1 TIMOTEO 3 - Chatino Tataltepec

Ñati̱ nu caca loo ji'i̱ tya'a ngusñi na cha' ji'i̱ Jesús

¹ Nga'a̱ cha' jlya tso'o ti' ma̱ cha' liñi nu nchcui' ndi'ya̱: Tso'o tsa si tyaja'a̱ sca ngu' tya'a ma̱ caca loo ji'i̱ ña'a̱ taju ti ma̱ nu ngusñi ma̱ cha' ji'i̱ ycui' Ndyosi, cha' tso'o tsa cuentya ji'i̱ ycui' Ndyosi si nti' sca ñati̱ cua'ni cña bi'.

² Si laca sca ñati̱ loo ji'i̱ ña'a̱ taju tya'a ñati̱ ji'i̱ Jesucristo, li' ntsu'u cha' cua'ni yu xcui' cha' tso'o lo'o ñati̱, cha' ná caja ñi'ya̱ jña ngu' qui'ya ji'i̱ yu li'. Caja clyo'o yu bi' lo'o sca ti nu cuna'a̱; jua'a̱ ntsu'u cha' culacua tso'o ti' yu, cha' cua'a yu ji'i̱ cha' cuxi nu ntsu'u tyiquee ycui' ca yu, cha' tso'o ti tyi'i̱ yu lo'o tya'a ñati̱. Ntsu'u cha' ta yu ni'i̱ ji'i̱ yu lo'o jña ñati̱ nu lijya̱ tyijyu', jua'a̱ ntsu'u cha' ta yu na cacu ngu' bi'. Ntsu'u cha' culu'u yu cha' ji'i̱ ycui' Ndyosi ji'i̱ ñati̱, bi' cha' ná tso'o si ná nchca ji'i̱ yu.

³ Ná caca yu cña bi' si cu'bi yu, si xu̱u̱ tya'a yu lo'o ñati̱; nga'a̱ cha' talo tyiquee yu ji'i̱ tya'a ñati̱ yu, cha' ná caja tya'a cusu̱u̱ yu. Ná tso'o cha' jña yu cñi ji'i̱ tya'a ñati̱, cha' caca culiya' tsa ycui' ca yu.

⁴ Ntsu'u cha' culo tso'o yu bi' cña ji'i̱ ngu' tya'a ndi'i̱ ti yu, cha' jua'a̱ taquiya' sñi' yu cña nu nclyo yu ji'i̱ ngu', cha' cua'ni chi̱ sñi' yu loo yu.

⁵ Ná caca ji'i̱ sca ñati̱ caca loo ji'i̱ taju tya'a ñati̱ ji'i̱ ycui' Ndyosi si ná lo'o culo tso'o yu bi' cña to' tyi yu;

⁶ bi' cha' ná tso'o caca loo sca ñati̱ nu ngusñi ca ti cha' ji'i̱ ycui' Ndyosi, cha' tya lyiji ca tsa'a̱ tso'o yu. Ná tyiquee' lye tsa cua'ni tyucuaa ti' yu ji'i̱ tya'a yu, lo'o li' ntsu'u cha' xcube' ycui' Ndyosi ji'i̱ yu ñi'ya̱ lo'o xcube' Ni ji'i̱ nu xña'a̱.

⁷ Nu ñati̱ nu caca loo bi' ni, tso'o si caca yu sca ñati̱ nu nchcui' ngu' quichi̱ ji'i̱ yu cha' tso'o ti ndu'ni yu, masi ngu' nu ná ndaquiya' cha' ji'i̱ Jesucristo tsiya' ti chcui' ngu' jua'a̱ ji'i̱ yu. Lo'o li' ná caca chcui' ngu' cuentyu ji'i̱ yu bi', ná caca cojolaqui nu xña'a̱ ji'i̱ yu bi', cha' cua'ni yu cha' cuxi.

Ñati̱ nu laca cña ji'i̱ ngu' tya'a ngusñi na cha' ji'i̱ Jesús

⁸ Lo'o jua'a̱ ñati̱ nu laca cña ji'i̱ ngu' tya'a ngusñi na cha' ji'i̱ Jesús ni, lo'o ngu' bi' ntsu'u cha' cua'ni ngu' xcui' cha' tso'o. Ná tso'o si tucua cha' ntsu'u tyiquee ngu' bi' lo'o ndu'ni ngu' cña bi'; ná tso'o si cu'bi ngu' bi', ni ná tso'o si jña ngu' bi' cñi ji'i̱ tya'a ñati̱ cha' caca culiya' tsa ycui' ca ngu'.

⁹ Ntsu'u cha' xñi tso'o ngu' bi' lcaa cha' liñi ji'i̱ ycui' Ndyosi, tya'a cha' nu ngusñi lcaa na, cha' jua'a̱ tyucui tyiquee ngu' cua'ni ngu' xcui' cha' tso'o.

¹⁰ Lo'o jua'a̱ ntsu'u cha' cua'ni cuayá' ma̱ ji'i̱ ñati̱ bi', cha' ña'a̱ ma̱ si xcui' cha' tso'o ndu'ni ngu'. Ñati̱ nu ndu'ni tso'o ni, taca caca ngu' cña ji'i̱ tya'a ngu' cha' xtyucua ngu' ji'i̱ ña'a̱ taju ngu' nu ngusñi cha' ji'i̱ Jesús, cha' cuentya ji'i̱ ycui' Ndyosi cua'ni ngu' bi' cña li'.

¹¹ Lo'o nu ngu' cuna'a̱ ni, ntsu'u cha' cua'ni ngu' xcui' cha' tso'o nu lo'o caca ngu' cña cha' xtyucua ngu' ji'i̱ ña'a̱ taju ngu' nu ngusñi cha' ji'i̱ Jesús; ná tso'o cha' chcui' nu cuna'a̱ bi' cuentyu ji'i̱ tya'a ngu' lo'o xa' ñati̱. Nga'a̱ cha' culacua tso'o ti' nu cuna'a̱ bi', cha' talo ji'i̱ cña nu nda ngu' ji'i̱.

¹² Ñati̱ nu laca cña ji'i̱ ña'a̱ taju ngu' nu ngusñi cha' ji'i̱ Jesús ni, caja clyo'o ñati̱ bi' lo'o sca ti nu cuna'a̱; nga'a̱ cha' culo tso'o ñati̱ bi' cña ji'i̱ sñi' ngu', cha' taquiya' tso'o lcaa ñati̱ nu ndi'i̱ to' tyi ngu' cha' nu chcui' ngu' bi'.

¹³ Lo'o jua'a̱ tso'o tsa chcui' cua ña'a̱ ca ñati̱ ji'i̱ ngu' bi' si tso'o ndu'ni ngu' cha' laca ngu' cña, cha' nxtyucua ngu' ji'i̱ ngu' tya'a na; li' tyatí̱ la ti' ngu' ji'i̱ Jesucristo, lo'o jua'a̱ caca tlyu tyiquee ngu' cha' culu'u ngu' cha' liñi ji'i̱ xa' ñati̱.

Ñi'ya̱ laca cha' ji'i̱ Jesús nu cua ngusñi na

^14-15 Yala ti ca̱a̱ na' slo nu'u̱, nti' na'. Jua'a̱ nta̱', pana ná jlo ti' na' ni jacua' caca 'na, si ntsu'u nu tacu̱' tyucui̱i̱ jna'; bi' cha' juani nscua na' quityi re cha' caca cuayá' la ti' nu'u̱ ñi'ya̱ nga'a̱ cha' cua'ni ñati̱ ji'i̱ Jesucristo lo'o tya'a ngu', ñi'ya̱ nu ntsu'u cha' cua'ni ngu' lo'o ndyu'u ti'i̱ ngu' tsa tlyu ti. Ndu'ni tlyu na ji'i̱ ycui' Ndyosi nu lu'ú ca, lcaa taju na lo'o tya'a na, lo'o jua'a̱ nclu'u lcaa ngu' tya'a na cha' liñi ji'i̱ ycui' nu Xu'na na ji'i̱ xa' ñati̱. Ná tye cha' liñi bi' tsiya' ti nde chalyuu xqui'ya lcaa taju ngu' tya'a na li'.

¹⁶ Chañi cha' tlyu tsa cha' tso'o ji'i̱ Jesucristo nu ngusñi na. Ndi'ya̱ nchcui' cha' bi': Nu ngua sa'ni la ni, ni sca ñati̱ ná ngua cuayá' ti' ñi'ya̱ cua'ni lyaá ycui' Ndyosi ji'i̱ ngu'; pana nu juani jlo ti' na, xqui'ya cha' ngula Jesucristo chalyuu, cha' ngua ycui' Ni sca ñati̱. Lo'o jua'a̱ nchcui' Xtyi'i ycui' Ni cha' ji'i̱ yu, cha' sca ñati̱ nu lubii tsa laca yu; cua na'a̱ xca̱ ji'i̱ ycui' Ndyosi ji'i̱ Jesús, nu ñati̱ lubii bi'. Li' nclyu'u ngu' cha' ji'i̱ Jesucristo bi' ji'i̱ ñati̱ ca quiña'a̱ tsa quichi̱ tyucui ña'a̱ chalyuu; ngusñi ñati̱ lcaa quichi̱ cha' nu nchcui' ngu' ji'i̱ Ni li'. Cua ndyaa Jesús ca slo ycui' Ndyosi Sti na nde cua̱, lo'o juani tlyu tsa laca Jesús cajua.