1 TESALONICENSES 2 - Chatino Tataltepec

Cña nu ngua'ni Pablo lo'o nguti'i̱ yu quichi̱ Tesalónica

¹ Cu'ma̱ ngu' tya'a ngusñi na cha' ji'i̱ Jesús, jlo ti' ma̱ cha' ná nguna' cña nu ngua'ni ya lo'o nguti'i̱ ya slo cu'ma̱.

² Cua ngua'ni ycui' Ndyosi cha' tlyu tyiquee ya, cha' ngulu'u ya cha' tso'o nu ntsu'u ji'i̱ ycui' Ndyosi ji'i̱ ma̱ lo'o ngulaa ya slo cu'ma̱, masi lya' tsa ti' ngu' ji'i̱ ya tya tsubi' la ca quichi̱ Filipos. Jlo ti' ma̱ cha' cuxi tsa ngua'ni ngu' bi' lo'o ya li', lo'o jua'a̱ ntsu'u ngu' quichi̱ tyi ma̱ nu cuxi nti' ña'a̱ ngu' ji'i̱ ya.

³ Si'i cha' cuiñi ngulu'u ya ji'i̱ ma̱ nu ngua li', si'i na cuxi tyiquee ya ña'a̱ ya ji'i̱ ma̱, ni si'i na nñilo'o ya ji'i̱ ma̱.

⁴ Cua nda ycui' Ni cha' bi' lo'o ya cha' culu'u ya ji'i̱ ñati̱, bi' cha' liñi nchcui' ya lo'o ngu' nde lcaa quichi̱. Si'i ñati̱ chalyuu laca nu Xu'na na, ycui' Ndyosi laca nu Xu'na na; bi' cha' cuentya ji'i̱ ycui' Ni nclu'u ya cha' tso'o bi' ji'i̱ Ni ji'i̱ lcaa ma̱, cha' jlo ti' Ni lcaa cha' nu ntsu'u ne' cresiya ji'i̱ ya.

⁵ Si'i na tso'o tsa ndyu'ni ya lo'o ma̱ cha' cua'ni ya ngana ji'i̱ ma̱, ni si'i na tso'o tsa nchcui' ya lo'o ma̱ cha' caja cha' tso'o nu ntsu'u ji'i̱ ma̱ ji'i̱ ya. Jlo ti' ycui' Ndyosi cha' xcui' cha' liñi nchcui' ya; lo'o jua'a̱ cu'ma̱, cua ndyuna ma̱ cha' bi'.

⁶ Ná nti' ya cha' cua'ni chi̱ ma̱ loo ya, masi chacuayá' ji'i̱ ycui' Jesucristo ndyalaa ya slo cu'ma̱; si'i na nchcui' tyucuaa ti' ya lo'o ma̱, cha' loo laca ya ji'i̱ ma̱, ni si'i na tyixi ya cha' loo laca ya ji'i̱ xa' ñati̱.

⁷ Pana ñi'ya̱ nu ña'a̱si̱i̱ sca nu cuna'a̱ ji'i̱ sñi', jua'a̱ nguna'a̱si̱i̱ ya ji'i̱ ma̱, nu lo'o nguti'i̱ ya ca slo ma̱ nu ngua li'.

⁸ Ntsu'u tsa tyiquee ya ña'a̱ ya ji'i̱ ma̱, cha' cua nda ya cha' tso'o ji'i̱ ycui' Ndyosi lo'o ma̱; lye tsa nclyacua ti' ya cuentya ji'i̱ ma̱, hasta tso'o ntsu'u tyiquee ya masi cujuii ngu' ji'i̱ ya xqui'ya cu'ma̱.

⁹ Cu'ma̱ ngu' tya'a na, tyi'u ti' ma̱ cha' lye tsa ngua'ni ya cña cha' caja ñi'ya̱ tyiji̱ yu'u ya chalyuu; tsa̱ lo'o talya ngua'ni ya cña lo'o ya' ti ya, cha' ná culiji ma̱ cñi ji'i̱ ma̱ lo ya laja lo'o ngulu'u ya cha' tso'o bi' ji'i̱ ma̱.

¹⁰ Cua na'a̱ ma̱, lo'o jua'a̱ cua na'a̱ ycui' Ndyosi, cha' tso'o ti nguti'i̱ ya slo cu'ma̱ nu ntsu'u cha' ji'i̱ ma̱ lo'o Ni. Ñati̱ lubii laca ya, ná ntsu'u cha' jña ngu' qui'ya ji'i̱ ya li'.

¹¹ Ñi'ya̱ ndu'ni sca ñati̱ lo'o sñi', jua'a̱ ngulu'u ya ji'i̱ ma̱ li': nu lo'o ngua'ni ma̱ cha' tso'o, li' nguxtyucua ya ji'i̱ ma̱; nu lo'o ngua'ni ma̱ cha' cuxi, li' nda ya sca cui̱i̱ lo'o ma̱.

¹² Nguxtyucua ya ji'i̱ ma̱ cha' tyucui tyiquee ma̱ cua'ni ma̱ ña'a̱ cha' tso'o nu nti' ycui' Ndyosi cha' cua'ni na nde chalyuu, cha' jua'a̱ xñi ma̱ cha' ji'i̱ ycui' Ndyosi cha' tsaa ma̱ ca su tlyu su xee tsa su laca Ni loo.

¹³ Lo'o jua'a̱ lcaa hora ndya ya xlya'be ji'i̱ ycui' Ndyosi cuentya ji'i̱ ma̱, xqui'ya cha' nu lo'o ndyuna ma̱ cha' tso'o ji'i̱ ycui' Ndyosi, la cui' cha' nu cua nda ya lo'o ma̱, li' jlya ti' ma̱ cha' bi'. Ngua cuayá' ti' ma̱ cha' laca cha' bi' nu cha' liñi ji'i̱ ycui' Ndyosi, si'i cha' ngua'ya hique sca ñati̱ ti; ngusñi ma̱ cha' bi' li', bi' cha' ndyu'ni ycui' Ndyosi cña ne' cresiya ji'i̱ ma̱.

¹⁴ Ñi'ya̱ nu ngua tya tsubi' la, cha' ngua'ni lya' ti' ngu' judío ji'i̱ ña'a̱ taju ñati̱ tya'a ntsu'u cha' ji'na lo'o Jesucristo ca loyuu su cuentya Judea, jua'a̱ ngua'ni lya' ti' ngu' tya'a quichi̱ tyi ma̱ ji'i̱ cu'ma̱ li'. Cu'ma̱ ngu' tya'a na, la cui' tya'a cha' ti'í ngua ji'i̱ ma̱ ñi'ya̱ nu ngua ji'i̱ ngu' judío tya'a na bi'.

¹⁵ Ñi'ya̱ lo'o ndyujuii ngu' judío cuxi nu nguti'i̱ nu ngua sa'ni la ji'i̱ jyo'o nu ngua tu'ba ji'i̱ ycui' Ndyosi, la cui' jua'a̱ cua ndyujuii nu ngu' judío cuxi bi' ji'i̱ ycui' Jesús nu Xu'na na cua tsubi'. Ca tiya' la li' lo'o ji'i̱ cuare ngulo'o nu ngu' judío bi'. Ná ndiya ti' ycui' Ndyosi cha' ndyu'ni ngu' bi' jua'a̱, cha' nxu̱u̱ tya'a ngu' bi' lo'o lcaa ñati̱.

¹⁶ Ná nda ngu' judío cuxi bi' chacuayá' ji'i̱ ya cha' chcui' ya cha' ji'i̱ Jesucristo lo'o ngu' xa' tsu', cha' cua'ni lyaá Ni ji'i̱ ngu' xa' tsu' bi' li'; bi' cha' jua'a̱ nchca tlyu la qui'ya nu ntsu'u ji'i̱ ngu' judío cuxi bi', ña'a̱ cuayá' nchca ñasi̱' tsa ycui' Ndyosi ji'i̱ ngu' bi'. Ntsu'u cha' xcube' tsa Ni ji'i̱ ngu' bi' nde loo la.

Nti' tsa Pablo tsaa na'a̱ ji'i̱ ngu' chaca quiya'

¹⁷ Masi xa' quichi̱ ndi'i̱ ya juani, nti' ya xtyu̱u̱ ya slo cu'ma̱ tya'a ngusñi na cha' ji'i̱ Jesús; ndyi'u tsa ti' ya ji'i̱ ma̱, masi ná nchca ña'a̱ ya ji'i̱ ma̱, bi' cha' nti' ya tya̱a̱ ya tya̱a̱ na'a̱ ya ji'i̱ ma̱ chaca quiya'.

¹⁸ Tyu̱u̱ quiya' ngua ti' ya ca̱a̱ ya nquicha'. Lo'o na' ni, la cui' Pablo laca na', nti' tsa na' ca̱a̱ na'; pana lcaa quiya' ngua'a Satanás cha' ji'i̱ ya cha' ná ca̱a̱ ya.

¹⁹ Tso'o tsa ntsu'u tyiquee ya xqui'ya cu'ma̱, cha' lo'o cu'ma̱ nscua cha' tyatu̱ ma̱ lo'o ya slo Jesucristo nu Xu'na na lo'o tya̱a̱ Jesús nde chalyuu chaca quiya'. Li' tso'o tsa caca tyiquee Ni ña'a̱ Ni ji'i̱ ya, xqui'ya cha' tso'o tsa ngusñi ma̱ cha' ji'i̱ Ni nu cua nchcui' ya lo'o ma̱.

²⁰ Nchcui' tsa ya lo'o xa' ñati̱ cha' tso'o tsa ndu'ni ma̱, cha' tso'o tsa ntsu'u tyiquee ya xqui'ya cu'ma̱.