati̱ nu cua ngusñi cha' ji'i̱ Cristo laca na'; nu juani cua ntsu'u tii jlyacua yija̱ tya lo'o ngua ti' na' cha' ya̱a̱ ycui' Ndyosi ya̱qui'ya Ni 'na, cha' li' ndya'a̱a̱ ca chaca chalyuu nde cua̱ la, ca su ntucua ycui' Ndyosi. Nga'aa jlo ti' na' si chañi cha' ndya'a̱ na' ca ndacua, si laja xcalá ti na' ngulu'uloo ti cha' bi' 'na; sca ti ycui' Ndyosi jlo ti'.

³ Chaca quiya' chcui' na' lo'o cu'ma̱ cha' ná jlo ti' na' si chañi cha' ndyaa lo'o lye ycui' Ndyosi 'na ca chalyuu bi' su tso'o tsa ña'a̱ lcaa na, si na nchcuilo'o ti 'na cha' ndya'a̱ na' ca bi'; sca ti ycui' Ndyosi jlo ti'.

⁴ Ca bi' cua ndyuna na' quiña'a̱ tsa cha'; cua ntsu'u tsa cha' nu ná nchca chcui' na' ji'i̱, jua'a̱ ná caja ñi'ya̱ chcui' ñati̱ chalyuu ji'i̱ cha' bi' tsiya' ti.

⁵ Pana tso'o si chcui' na' xi lo'o ma̱, cha' jua'a̱ ngua 'na tya li'; ná tso'o chcui' na' xa' la cha' cuentya ji'i̱ ycui' ca na', sca ti si chcui' la na' xi ji'i̱ scaa cha' nu ná nda chacuayá' 'na cha' caja juersa 'na su ntucua na' ycui' ti na'.

⁶ Ni si'i na tonto laca na' cha' nchcui' tsa na' ji'i̱ ycui' ca ti na' jua'a̱, cha' liñi laca nu nda na' lo'o ma̱ juani. Pana nga'aa nti' na' chcui' na' quiña'a̱ la cha' lo'o ma̱ juani, cha' ná nti' na' cha' cua'ni chi̱ ngu' loo na' si bilya ña'a̱ ngu' ñi'ya̱ ndyu'ni na', si bilya cuna ngu' cha' nu nda na'; tsa ña'a̱ cuayá' nu ndyuloo ti ngu' 'na, jua'a̱ ti taca cua'ni chi̱ ngu' loo na' nti' na'.

⁷ Lo'o li' nda ycui' Ndyosi chacuayá' cha' caja xi cha' chcube' na', cha' ná lye tsa caca tyucuaa ti' na' lo'o ñati̱ xqui'ya cha' tlyu ca nde cua̱ nu cua na'a̱ na' laja xcalá̱; nda Ni sca lo quicha 'na nu ti'í tsa ndyu'ni lo'o na'. Lo'o jua'a̱ laca bi' ñi'ya̱ laca lo'o ntsu'u na ya' nu xña'a̱ nchcube' ji'na, cha' ti'í tsa ndyu'ni quicha bi' lo'o na', cha' ná caca tyucuaa ti' na' lo'o xa' ñati̱.

⁸ Cua ndya'a sna quiya' nchcui' na' lo'o ycui' Ndyosi; tya'na tsa nchcui' na' lo'o Ni cuentya ji'i̱ quicha bi' cha' tyu'utsu' bi' jna'.

⁹ Pana ndi'ya̱ nacui̱ Ni 'na li': “Tsa bi' ti cha' nga'a̱ cha' tyi'u ti' nu'u̱, cha' xcui' cha' tso'o ndu'ni na' lo'o nu'u̱ jua'a̱ ti. Lye la caca cua'ni na' cña xqui'ya nu'u̱, nu lo'o ná quiña'a̱ tsa juersa ntsu'u ji'i̱ ycui' ca nu'u̱”, nacui̱ Ni jna'. Bi' cha' juani tso'o tsa nti' na' masi ná ndyiji juersa 'na, cha' li' taca tyanu juersa ji'i̱ ycui' Cristo ne' cresiya 'na.

¹⁰ Tso'o nti' na' lacua, masi ná ntsu'u juersa 'na tsiya' ti, masi quiña'a̱ tsa cha' ti'í nchcui' ngu' jna', masi ti'i tsa na', masi lya' tsa ti' ngu' 'na, masi tucui tsa laca cña su ndya'a̱ na' cuentya ji'i̱ Cristo; la cui' tyempo lo'o ná nchca 'na tsiya' ti, la cui' hora bi' tso'o tsa ndyiji juersa 'na xqui'ya Cristo.

Ndube tsa ti' Pablo ñi'ya̱ ndyaca ji'i̱ ngu' Corinto nu ngusñi cha' ji'i̱ Cristo

¹¹ Cu'ma̱ ngua'ni ma̱ lo'o na' cha' nchcui' na' cha' tonto re, pana cu'ma̱ laca nu nga'a̱ cha' chcui' tso'o ma̱ 'na nquicha'. Masi ná sca cha' ndyaca 'na tsiya' ti, si'i na xti la cña nchca 'na lo'o quiña'a̱ la cña nchca ji'i̱ nu ngu' cuiñi bi', masi tyaca'a tsa ndyu'ni ma̱ ji'i̱ ngu'; si'i jua'a̱ ndyu'u cha'.

¹² Cua ndalo tsa na' laja lcaa cha' cuxi nu ngua 'na, cha' ndyu'ni na' cña nu cua nda nu Xu'na na 'na, cha' ndu̱ na' nchcui' na' lo'o cu'ma̱. Cua jlo ti' ma̱ cha' ycui' Ndyosi laca nu cua nda cña bi' 'na nu lo'o cua na'a̱ ma̱ cha' tlyu nu cua ngua'ni Ni ca slo ma̱ xqui'ya na', cha' jua'a̱ cube la ti' ma̱ ji'i̱ ycui' Ndyosi. Ná nchca cua'ni ñati̱ chalyuu cña bi' jua'a̱ ti.

¹³ Tsa bi' ti cha', ná ngüijña na' ji'i̱ cu'ma̱ cha' xtyucua ma̱ 'na, bi' cha' nti' ma̱ cha' chi̱i̱ nti' na' ña'a̱ na' ji'i̱ cu'ma̱; tso'o la ndu'ni na' lo'o ngu' xa' quichi̱, nti' ma̱. Tyu'u xi cha' clyu ti' ji'i̱ ma̱ lo'o na' lacua, cha' ná ndijña na' cha' bi' ji'i̱ cu'ma̱.

¹⁴ Cua tya̱a̱ ti na' ca su ndi'i̱ ma̱ chaca quiya'. Cua tya'a ti sna quiya' cha' ca̱a̱ na' slo ma̱ juani, lo'o ña'a̱ ti ná lijya̱ na' cha' culo na' sca cña tlyu ji'i̱ cu'ma̱. Sca ti nti' na' cha' caca ma̱ ñati̱ ji'i̱ ycui' Ndyosi, ná nti' na' cha' jña na' cñi ji'i̱ ma̱. Ñi'ya̱ nti' na ni, si ntsu'u sñi' na, ycui' ti na ta na caya' lo na laca nu lyiji ji'i̱ sñi' na; si'i sñi' na nu ta caya' lo ycui' na.

¹⁵ Lo'o jua'a̱ na', tso'o tsa nti' na' masi culiji na' lcaa na nu ntsu'u xi 'na, masi tye juersa ji'i̱ ycui' na' tsiya' ti, cha' caja ñi'ya̱ xtyucua na' xi ji'i̱ cu'ma̱. Bi' cha' ná tso'o laca si xti ti ntsu'u tyiquee ma̱ ña'a̱ ma̱ 'na, masi tso'o la ntsu'u tyiquee na' ña'a̱a̱ ji'i̱ cu'ma̱.

¹⁶ Ná quiña'a̱ tsa cñi nguliji ma̱ lo na' li'; pana ña'a̱ ti tya ntsu'u xi ngu' tya'a ma̱ nu nchcui' cha' cua nguñilo'o na' ji'i̱ ma̱ cha' cua'ni na' ngana ji'i̱ ma̱.

¹⁷ ¿Ñi'ya̱ jua'a̱? Ná nda na' ñati̱ lijya̱ ca slo ma̱ cha' cua'ni ngu' ngana ji'i̱ ma̱ cuentya 'na, si'i jua'a̱ nti' na'.

¹⁸ Chañi cha' nchcui' na' lo'o yu Tito bi', cha' tsubi' ti tsaa yu ca su ndi'i̱ ma̱; ndyaa yu lo'o chaca yu tya'a ngusñi na cha' ji'i̱ Jesús bi' li'. Pana si'i Tito laca nu ngua'ni ngana ji'i̱ ma̱; sca ti cuayá' ndyu'ni yu cña ñi'ya̱ nu ndyu'ni na' cña, sca ti cha' ntsu'u tyiquee tyucuaa ya.

¹⁹ Ni si'i xcui' na cua nti' ya cha' tyu'u lubii cha' ji'i̱ ya lo'o cu'ma̱; laca cha' ndube ti' ya cha' ña'a̱ ycui' Ndyosi ji'i̱ ya, bi' cha' tsa lo cua ti cha' nchcui' ya, tsa ña'a̱ cha' nu nti' ycui' Cristo cha' chcui' ya lo'o cu'ma̱. La cui' jua'a̱ lcaa cña nu ndyu'ni ya, na xtyucua ya ji'i̱ ma̱ laca cña bi', cha' ntsu'u tsa tyiquee ya ña'a̱ ya ji'i̱ cu'ma̱ tya'a tso'o na.

²⁰ Quiña'a̱ xi nclyacua ti' na' xqui'ya cu'ma̱ juani. Lo'o tyalaa na' ca su ndi'i̱ ma̱, si quije cha' 'na lo'o ma̱ cha' xa' ña'a̱ ndu'ni ma̱, nga'aa si'i ñi'ya̱ nu ngulu'u na' ji'i̱ ma̱ tya clyo, ¿ñi'ya̱ cua'ni ta na' lo'o ma̱ li'? Ca cuayá' ti' ma̱ cha' taca cua'ni tyaala na' xi lo'o ma̱ li', masi ná ndiya ti' ma̱ cha' cua'ni na' jua'a̱. Ndube ti' na' cha' tya ntsu'u xi ngu' tya'a ma̱ nu ña'a̱ ti nxu̱u̱ tya'a ngu', nu ti'í tsa ti' ngu' ña'a̱ ji'i̱ tya'a ngu', nu ñasi̱' tsa ngu' ña'a̱ ji'i̱ tya'a ngu', nu sca ti ji'i̱ ycui' ca ngu' ndube ti' ngu'; lo'o jua'a̱ nchcui' ca'a̱ ti ngu' ji'i̱ tya'a ngu', cuentyu tsa ti' ngu' lo'o tya'a ngu', ntyucuaa tsa ti' ngu' ndyu'ni ngu' lo'o tya'a ngu'. Lcaa lo cha' cuxi bi' ndyu'ni ngu' cha' ná ndube ti' ngu' tsiya' ti.

²¹ Nu lo'o tyalaa na' chaca quiya' ca slo ma̱ juani ti, si quije cha' jna' cha' jua'a̱ ndu'ni ma̱, ná tyiquee' quiña'a̱ tsa cha' tyuju'u ti' caca 'na cuentya ji'i̱ ycui' Ndyosi nu laca Xu'na na', nu lo'o ña'a̱ na' ji'i̱ cu'ma̱. Xi'ya tsa na' li', ña'a̱ cuayá' xñii hitya cloo na'; xi'ya na' xqui'ya ngu' nu ngua'ni cha' cuxi bi' tya tsubi' la, cha' bilya ca tyuju'u ti' ngu' bi' ji'i̱ cha' suba' nu ngua'ni ngu', cha' ntsu'u tsa cha' cuxi nu ndyu'ni ngu' lo'o tya'a ngu', cha' ná lubii cresiya ji'i̱ ngu' bi' tsiya' ti.