1 TIMOTEO 2 - Chatino Tataltepec

Ndi'ya̱ cua'ni na lo'o chcui' na lo'o ycui' Ndyosi

¹ Nga'a̱ cha' chcui' na lo'o ycui' Ndyosi cuentya ji'i̱ lcaa ñati̱ chalyuu, nu lo'o jña na cha' ji'i̱ Ni, lcaa cha' nu lyiji ji'i̱ ñati̱; chcui' na cuentya ji'i̱ xa' ñati̱ lo'o nchcui' na lo'o ycui' nu Xu'na na, jua'a̱ lo'o tya na xlya'be ji'i̱ ycui' Ndyosi cuentya ji'i̱ ñati̱.

² Nga'a̱ cha' chcui' na lo'o ycui' Ndyosi cuentya ji'i̱ lcaa ngu' nu laca loo, cuentya ji'i̱ lcaa ngu' nu laca cña; jña ma̱ cha' cua'ni Ni cha' ti̱ ti tyi'i̱ tyiquee na, cha' ná xu̱u̱ tya'a ngu' laca loo bi' lo'o na, cha' ta ngu' bi' chacuayá' cha' cua'ni na lcaa lo cha' tso'o, ñi'ya̱ nu nti' ycui' Ndyosi cha' cua'ni na.

³ Jua'a̱ nti' ycui' Ndyosi nu ndu'ni lyaá ji'na; tso'o nti' Ni si jua'a̱ chcui' na lo'o Ni,

⁴ cha' nti' Ni cha' cua'ni lyaá Ni ji'i̱ lcaa ñati̱ chalyuu, nti' Ni cha' ca cuayá' ti' lcaa ñati̱ ñi'ya̱ nu ntsu'u cha' liñi ji'i̱ ycui' Ndyosi.

⁵ Sca ti ycui' Ndyosi ntsu'u tsiya' ti, lo'o jua'a̱ ntsu'u sca ti ñati̱ nu ndi'i̱ slo ycui' Ni nu nchcui' lo'o Ni cuentya ji'i̱ ñati̱ chalyuu; la cui' Jesucristo laca nu ñati̱ bi'.

⁶ Nda Jesucristo chacuayá' cha' ndyujuii ngu' ji'i̱ yu cua tsubi' la; jua'a̱ nda yu caya' lo qui'ya nu ntsu'u ji'i̱ ñati̱ chalyuu, nu lo'o ngujuii yu lo crusi. Ngua'ni ycui' Ndyosi cña bi' la cui' hora lo'o ngua ti' Ni cha' cua'ni Ni ji'i̱.

⁷ Ngusubi Ni 'na cha' ndya'a na' nda na' cha' tso'o bi' lo'o ñati̱ cuentya ji'i̱ ycui' Ni, cha' lo'o ngu' xa' tsu' ndyuna ngu' cha' tso'o bi' li'; ndya'a na' ngulu'u na' ji'i̱ ngu' ñi'ya̱ caca xñi ngu' cha' ji'i̱ ycui' Ndyosi. Cha' liñi nscua na' nde, si'i cha' cuiñi nchcui' na'.

⁸ Bi' cha' lacua, lcaa se'i̱ su ndyu'u ti'i̱ ngu' nu ntsu'u cha' ji'i̱ lo'o Jesucristo tsa tlyu ti, nti' na' cha' chcui' ngu' lo'o ycui' Ndyosi. Tso'o ti tyiquee ngu' ta ngu' cha' lo'o ycui' Ndyosi li', cha' ná tso'o chcui' ngu' lo'o Ni si ñasi̱' ngu', ni ná tso'o chcui' ngu' lo'o Ni laja lo'o nxu̱u̱ tya'a ngu'.

⁹ Lo'o nu ngu' cuna'a̱ ni, cacu' ngu' ste' tso'o ti, si'i late' nu quiña'a̱ tsa nga'a̱; ná talya' lye ngu' quicha̱' hique ngu', ná cacu' lye ngu' oro ni quee ndubi nu quiña'a̱ tsa nga'a̱, cha' ná tso'o cha' cua'ni tyixi tsa ngu' ji'i̱ ycui' ca ngu' cha' xña'a̱ xa' nu qui'yu ji'i̱ ngu' li';

¹⁰ tso'o la ña'a̱ nu cuna'a̱ nu xcui' cha' tso'o ndu'ni cuentya ji'i̱ ycui' Ndyosi.

¹¹ Nga'a̱ cha' tyi'i̱ ti̱ ti ngu' cuna'a̱ lo'o culu'u ngu' cha' ji'i̱ ycui' Ndyosi laja lo'o ndyu'u ti'i̱ ngu', cha' lo'o ngu' cuna'a̱ bi' ca tsa'a̱ lo'o ngu', cha' lo'o ngu' cuna'a̱ taquiya' ji'i̱ cha' bi'.

¹² Ná ta na' chacuayá' ji'i̱ sca nu cuna'a̱ cha' culu'u cha' ji'i̱ ycui' Ndyosi ji'i̱ tya'a ngu' lo'o ndyu'u ti'i̱ ngu' tsa tlyu ti, cha' ná tso'o si culo nu cuna'a̱ cña ji'i̱ nu qui'yu jua'a̱. Ti̱ ti tyi'i̱ ngu' cuna'a̱ tso'o la.

¹³ Nu ngua tya clyo ni, ngüiñá ycui' Ndyosi ji'i̱ nu qui'yu Adán; tiya' la xi, li' ngüiñá Ni ji'i̱ sca nu cuna'a̱ nu ngua naa Eva.

¹⁴ Lo'o jua'a̱ si'i ji'i̱ jyo'o Adán bi' ngua'ni nu xña'a̱ ngana tyempo bi'; ji'i̱ nu cuna'a̱ ji'i̱ yu ngua'ni bi' ngana, nu lo'o ngua'ni jyo'o Eva bi' cha' cuxi.

¹⁵ Bi' cha' tlyu tsa cña ntsu'u ji'i̱ ngu' cuna'a̱ lo'o cala sñi' ngu' juani; pana cua'ni lyaá ycui' Ndyosi ji'i̱ ngu' cuna'a̱ si xñi tso'o ngu' cha' ji'i̱ Ni, si ntsu'u tyiquee ngu' ña'a̱ ngu' ji'i̱ tya'a ngu'. Cua'ni Ni cha' ca lubii cresiya ji'i̱ ngu' cuna'a̱ bi', si talo ngu' cua'ni ngu' cha' tso'o bi', si nchca ji'i̱ ngu' cuna'a̱ bi' cua'a ji'i̱ ycui' ca ngu' cha' ná ca tyucuaa ti' ngu' ji'i̱ ñati̱.