1 PEDRO 5 - Chatino Tataltepec

Cui̱i̱ nu nda Pedro lo'o ñati̱ tya'a ngusñi cha' ji'i̱ Jesucristo

¹ Sca ngu' cusu' nu laca loo laca na', lo'o juani nti' na' ta na' sca cui̱i̱ lo'o cu'ma̱ tya'a cusu' na. Lo'o na', cua na'a̱ na' ji'i̱ Cristo lo'o nguxcube' ngu' ji'i̱ yu, bi' cha' jlo ti' na' cha' stu'ba ti tyi'i̱ lcaa tya'a na ca slo ycui' Ndyosi; ña'a̱ na cha' tlyu nu caca li'.

² Ntsu'u cha' ña'a̱si̱i̱ tso'o ma̱ ji'i̱ lcaa ngu' tya'a ma̱, ña'a̱ taju ngu' tya'a ma̱ ca su laca ma̱ loo ji'i̱ ngu'. Ñi'ya̱ nti' xlya', jua'a̱ laca ngu' bi'; ñi'ya̱ nti' ñati̱ nu ña'a̱si̱i̱ ji'i̱ xlya', jua'a̱ laca na, ngu' cusu' tya'a na. Nga'a̱ cha' xtyucua na ji'i̱ ngu' tya'a na cha' tyanu tachaa la cha' ji'i̱ Cristo tyiquee ngu'. Tyucui tyiquee ma̱ cua'ni ma̱ cña bi', cha' jua'a̱ nti' ycui' Ndyosi cha' cua'ni na; ná tso'o si ntsu'u cha' tatsaa ngu' tya'a ma̱ ji'i̱ ma̱ cha' cua'ni ma̱ cña bi'. Lo'o jua'a̱ ná tso'o si quiña'a̱ tsa caya' xñi ma̱ ji'i̱ ngu' cha' cua'ni ma̱ cña bi', pana tso'o la si tyucui tyiquee ma̱ cua'ni ma̱ cña bi' cuentya ji'i̱ ycui' Ndyosi.

³ Ná laca ma̱ xu'na ngu' tya'a ma̱, bi' cha' tso'o ti cua'ni ma̱ slo ngu', cha' taca ca cuayá' ti' xa' la ngu' tya'a ma̱ ñi'ya̱ nu ntsu'u cha' cua'ni ngu'.

⁴ Nu lo'o tyu'u tucua ycui' nu Xu'na na, li' ta Ni na tso'o nu tyacua ji'i̱ ma̱. Ná nga'a̱ cha' tye tsiya' ti na nu ta Ni ji'i̱ lcaa na nu ntsu'u cña ji'na cha' ña'a̱si̱i̱ na ji'i̱ taju ñati̱ ji'i̱ Ni; si'i ñi'ya̱ nti' ngana nu caja ji'na lo'o ndyu'ni na cña nde chalyuu nu yala ti tye bi'.

⁵ Lo'o jua'a̱ cu'ma̱ ngu' cuañi' ni, ta na' sca cui̱i̱ lo'o ma̱. Taquiya' ma̱ ji'i̱ cha' nu nchcui' ngu' cusu' nu laca loo ji'i̱ ma̱. Lo'o jua'a̱ ntsu'u cha' xtyucua ma̱ ji'i̱ tya'a ñati̱ ma̱, cha' ná tso'o cua'ni tyucuaa ti' ma̱ ji'i̱ ngu' bi'. Ndi'ya̱ nscua cha' lo quityi ji'i̱ ycui' Ndyosi: Xu̱u̱ tya'a ycui' Ndyosi lo'o ñati̱ nu ndu'ni tyucuaa ti' ji'i̱ tya'a ñati̱, pana xtyucua tsa Ni ji'i̱ ñati̱ nu xti ti cha' ntsu'u tyiquee ngu' cuentya ji'i̱ ycui' ca ngu'.

⁶ Bi' cha' taquiya' ma̱ ji'i̱ cha' nu nchcui' ycui' Ndyosi nu laca loo tsiya' ti, cha' ná cua'ni tyucuaa ti' ma̱ ji'i̱ tya'a ñati̱ ma̱; cua jlo ti' ycui' Ni ni tsa̱ laca nu lo'o cua'ni Ni cha' caca ma̱ ñati̱ tlyu la.

⁷ Cacha' ma̱ ji'i̱ ycui' Ni lcaa cha' nu nclyacua tsa ti' ma̱ ji'i̱, lo'o li' cua'ni Ni cha' nga'aa cube ti' ma̱ ji'i̱ cha' bi'. Chañi cha' ndube ti' ycui' Ni ña'a̱ Ni ji'i̱ cu'ma̱.

⁸ ¡Tii ti ti' ma̱ tyi'i̱ ma̱ chalyuu! Ná caja' ma̱, cha' tya'a cusu̱u̱ ma̱ laca ycui' nu xña'a̱, lo'o jua'a̱ cacua tsa ndu̱ bi' slo ma̱. Ñi'ya̱ nti' sca cuichi nu tyaala tsa nu nclyana ji'i̱ sca ñati̱ cha' cacu ni', jua'a̱ nti' ndya'a̱ yu'u nu xña'a̱ bi' chalyuu.

⁹ Xñi tso'o ma̱ cha' ji'i̱ ycui' Ndyosi cha' caca nguula ti' tyiquee ma̱; li' ná ta ma̱ chacuayá' tyiji̱loo nu xña'a̱ bi' ji'i̱ ma̱. Jlo ti' na cha' sca ti cuayá' ndyacua cha' ti'í ji'i̱ lcaa tya'a na tyucui ña'a̱ chalyuu.

¹⁰ Pana xti ti tsa̱ tyacua cha' ti'í ji'i̱ ma̱. Lo'o tye tsa̱ nu nchcube' ma̱, li' cua'ni ycui' Ndyosi cha' caca tso'o ma̱, cua'ni Ni cha' caca nguula ti' tyiquee ma̱ chaca quiya'; ta Ni juersa ji'i̱ ma̱, cha' xcui' tso'o tsa ndu'ni ycui' Ni lo'o na. Xqui'ya Cristo cua ngusubi Ni ji'na cha' taca tyi'i̱ na ca su tlyu su ntucua ycui' Ni.

¹¹ Ná nga'a̱ cha' tye tsa̱ nu cua'ni tlyu na ji'i̱ ycui' Ndyosi li', cha' laca Ni loo tsiya' ti. Jua'a̱ caca cha' tu'ni.

Nchcui' salya' Pedro lo'o ngu'

¹² Jlo ti' na' cha' tso'o tsa ngusñi Silvano tya'a na cha' ji'i̱ ycui' nu Xu'na na; yu bi' laca nu nguxtyucua tsa 'na lo'o nguscua ya quityi sube re cha' ca̱a̱ slo cu'ma̱. Nti' na' cha' caca nguula ti' tyiquee ma̱, cha' chañi cha' tlyu tsa cha' tso'o ndu'ni ycui' Ni lo'o na. Jlo ti' na' cha' bi', lo'o jua'a̱ tso'o tsa si lo'o cu'ma̱ tyi'u ti' ma̱ cha' bi', ñi'ya̱ laca lo'o nxtyucua tsa ycui' Ni ji'na lcaa tsa̱.

¹³ Ña'a̱ tsaca taju ñati̱ ji'i̱ Jesucristo nde Babilonia re nda ngu' xlyo ni'i̱ ji'i̱ ma̱. Ngu' tya'a na laca ngu' bi', cha' lo'o tyucui taju ngu' bi', ngusubi ycui' Ndyosi ji'i̱ ngu' cha' caca ngu' ñati̱ ji'i̱ Ni. “Xlyo ni'i̱”, nacui̱ Marcos ji'i̱ cu'ma̱, nu Marcos nu laca ñi'ya̱ nti' sca sñi' na'.

¹⁴ Chcuicha' ma̱ ji'i̱ lcaa ngu' tya'a ma̱; quityi ma̱ ji'i̱ tya'a ma̱ cuentya jna', cha' chañi cha' tso'o ntsu'u tyiquee na ña'a̱ na ji'i̱ tya'a na. Cua'ni Ni cha' ti̱ ti tyi'i̱ cresiya ji'i̱ lcaa cu'ma̱ nu ntsu'u cha' ji'i̱ ma̱ lo'o Cristo.