1 JUAN 5 - Chatino Tataltepec

Ntiji̱loo na ji'i̱ nu cuxi nu ntsu'u chalyuu

¹ Lcaa ñati̱ nu jlya ti' ji'i̱ Jesús, cha' laca yu Cristo nu cua nda ycui' Ndyosi ji'i̱ ya̱a̱ chalyuu, chañi cha' laca ngu' bi' sñi' ycui' Ndyosi. Ycui' Ndyosi laca Sti na, lo'o jua'a̱ ntsu'u tsa tyiquee na ña'a̱ na ji'i̱ Ni, bi' cha' ntsu'u tyiquee na ña'a̱ na ji'i̱ xa' la sñi' ycui' Ni, tya'a ngusñi na cha' ji'i̱ Jesús.

² Nu lo'o ntsu'u tyiquee na ña'a̱ na ji'i̱ ycui' Ndyosi Sti na, lo'o jua'a̱ taquiya' na ji'i̱ lcaa cña nu nda Ni lo'o na, li' tso'o ti taca tyu'u tyiquee na ña'a̱ na ji'i̱ xa' la sñi' ycui' Ni.

³ Si chañi cha' ntsu'u tyiquee na ña'a̱ na ji'i̱ Ni, taquiya' na ji'i̱ cha' nu chcui' Ni lo'o na li', cha' si'i sca cña nu tucui tsa laca cha' taquiya' na ji'i̱ scaa cha' nu nchcui' Ni.

⁴ Cua ña'a̱ ca sñi' ycui' Ndyosi taca tyiji̱loo ji'i̱ lcaa nu cuxi nu ntsu'u chalyuu; taca tyiji̱loo na ji'i̱ nu cuxi, xqui'ya cha' cua ngusñi na cha' ji'i̱ Jesucristo.

⁵ Pana ñati̱ nu jlya ti' cha' Jesús laca nu sca ti Sñi' ycui' Ndyosi, bi' ti ñati̱ nu caca ji'i̱ tyiji̱loo ji'i̱ lcaa nu cuxi nu ntsu'u chalyuu.

Ndi'ya̱ ntsu'u cha' ji'i̱ Jesús nu laca Sñi' ycui' ca Ndyosi

⁶ Nu sca ti Sñi' ycui' ca Ndyosi laca Jesucristo, nu ya̱a̱ chalyuu. Ntyucuatya ngu' ji'i̱ yu li'. Ngujuii yu lo crusi, ndyalú tañi ycui' yu li'. Si'i xqui'ya cha' nu cua ntyucuatya ti yu, masi lo'o xqui'ya cha' cua ngujuii yu lo crusi ndyalú tañi yu, bi' cha' nchca cuayá' ti' na juani cha' nu sca ti Sñi' ycui' Ndyosi laca Jesucristo. Bi' laca cha' nu ndacha' Xtyi'i ycui' Ndyosi ji'na, lo'o jua'a̱ chañi tsa laca cha' bi'.

⁷ Nde cua̱ ntucua sna tya'a ngu' nu nchcui' cha' chañi laca cha' ji'i̱ Jesús bi': ycui' Ndyosi Sti yu laca tsaca ngu' bi'; jua'a̱ Jesucristo nu ntsu'u tyucui cha' ji'i̱ ycui' Ndyosi ji'i̱, bi' laca chaca; lo'o jua'a̱ Xtyi'i ycui' Ni, chaca laca bi'. Stu'ba ti nchcui' nu ca ta'a sna bi', cha' chañi laca cha' bi'.

⁸ Lo'o jua'a̱ nde lo yuu cua ngua sna quiya' lo'o nchcui' ycui' Ndyosi cha' chañi laca cha' Jesucristo laca nu sca ti Sñi' ycui' Ni: tsaca laca cha' nu nchcui' Xtyi'i ycui' Ndyosi lo'o na; jua'a̱ chaca laca cha' nu nchcui' Ni laja lo'o ntyucuatya Jesucristo; lo'o jua'a̱ chaca laca cha' nu cua nchcui' Ni laja lo'o ngujuii Jesucristo lo crusi, ndyalú tañi yu li'. Sca ti cha' nchcui' Ni ca ta'a sna quiya' bi'.

⁹ Ntucuá na ji'i̱ cha' nu nchcui' ñati̱ chalyuu lo'o na, pana juani ndulo la cha' nu nda ycui' Ndyosi lo'o na. Ca ta'a sna cha' nu nda ycui' Ndyosi, lcaa cha' bi' nchcui' cha' sca ti Jesucristo laca Sñi' ycui' Ndyosi.

¹⁰ Ñati̱ nu jlya ti' ji'i̱ yu cha' laca yu nu sca ti Sñi' ycui' Ndyosi, ycui' ca ngu' jlo ti' ngu' ne' cresiya ji'i̱ ngu' cha' chañi tsa laca cha' bi'; ñati̱ nu ná ntaja'a̱ tucuá cha' ji'i̱ Ni, cha' laca Jesucristo Sñi' ycui' ca Ni, bi' ngu' laca nu ná jlya ti' tsiya' ti cha' cua nchcui' ycui' Ndyosi cha' ji'i̱ Sñi' ycui' ca Ni. Ñati̱ cuiñi laca ycui' Ndyosi nti' ngu' bi'.

¹¹ Nde laca cha' liñi nu tso'o tsa cha' xñi na ji'i̱, cha' cua nda ycui' Ndyosi chalyuu nu ná nga'a̱ cha' tye ji'na; Jesucristo laca nu ngulu'u ji'na ñi'ya̱ caca chalyuu bi'.

¹² Cua ña'a̱ ca ñati̱ nu ntsu'u cha' ji'i̱ lo'o Jesús nu laca Sñi' ycui' ca Ni, bi' ñati̱ laca nu ntsu'u chalyuu nu ná nga'a̱ cha' tye ji'i̱; ñati̱ nu ná ntsu'u cha' ji'i̱ lo'o nu sca ti Sñi' ycui' Ndyosi, ná ntsu'u cha' ta Ni chalyuu bi' ji'i̱ ngu'.

Cua tye ti cha' nu nguscua Juan

¹³ Cua nscua na' quityi re lacua, cha' ca̱a̱ ca slo ma̱, lcaa tya'a ngusñi ma̱ cha' ji'i̱ Jesús nu sca ti Sñi' ycui' Ndyosi; xqui'ya cha' re taca ca cuayá' ti' ma̱ cha' cua ngujui chalyuu cucui ji'i̱ ma̱, nu cua nda ycui' Ndyosi ji'na.

¹⁴ Tyucui tyiquee na taca chcui' na lo'o ycui' Ndyosi lacua. Lo'o jña na sca cha' ji'i̱ ycui' Ndyosi nu stu'ba nti' lo'o sca cha' nu nti' ycui' Ni, li' taca jlo ti' na cha' taquiya' Ni ji'i̱ cha' nu chcui' na lo'o Ni.

¹⁵ Si jlo ti' na cha' nduna ycui' Ndyosi lo'o jña na sca cha' ji'i̱ Ni, la cui' jua'a̱ taca jlo ti' na cha' cua caja ti cha' bi' ji'na li'.

¹⁶ Lo'o ña'a̱ na ji'i̱ sca ñati̱ tya'a ngusñi na cha' ji'i̱ Jesucristo cha' ndyu'ni yu sca cha' cuxi, pana nda na cuentya cha' ná nscua cha' chcuna' chalyuu ji'i̱ yu xqui'ya cha' cuxi bi', li' tso'o la si jña na cha' clyu ti' ji'i̱ ycui' Ndyosi cuentya ji'i̱ yu tya'a na bi', cha' ná ta Ni chacuayá' cha' chcuna' chalyuu ji'i̱ yu tya'a na bi'. Pana ntsu'u qui'ya tlyu nu ná taca cua'ni clyu ti' ycui' Ndyosi ji'i̱; ná ñacui̱ na' cha' jña na cha' clyu ti' ji'i̱ Ni li', si jua'a̱ ntsu'u qui'ya ji'i̱ ngu'.

¹⁷ Chañi cha' sta ycui' Ndyosi qui'ya ji'i̱ lcaa na lo'o tya'a na xqui'ya cha' cuxi nu ndyu'ni na. Pana ntsu'u sca lo qui'ya nu ná taca cui'ya Ni cha' clyu ti' ji'i̱ tsiya' ti.

¹⁸ Jlo ti' na cha' nga'aa ndu'ni ñati̱ ji'i̱ Jesucristo cha' cuxi. Jesucristo nu laca nu sca ti Sñi' ycui' Ndyosi, bi' laca nu ndaca'a ji'i̱ ngu', cha' ná taca cala' nu xña'a̱ ji'i̱ ngu' bi' li'.

¹⁹ Jlo ti' na cha' ñati̱ ji'i̱ ycui' Ndyosi laca na, xqui'ya cha' cua ngusñi na cha' ji'i̱ Jesucristo; pana xa' la ñati̱ chalyuu nu ná ndaquiya' ji'i̱ Ni tsiya' ti, ña'a̱ ti tya laca nu xña'a̱ loo ji'i̱ ñati̱ bi'.

²⁰ Cua jlo ti' na cha' cua ya̱a̱ nu sca ti Sñi' ycui' Ndyosi nde lo yuu chalyuu, lo'o jua'a̱ cua nda bi' chacuayá' cha' caca tyu'u cha' ji'na lo'o ycui' Ndyosi. Chañi cha' stu'ba ntsu'u tyiquee na lo'o ycui' Ndyosi juani, xqui'ya cha' stu'ba ntsu'u tyiquee na lo'o Jesucristo nu laca Sñi' ycui' ca Ni. Chañi cha' ycui' Ndyosi tsiya' ti laca nu Jesús bi', lo'o jua'a̱ chañi cha' ná nga'a̱ cha' tye chalyuu cucui nu ta Ni ji'na.

²¹ Cu'ma̱ sñi' na', tii ti ti' ma̱ tyi'i̱ ma̱ chalyuu, cha' ná tyatí̱ yu'u ma̱ lo'o xa' jo'ó. Jua'a̱ laca cha' bi' lacua.