1 PEDRO 4 - Chatino Tataltepec

Cua'ni na cua ña'a̱ ca cña ji'i̱ ycui' Ndyosi nu nchca ji'na

¹ Lo'o ndyi'u ti' ma̱ cha' nchcube' Cristo nde chalyuu, li' caca nguula la ti' ma̱ cha' talo tyiquee ma̱ lo'o chcube' cu'ma̱; ñi'ya̱ nu ndalo tyiquee ycui' Cristo, jua'a̱ taca talo tyiquee ma̱ lo'o chcube' ma̱ li'. Nga'aa caca cua'ni cha' cuxi ngana ji'i̱ ma̱ si lo'o cu'ma̱ chcube' ma̱ jua'a̱.

² Lo'o li' nu cha' cuxi nu ndiya ti' ñati̱ chalyuu ni, nga'aa si'i cha' bi' nu caca loo ji'i̱ ma̱ lcaa tsa̱ lo'o ndi'i̱ ma̱ chalyuu; xcui' cña nu ndiya ti' ycui' Ndyosi cha' cua'ni ma̱, bi' laca cña nu cua'ni ma̱, cha' sca ti ycui' Ndyosi caca loo ji'i̱ ma̱ li'.

³ Tyempo nu nteje tacui, cua ngua'ni ma̱ lcaa cha' cuxi ñi'ya̱ nu ndiya ti' ñati̱ nu ná ntsu'u cha' ji'i̱ lo'o ycui' Ndyosi tsiya' ti. Cuayá' tsa lo cua ti cha' cuxi: bi' cha' nga'aa cua'ni suba' ma̱ lo'o tya'a ñati̱ ma̱ juani, nga'aa cua'ni ma̱ lcaa lo cha' cuxi nu ndiya ti' ma̱ cua sa'ni la; nga'aa caca cu'bi ma̱, nga'aa tyeje tacui ma̱ cuayá' cacu ma̱, co'o ma̱, ñi'ya̱ nu ndyu'ni ngu' nu ná ndube ti' lo'o ndya'a̱ ngu' bi' ta'a; nga'aa cua'ni tlyu ma̱ ji'i̱ lcui̱ jo'ó, cha' suba' tsa cha' bi' cuentya ji'i̱ ycui' Ndyosi.

⁴ Ngua'ni ma̱ cha' cuxi jua'a̱ cua tsubi' la; lo'o juani nu ñati̱ nu ngua tya'a tso'o ma̱ nquicha', ndube tsa ti' ngu' cha' nga'aa nti' ma̱ cua'ni ma̱ cua ña'a̱ ca cha' cuxi nu ngua'ni ma̱ cua tsubi' la. Ná nchca cuayá' ti' ñati̱ bi' ni cha' laca nga'aa ndu'ni ma̱ jua'a̱, bi' cha' nchcui' ngu' bi' cuentyu ji'i̱ ma̱ juani.

⁵ Pana ná cube ti' ma̱, ntsu'u cha' xacui̱ ngu' bi' cha' ji'i̱ ycui' Ndyosi cuentya ji'i̱ cha' cuxi nu ndu'ni ngu' chalyuu. Cua ngulala ti tyalaa tsa̱ nu cua'ni cuayá' Ni ji'i̱ lcaa ñati̱, masi ngu' jyo'o, masi ngu' nu tya ndi'i̱ chalyuu.

⁶ Lo'o jua'a̱ ngu' nu cua ngujuii, nu cua ndyuna cha' tso'o ji'i̱ Jesucristo, ñati̱ chalyuu ti ngua ngu' bi', bi' cha' ngujuii ngu', ñi'ya̱ nu nscua cha' cajaa lcaa ñati̱; pana cua'ni Xtyi'i ycui' Ndyosi cha' tyu'ú ngu' bi' chaca quiya', cha' caja chalyuu nu ná nga'a̱ cha' tye ji'i̱ ngu' bi', cha' cua ngusñi ngu' cha' ji'i̱ Jesús.

⁷ Cua tye ti cha' ji'i̱ lcaa na nu ntsu'u chalyuu; bi' cha' tso'o la si cua'a ma̱ ji'i̱ ycui' ca ma̱, tii ti ti' ma̱ tyi'i̱ ma̱ chalyuu cha' taca cua'ni ma̱ cña tso'o, cha' lu'ba ti taca chcui' ma̱ lo'o ycui' Ndyosi.

⁸ Nu cha' nu ndulo tsa cha' cua'ni ma̱ ni, bi' laca cha' xcui' tso'o caca tyiquee ma̱ ña'a̱ ma̱ ji'i̱ tya'a ñati̱ ma̱. Lo'o si jua'a̱ nti' na ña'a̱ na ji'i̱ tya'a na, ndyu'ni clyu ti' na ji'i̱ qui'ya nu ntsu'u ji'i̱ tya'a na li'.

⁹ Ta ma̱ xi to' tyi ma̱ su tyi'i̱ tya'a ma̱, lo'o jua'a̱ ta ma̱ na cacu ngu' lo'o tyalaa ngu' bi' slo ma̱; ná chcui' ma̱ cha' ti'í ji'i̱ tya'a ma̱ xqui'ya cha' ndyalaa ngu' slo ma̱.

¹⁰ Nda xlya'be ti ycui' Ndyosi ñi'ya̱ taca cua'ni scaa ma̱ sca cña tso'o, lcaa ma̱ nu ngusñi ma̱ cha' ji'i̱ Jesús. Ñi'ya̱ lo'o nxtyucua ycui' Ndyosi ji'na cha' caca tya'na ti' na ji'i̱ tya'a ñati̱ na, la cui' jua'a̱ nga'a̱ cha' xtyucua na ji'i̱ ngu' lo'o cua'ni na cña nu nda Ni cha' cua'ni sa scaa na.

¹¹ Culu'u ma̱ cha' ji'i̱ ñati̱, si bi' laca cña nu cua nda Ni ji'i̱ ma̱ cha' cua'ni ma̱; culu'u ma̱ tsa ña'a̱ cha' nu nti' ycui' Ndyosi chcui' Ni lo'o ngu'. Lo'o jua'a̱ xtyucua ma̱ ji'i̱ tya'a ñati̱ ma̱ lo'o tyucui juersa nu nda ycui' Ndyosi ji'i̱ ma̱, si bi' laca cña nu cua nda Ni ji'i̱ ma̱ cha' cua'ni ma̱. Nu lo'o ña'a̱ ngu' cña tso'o nu ndyu'ni ma̱ bi', li' cua'ni tlyu ngu' ji'i̱ ycui' Ndyosi xqui'ya Jesucristo. Lo'o li' ná nga'a̱ cha' tye cha' cua'ni tlyu ngu' ji'i̱ Cristo bi', cha' laca Cristo loo tsiya' ti. Jua'a̱ caca cha' tu'ni.

Ntsu'u cha' tyacua cha' ti'í ji'i̱ ñati̱ nu ntsu'u cha' ji'i̱ lo'o Jesucristo

¹² Cu'ma̱ tya'a tso'o na, masi lye tsa cua'ni lya' ti' ñati̱ ji'i̱ ma̱, ñi'ya̱ nti' si ntsu'u ma̱ ndyaqui̱ ma̱ lo quii', ná ntsu'u cha' cube tsa ti' ma̱; ná tso'o si culacua tsa ti' ma̱ li', ñi'ya̱ si ná tso'o tyacua cha' cuxi ji'i̱ ma̱, nti' ma̱. Jua'a̱ li' nchca cuayá' ti' Ni si chañi cha' ntsu'u cha' ji'i̱ ma̱ lo'o Ni, si ná chañi cha' bi'.

¹³ Nga'a̱ cha' caca tso'o tyiquee ma̱ lo'o tyi'u ti' ma̱ cha' ñi'ya̱ ngua lya' ti' ngu' ji'i̱ ycui' Cristo, jua'a̱ ca lya' ti' ngu' ji'i̱ cu'ma̱ juani. Tlyu tsa laca Cristo cuentya ji'i̱ ycui' Ndyosi, lye tsa quiji'i̱ xee ji'i̱ Ni lo'o ca̱a̱ ycui' Cristo chaca quiya' nde loo la; li' ca chaa la ti' ma̱, ca tso'o la tyiquee ma̱.

¹⁴ Nu lo'o nchcui' ngu' cha' ti'í ji'i̱ ma̱ xqui'ya Cristo, ca tso'o tyiquee ma̱ cha' ndi'i̱ Xtyi'i ycui' Ndyosi lo'o ma̱, lo'o jua'a̱ tlyu tsa cha' tso'o ntsu'u ji'i̱ ycui' Ni. Nchcui' ngu' bi' cha' cuxi ji'i̱ ycui' Ndyosi; pana cu'ma̱ ni, tso'o tsa si tya cua'ni tlyu ma̱ ji'i̱ Ni.

¹⁵ Ná tso'o tsiya' ti si cua'ni ma̱ cha' cuxi. Liñi tsa laca si chcube' ngu' nu lo'o cua'ni ngu' cha' cuxi; masi cujuii ngu' ji'i̱ tya'a ñati̱, masi cuaana ngu' na nu ntsu'u ji'i̱ tya'a ñati̱, masi cua'ni ngu' xa' lo cha' cuxi nu ná ntsu'u chacuayá' cua'ni ngu', masi xu̱u̱ tya'a ngu' lo'o ngu' nu laca loo, liñi tsa si chcube' ngu' bi'.

¹⁶ Pana ná ntsu'u cha' ca tyuju'u ti' ma̱ si xcube' ngu' ji'i̱ ma̱ cha' laca ma̱ ñati̱ ji'i̱ Jesucristo; cua'ni tlyu ma̱ ji'i̱ ycui' Ndyosi cha' jua'a̱ ndyaca ji'i̱ ma̱ li'.

¹⁷ Cua ndyalaa hora cha' xana cua'ni cuayá' Ni ji'i̱ lcaa ñati̱, pana clyo nguxana Ni lo'o ñati̱ nu ji'i̱ ycui' Ni; bi' cha' laca si ntsu'u xi cha' ti'í ji'na juani lo'o nguxana ca ti Ni ndyu'ni cuayá' Ni ji'i̱ ñati̱, caca cuayá' ti' na cha' tlyu la cha' caca lo'o chcube' ngu' cuxi nde loo la. Li' chcube' ñati̱ nu ná ntaja'a̱ taquiya' ji'i̱ cha' tso'o nu ji'i̱ ycui' Ndyosi.

¹⁸ Tucui tsa cha' laca cha' clyaá ñati̱ nu ndu'ni cha' tso'o ti; pana nu ñati̱ xña'a̱, lo'o jua'a̱ ñati̱ nu ntsu'u cha' cuxi ji'i̱ ni, tye cha' ji'i̱ ngu' bi' tsiya' ti.

¹⁹ Ndyiji xi cha' ti'í ji'i̱ ma̱ juani chacuayá' ji'i̱ ycui' Ndyosi. Cua jlo ti' Ni cha' bi', pana ná culati'i̱ Ni ji'na si jua'a̱. Ntsu'u cha' tya cua'ni na xcui' cha' tso'o, cha' ña'a̱ ti xñi na cha' ji'i̱ ycui' Ni nu ngüiñá lcaa lo na, masi nchcube' na; chañi cha' cña'a̱si̱i̱ Ni ji'na li'.