1 JUAN 3 - Chatino Tataltepec

Sñi' ycui' Ndyosi laca na

¹ Tlyu tsa cha' tso'o laca cha' ntsu'u tsa tyiquee ycui' Ndyosi Sti na ña'a̱ Ni ji'i̱ ca ta'a ngu' tya'a ntsu'u cha' ji'na lo'o Jesucristo; bi' cha' laca cha' nchcui' ycui' Ndyosi ji'na cha' sñi' ycui' Ni laca na, lo'o jua'a̱ chañi laca cha' bi'. Ná ntaja'a̱ ñati̱ chalyuu tyuloo ji'na cha' sñi' Ni laca na; la cui' jua'a̱ lo'o nguti'i̱ Jesucristo chalyuu, ná ntaja'a̱ ngu' tyuloo ngu' ji'i̱ yu li'.

² Cu'ma̱ ngu' tya'a na nu tyaca'a tsa ma̱ 'na, nu juani ti laca na sñi' ycui' Ndyosi; pana bilya caja cha' ji'na ñi'ya̱ nu tso'o la ña'a̱ na, nu lo'o tyi'i̱ na lo'o ycui' Ni nde loo la. Ñi'ya̱ laca ycui' Jesucristo, jua'a̱ caca na lo'o culu'u loo Jesucristo ji'na lo'o cua ndye chalyuu re; li' taca ña'a̱ na ji'i̱ Jesucristo ñi'ya̱ nu laca ycui'. Tsa bi' ti cha' nchca cuayá' ti' na juani.

³ Lcaa ñati̱ nu nti' ña'a̱ ji'i̱ Ni ca li', nga'a̱ cha' cua'ni lubii ngu' ji'i̱ cresiya ji'i̱ ngu', ñi'ya̱ nu lubii cresiya ji'i̱ ycui' Jesucristo.

⁴ Si ndu'ni na cha' cuxi, laca cha' ná ntaja'a̱ na cua'ni na cña nu ngulo ycui' Ndyosi ji'na; ntsu'u qui'ya ji'na xqui'ya cha' ná ntaja'a̱ na taquiya' na ji'i̱ cha' nu nchcui' Ni lo'o na.

⁵ Cua jlo ti' ma̱ cha' cua ya̱a̱ Jesucristo chalyuu cha' cuityi̱ Ni qui'ya nu ntsu'u ji'i̱ ñati̱; pana ycui' Cristo ni, ná ntsu'u qui'ya ji'i̱ yu tsiya' ti.

⁶ Ni sca ñati̱ nu nxñi tso'o cha' ji'i̱ Jesucristo lcaa tsa̱, nga'aa nscua cha' cua'ni ngu' bi' cha' cuxi. Nu ñati̱ nu ndu'ni cha' cuxi lcaa tsa̱, ndu'ni ngu' cha' cuxi xqui'ya cha' bilya tyu'u cha' ji'i̱ ngu' bi' lo'o Jesucristo, bilya xñi ngu' cha' ji'i̱ Ni.

⁷ Cu'ma̱ sñi' na', ná nti' na' cha' cñilo'o xa' ñati̱ ji'i̱ ma̱. Xcui' tso'o ti ngua'ni Jesucristo nde chalyuu; bi' cha' lacua, lcaa ñati̱ nu ntsu'u cha' ji'i̱ lo'o Jesucristo, cua nscua cha' xcui' cha' tso'o ti cua'ni ngu' bi' laja lo'o tyi'i̱ ngu' chalyuu.

⁸ Lcaa ñati̱ nu ndu'ni xcui' cha' cuxi, cua laca ngu' bi' sñi' ycui' nu xña'a̱ nu laca xu'na cuiñaja; tya lyiji tye cha' cua'ni nu xña'a̱ bi' cha' cuxi. Sca ti Jesús nu Sñi' ycui' Ndyosi, cua ya̱a̱ Ni chalyuu cha' cua'ni tye Ni ji'i̱ lcaa cña nu ndyu'ni nu xña'a̱ bi'.

⁹ Ñati̱ nu laca sñi' ycui' Ndyosi ni, nga'aa nscua cha' cua'ni ngu' cha' cuxi, cha' cua nda ycui' Ndyosi chaca cha' tso'o la nu tyanu ne' cresiya ji'i̱ ngu' bi' xqui'ya Xtyi'i ycui' Ndyosi. Nga'aa tyaja'a̱ ngu' bi' cua'ni ngu' cha' cuxi, cha' sñi' ycui' Ndyosi laca ngu' bi'.

¹⁰ Bi' cha' nchca cuayá' ti' ma̱ juani ñi'ya̱ laca ñati̱ nu laca sñi' ycui' Nydosi, lo'o jua'a̱ nchca cuayá' ti' ma̱ ñi'ya̱ ndu'ni ñati̱ nu laca sñi' ycui' nu xña'a̱. Si'i sñi' ycui' Ndyosi laca ñati̱ nu ndu'ni cha' cuxi lcaa tsa̱, ni si'i sñi' ycui' Ndyosi laca ñati̱ nu ná ntsu'u tyiquee ña'a̱ ji'i̱ tya'a ñati̱.

Nga'a̱ cha' tyu'u tyiquee na ña'a̱ na ji'i̱ tya'a ñati̱ na

¹¹ Nde nscua la cui' cha' nu cua ndyuna ma̱ lo'o ngusñi ma̱ cha' ji'i̱ Jesús tya clyo: nga'a̱ cha' tyu'u tyiquee na ña'a̱ na ji'i̱ tya'a ñati̱ na.

¹² Ná cua'ni na ñi'ya̱ nu ngua'ni jyo'o Caín; sñi' ycui' nu xña'a̱ ngua yu bi', cha' ndyujuii yu ji'i̱ tya'a yu. ¿Ni cha' laca ngua'ni yu jua'a̱? Ndyujuii yu ji'i̱ tya'a yu xqui'ya cha' xcui' cha' cuxi ngua'ni jyo'o Caín bi', bi' cha' ná ndiya ti' yu cha' xcui' cha' tso'o ngua'ni yu tya'a yu bi'.

¹³ Cu'ma̱ tya'a ngusñi na cha' ji'i̱ ycui' Ndyosi, ná quiña'a̱ tsa cha' culacua ti' ma̱ si liye' tsa ti' ñati̱ chalyuu ña'a̱ ngu' ji'i̱ ma̱.

¹⁴ Xcui' nguna' tya ndi'i̱ na chalyuu cua tsubi' la xqui'ya qui'ya nu ntsu'u ji'na; pana juani, cua nda ycui' Ndyosi chaca chalyuu cucui ji'na, cha' tso'o ti ndi'i̱ tyiquee na juani. Ntsu'u tsa tyiquee na ña'a̱ na ji'i̱ xa' la tya'a ntsu'u cha' ji'na lo'o Jesucristo; bi' cha' taca jlo ti' na cha' cua ntsu'u chaca chalyuu cucui ji'na juani, cha' ñati̱ nu ná ntsu'u tyiquee ña'a̱ ji'i̱ tya'a ñati̱, nguna' tya ndi'i̱ ngu' chalyuu.

¹⁵ Ñi'ya̱ laca ñati̱ nu ndyujuii ji'i̱ tya'a ñati̱, jua'a̱ laca na si liye' ti' na ña'a̱ na ji'i̱ tya'a ñati̱ na. Jlo ti' ma̱ cha' nga'aa caja chalyuu cucui bi' ji'i̱ ñati̱ si ndyujuii ngu' ji'i̱ tya'a ñati̱ ngu', pana la cui' tya'a cha' laca si liye' tsa ti' na ña'a̱ na ji'i̱ tya'a ñati̱ na.

¹⁶ Nu lo'o cube ti' na cha' cuentya ji'na ntaja'a̱ Cristo ngujuii yu lo crusi, cha' ntsu'u tsa tyiquee Ni ña'a̱ Ni ji'na, li' ca cuayá' ti' na ña'a̱ cha' nu tso'o la cua'ni na, si ntsu'u tyiquee na ña'a̱ na ji'i̱ tya'a ngusñi na cha' ji'i̱ Ni. Tso'o si tyaja'a̱ na xtyucua na ji'i̱ tya'a na jua'a̱, masi hasta cajaa ycui' na cuentya ji'i̱ ngu' tya'a na.

¹⁷ Ntsu'u ngu' tya'a na nu nga'aa ntsu'u na nu lyiji ji'i̱ ngu' tsiya' ti cha' tyiji̱ yu'u ji'i̱ ngu' chalyuu. Si jua'a̱ tso'o ti ndi'i̱ na, lo'o li' ña'a̱ na ji'i̱ tya'a na nu ntsu'u na nu lyiji ji'i̱ ngu', pana ná ntaja'a̱ na cua'ni tya'na ti' na ji'i̱ tya'a na, li' ná taca ji'na ñacui̱ na cha' ntsu'u tyiquee na ña'a̱ na ji'i̱ ycui' Ndyosi, cha' nu ycui' Ndyosi ni, ntsu'u tsa tyiquee Ni ña'a̱ Ni ji'na.

¹⁸ Cu'ma̱ sñi' na', nu lo'o ntsu'u tsa tyiquee na ña'a̱ na ji'i̱ ycui' Ndyosi lo'o ji'i̱ tya'a ñati̱ na, si'i sca cui̱i̱ ti laca nu chcui' na lo'o ngu', si'i sca cha' nu nda ti na lo'o ngu' caca bi'; tyucui tyiquee na nga'a̱ cha' xtyucua na ji'i̱ nu ngu' tya'a na bi'.

Taca jlo ti' na cha' chañi cha' ntsu'u cha' ji'na lo'o ycui' Ndyosi

¹⁹ Si jua'a̱ ndu'ni na, li' caca cuayá' ti' na cha' liñi tsa laca cha' nu cua nda ycui' Ndyosi lo'o na, cha' nu jlya ti' na ji'i̱; ca tii na cha' cua ngüiñi tso'o cha' ji'na lo'o ycui' Ndyosi.

²⁰ Nu lo'o jlo ti' cresiya ji'na cha' ntsu'u qui'ya ji'na, li' taca ca cuayá' ti' na cha' lo'o ycui' Ni jlo ti' Ni cha' bi'. Lo'o jua'a̱ tlyu la laca ycui' Ni, taca ji'i̱ Ni cua'ni lyaá Ni ji'na ji'i̱ cha' cuxi bi'.

²¹ Cu'ma̱ ngu' tya'a na nu tyaca'a tsa ma̱ 'na, si jlo ti' na cha' ná ntsu'u qui'ya ji'na, tyucui tyiquee na taca chcui' na lo'o ycui' Ndyosi li';

²² nu lo'o jña na cha' ji'i̱ ycui' Ni, caja cua ña'a̱ ca cha' ji'na si taquiya' na ji'i̱ cña nu cua nda ycui' Ni ji'na, si cua'ni na cña nu ndiya la ti' ycui' Ni.

²³ Nde laca cña nu cua nda ycui' Ndyosi cha' cua'ni sa scaa na: nga'a̱ cha' xñi tso'o na cha' ji'i̱ Jesucristo Sñi' ycui' Ni; la cui' jua'a̱ tso'o ti tyu'u tyiquee na ña'a̱ na ji'i̱ tya'a ñati̱ na, ñi'ya̱ nu cua nacui̱ ycui' Ni ji'na.

²⁴ Nu lo'o taquiya' na ji'i̱ cña nu cua ngulo ycui' Ndyosi ji'na cha' cua'ni na, li' cua ntsu'u cha' ji'na lo'o ycui' Ndyosi, lo'o jua'a̱ ntsu'u cha' ji'i̱ Ni lo'o na li'. Jlo ti' na cha' bi', xqui'ya cha' cua nda ycui' Ndyosi Xtyi'i ycui' Ni cha' tyanu ne' cresiya ji'na.