1 TIMOTEO 5 - Chatino Tataltepec

Tso'o ti cua'ni na lo'o tya'a ngusñi na cha' ji'i̱ Jesús

¹ Ná cua'ni tyaala nu'u̱ ji'i̱ sca ngu' cusu' si ngua'ni cuxi yu; ta nu'u̱ sca cui̱i̱ lo'o yu ñi'ya̱ lo'o nchcui' na lo'o sti na. La cui' ti cha' lo'o nu ngu' qui'yu cuañi' ni, ta sca cui̱i̱ lo'o ngu' ñi'ya̱ lo'o nclu'u na ji'i̱ tya'a na.

² Lo'o sca ma' cusu' ni, ta sca cui̱i̱ lo'o ma' ñi'ya̱ lo'o nchcui' na lo'o xtya'a̱ na; la cui' ti cha' lo'o nu ngu' cuna'a̱ cuañi' ni, ta sca cui̱i̱ lo'o ngu' ñi'ya̱ lo'o nclu'u na ji'i̱ sca nu cuna'a̱ tya'a na. Pana xcui' lubii ti cresiya jinu'u̱ ña'a̱ nu'u̱ ji'i̱ ngu' bi'.

³ Ntsu'u cha' ña'a̱si̱i̱ ngu' ji'i̱ lcaa ngu' cuna'a̱ ti'i si cua ngujuii nu laca clyo'o ngu', si ndyanu ycui' ti ngu'.

⁴ Si ntsu'u sñi' nu cuna'a̱ ti'i, masi sca sñi' ste', ntsu'u cha' ña'a̱si̱i̱ ngu' bi' ji'i̱ xtya'a̱ ngu' li'; nga'a̱ cha' ca tsa'a̱ sñi' ngu' cha' ña'a̱si̱i̱ ngu' ji'i̱ ngu' cusu' ji'i̱, ñi'ya̱ lo'o nguna'a̱si̱i̱ ngu' cusu' bi' ji'i̱ sñi' ngu' lo'o ngua cuañi' ngu'. Bi' laca cña nu ndacui ji'i̱ ngu' cuañi' cha' cua'ni ngu' cuentya ji'i̱ ngu' cusu' ji'i̱, cha' tso'o ntsu'u tyiquee ycui' Ndyosi lo'o ña'a̱ Ni ji'i̱ ngu' cuañi' nu ña'a̱si̱i̱ tso'o ji'i̱ ngu' cusu' ji'i̱.

⁵ Sca ti ji'i̱ ycui' Ndyosi ndu̱ ti' ngu' cuna'a̱ ti'i nu chañi cha' ndyanu ycui' ti ngu'; sca ti ycui' Ni xtyucua Ni ji'i̱ ngu' nti' ngu', bi' cha' nchcui' ngu' lo'o ycui' Ndyosi tsa̱ lo'o talya, ndijña ngu' ji'i̱ Ni na ca nu lyiji ji'i̱ ngu'.

⁶ Si'i jua'a̱ ndu'ni nu cuna'a̱ ti'i nu ndyu'ni cua ña'a̱ ca cha', ñi'ya̱ nu nti' ti cresiya ji'i̱ ycui' ngu'; nti' ngu' cha' tso'o ti ndi'i̱ ngu' chalyuu, pana cua tye ti cha' ji'i̱ ngu' bi' cuentya ji'i̱ ycui' Ndyosi.

⁷ Ntsu'u cha' culo nu'u̱ cña ji'i̱ lcaa ngu' bi', cha' ná caca sta xa' la ñati̱ qui'ya ji'i̱ cu'ma̱ ñati̱ ji'i̱ Jesucristo xqui'ya ngu' cuna'a̱ ti'i bi'.

⁸ Ná tso'o ndu'ni ñati̱ nu ná ndube ti' ji'i̱ tya'a, masi ji'i̱ sti ngu', masi ji'i̱ xtya'a̱ ngu', masi ji'i̱ sñi' ngu'; cha' cuiñi nchcui' ngu' lo'o nacui̱ ngu' cha' ngusñi ngu' cha' ji'i̱ Jesucristo si ná ña'a̱si̱i̱ ngu' ji'i̱ tya'a ngu', cha' tso'o la ndyu'ni xa' ñati̱ nu ná ndaquiya' cha' ji'i̱ Jesucristo tsiya' ti.

⁹ Tso'o la scua ngu' cusu' xtañi lcaa nu cuna'a̱ ti'i nu cua ndye snayala yija̱ ji'i̱, ma' cusu' nu sca ti quiya' ngujui clyo'o, nu sca ti lo'o clyo'o ma' nguti'i̱ ma' chalyuu.

¹⁰ Scua ngu' xtañi ma' cusu' nu nchcui' ngu' ji'i̱ cha' tso'o tsa cña ndu'ni ma' cusu' bi': si cua ngua'ni cu'ú tso'o ma' ji'i̱ nu sube; si cua nda ma' su tyi'i̱ ñati̱ nu lijya̱ tyijyu'; si cua nguxtyucua ma' ji'i̱ tya'a ñati̱ ji'i̱ Jesucristo, masi tlyu cña ntsu'u cha' cua'ni ma'; si ngua tya'na ti' ma' ji'i̱ ñati̱ nu quicha ti'. Si jua'a̱ xcui' cña tso'o ndu'ni ma' cusu' bi', scua ngu' xtañi ma' lo quityi bi' lacua.

^11-12 Ná scua ngu' xtañi nu cuna'a̱ cuañi' la nu ndyanu ti'i, cha' ntsu'u quiya' ná talo nu ngu' cuañi' bi'. Pana nu cuna'a̱ nu nscua xtañi lo quityi ni, sca ti cua'ni ngu' cña ji'i̱ Jesucristo nti' ngu', bi' cha' ngüiñi cha' ji'i̱ ngu' lo'o ycui' Ndyosi li'. Ñi'ya̱ caca si tiya' la xa' caja clyo'o nu cuna'a̱ cuañi' bi', lo'o li' nga'aa cua'ni ngu' ñi'ya̱ nu nacui̱ ngu' cha' cua'ni ngu' cuentya ji'i̱ Jesucristo li', jua'a̱ ntsu'u qui'ya ji'i̱ nu cuna'a̱ bi' li'.

¹³ Bi' cha' tso'o la si ná scua ngu' tsiya' ti xtañi nu cuna'a̱ cuañi' nu ndyanu ti'i. Ná tyiquee' xcui' paseya ti tya'a̱ ngu' cuañi' bi' slo ñati̱; pana si jua'a̱ cua'ni ngu', caca taja ngu' cuna'a̱ bi', chcui' tsa ngu' cuentyu ji'i̱ xa' ñati̱ li', masi ji'i̱ tya'a ngu', masi ji'i̱ xa' la ñati̱. Ni si'i sca ti cha' taja nu cuna'a̱ ti'i nu ndu'ni jua'a̱, masi lo'o chcui' tsa ngu' cuna'a̱ bi' lo'o tya'a ngu' lcua ti lo cha' nu ná tso'o cha' chcui' na.

¹⁴ Bi' cha' tso'o la si xa' caja clyo'o nu cuna'a̱ cuañi' nu ndyanu ti'i, nti' na'; caja sñi' ngu' li', ña'a̱si̱i̱ ngu' to' tyi ycui' ngu', cha' ná caja ñi'ya̱ nu sta ngu' qui'ya ji'na xqui'ya nu cuna'a̱ bi'.

¹⁵ Jua'a̱ nta̱' cha' cua'ni ma̱, cha' cua ntsu'u xi ngu' cuna'a̱ cuañi' nu ndyanu ti'i nu cua ngulochu̱' ji'i̱ cha' ji'i̱ ycui' Ndyosi, cha' cua ngusñi ngu' tyucui̱i̱ ji'i̱ Satanás nu xña'a̱ li'.

¹⁶ Culo nu'u̱ cña ji'i̱ ca ta'a ñati̱ ji'i̱ Jesucristo jua, masi ji'i̱ ngu' qui'yu, masi ji'i̱ ngu' cuna'a̱, cha' ña'a̱si̱i̱ ngu' ji'i̱ nu cuna'a̱ ti'i tya'a ngu'; ná xtyanu ngu' ji'i̱ nu cuna'a̱ ti'i tya'a ngu' cha' caca bi' cuentya ji'i̱ taju ñati̱ ji'i̱ Jesucristo. Li' caca xtyucua tyucui taju ngu' bi' ji'i̱ nu cuna'a̱ nu chañi cha' ti'i ngu', nu ngu' cuna'a̱ ti'i nu ná ntsu'u ni sca ñati̱ ji'i̱ cha' xtyucua ji'i̱.

¹⁷ Cua'ni chi̱ ma̱ loo ngu' cusu' nu laca loo ji'i̱ taju ji'i̱ ma̱ si tso'o ti ndu'ni ngu' lo'o ma̱. Lye la cua'ni chi̱ ma̱ loo ngu' cusu' nu nchcui' cha' ji'i̱ ycui' Ndyosi lo'o ma̱, ngu' cusu' nu nclu'u cha' bi' ji'i̱ ma̱. Ta ma̱ caya' ji'i̱ ngu' cusu' bi'.

¹⁸ La cui' ti cha' nscua lo quityi ji'i̱ ycui' Ndyosi nu nchcui' ndi'ya̱: “Ná sca̱' ma̱ tu'ba toro laja lo'o nxatá ni' ji'i̱ trigo cha' tyu'u si'yu; cacu ni' xi, tso'o la li'”, nacui̱ quityi. Xa' nchcui' lo quityi bi' ndi'ya̱: “Liñi ndyu'u cha' xñi ngu' caya' lo cña nu ngua'ni ngu'”, nacui̱ quityi.

¹⁹ Ná tucuá nu'u̱ cha' ji'i̱ ngu' si sta sca ñati̱ qui'ya ji'i̱ sca ngu' cusu' bi'; sca ti si stu'ba ti sta tucua sna tya'a ñati̱ qui'ya bi' ji'i̱ ngu' cusu' bi', li' nga'a̱ cha' tucuá nu'u̱ cha' ji'i̱ ngu'.

²⁰ Si chañi cha' ndyu'ni ngu' cusu' bi' cha' cuxi, li' chcui' nu'u̱ lo'o nu cusu' bi' slo tyucui taju ñati̱ ji'i̱ Jesucristo bi', cha' cube ti' lcaa ngu', cha' ná cua'ni cuxi ngu' jua'a̱.

²¹ Nclyo na' cña bi' jinu'u̱, Timoteo, cha' cua'ni nu'u̱ lcaa cña nu nguscua na' lo quityi re; lo'o jua'a̱ jlo ti' ycui' Ndyosi cha' nu nguscua na' re, jlo ti' Jesucristo, jlo ti' xca̱ nu ngusubi ycui' Ndyosi ji'i̱. Nu lo'o ntsu'u cha' cua'ni cuayá' nu'u̱ ji'i̱ sca ngu' tya'a ma̱ ni, jatya nu'u̱ xi cha' ca cuayá' tso'o ti' nu'u̱ lcaa lo cha' ji'i̱ ngu' bi', cha' sca ti cuayá' liñi tyu'u cha' ji'i̱ ngu' bi', masi tya'a tso'o nu'u̱, masi chaca tya'a ngu'.

²² Ná yala tsa cua'ni nu'u̱ cha' sta ya' nu'u̱ hichu̱' sca ñati̱, cha' caca yu loo ji'i̱ sca taju ñati̱ ji'i Jesucristo; jatya xi cha' ña'a̱ si chañi cha' ñati̱ nu xcui' ndu'ni cha' tso'o laca yu, si chañi cha' tso'o tsa cña ndyu'ni yu, cha' ná tyanu qui'ya yu hichu̱' nu'u̱ si ntsu'u cha' cuxi ne' cresiya ji'i̱ yu bi'. Lo'o nu'u̱ ni, xcui' lubii ti cresiya jinu'u̱ cua'ni nu'u̱ cña.

²³ Jlo ti' na' cha' quicha xi ti' nu'u̱; bi' cha' nga'aa co'o nu'u̱ xcui' hitya ti, tso'o co'o nu'u̱ xi vino nu ndyu'u lo si'yu losu' cha' caca jo'o ne' nu'u̱.

²⁴ Ntsu'u ñati̱ nu ntsu'u qui'ya ji'i̱, pana jlo ti' xa' ñati̱ ni cha' cuxi ndyu'ni ngu' bi', masi bilya caca cuayá' ji'i̱ ngu' bi'. Lo'o jua'a̱ ntsu'u ñati̱ nu cuxi tyiquee ngu', pana ná jlo ti' xa' ñati̱ ni cha' cuxi ndyu'ni ngu' bi'; lo'o caca cuayá' ji'i̱ ngu' bi', hasta li' ca cuayá' ti' xa' ñati̱ ñi'ya̱ laca qui'ya nu ntsu'u ji'i̱ ngu' bi'.

²⁵ La cui' jua'a̱ lo'o ñati̱ nu tso'o tsa tyiquee, jlo ti' xa' ñati̱ ni cha' tso'o nu ndyu'ni ngu' bi'. Pana si ntsu'u ñati̱ nu tso'o tyiquee, nu ná jlo ti' xa' ñati̱ ji'i̱, ca nde loo la tyu'u tucua cha', ca cuayá' ti' ngu' ji'i̱ cha' tso'o nu ngua'ni ngu' bi' li'.