1 TIMOTEO 6 - Chatino Tataltepec

¹ Lcaa ñati̱ ji'i̱ Jesucristo nu laca msu nu ngüi'ya ñati̱ ntsu'u cha' cua'ni chi̱ ngu' loo xu'na ngu', masi ti'i̱ tsa cña nu nda xu'na ji'i̱. Li' ná caca chcui' cuxi ngu' ji'i̱ ycui' Ndyosi xqui'ya msu bi', ni ná caca chcui' cuxi ngu' ji'i̱ cha' ji'i̱ Jesucristo nu nclu'u na.

² Ñati̱ nu laca msu nu cua ngüi'ya tya'a ñati̱ ji'i̱ Jesucristo sa'ni la ni, ná tso'o si cua'ni tyixi msu bi' lo'o xu'na ngu', cha' stu'ba ntsu'u tyiquee ngu' lo'o Jesucristo; ntsu'u cha' lye la cua'ni chi̱ msu bi' loo xu'na ngu', tso'o la cua'ni msu bi' cña ji'i̱ xu'na ngu', cha' nu tya'a ngusñi ngu' cha' ji'i̱ Jesús laca ngu' juani, lo'o jua'a̱ ntsu'u tyiquee ngu' ña'a̱ ngu' ji'i̱ tya'a ngu'. Stu'ba ti ngusñi ngu' cha' ji'i̱ Jesucristo, bi' cha' culu'u nu'u̱ cha' bi' ji'i̱ ngu', lo'o jua'a̱ culo nu'u̱ cña ji'i̱ ngu' cha' cua'ni ngu' lcaa lo cha' nu nscua lo quityi re.

Ná culacua tsa ti' na cha' ji'i̱ cñi

³ Liñi tsa cha' ji'i̱ ycui' Jesucristo nu Xu'na na; cua ña'a̱ ca ñati̱ nu nclu'u xi xa' la cha' ji'i̱ ma̱, ná liñi ndyu'ni nu ñati̱ bi', ná ntaja'a̱ ngu' tsiya' ti taquiya' ngu' ji'i̱ cha' liñi bi'.

⁴ Na nclu'u ngu' bi' xa' la cha' xqui'ya cha' ná jlo ti' ngu' bi' tsiya' ti, cha' tyixi tsa tyiquee ngu'. Ná tso'o tyiquee ngu' bi', cha' xcui' na ndiya tsa ti' ngu' xu̱u̱ tya'a ngu' cuentya ji'i̱ scaa cha' nu nchcui' ngu'; ná tso'o cña nu ndu'ni ngu' bi', cha' jua'a̱ caca liye' ti' ngu' ji'i̱ tya'a ngu', lo'o jua'a̱ xu̱u̱ tya'a ngu' bi' li', cha' xcui' cuentyu chcui' ngu' ji'i̱ tya'a ngu', lo'o jua'a̱ sta ngu' qui'ya laja ti ji'i̱ tya'a ngu' li'.

⁵ Lye tsa nchcui' ngu' bi', xqui'ya cha' ná ngusñi tso'o ngu' cha' liñi ji'i̱ ycui' Ndyosi, jua'a̱ nga'aa nclyacua tso'o ti' ngu' bi'; cha' cuiñi ti ndu'ni tlyu ngu' bi' ji'i̱ ycui' Ndyosi cha' caja cñi ji'i̱ ngu', nti' ngu'. Ná tya'a̱ nu'u̱ stu'ba ti lo'o ngu' bi'.

⁶ Chañi cha' ntsu'u xi cha' tso'o nu tyacua ji'na xqui'ya ycui' Ndyosi, si cua'ni tlyu na ji'i̱ Ni tyucui tyiquee na; pana sca ti si nguaala' ti' na lo'o lcaa cha' tso'o nu ntsu'u ji'na nde chalyuu.

⁷ Ná sca na lo'o ji'na nu lo'o ngula na chalyuu, lo'o jua'a̱ ná sca na tyalo'o na lo'o cajaa na.

⁸ Cuayá' ji'na nde chalyuu si ntsu'u na cacu na, si ntsu'u ste' na;

⁹ pana ntsu'u ñati̱ nu nti' tsa cha' caca culiya' ngu'. Ná tso'o cha' bi', cha' li' cua'ni cuayá' nu xña'a̱ ji'i̱ ngu' si caca tyu'u cha' cuxi tyiquee ngu'; tye chalyuu ji'i̱ ngu' li', chcuna' cresiya ji'i̱ ngu'.

¹⁰ Lo'o ntsu'u tsa tyiquee ñati̱ ji'i̱ cñi, bi' laca su̱u̱ quiña'a̱ tsa cha' cuxi. Ntsu'u ñati̱ nu tiji̱' tsa ti' ji'i̱ cñi, bi' cha' cua ngulochu̱' ngu' cha' ji'i̱ nu Xu'na na, cha' nga'aa taquiya' ngu' bi' cha' ji'i̱ Ni. Xñi'i̱ tsa ti' ndi'i̱ ngu' bi' li', cha' nchcube' ngu' ji'i̱ ycui' ca ngu'.

Tya nda Pablo xi cha' lo'o yu Timoteo

¹¹ Lo'o nu'u̱ Timoteo, ñati̱ ji'i̱ ycui' Ndyosi laca nu'u̱, bi' cha' xtyanu nu'u̱ ji'i̱ lcaa cha' cuxi bi'; xcui' cha' liñi cua'ni nu'u̱, cua ña'a̱ ca lo cha' tso'o nu nti' ycui' Ndyosi cha' cua'ni na. Tya nxñi tso'o nu'u̱ cha' ji'i̱ ycui' Ndyosi, jua'a̱ cua'ni nu'u̱ cha' tso'o tsa ntsu'u tyiquee nu'u̱ ña'a̱ nu'u̱ ji'i̱ lcaa ñati̱; talo nu'u̱ masi xcube' ngu' jinu'u̱, jua'a̱ cua'ni tya'na ti' nu'u̱ ji'i̱ ñati̱.

¹² Tyucui tyiquee nu'u̱ cua'ni nu'u̱ cña ji'i̱ ycui' nu Xu'na na, xqui'ya cha' ngusñi tso'o nu'u̱ cha' ji'i̱ Ni. Cua jlo ti' nu'u̱ cha' ná nga'a̱ cha' tye chalyuu jinu'u̱, cha' ngusubi ycui' Ndyosi jinu'u̱, lo'o li' cua nda nu'u̱ cha' lo'o tyu̱u̱ tya'a ñati̱ ñi'ya̱ ngua lo'o ngusñi nu'u̱ cha' ji'i̱ Jesucristo; si'i sca cha' cuaana ti ngua bi'.

¹³ Culo na' cña jinu'u̱ juani chacuayá' ji'i̱ ycui' Ndyosi nu ndu'ni cu'ú ji'i̱ lcaa na lu'ú nu ntsu'u chalyuu; la cui' jua'a̱ culo na' cña jinu'u̱ chacuayá' ji'i̱ Jesucristo nu tso'o tsa nguxacui̱ cha' ji'i̱ Poncio Pilato nu laca loo nu lo'o ngua cuayá' ji'i̱ Jesús. Ná ntsi̱i̱ yu nguxacui̱ yu cha' cuentya ji'i̱ cña nu ndyaca ji'i̱ yu cha' nu sca ti Sñi' ycui' Ndyosi laca yu.

¹⁴ Culo na' cña jinu'u̱ cha' xcui' tso'o ti cua'ni nu'u̱, cha' cua'ni lyiji nu'u̱ lcaa cha' nu nguscua na' lo quityi re, lo'o jua'a̱ ná ta nu'u̱ tyempo nu caja ñi'ya̱ sta ngu' qui'ya jinu'u̱. Na ntajatya na ji'i̱ Jesucristo nu Xu'na na ña'a̱ cuayá' tya̱a̱ Ni chaca quiya',

¹⁵ cha' tsa̱ nu nti' ycui' Ndyosi cha' ca̱a̱ Jesús, li' tyu'u tucua Ni chaca quiya'. Nu ycui' Ndyosi ni, tso'o ntsu'u tyiquee Ni tyucui tyempo, lo'o jua'a̱ ycui' Ni laca loo tsiya' ti; laca Ni rey nu tlyu la, nu Xu'na nu laca loo la.

¹⁶ Ná ntsu'u cha' cajaa ycui' Ndyosi tsiya' ti, ná tye cha' ji'i̱ Ni. Ndubi tsa ña'a̱ xee ca su ntucua ycui' Ndyosi, ni ná ntsu'u ñati̱ nu caca tsaa ca slo Ni jua'a̱ ti xqui'ya xee tlyu bi'. La cui' jua'a̱ ná ntsu'u ñati̱ nu cua na'a̱ ji'i̱ ycui' Ndyosi, cha' ná nchca ña'a̱ ñati̱ ji'i̱ Ni nde chalyuu. Bi' cha' cua'ni chi̱ na loo ycui' Ndyosi lacua, cha' laca Ni nu tlyu la. Jua'a̱ laca cha' tu'ni.

¹⁷ Lo'o jua'a̱ ntsu'u cha' culo nu'u̱ cña ji'i̱ ngu' culiya' tya'a ngusñi ma̱ cha' ji'i̱ Jesús, cha' ná cua'ni tyucuaa ti' ngu' bi' lo'o tya'a ngu'. Ná tso'o si xcui' culacua tsa ti' ngu' bi' ji'i̱ cñi ji'i̱ ngu'; la cui' ti ná culacua tsa ti' ngu' ji'i̱ lcaa cha' tso'o nu ntsu'u ji'i̱ ngu', cha' yala ti ndye cñi ji'na. Tso'o la si cube ti' ngu' bi' ji'i̱ ycui' Ndyosi nu lu'ú ca, cha' cua nda Ni lcaa lo na nu ntsu'u ji'na cha' caca tso'o tyiquee na nde chalyuu.

¹⁸ Culo nu'u̱ cña ji'i̱ ngu' culiya' bi' ndi'ya̱: Xcui' cha' tso'o cua'ni ngu'; cua'ni tya'na ti' ngu' ji'i̱ xa' ñati̱, lo'o jua'a̱ tyi'u ti' ngu' ji'i̱ ngu' ti'i, cha' ta ngu' na nu lyiji ji'i̱ ngu' ti'i bi'.

¹⁹ Jua'a̱ ti caca culiya' ngu' slo ycui' Ndyosi xqui'ya cha' tso'o nu ngua'ni ngu' ca nde, xqui'ya cha' ngusñi ngu' cha' tso'o ji'i̱ ycui' Ni. Ná nga'a̱ cha' tye chalyuu ji'i̱ ngu' bi' li'.

Chaca tya cña nclyo Pablo ji'i̱ yu

²⁰ Lo'o nu'u̱ Timoteo, cua'ni tyaca'a nu'u̱ ji'i̱ cha' nu ntsu'u cha' culu'u nu'u̱ ji'i̱ ñati̱ cuentya ji'i̱ ycui' Ndyosi. Ná taquiya' nu'u̱ tsiya' ti ji'i̱ cha' cuxi nu nchcui' nu ngu' cuiñi bi'. Jlo tsa ti' ycui' ca ngu', jua'a̱ nti' nu ngu' cuiñi bi'; pana ná nda ngu' bi' cuentya tsiya' ti ñi'ya̱ laca sca cha' liñi.

²¹ Ntsu'u ngu' nu jlya ti' cha' cuiñi nu nchcui' ngu' cuiñi bi', pana juani nga'aa ndya'a̱ stu'ba ngu' bi' lo'o ngu' tya'a ngusñi na cha' ji'i̱ ycui' Ndyosi. Ña'a̱ ti cua'ni ycui' Ndyosi cha' tso'o lo'o nu'u̱. Jua'a̱ caca cha' lacua.