1 JUAN 4 - Chatino Tataltepec

Cua'ni cuayá' na ñi'ya̱ nu ntsu'u ne' cresiya ji'i̱ scaa ñati̱

¹ Cu'ma̱ tya'a ngusñi na cha' ji'i̱ Cristo nu tyaca'a tsa ma̱ 'na, ná xñi ma̱ cha' ji'i̱ cua ña'a̱ ca ñati̱ nu ñacui̱ cha' cua nda ycui' Ndyosi Xtyi'i ycui' Ni ji'i̱ ngu' bi'. Cua'ni cuayá' ma̱ ji'i̱ ngu' bi' clyo, cha' quijeloo cha' ji'i̱ ma̱ lo'o ngu' si chañi cha' cua ndyanu Xtyi'i ycui' Ndyosi ne' cresiya ji'i̱ ngu' bi', si cha' cuiñi ti laca nu nchcui' ngu' bi'. Cua ndu'u tucua tyu̱u̱ tsa tya'a ngu' cuiñi chalyuu juani, nu nñilo'o ji'i̱ ñati̱ cha' cuentya ji'i̱ ycui' Ndyosi nchcui' ngu'.

² Ndi'ya̱ ca cuayá' ti' na ñi'ya̱ laca ñati̱ nu cua ndyanu Xtyi'i ycui' Ndyosi ne' cresiya ji'i̱: lcaa ñati̱ nu nchcui' cha' chañi cha' nu sca ti Sñi' ycui' Ndyosi laca Jesucristo lo'o ngula yu chalyuu cha' ngua yu ñati̱, lcaa ñati̱ bi' cua ntsu'u Xtyi'i ycui' Ndyosi ne' cresiya ji'i̱ ngu';

³ pana ñati̱ nu nacui̱ cha' si'i Sñi' ycui' Ndyosi laca Jesucristo lo'o ngula yu chalyuu ñi'ya̱ nu nclya ñati̱, ná ntsu'u Xtyi'i ycui' Ni ne' cresiya ji'i̱ ngu' bi'. Cha' ji'i̱ nu cuiñi nu nti' tyiji̱loo ji'i̱ Jesucristo laca cha' nu ntsu'u ne' cresiya ji'i̱ ngu' bi'; jua'a̱ cua ngua cuayá' ti' ma̱ cha' cua lijya̱ ti nu cuiñi bi', cha' masi juani cua laca ndi'i̱ bi' chalyuu.

⁴ Cu'ma̱ sñi' na', cua ntsu'u cha' ji'i̱ ma̱ lo'o ycui' Ndyosi, jua'a̱ cua ngua nguula la ti' tyiquee ma̱ xqui'ya Xtyi'i ycui' Ndyosi nu ndyanu ne' cresiya ji'i̱ ma̱ li'; bi' cha' nchca ji'i̱ ma̱ tyiji̱loo ma̱ ji'i̱ ngu' cuiñi nu cua ntsu'u cha' ji'i̱ lo'o ycui' nu xña'a̱. La cui' nu xña'a̱ laca nu nclyo cña ji'i̱ ñati̱ cuxi nde chalyuu.

⁵ Cua ntsu'u cha' ji'i̱ nu ngu' cuiñi bi' lo'o nu cuxi nu ntsu'u chalyuu, lo'o jua'a̱ xcui' cha' ji'i̱ nu xña'a̱ laca cha' nu nchcui' ngu' bi'; bi' cha' ndiya tsa ti' ñati̱ chalyuu cuna ngu' cha' nu nda nu ngu' cuiñi bi', lcaa ñati̱ nu ná ndaquiya' ji'i̱ Jesucristo tsiya' ti.

⁶ Pana ñati̱ ji'i̱ ycui' Ndyosi laca na. Nu lo'o ntsu'u cha' ji'i̱ ñati̱ lo'o ycui' Ndyosi, cuna ngu' lcaa cha' nu chcui' na lo'o ngu' li'; ñati̱ nu ná ntsu'u cha' ji'i̱ lo'o ycui' Ndyosi tsiya' ti, bi' ñati̱ laca nu ná nduna cha' nu nchcui' na. Jua'a̱ taca quijeloo cha' ji'na tilaca laca nu ntsu'u cha' liñi ji'i̱, tilaca laca nu ntsu'u cha' cuiñi ji'i̱.

Xcui' ntsu'u tyiquee ycui' Ndyosi ña'a̱ Ni ji'i̱ ñati̱

⁷ Cu'ma̱ ngu' tya'a na nu tyaca'a tsa ma̱ 'na, nga'a̱ cha' tyu'u tso'o tyiquee na ña'a̱ na ji'i̱ tya'a ñati̱ na; ycui' Ndyosi laca nu nclyo cña cha' xcui' tso'o ti tyu'u tyiquee na ña'a̱ na ji'i̱ tya'a ñati̱ na. Lcaa ñati̱ nu ntsu'u tyiquee ña'a̱ ji'i̱ tya'a ñati̱, sñi' ycui' Ndyosi laca ngu' bi', lo'o jua'a̱ tyu'u cha' ji'i̱ ngu' bi' lo'o ycui' Ni.

⁸ Pana ñati̱ nu ná ntsu'u tyiquee ña'a̱ ji'i̱ tya'a ñati̱, ná caja ñi'ya̱ nu tyu'u cha' ji'i̱ ngu' bi' lo'o ycui' Ndyosi tsiya' ti, cha' ycui' Ndyosi ni, ntsu'u tsa tyiquee Ni ña'a̱ Ni ji'i̱ ñati̱.

⁹ Ngulu'u Ni ji'na ñi'ya̱ ntsu'u tsa tyiquee Ni ña'a̱ Ni ji'na, nu lo'o cua nda Ni ji'i̱ nu sca ti Sñi' ycui' ca Ni ya̱a̱ chalyuu, cha' jua'a̱ taca caja chalyuu cucui ji'na.

¹⁰ Nde laca cha' nu nchcui' na' lo'o ma̱: Si'i cha' ntsu'u tyiquee na ña'a̱ na ji'i̱ ycui' Ndyosi, masi ycui' Ndyosi laca nu ntsu'u tsa tyiquee Ni ña'a̱ Ni ji'na tya clyo, bi' cha' nda Ni ji'i̱ Sñi' ycui' ca Ni ya̱a̱ chalyuu cha' ngujuii yu lo crusi, cha' cua ngua cuxi tyiquee na lo'o ycui' Ndyosi nu Xu'na na xqui'ya cha' cuxi nu ngua'ni na; pana Jesucristo nu sca ti Sñi' ycui' Ni, bi' laca nu cua nchcube' cña loo na, ngüi'ya Ni yabe' nu ntsu'u ji'na.

¹¹ Cu'ma̱ ngu' tya'a na nu tyaca'a tsa ma̱ 'na, nga'a̱ cha' tso'o ti tyu'u tyiquee na ña'a̱ na ji'i̱ tya'a ñati̱ na, cha' jua'a̱ ntsu'u tsa tyiquee ycui' Ndyosi ña'a̱ Ni ji'na.

¹² Ni sca ñati̱ chalyuu, bilya ña'a̱ ngu' ji'i̱ ycui' Ndyosi; pana taca ca cuayá' ti' na cha' stu'ba ntsu'u tyiquee na lo'o Ni juani, nu lo'o ña'a̱ na ji'i̱ lcaa na lo'o tya'a na, cha' ntsu'u tsa tyiquee na ña'a̱ na ji'i̱ tya'a ñati̱ na. Ñi'ya̱ ntsu'u tsa tyiquee Jesucristo ña'a̱ yu ji'i̱ ñati̱ chalyuu, jua'a̱ nga'a̱ cha' cua'ni na lo'o tya'a ñati̱ na li'.

¹³ Cua nda ycui' Ndyosi Xtyi'i Ni cha' tyanu ne' cresiya ji'na, bi' cha' cua ngua jlo ti' na cha' stu'ba ntsu'u tyiquee na lo'o ycui' Ndyosi, lo'o jua'a̱ stu'ba ntsu'u tyiquee Ni lo'o na.

¹⁴ Cua na'a̱ ycui' ya ji'i̱ Jesús. Chañi laca cha' nu nchcui' ya lo'o ma̱ juani, cha' cua nda ycui' Ndyosi Sti Jesús chacuayá' ji'i̱ Sñi' ycui' ca Ni cha' cua'ni lyaá ji'i̱ cua ña'a̱ ca ñati̱ ji'i̱ nu cuxi.

¹⁵ Ñati̱ nu tyaja'a̱ cacha' ji'i̱ tya'a ñati̱ cha' nu sca ti Sñi' ycui' Ndyosi laca Jesucristo, stu'ba ntsu'u tyiquee ycui' Ni lo'o ngu' bi' li'; jua'a̱ stu'ba ntsu'u tyiquee ngu' bi' lo'o ycui' Ni.

¹⁶ Ngua cuayá' ti' na li', cha' ntsu'u tsa tyiquee ycui' Ndyosi ña'a̱ Ni ji'na; jua'a̱ jlya ti' na li', cha' xcui' ntsu'u tsa tyiquee ycui' Ni ña'a̱ Ni ji'i̱ ñati̱ chalyuu. Lo'o ñati̱ nu jua'a̱ tso'o nti' ña'a̱ ngu' ji'i̱ tya'a ñati̱, nu xcui' jua'a̱ ndu'ni ngu' laja lo'o ndi'i̱ ngu' chalyuu, cua stu'ba ntsu'u tyiquee ngu' bi' lo'o ycui' Ndyosi; la cui' jua'a̱ stu'ba ntsu'u tyiquee ycui' Ndyosi lo'o ngu' bi' li'.

¹⁷ Tso'o ti ntsu'u tyiquee na ña'a̱ na ji'i̱ ycui' Ndyosi, cha' nu lo'o tyalaa tsa̱ lo'o tya̱a̱ Jesucristo chaca quiya' cha' cua'ni cuayá' Ni ji'i̱ lcaa ñati̱, li' tyucui tyiquee na taca tyacua tya'a na lo'o ycui' Ni. Ndya'a̱ Ni lo'o na laja lo'o ndi'i̱ na chalyuu, ñi'ya̱ nguta'a̱ Ni lo'o Jesucristo lo'o nguti'i̱ yu nde chalyuu, bi' cha' nga'aa ntsu'u cha' cutsi̱i̱ na.

¹⁸ Ná ntsu'u cha' cutsi̱i̱ na cha' xcube' ycui' Ndyosi ji'na, si chañi cha' ntsu'u tyiquee na ña'a̱ na ji'i̱ ycui' Ni; pana tya lyiji cha' tso'o ti tyu'u tyiquee na ña'a̱ na ji'i̱ ycui' Ndyosi, si ña'a̱ ti tya ntsi̱i̱ na cha' xcube' Ni ji'na. Ñati̱ nu ntsi̱i̱ tsa ji'i̱ ycui' Ndyosi ni, cua nda ti' ngu' cha' xcube' Ni ji'i̱ ngu'.

¹⁹ Ntsu'u tyiquee na ña'a̱ na ji'i̱ ycui' Ni, xqui'ya cha' tya clyo ntsu'u tsa tyiquee Ni ña'a̱ Ni ji'na.

²⁰ Ngu' nu ñacui̱ ndi'ya̱: “Ntsu'u tsa tyiquee na' ña'a̱ na' ji'i̱ ycui' Ndyosi”, lo'o li' ña'a̱ ti tya liye' ti' ngu' bi' ña'a̱ ngu' ji'i̱ tya'a ngu', cha' cuiñi ti laca nu nchcui' ngu' bi'. Ndi'ya̱ ndyu'u cha' bi': taca ña'a̱ na ji'i̱ tya'a ñati̱ na, pana ycui' Ndyosi ni, bilya ña'a̱ na ji'i̱ Ni tsiya' ti; bi' cha' lacua, si ná ntsu'u tyiquee na ña'a̱ na ji'i̱ tya'a ngusñi na cha' ji'i̱ Jesucristo, li' ná taca ñacui̱ na cha' ntsu'u tyiquee na ña'a̱ na ji'i̱ ycui' Ndyosi Sti na.

²¹ Cua ngulo Ni cña bi' ji'na ndi'ya̱: Tso'o ti tyu'u tyiquee ma̱ ña'a̱ ma̱ ji'i̱ ycui' Ndyosi, lo'o jua'a̱ xcui' tso'o ti tyu'u tyiquee ma̱ ña'a̱ ma̱ ji'i̱ tya'a ñati̱ ma̱.