2 CORINTIOS 11 - Chatino Tataltepec

Nu ngu' nu cuiñi ti nclyu'u cha' ji'i̱ Jesús

¹ Lo'o juani tyu'u cha' clyu ti' ji'i̱ ma̱ lo'o na', talo tyiquee ma̱ xi jna', masi cha' tonto ti na' nchcui' tsa na' cha' ji'i̱ ycui' ca ti na'.

² Na tiji̱' tsa ti' na' ña'a̱ na' ji'i̱ cu'ma̱. Ni tyiquee' la cui' jua'a̱ nti' ycui' Ndyosi ña'a̱ Ni ji'i̱ cu'ma̱. Na cua ngüiñi cha' 'na lo'o ycui' Ndyosi cha' ta na' ji'i̱ ma̱ cha' caca ma̱ ñati̱ ji'i̱ Cristo, ñati̱ nu lubii tyiquee, la cui' ñi'ya̱ laca lo'o sca nu cuna'a̱ cuañi' nu caja clyo'o lo'o sca ti nu qui'yu ji'i̱;

³ ndube tsa ti' na' si quiñu'u̱ chca cresiya ji'i̱ ma̱. Tya sa'ni ni, cua nguñilo'o nu cuaña ji'i̱ Eva, cha' tajua' tsa nchcui' nu xña'a̱ bi'. Pana ná nti' na' cha' quiñu'u̱ cha' ji'i̱ ma̱ lo'o Cristo jua'a̱, ná nti' na' cha' ñilo'o nu xña'a ji'i̱ ma̱ xqui'ya xa' ñati̱; juani tso'o tsa cha' tyucui tyiquee ma̱ cua ngusñi ma̱ cha' ji'i̱ ycui' Cristo.

⁴ Ngujui cha' jna' cha' ndi'ya̱ ndu'ni ma̱: tso'o tsa nchcui' ma̱ lo'o cua ña'a̱ ca ñati̱ nu lijya̱ ca slo ma̱, masi xa' ña'a̱ cha' nu nda ngu' cuentya ji'i̱ Jesús, masi ná stu'ba cha' nu nda ngu' bi' lo'o cha' nu cua nda ya lo'o ma̱ tya clyo la. La cui' jua'a̱ nduna ma̱ chaca cha', pana si'i cha' tso'o ji'i̱ Jesús nu ndu'ni lyaá ji'na ji'i̱ nu cuxi nu cua nchcui' ya lo'o ma̱ laca bi'. Bi' cha' laca cha' chaca xtyi'i ndyu'ú ne' cresiya ji'i̱ ma̱ juani, nga'aa si'i Xtyi'i ycui' Ndyosi laca bi'.

⁵ Ni si'i na cuxi la laca cha' nu nchcui' na', si'i na tso'o la cha' nu nchcui' nu xa' ñati̱ bi'; nti' ma̱ jua'a̱, masi cua nguñilo'o ngu' ji'i̱ ma̱ lo'o nchcui' ngu' cha' laca ngu' cña ji'i̱ Cristo.

⁶ Masi ná nchca 'na chcui' liñi na' lo'o ñati̱, nti' ma̱, pana ndye cha' ngua tsa'a̱ tso'o na' cha' ji'i̱ Jesús bi'; lo'o jua'a̱ jlo ti' ma̱ cha' chañi tsa cha' nu nchcui' na' re, cha' tyu̱u̱ quiya' cua na'a̱ ma̱ 'na, lcaa ca cha' nu cua ngua 'na.

⁷ Ná ngusñi na' caya' ji'i̱ ma̱ tsiya' ti nu lo'o ndi'i̱ na' ngulu'u na' cha' tso'o ji'i̱ ycui' Ndyosi ji'i̱ ma̱. Cua ntaja'a̱ na' li' cha' caca ti'í la na' xqui'ya cu'ma̱, cha' caja ñi'ya̱ caca tso'o la tyiquee ycui' cu'ma̱. ¿Ha ná tso'o cha' ngua'ni na' jua'a̱, nti' cu'ma̱?

⁸ Ca ta'a taju ngu' tya'a na nu ngusñi cha' ji'i̱ Jesucristo xa' quichi̱ ni, bi' laca ngu' nu nxtyucua 'na lo'o cñi tyucui tyempo lo'o ngua'ni na' cña ca su ndi'i̱ cu'ma̱; ná ngusñi ti na' caya' ji'i̱ ngu' bi', cha' jua'a̱ ngua nxtyucua na' ji'i̱ ma̱ li'.

⁹ Tyucui tyempo nu lo'o nguti'i̱ na' lo'o cu'ma̱, nu lo'o lyiji cñi 'na, li' ná ngüijña na' ji'i̱ ma̱ cha' xtyucua ma̱ xi 'na; nu ngu' ca tyi Macedonia, tya'a ngusñi na cha' ji'i̱ Cristo, cua ya̱a̱ ya̱lo'o ngu' bi' lcaa na nu nguliji ti xi 'na. Jua'a̱ ngua'ni na' nu ngua li', cha' ná ta na' quiña'a̱ tsa cña ji'i̱ cu'ma̱, ngua ti' na'. La cui' jua'a̱ tya cua'ni la na' tyempo nde loo la, nti' na'.

¹⁰ Tso'o la nti' na' cha' ndyaca jna' jua'a̱. Bi' cha' juani macala su tya'a̱ na' tyucui loyuu su cuentya Grecia, nga'aa nti' na' cha' ta ngu' caya' 'na; cua jlo ti' ma̱ cha' chañi tsa cha' nu nchcui' na' re, xqui'ya cha' laca na' ñati̱ ji'i̱ Cristo.

¹¹ Si'i xqui'ya cha' ná ntsu'u tyiquee na' ña'a̱ na' ji'i̱ ma̱, bi' cha' nchcui' na' jua'a̱; cua jlo ti' ycui' Ndyosi cha' tso'o tsa nti' na' ña'a̱ na' ji'i̱ cu'ma̱.

¹² Lo'o jua'a̱ tya cua'ni la na' ña'a̱ nu ndu'ni ti na' juani, cha' jua'a̱ ná caca chcui' lye nu xa' ñati̱ bi' ji'i̱ ya, lo'o ñacui̱ ngu' cha' ndyu'ni ya cña ñi'ya̱ nu ndu'ni ycui' ngu'.

¹³ Ná chañi cha' ndyu'ni ngu' bi' cña ji'i̱ Cristo; na cuiñi ti ngu' bi', quiña'a̱ tsa cha' cuiñi nda ngu' bi' lo'o ñati̱ macala su ndya'a̱ ngu'. Xa' ña'a̱ xi ndu'ni loo ngu' bi', cha' ñilo'o ngu' ji'i̱ xa' ñati̱ cha' laca ngu' bi' ñati̱ tso'o, cha' ñati̱ nu ndyu'ni cña ji'i̱ Cristo laca ngu' bi'.

¹⁴ Ná tlyu cña laca cha' ndu'ni ngu' bi' jua'a̱, cha' lo'o nu xña'a̱ nu naa Satanás taca ji'i̱ ñilo'o ji'i̱ ñati̱, nu lo'o xa' ña'a̱ cua'ni loo yu ña'a̱ cuayá' nu ca ti' ngu' cha' laca yu sca xca̱ nu ndyu'u tucua lo'o xee ji'i̱ ycui' Ndyosi; pana ná chañi laca cha' bi'.

¹⁵ La cui' jua'a̱ lo'o ngu' nu ndyu'ni cña cuentya ji'i̱ nu xña'a̱ bi'; ná tlyu cña cha' cua'ni ngu' cha' xa' ña'a̱ loo ngu', ña'a̱ cuayá' nu ñilo'o ngu' bi' ji'i̱ xa' la ñati̱ cha' cña ji'i̱ ycui' Ndyosi laca nu ndyu'ni ngu' bi'. Pana nu lo'o tyalaa hora cha' caca cuayá' ji'i̱ ngu' lo'o ycui' Ndyosi, li' chcube' ngu' bi' ñi'ya̱ nu nga'a̱ cha' tyacua ji'i̱ ngu' xqui'ya cña cuxi nu cua ngua'ni ngu' lo'o ya̱a̱ ngu' chalyuu.

Cha' ti'í nu cua ngujui ji'i̱ Pablo lcaa su nguta'a̱ yu

¹⁶ Chaca quiya' chcui' na' lo'o ma̱, cha' ná nga'a̱ cha' chcui' ma̱ cha' nu tonto ti laca na'. Masi jua'a̱ nti' ma̱, cha' tonto laca na', pana ta ma̱ xi chacuayá' 'na chcui' na' xi ji'i̱ lcaa cha' nu cua ngua 'na.

¹⁷ Ná ndiya ti' na' cha' nchcui' na' ji'i̱ cha' bi', cha' si'i cha' nu cua nda ycui' Ndyosi cha' chcui' na' lo'o ñati̱ laca cha' bi', nti' na'. Chañi cha' tonto tsa na', nti' na', si lye tsa chcui' na' cha' ji'i̱ ycui' ca na'.

¹⁸ Pana ná ndube ti' na', chcui' na' xi juani, cha' ntsu'u tsa ngu' nu jua'a̱ nchcui' tsa ngu' cha' caca chi̱ la loo ycui' ca ngu', nti' ngu'; bi' cha' lo'o na' ntsu'u chacuayá' chcui' na' xi, nti' na'.

¹⁹ ¡Nu cu'ma̱ nchca tsa ji'i̱ ma̱! Bi' cha' tso'o tsa ndalo tyiquee ma̱ ji'i̱ ngu' nu tonto ti ndu'ni.

²⁰ Na ndalo tsa tyiquee ma̱ ji'i̱ lcaa ngu' tonto bi', masi lye tsa nclyo ngu' cña ji'i̱ ma̱, masi ndyu'ni ngu' ngana ji'i̱ ma̱, masi ndatsaa tsa ngu' ji'i̱ ma̱ cha' cua'ni ma̱ cha' cuxi, masi ndu'ni tyucuaa tsa ti' ngu' lo'o ma̱, masi lu'ba ti ntyiji'i̱ ngu' saca' ma̱; cua ndalo tsa tyiquee ma̱ ji'i̱ ngu' bi'.

²¹ Lo'o li' nacui̱ ma̱ cha' ná ngulo tso'o ya cña ji'i̱ ma̱. ¡Chañi cha' ná ngua'ni tyaala ya ji'i̱ cu'ma̱ ñi'ya̱ nu ndyu'ni nu ñati̱ bi'! Tso'o lacua, chcui' na' xi cha' ji'i̱ ycui' ca ti na', masi cha' tonto ti ndyu'ni na' jua'a̱; si'i ngu' bi' ti nu ntsu'u chacuayá' chcui' ngu' ji'i̱ ycui' ca ngu'.

²² Laca na' ngu' hebreo stu'ba ti lo'o ngu' bi'; jua'a̱ laca na' ngu' Israel stu'ba ti lo'o ngu' bi', cha' jua'a̱ ndyu'u cha' jna' lo'o jyo'o Abraham stu'ba ti lo'o ngu' bi'.

²³ Nacui̱ ngu' bi', cha' cña ji'i̱ Cristo ndyu'ni ngu'; la cui' cña bi' ndyu'ni na'. Masi tonto ti nchcui' na', pana tso'o la cña nu ndyu'ni na' que cña nu ndyu'ni ngu' bi'; lye la ngua'ni na' cña, lu'ba la ngusu'ba ngu' 'na ne' chcua̱, tyu̱u̱ tsa quiya' cua ngujui'i̱ ngu' juata hichu̱' na', lu'ba ti ndyaca cha' cua cajaa ti na' xqui'ya Cristo.

²⁴ Calaa tyii ntucua caa quiya' ndya'ni ngu' cuxi cuentya ji'i̱ ngu' judío ni, lo'o jua'a̱ ca'yu quiya' ngujui'i̱ ngu' judío 'na tsa lo cua quiya';

²⁵ jua'a̱ sna quiya' ngujui'i̱ ngu' romano yaca hichu̱' na', lo'o jua'a̱ tsaca quiya' ngu̱ ngu' quee 'na cha' ngua ti' ngu' cujuii ngu' 'na. Sna quiya' ngua cuxi ji'i̱ yaca ni'i̱ su ndya'a̱ na', ngüilyu'u bi' nde ne' hitya; lo'o jua'a̱ sna quiya' ngua cha' ndyanu na' nchcuatya ti na' lo hitya sca tsa̱ lo'o sca talya.

²⁶ Quiña'a̱ tsa se'i̱ ndya'a̱ na' tyucui̱i̱ su caca cuxi 'na nquicha': ntsu'u hora ndyacua na' cla'be sta'a̱ lo'o ndyaluu bi'; la cui' jua'a̱ ntsu'u tsa ñati̱ cuaana tyucui̱i̱; masi ngu' judío tya'a na', masi ngu' xa' tsu', ngua ti' ngu' cua'ni cuxi ngu' lo'o na'; la cui' jua'a̱ masi ndya'a̱ na' nde quichi̱ tonu, masi ndya'a̱ na' nde ne' quixi̱', masi ndya'a̱ na' nde lo tyujo'o, ntsu'u tsa cha' cuxi nu ndyacua 'na; lo'o jua'a̱ ntsu'u ngu' nu stu'ba ndya'a̱ lo'o ñati̱ ji'i̱ Jesucristo, pana cha' cuiñi ndyu'ni ngu' bi', cuxi ti ngulacua ti' ngu' ña'a̱ ngu' 'na.

²⁷ Tucui tsa cña nu ndyacua 'na, ti'í tsa cña ndyacua 'na ca su ndya'a̱ na', ña'a̱ cuaya' tyu̱u̱ tsa quiya' ná ngua caja' na'; ntsu'u quiya' ntyute' na', jua'a̱ ntsu'u quiya' nguityi na' hitya, lo'o jua'a̱ ntsu'u tsa̱ nu ná ngujui tsiya' ti na cacu na', ntsu'u tsa̱ lo'o lye tsa nchca tlya' na', la cui' jua'a̱ ná ngujui late' cacu' na'. Lcaa cha' bi' ndyacua 'na ca su ndya'a̱ na'.

²⁸ Lo'o jua'a̱ tya ntsu'u la xi xa' la cha' 'na; lcaa tsa̱ ndube tsa ti' na' ñi'ya̱ ndyaca ji'i̱ lcaa taju ñati̱ nu cuentya ji'i̱ Cristo ca xa' quichi̱, lye tsa nclyacua ti' na' ne' cresiya jna' lo'o ndyi'u ti' na' ji'i̱ ngu' bi'.

²⁹ Lo'o ná ndyiji juersa ji'i̱ scaa ngu' bi', li' caca ñu'u̱ ti' na' cuentya ji'i̱ ngu' bi'; lo'o ndyacua qui'ya ji'i̱ scaa ngu' bi', la cui' jua'a̱ na', xñi'i̱ tsa ti' na' li'.

³⁰ Laja lo'o nchcui' ti na', tso'o si chcui' na' ji'i̱ lcaa cha' nu ná nda chacuayá' cha' caja juersa jna' su ntucua ycui' ti na'.

³¹ Ycui' Ndyosi Sti Jesucristo nu Xu'na na ni, tyucui tyempo nga'a̱ cha' cua'ni tlyu na ji'i̱ Ni: la cui' Ni jlo ti' Ni cha' si'i cha' cuiñi laca nu nda na' lo'o cu'ma̱.

³² Ndi'ya̱ cha' ngua 'na lo'o nguti'i̱ na' ca quichi̱ Damasco: Nu laca xu'na quichi̱ ca jua, cuentya ji'i̱ rey Aretas laca yu cña; lo'o jua'a̱ ngulo yu bi' cña ji'i̱ ngu' policia cha' tsatu̱ ngu' to' lo'o quichi̱ bi' cha' tejeya' ngu' 'na, cha' tyaa lo'o ngu' 'na nde ne' chcua̱ li'.

³³ Pana xa' tyucui̱i̱ ngusñi na' nguta'a̱ na' li'; ya̱a̱ lo'o ngu' tya'a na sca chcubi, cha' chca'a̱ na' nde ne' chcubi bi', lo'o li' ngusu'ba ngu' 'na toni'i̱ ventana cha' ngua'ya ti'i̱ na' nde chu̱' lo'o quichi̱ bi' nde liya'. Jua'a̱ ngua, bi' cha' laca cha' ngulaá na' ji'i̱ xu'na quichi̱ bi'.