1 JUAN 1 - Chatino Tataltepec

Jesucristo laca nu nda chaca chalyuu cucui ji'i̱ ñati̱

¹ Cua laca ntucua Jesús lo'o ycui' Ndyosi Sti yu nu lo'o nguxana chalyuu tya clyo; la cui' yu laca nu nchcui' ya ji'i̱, nu lo'o nscua ya tilaca laca Jesucristo. Cua jlo tso'o ti' ya cha' bi', cha' cua na'a̱ tso'o ya ji'i̱ yu lo'o cloo ya, cha' stu'ba ti nguta'a̱ ya lo'o yu; cua ndyuloo ya ji'i̱ yu lo'o cua ngua'ni ca'a̱ ya' ya ji'i̱ ycui' yu. Cua nchcui' ya lo'o cu'ma̱ cha' Jesucristo laca nu nda chaca chalyuu cucui ji'i̱ ñati̱.

² Ngula Jesucristo nde lo yuu chalyuu su ndi'i̱ ya, lo'o jua'a̱ cua na'a̱ ya ji'i̱ ycui' yu; bi' laca cha' nu ndacha' ya ji'i̱ ma̱ juani, cha' chañi tsa laca cha' bi'. Nclyu'u ya ji'i̱ ma̱ ñi'ya̱ laca cha' tyucui tyempo lu'ú Jesucristo, cha' ntucua yu ca slo ycui' Ndyosi Sti na clyo; jua'a̱ nclyu'u ya ñi'ya̱ ngua cha' na'a̱ ya ji'i̱ yu nde chalyuu re.

³ Juani culu'u ya ji'i̱ ma̱ cua ña'a̱ ca cha' nu cua na'a̱ ya, culu'u ya cua ña'a̱ ca cha' nu cua ndyuna ya. Chañi laca cha' stu'ba ntsu'u tyiquee na lo'o ycui' Ndyosi Sti na, jua'a̱ lo'o Jesucristo nu sca ti Sñi' ycui' Ni. Lo'o juani cua nti' ya cha' stu'ba ti caca tyiquee ma̱ lo'o ya;

⁴ bi' cha' nscua ya quityi re, cha' lcaa tsa̱ tso'o ti tyi'i̱ tyiquee na.

Xcui' lubii tsa cresiya ji'i̱ ycui' Ndyosi

⁵ Nde culu'u ya ji'i̱ ma̱ cha' nu cua nda Jesucristo lo'o ya: Ñi'ya̱ nti' sca xee nu ndubi tsa ña'a̱, jua'a̱ nti' ycui' Ndyosi si tyu'u tucua Ni slo na; xcui' lubii tsa cresiya ji'i̱ Ni, cha' ne' cresiya ji'i̱ ycui' Ni ná ntsu'u su talya ña'a̱, ná ntsu'u cha' cuxi tsiya' ti.

⁶ Cha' cuiñi laca nu nda na si ñacui̱ na cha' stu'ba ntsu'u tyiquee na lo'o ycui' Ndyosi, lo'o li' ña'a̱ ti tya ndiya ti' na cha' cuxi; ndi'i̱ na chalyuu ñi'ya̱ laca si talya tsa ña'a̱ su ndi'i̱ na li', cha' ná tso'o ndu'ni na.

⁷ Pana si lubii cresiya ji'na ñi'ya̱ lo'o lubii cresiya ji'i̱ ycui' Ni, ndu'ni na cha' tso'o li'; stu'ba ti caca tyiquee na lo'o tya'a ngusñi na cha' ji'i̱ Jesús li'. Lo'o jua'a̱ cuityi̱ Ni qui'ya nu ntsu'u ji'na, xqui'ya cha' cua ndyalú tañi Jesús Sñi' ycui' Ni lo'o ngujuii yu lo crusi.

⁸ Si ñacui̱ na cha' ná ntsu'u qui'ya ji'na tsiya' ti, na ñilo'o na ji'i̱ ycui' ca ti na li', cha' ná nchca chcui' na cha' liñi.

⁹ Pana taca jlya ti' na ji'i̱ ycui' Ndyosi cha' cua'ni clyu ti' Ni ji'na ji'i̱ qui'ya nu ntsu'u ji'na, nu lo'o ñii na ji'i̱ Ni cha' ntsu'u qui'ya ji'na. Tso'o tsa ndu'ni Ni lo'o na li'; hasta cuityi̱ Ni lcaa cha' cuxi nu ntsu'u ne' cresiya ji'na, xqui'ya cha' ngujuii Jesús lo crusi.

¹⁰ Ñi'ya̱ si cua nacui̱ na cha' na cuiñi ycui' Ndyosi, jua'a̱ ndyu'u cha' si ñacui̱ na cha' ná ntsu'u qui'ya ji'na tsiya' ti; ná ngusñi su̱u̱ cha' ji'i̱ ycui' Ndyosi ne' cresiya ji'na, si tya ñacui̱ na jua'a̱.