2 CORINTIOS 10 - Chatino Tataltepec

Ycui' Ndyosi nda chacuayá' macala su cua'ni Pablo cña

¹ Pablo laca na' nu nchcui' na' lo'o cu'ma̱ juani; tyu'u cha' clyu ti' ji'i̱ ma̱, masi chcui' liñi na' lo'o ma̱. Nacui̱ ngu' cha' ntsi̱i̱ na' lo'o nchcui' na' lo'o ma̱ nu lo'o ndi'i̱ na' slo ma̱, pana tyaala tsa ndu'ni na' lo'o ma̱ nu lo'o nga'a̱ na' tyijyu'; jua'a̱ cha' nda ngu'. Tyi'u ti' ma̱ lacua, cha' xcui' tso'o ti nti' Cristo lo'o ña'a̱ Ni ji'na.

² Nu juani tya'na nchcui' na' lo'o ma̱, cha' ná cua'ni lye ma̱ lo'o na', cha' jua'a̱ ná cua'ni tyaala na' lo'o ma̱ chaca quiya' lo'o tyalaa na' ca su ndi'i̱ ma̱. Taca cua'ni tyaala na' lo'o ñati̱ tu'ni, ñati̱ nu cua nñilo'o ji'i̱ ma̱ cha' cuxi tsa cña ndyu'ni ya.

³ Chañi tsa cha' laca na ñati̱ chalyuu, pana ná ndyu'ni na ngana ji'i̱ ngu' ñi'ya̱ nu ndu'ni xa' ñati̱;

⁴ si'i na nxu̱u̱ tya'a na lo'o ngu' cuxi ñi'ya̱ nu nxu̱u̱ tya'a sca ñati̱ chalyuu. Ycui' Ndyosi ni, nchca tsa ji'i̱ Ni, bi' laca nu stu'ba ti ndu'ni cña lo'o na cha' taca tyiji̱loo na ji'i̱ lcaa cha' cuxi nu nxu̱u̱ lo'o na.

⁵ Ntsu'u cha' tyiji̱loo na ji'i̱ lcaa cha' cuiñi nu nchcui' ngu' ji'i̱ Cristo; jua'a̱ ntsu'u cha' tyiji̱loo na ji'i̱ lcaa cha' cuxi nu tiji̱' tsa ti' ngu' ji'i̱, nu ndaca'a tsa ji'i̱ ngu' cha' ná xñi ngu' cha' ji'i̱ ycui' Ndyosi. Nu lo'o cua nguxtyanu ngu' ji'i̱ lcaa cha' cuxi bi', li' taca cua'ni na cha' taquiya' ngu' ji'i̱ cha' nu ntsu'u ji'i̱ Cristo.

⁶ Bi' cha' lo'o cu'ma̱ ni, nga'a̱ cha' taquiya' lyiji ma̱ lcaa cha' nu ntsu'u ji'i̱ Cristo, cha' tiya' la li' taca culo'o ya ji'i̱ nu xa' la ñati̱ nu ná ntaja'a̱ taquiya' ji'i̱ cha' bi' tsiya' ti.

⁷ Na la xña nchcui' ti ma̱ ji'i̱ ya. Pana tso'o la si culacua xi ti' ma̱ ñi'ya̱ ndyu'u scaa cha' nu liñi ca; nu ñati̱ nu nti' cha' cuentya ji'i̱ Cristo laca ngu' bi' ni, ndu'ni cha' culacua tso'o la xi ti' ngu' bi', cha' caca cuayá' ti' ngu' li', cha' lo'o cuare laca ya cuentya ji'i̱ Cristo.

⁸ Cua nchcui' tsa na' lo'o ma̱ cha' cua nda ycui' nu Xu'na na chacuayá' ji'i̱ ya, nu lo'o ndya'a̱ ya slo cu'ma̱; lo'o jua'a̱ ná nchca tyuju'u ti' na' masi nchcui' na' jua'a̱ lo'o ma̱. Cua lo'o chacuayá' ji'i̱ ycui' Ndyosi ndya'a̱ ya, cha' taca tyatí̱ la ti' tyiquee ma̱ cha' ji'i̱ Ni; si'i na cua'ni ñu'u̱ lyiji ya ji'i̱ ma̱.

⁹ Ná nti' na' cha' ñacui̱ ma̱ cha' na nchcutsi̱i̱ ti na' ji'i̱ ma̱ lo'o quityi nu nscua na' cha' ya̱a̱ slo ma̱.

¹⁰ Nacui̱ ngu': Tonu tsa cha' nu nda nu Pablo bi', tyaala tsa ndu'ni yu lo'o na, nu lo'o ndi'i̱ yu tyijyu'. Nda yu cha' nu lijya̱ ca slo na, nacui̱ ngu' ji'i̱ ma̱, pana ná nchca culo tso'o yu cña ji'na nu lo'o ndi'i̱ yu slo na; ná nduna na tsiya' ti cha' nu nda yu li', nacui̱ ngu' bi' li'.

¹¹ Tso'o si caca cuayá' ti' ngu' bi' lacua, cha' sca ti cuayá' ndyu'u cha' nu nscua ya lo quityi nu lo'o nga'a̱ ya tyijyu', la cui' ñi'ya̱ nu cua'ni ya lo'o ma̱ nu lo'o tyi'i̱ ya ca slo ma̱.

¹² Si'i na caca stu'ba cha' ji'i̱ ya lo'o ñati̱ bi', nti' ya; tyixi tsa ndu'ni ngu' bi' lo'o tya'a ngu', tonto tsa ngu' bi'. Na ña'a̱ cuayá' ngu' bi' ji'i̱ ycui' ca ngu', bi' cha' nti' ngu' cha' tso'o tsa ndyu'ni ycui' ngu'.

¹³ Pana nu cuare ni, ná nti' ya cha' chcui' tso'o ti ngu' ji'i̱ ya cuentya ji'i̱ sca cña nu cua ngua'ni xa' ñati̱; tso'o masi chcui' ngu' ji'i̱ cña nu ndyu'ni ycui' ca ya, cha' ycui' Ndyosi laca nu nda chacuayá' macala su nga'a̱ cha' cua'ni scaa ya cña. Lo'o jua'a̱ nda Ni chacuayá' cha' ndyalaa ya ca slo cu'ma̱, ngu' Corinto.

¹⁴ Bi' cha' lacua, cua lo'o chacuayá' ji'i̱ ycui' Ndyosi ndyaa ya ca slo ma̱ tya clyo, cha' nchcui' ya cha' tso'o nu ntsu'u ji'i̱ Cristo lo'o ma̱; si'i na ntyiji̱loo ya ji'i̱ chacuayá' nu nda Ni ji'i̱ ya bi'.

¹⁵ Ná ntsu'u cha' chcui' ya ji'i̱ cña nu ndyu'ni xa' ñati̱ cuentya ji'i̱ ycui' Ndyosi, chcui' ya ji'i̱ tsa bi' ti cña nu nda Ni chacuayá' cha' cua'ni ycui' ca ya ca slo ma̱. Na cua nti' ya cha' xñi tso'o la ma̱ cha' ji'i̱ ycui' Ndyosi nde loo la, cha' li' quiña'a̱ la cña taca cua'ni ya laja ngu' tya'a ma̱, ñi'ya̱ nu cua nda Ni chacuayá' cha' cua'ni ya.

¹⁶ Lo'o li' xqui'ya cu'ma̱ caja ñi'ya̱ chcui' ya cha' tso'o nu ntsu'u ji'i̱ Cristo lo'o ngu' xa' quichi̱ nu ndi'i̱ tyijyu' la, nde loo la ca su ndi'i̱ cu'ma̱. Bi' cha' lacua, ná ndu'ni cha' chcui' ya cha' ji'i̱ cña nu cua ngua'ni xa' ñati̱ cuentya ji'i̱ Cristo.

¹⁷ Si nga'a̱ cha' chcui' na ji'i̱ sca cha', tso'o la chcui' na ji'i̱ sca cña nu ndyu'ni ycui' Ndyosi lacua.

¹⁸ Si'i na taquiya' tso'o la Ni ji'i̱ ñati̱ nu nchcui' tsa ji'i̱ cña nu ndyu'ni ycui' ca ngu'; nu lo'o tso'o ti nti' Ni ña'a̱ Ni ji'i̱ ñati̱, li' taquiya' Ni ji'i̱ cña nu ndyu'ni ngu' bi'.