1 PEDRO 3 - Chatino Tataltepec

Ñi'ya̱ ntsu'u cha' tyi'i̱ ñati̱ lo'o clyo'o

¹ Lo'o jua'a̱ cu'ma̱ ngu' cuna'a̱ ni, ntsu'u cha' taquiya' ma̱ ji'i̱ cha' nu nchcui' clyo'o ma̱, cha' nu qui'yu laca loo ji'i̱ nu cuna'a̱, masi tya lyiji taquiya' nu qui'yu bi' ji'i̱ ycui' Ni. Pana lo'o ña'a̱ nu ngu' qui'yu clyo'o ma̱ lcaa cha' tso'o nu ndu'ni ma̱, li' xñi ngu' cha' ji'i̱ ycui' Ni, masi bilya chcui' ma̱ lo'o ngu' ji'i̱ cha' bi';

² lo'o ña'a̱ clyo'o ma̱ cha' nduna ma̱ cha' nu nchcui' ycui' ngu' lo'o ma̱, cha' lubii cresiya ji'i̱ ma̱, ná tyiquee' taquiya' ngu' bi' ji'i̱ cha' liñi ji'i̱ ycui' Ndyosi li'.

³ Lcaa cu'ma̱ ngu' cuna'a̱ ni, tso'o si ña'a̱si̱i̱ ma̱ ji'i̱ quicha̱' hique ma̱; pana ná nti' cha' culiji quiña'a̱ tsa hora ji'i̱ ma̱, ni ná nti' cha' culiji quiña'a̱ tsa cñi ji'i̱ ma̱, cha' cua'ni cho'o ma̱ quicha̱' hique ma̱. Ná ntsu'u cha' tyacui chcua̱ jyaca̱ ma̱ nu quiña'a̱ tsa ntsu'u loo, ni ná ntsu'u cha' cacu' ma̱ late' nu quiña'a̱ tsa nga'a̱. Si'i na cacu' nu cuna'a̱ nu cua'ni cha' ndiya la ti' ngu' ji'i̱.

⁴ Pana ycui' Ndyosi ndiya la ti' ji'i̱ nu cuna'a̱ nu tso'o tsa cha' ntsu'u tyiquee ngu'; si ná liye' ti' ngu', si ná tyaala ngu', bi' laca ngu' cuna'a̱ nu ndiya ti' ycui' Ndyosi ña'a̱ Ni ji'i̱. Ñi'ya̱ laca sca na nu tso'o tsa ña'a̱, nu quiña'a̱ tsa nga'a̱, jua'a̱ laca ngu' cuna'a̱ nu ná cuxi tyiquee tsiya' ti cuentya ji'i̱ ycui' Ni.

⁵ Ná cuxi tyiquee tsiya' ti jyo'o ma' cusu' nu ntsu'u cha' ji'i̱ lo'o ycui' Ndyosi nu ngua cua sa'ni. Tso'o tsa ña'a̱ ma' cusu' bi', cha' ngua'ni tlyu ma' ji'i̱ ycui' Ni, lo'o jua'a̱ ndaquiya' ma' ji'i̱ cha' nu nchcui' clyo'o ma'.

⁶ Jyo'o ma' Sara ngua'ni ma' jua'a̱, cha' ndaquiya' ma' bi' ji'i̱ jyo'o Abraham nu ngua clyo'o ma'; “xu'na na'”, nacui̱ ma' bi' ji'i̱. Lo'o cu'ma̱ ni, ñi'ya̱ si laca ma̱ sñi' ma' Sara bi', jua'a̱ laca cu'ma̱ ngu' cuna'a̱ juani, si xcui' cha' tso'o ndu'ni ma̱. Nga'aa ntsu'u cha' cutsi̱i̱ ma̱, nga'aa ntsu'u cha' culacua tsa ti' ma̱ li'.

⁷ Lo'o jua'a̱ cu'ma̱ ngu' qui'yu ni, tso'o ti tyi'i̱ ma̱ lo'o clyo'o ma̱, cua'ni tyaca'a ma̱ ji'i̱ clyo'o ma̱; masi xtyi la juersa ntsu'u ji'i̱ nu cuna'a̱, pana stu'ba ti laca tyucuaa ma̱ cuentya ji'i̱ ycui' Ndyosi, cha' cua nda Ni chalyuu nu ná nga'a̱ cha' tye ji'i̱ tyucuaa ma̱. Si cua'ni ma̱ tso'o jua'a̱, tso'o ti tyi'i̱ ma̱ to' tyi ma̱; li' ná caja sca cha' cuxi nu cua'a ji'i̱ ma̱, nu cua'ni cha' ná chcui' ma̱ lo'o ycui' Ndyosi.

Ñi'ya nu chcube' ngu', masi xcui' cha' tso'o ndu'ni ngu'

⁸ Lcaa cu'ma̱ ni, nga'a̱ cha' caca stu'ba tyiquee ma̱ lo'o tya'a ma̱, cha' tya'a ngusñi ma̱ cha' ji'i̱ Cristo laca ma̱; nga'a̱ cha' cube ti' ma̱ ji'i̱ tya'a ma̱, nga'a̱ cha' cua'ni tyaca'a ma̱ ji'i̱ lcaa tya'a ma̱. Lo'o jua'a̱ cua'ni tya'na ti' ma̱ ji'i̱ tya'a ma̱, ná cua'ni liye' ti' ma̱ ña'a̱ ma̱ ji'i̱ ngu' bi'.

⁹ Ná cua'ni cuxi ma̱ lo'o tya'a ñati̱ ma̱, masi ngua'ni cuxi ngu' lo'o ma̱; lo'o jua'a̱ ná chcui' tyaala ma̱ lo'o tya'a̱ ñati̱ ma̱, masi tyaala tsa nchcui' ngu' lo'o ma̱. Na cua ngusubi ycui' Ni ji'i̱ ma̱ cha' xtyucua Ni ji'i̱ cu'ma̱, bi' cha' tso'o la si chcui' ma̱ lo'o ycui' Ndyosi cha' xtyucua Ni ji'i̱ ngu' tyaala bi'.

¹⁰ Ndi'ya̱ nscua cha' lo quityi ji'i̱ ycui' Ndyosi: Lcaa ngu' nu nti' caja chalyuu tso'o ji'i̱ ngu', cha' ca chaa ti' ngu', nga'a̱ cha' cua'a ngu' bi' ji'i̱ ycui' ca ngu' cha' ná chcui' ngu' cha' cuxi; la cui' jua'a̱ ná tso'o si tyu'u cha' cuiñi tu'ba ngu' bi'.

¹¹ Ntsu'u cha' tyaatsu' ngu' bi' ji'i̱ lcaa cha' cuxi nu ntsu'u ji'i̱ ngu', cha' nga'aa cua'ni ngu' cha' cuxi bi'. Xcui' cha' tso'o ntsu'u cha' cua'ni ngu' bi'. Lo'o li' ntsu'u cha' xtyucua ngu' bi' ji'i̱ tya'a ñati̱ ngu' lcaa tsa̱, xqui'ya cha' tso'o ntsu'u tyiquee ngu' bi' ña'a̱ ngu' ji'i̱ tya'a ñati̱ ngu'; jua'a̱ nga'aa xu̱u̱ tya'a ngu' bi' li'.

¹² Tso'o la si jua'a̱ cua'ni ngu'; cua'ni tyaca'a ycui' nu Xu'na na ji'i̱ nu ñati̱ nu tso'o tyiquee bi' li', cuna Ni lo'o chcui' ngu' bi' lo'o Ni. Pana lye tyi'i̱ loo Ni ña'a̱ Ni ji'i̱ ñati̱ nu xña'a̱ tyiquee. Jua'a̱ nchcui' lo quityi bi'.

¹³ Ná ntsu'u cha' cua'ni cuxi ngu' lo'o ma̱, si xcui' cha' tso'o ti cua'ni ma̱.

¹⁴ Pana si ntsu'u quiya' nu cua'ni lya' ti' ngu' ji'i̱ ma̱ xqui'ya sca cha' tso'o nu ndyu'ni ma̱, tso'o la si ná caca xñi'i̱ ti' tyiquee ma̱ li'; ná cube ti' ma̱, ná cutsi̱i̱ ma̱ ji'i̱ ngu' bi'.

¹⁵ Tyucui tyiquee ma̱ cua'ni tlyu ma̱ ji'i̱ Cristo, cha' chañi cha' laca Ni nu Xu'na na. Lo'o jua'a̱ culacua xi ti' ma̱ ñi'ya̱ caca xacui̱ ma̱ cha' ji'i̱ ngu' lo'o xcuane ngu' ji'i̱ ma̱ ndi'ya̱: ¿Ni cha' laca ndu̱ ti' ma̱ ji'i̱ nu Cristo bi'? Tso'o ti xacui̱ ma̱ cha' ji'i̱ ngu' bi', ná cua'ni tyixi ma̱ lo'o ngu' bi'.

¹⁶ Xcui' cha' tso'o cua'ni ma̱ lo'o ngu' lacua, cha' taca tyanu lubii cresiya ji'i̱ ma̱; li' caca tyuju'u ti' nu ngu' cuiñi bi', ngu' nu nchcui' cuentyu ji'i̱ ma̱ xqui'ya cha' tso'o nu ndyu'ni ma̱ cuentya ji'i̱ Cristo.

¹⁷ Si ntsu'u cha' chcube' na, tso'o la xcube' ngu' ji'na xqui'ya sca cha' tso'o nu ndyu'ni na, si ta ycui' Ndyosi chacuayá' ji'i̱ ngu'; pana si ngua'ni na sca cha' cuxi, liñi tsa ndyu'u cha' si xcube' ngu' ji'na li'.

¹⁸ Ycui' Cristo ngujuii xqui'ya qui'ya nu ntsu'u ji'na, masi lubii tsiya' ti cresiya ji'i̱ yu; nchcube' yu cuentya ji'na, cha' cuxi tsa tyiquee na. Lo'o juani taca tyalaa na slo ycui' Ndyosi xqui'ya nu Cristo bi'. Sca ti quiya' ngua cha' ti'í bi' ji'i̱ Cristo, ndye cña ji'i̱ yu nde loyuu chalyuu li'. Ndyujuii ngu' ji'i̱ nu ñati̱ nu naa Jesucristo bi', pana ngua'ni Xtyi'i ycui' Ndyosi cha' ndyu'ú yu chaca quiya'.

¹⁹ Xtyi'i ycui' Cristo ngua nu ndyaa ne' ni'i̱ chcua̱ su ntsu'u ngu' jyo'o ca bilyaa, cha' chcui' Ni lo'o ngu' jyo'o bi'.

²⁰ Ná ntaja'a̱ ngu', ná ndaquiya' ngu' jyo'o bi' ji'i̱ ycui' Ndyosi cua sa'ni la lo'o nguti'i̱ ngu' chalyuu. Ntsu'u xi ngu' jyo'o bi' nu nguti'i̱ tyempo lo'o ngüiñá jyo'o Noé yaca ni'i̱ bi'. Ngujuatya ycui' Ndyosi ji'i̱ ngu' bi', ngua ti' Ni cha' taquiya' ngu' bi' ji'i̱ Ni, lo'o ná ntaja'a̱ ngu' bi' tsiya' ti; bi' cha' snu' tya'a ti ñati̱ ngulaá ne' yaca ni'i̱ bi' lo'o ngua'ya tyo clyaa tyempo bi'.

²¹ Ñi'ya̱ nu ngua'ni lyaá Ni ji'i̱ ngu' nu nguta'a̱ ne' yaca ni'i̱ bi' lo hitya nu ngua sa'ni la, cha' ndaquiya' ngu' bi' ji'i̱ cha' nu nchcui' ycui' Ni; jua'a̱ clyaá ma̱ juani, cha' cua ndaquiya' ma̱ ji'i̱ cha' nu nchcui' Ni. Cua ndyaa ma̱ lo hitya cha' tyucuatya ma̱ li'. Si'i na caata ti na chcu laca cha' bi', si'i cha' cuu' cuaña' na, bi' cha' tyucuatya na li'; ndi'ya̱ laca cha': na cua ndijña na ji'i̱ ycui' Ndyosi cha' cua'ni lubii Ni ji'i̱ cresiya ji'na xqui'ya cha' cua ndyu'ú Jesucristo chaca quiya', bi' cha' ntyucuatya na.

²² Na cua ndyaa Jesucristo nde cua̱, lo'o juani ndi'i̱ yu la'a tsu' cui̱ ca su ntucua ycui' Ndyosi. Nu Jesucristo bi' ni, laca yu loo ji'i̱ lcaa xca̱ ji'i̱ ycui' Ndyosi, ji'i̱ lcaa ngu' nu laca cña, ji'i̱ lcaa cui'i̱ tso'o nu nchca xi ji'i̱; laca yu loo tsiya' ti.