1 TESALONICENSES 3 - Chatino Tataltepec

^1-2 Lo'o li' nga'aa ndalo ya, xñi'i̱ tsa ti' ya cha' tyijyu' tsa ndi'i̱ ma̱; bi' cha' nda na' ji'i̱ Timoteo ndyaa yu slo ma̱. Tso'o la tyanu na' quichi̱ Atenas ngua ti' na', masi ná lo'o tya'a ndya'a̱ na'. Tya'a na laca nu Timoteo bi' ni, la cui' cña ji'i̱ ycui' Ndyosi ndyu'ni ya; tya'a ndyu'ni ya cña laca yu lo'o nda ya cha' tso'o ji'i̱ Jesucristo lo'o ñati̱. Li' ndyaa nu Timoteo bi' nde slo ma̱ cha' xñi la ti' tyiquee ma̱, cha' caca tlyu la tyiquee ma̱ lo'o ngusñi ma̱ cha' tso'o bi'.

³ Ná nti' ya cha' ca taja ti' ni tsaca ngu' tya'a ma̱, masi lye tsa ndyu'ni lya' ti' ngu' ji'i̱ ma̱; jlo ti' ma̱ cha' jua'a̱ ndyu'ni ngu' lo'o ñati̱ ji'i̱ Jesucristo lcua ti lo quichi̱.

⁴ Lo'o tya nguti'i̱ ya slo ma̱, li' tyu̱u̱ quiya' nda ya cha' lo'o ma̱ ndi'ya̱: “Cua'ni lya' ti' ngu' ji'na”, nacui̱ ya. Lo'o chañi lya' tsa ti' ngu' ji'i̱ ma̱ juani.

⁵ Lo'o ngua cuayá' ti' na' cha' bi', nga'aa ndalo na' li'; xñi'i̱ tsa ti' na' cha' ná jlo ta̱' ñi'ya̱ ndyaca cha' ji'i̱ ma̱. Bi' cha' nda na' ji'i̱ yu tya'a na ñaa yu slo ma̱, cha' ca cuayá' ta̱' si ña'a̱ ti nxñi tso'o ma̱ cha' tso'o ji'i̱ ycui' Ndyosi, si tyiji̱loo ma̱ ji'i̱ nu xña'a̱ nu nti' cha' cua'ni ma̱ cha' cuxi. Cua nguna' cña ji'i̱ ya lo'o ma̱ si ná caca tyiji̱loo ma̱ ji'i̱ nu xña'a̱ bi'.

⁶ Lo'o juani tso'o tsa ntsu'u tyiquee ya xqui'ya cu'ma̱. Cua ndyalaa Timoteo ca nde chaca quiya'; cua ndacha' yu ji'i̱ ya ñi'ya̱ ndyu'ni ma̱, cha' tya ngusñi ma̱ cha' tso'o ji'i̱ ycui' Ni, cha' ntsu'u tsa tyiquee ma̱ ña'a̱ ma̱ ji'i̱ tya'a ma̱ xqui'ya ycui' nu Xu'na na. Nacui̱ yu cha' ndube tsa ti' ma̱ ji'i̱ ya, ndu̱ tsa ti' ma̱ ni jacua' tyacua tya'a na chaca quiya'. Stu'ba ti ntsu'u tyiquee na, ¿ni jacua' tyacua tya'a na lacua?

⁷ Lo'o cua ndyuna ya cha' jua'a̱ ndyaca cha' bi' ji'i̱ ma̱, ngua chaa la ti' ya li', masi lya' tsa ti' ngu' ji'i̱ ya ca nde, masi ndyiji tsa cha' ti'í ji'i̱ ya. Ngusñi tso'o ma̱ cha' bi',

⁸ bi' cha' chaa la ti' ya; nguula la ti' ya xqui'ya cu'ma̱, cha' tlyu tyiquee ma̱ cuentya ji'i̱ ycui' nu Xu'na na.

⁹ Ná nchca tye cha' tya ya xlya'be ji'i̱ ycui' Ndyosi Sti na xqui'ya cu'ma̱, cha' tso'o tsa ntsu'u tyiquee ya xqui'ya cu'ma̱.

¹⁰ Nchcui' ya lo'o ycui' Ndyosi nde tsa̱ lo'o nde talya. Tya'na tsa nchcui' ya lo'o Ni cha' ta Ni chacuayá' ji'i̱ ya cha' tyacua tya'a na chaca quiya', cha' bilya tye culu'u ya ji'i̱ ma̱ lcaa cha' tso'o nu nga'a̱ cha' caca cuayá' ti' ma̱, cha' jua'a̱ xñi tso'o ma̱ cha' ji'i̱ Jesús.

¹¹ Ntajatya ya ji'i̱ ycui' Ndyosi Sti na lo'o ji'i̱ Jesús nu Xu'na na ni jacua' ta Ni chacuayá' tsaa ya ca slo cu'ma̱.

¹² Lo'o jua'a̱ ndijña ya ji'i̱ nu Xu'na na cha' cua'ni Ni cha' tso'o la tyu'u tyiquee ma̱ ña'a̱ ma̱ ji'i̱ tya'a ma̱, lo'o jua'a̱ ji'i̱ lcaa ñati̱, cha' ntsu'u tsa tyiquee ya ña'a̱ ya ji'i̱ cu'ma̱ xqui'ya ycui' Ndyosi;

¹³ ndijña ya cha' cua'ni Ni cha' caca lubii cresiya ji'i̱ ma̱, cha' tyanu tso'o cha' ji'i̱ ycui' Ndyosi ne' cresiya ji'i̱ ma̱. Li' nga'aa ntsu'u cha' sta ycui' Ndyosi Sti na qui'ya ji'i̱ ma̱ tsa̱ bi', nu lo'o ca̱a̱ Jesús nu Xu'na na nde chalyuu chaca quiya'. Ca̱a̱ ycui' nu Xu'na na lo'o lcaa ñati̱ ji'i̱ Ni tsa̱ bi'.