1 TIMOTEO 4 - Chatino Tataltepec

Tya'a̱chu̱' ngu' ji'i̱ cha' liñi ji'i̱ ycui' Ndyosi ca tiya' la

¹ Xqui'ya Xtyi'i ycui' Ndyosi nchca cuayá' ti' na ñi'ya̱ caca tyempo nde loo la, cha' ntsu'u ñati̱ nu cua ngusñi tyucui̱i̱ ji'i̱ Jesucristo nquicha', lo'o li' tyu'utsu' ngu' bi' tyucui̱i̱ ji'i̱ ycui' nu Xu'na na. Xtyanu ñati̱ bi' ji'i̱ Ni li', cha' cñilo'o cui'i̱ cuxi nu ndu'ni cña cuentya ji'i̱ nu xña'a̱ ji'i̱ ngu'; tyiji̱loo cui'i̱ cuxi bi' ji'i̱ ngu' bi' li'.

² Ntsu'u ngu' nu nchcui' tucua lo cha', nu nga'aa ntyuju'u ti' cha' ngusñi ngu' cha' cuiñi nu nchcui' nu xña'a̱; ji'i̱ ngu' cuiñi bi' cuna xi ngu' tya'a na, tyu'utsu' ngu' ji'i̱ tyucui̱i̱ tso'o li'.

³ Nclu'u ngu' cuiñi bi' cha' ná tso'o caja clyo'o na; nclu'u ngu' cha' ntsu'u tsa na ndacu na nu ná tso'o cacu na, nacui̱ ngu' bi'. Tlyu tsa cha' cuiñi nu nda ngu' bi'. Pana ngüiñá ycui' Ndyosi lcaa na nu ndacu na cha' tso'o ti cacu na ji'i̱, lcaa tya'a na nu ntsu'u cha' ji'na lo'o Jesucristo; bi' cha' tya na xlya'be ji'i̱ ycui' Ndyosi lo'o cua cacu ti na, cha' jlo ti' na cha' tso'o ji'i̱ ycui' Ni.

⁴ Tso'o tsa cña ngua'ni Ni, tso'o ngüiñá Ni lcaa lo na; bi' cha' ná tso'o si xcua̱a̱ na sca cha' tso'o nu ngüiñá Ni. Xñi na lcaa cha' tso'o bi', lo'o li' ndi'ya̱ chcui' na lo'o ycui' Ndyosi: “Tsaa xlya'be jinu'u̱, Ndyosi Sti ya”, ñacui̱ na.

⁵ Jua'a̱ chcui' na lo'o ycui' Ndyosi cha' nda Ni lcaa na nu tso'o cha' cacu na; culacua̱ Ni ji'i̱ lcaa na nu ndacu na li', cha' chacuayá' ji'i̱ ycui' Ndyosi ndacu na ji'i̱.

Ña'a̱ ti cua'ni tso'o nu'u̱ cña ji'i̱ ycui' Ndyosi

⁶ Culu'u nu'u̱ lcaa cha' nu nscua na' lo quityi re ji'i̱ ca ta'a ñati̱ ji'i̱ Jesucristo cajua, cha' caca nu'u̱ sca ñati̱ nu tso'o tsa ndu'ni cña ji'i̱ Jesucristo, Timoteo. Tyi'u tso'o ti' nu'u̱ lcaa cha' liñi nu cua ngusñi nu'u̱, cha' ji'i̱ ycui' Ni; ña'a̱ ti xñi tso'o nu'u̱ tyucui̱i̱ ji'i̱ ycui' nu Xu'na na li', ñi'ya̱ nu ndyu'ni ti nu'u̱.

⁷ Ná taquiya' nu'u̱ ji'i̱ cuentyu nu ná nchcui' cha' liñi ji'i̱ ycui' Ndyosi, cha' cuxi tsa laca cha' bi'. Pana nu'u̱ ni, ntsu'u cha' qui'i̱ nu'u̱ cha' cua'ni nu'u̱ xcui' cña nu ndiya ti' ycui' Ndyosi.

⁸ Tso'o xi cha' ngui'i̱ quiya' na cha' tya'a̱ na, ngui'i̱ ya' na cha' cua'ni na cña; pana tso'o la si qui'i̱ tyiquee na cha' taquiya' na ji'i̱ ycui' Ndyosi lcaa tyempo. Tso'o ti tyi'i̱ na nde chalyuu, nu lo'o cua'ni na cua ña'a̱ ca cña nu nti' nu Xu'na na cha' cua'ni na; la cui' tso'o ti tyi'i̱ na ca slo ycui' Ndyosi, si cua'ni na ñi'ya̱ nu nti' Ni cha' cua'ni na.

⁹ Chañi tsa cha' nu nscua na' nde, jua'a̱ ntsu'u cha' xñi tso'o na cha' bi'.

¹⁰ Jlya ti' na ji'i̱ ycui' Ndyosi nu lu'ú ca; bi' cha' lye cua'ni na cña ji'i̱ Ni, masi lya' tsa ti' ngu' ji'na. Lo'o ycui' Ndyosi ni, cua'ni lyaá Ni ji'i̱ lcaa ñati̱ si taquiya' ngu' ji'i̱ Ni. Lo'o xñi na cha' ji'i̱ Ni, li' ca cuayá' tso'o la ti' na cha' bi'.

¹¹ Culo nu'u̱ cña nu nguscua na' re ji'i̱ lcaa ngu' tya'a ma̱, culu'u tso'o nu'u̱ cha' bi' ji'i̱ ngu'.

¹² Ná ta nu'u̱ chacuayá' xtyí lo'o ngu' jinu'u̱ cha' tya cuañi' nu'u̱, nti' ngu'. Cua'ni nu'u̱ xcui' cña tso'o cha' ña'a̱ lcaa tya'a ñati̱ ji'i̱ Jesucristo; xcui' cha' tso'o chcui' nu'u̱, xcui' cha' tso'o cua'ni nu'u̱, lo'o jua'a̱ tso'o tsa tyu'u tyiquee nu'u̱ ña'a̱ nu'u̱ ji'i̱ xa' la ñati̱. Li' ca cuayá' ti' ngu' cha' tso'o tsa ngusñi nu'u̱ cha' ji'i̱ Jesucristo, xqui'ya cha' xcui' lubii ti cresiya jinu'u̱ ndyu'ni nu'u̱ cña.

¹³ Laja lo'o tya lyiji ti tyalaa na' slo nu'u̱, ña'a̱ ti tya chcui' nu'u̱ lcaa cha' nu nscua lo quityi ji'i̱ ycui' Ndyosi lo'o ngu'; tya chcui' la nu'u̱ ñi'ya̱ laca cha' liñi bi', tya culu'u la nu'u̱ cha' tso'o bi' ji'i̱ ngu' tsa tlyu ti lo'o tyu'u ti'i̱ ngu'.

¹⁴ Na cua nda ycui' Ndyosi tyucui chacuayá' ji'i̱ Ni jinu'u̱ lo'o ngusta ya' ngu' cusu' hique nu'u̱, cha' cua'ni nu'u̱ cña cuentya ji'i̱ ycui' nu Xu'na na. Cua nchcui' ngu' cuentya ji'i̱ Xtyi'i ycui' Ndyosi cha' cua'ni nu'u̱ cña bi'; bi' cha' cui'ya tso'o nu'u̱ cuentya ji'i̱ cha' tso'o nu cua nda ycui' Ndyosi jinu'u̱ tsa̱ bi', cha' talo nu'u̱ ji'i̱ cña nu ntsu'u jinu'u̱.

¹⁵ Lo'o ycui' nu'u̱ ni, cui'ya tso'o nu'u̱ cuentya ji'i̱ lcaa cha' nu nguscua na' nde; li' ña'a̱ ngu' cha' cua ndyaca tsa'a̱ tso'o nu'u̱ cha' caca nu'u̱ loo ji'i̱ ngu'.

¹⁶ Talo nu'u̱ ji'i̱ cña bi'. Cua'a nu'u̱ ji'i̱ ycui' ca cha' xcui' cha' tso'o ti cua'ni nu'u̱. Tso'o ti culu'u nu'u̱ ji'i̱ ngu' tya'a na, cha' jua'a̱ cuna tso'o ngu' cha' nu nclu'u nu'u̱ ji'i̱ ngu', cha' cua'ni lyaá ycui' Ndyosi ji'i̱ ngu' bi' li'. Lo'o jua'a̱ cua'ni lyaá Ni jinu'u̱ li'.