1 CORINTIOS 9 - Chatino Tataltepec

Ntsu'u chacuayá' ji'i̱ Pablo, cha' ycui' Ndyosi laca nu cua nda cña ji'i̱ yu

¹ Cua ntsu'u chacuayá' 'na cha' cua'ni na' cua ña'a̱ ca lo cha'. Cua ngua'a̱ loo ycui' Ndyosi 'na cha' cua'ni na' cña ji'i̱ Ni, nu lo'o na'a̱ na' ji'i̱ ycui' Jesús nu Xu'na na. Ngusñi ma̱ cha' ji'i̱ Jesús juani xqui'ya cha' ndu'ni na' cña ji'i̱ Ni,

² masi nti' xa' ñati̱ cha' si'i cña ji'i̱ Ni laca na'; pana cu'ma̱ ngu' Corinto cua nslo ma̱ 'na, cha' cua nda na' cha' ji'i̱ Jesús lo'o ma̱ tya clyo. Chañi cha' bi'. Taca jlo ti' ngu' cha' jua'a̱ laca cña nu ndyu'ni na', lo'o ña'a̱ ngu' ñi'ya̱ ndyaca cha' bi' lo'o ma̱.

³ Ndi'ya̱ nxacui̱ na' cha' ji'i̱ ngu' nu lo'o nchcui' chu̱' ti ngu' 'na:

⁴ Ntsu'u chacuayá' 'na cha' xñi na' xi na cacu na' lo'o na co'o na' caya' lo cña nu ndyu'ni na', ni na' ji'i̱ ngu' bi'.

⁵ Lo'o jua'a̱ taca caja clyo'o na' lo'o sca nu cuna'a̱ nu tya'a ngusñi na' cha' ji'i̱ Jesús, cha' tya'a̱ lo'o na' ji'i̱ tyucui̱i̱ lcaa su ndya'a̱ na' tyijyu', ni na' ji'i̱ ngu' bi'. Jua'a̱ ndu'ni tya'a ndya'a̱ na' cña, masi tya'a ycui' nu Xu'na na, masi Pedro, ntsu'u clyo'o ngu' bi'.

⁶ Si'i sca ti na' lo'o Bernabé nu nga'a̱ cha' cua'ni lye ya cña cha' caja na cacu ya, laja lo'o nclyu'u ya cha' ji'i̱ ycui' Ndyosi ji'i̱ ngu'.

⁷ ¿Ha ná jlo ti' ma̱ ñi'ya̱ ndu'ni ñati̱ chalyuu cha' tyiji̱ yu'u ji'i̱ ngu' chalyuu? Ñi'ya̱ nti' ngu' sendaru ni, ná ndya'a̱ bi' cusu̱u̱ laja ti, ntsu'u nu nda caya' ji'i̱ ngu'. Lo'o jua'a̱ ñati̱ nu ntsu'u cña ne' quixi̱' ni, ndyiji na cacu ngu' lo na nu ntyaa ngu'; nu ngu' nu ndya'a̱ lo'o scu̱' ñati̱ ni, ndyi'yu ngu' styi' nu ndyu'u ji'i̱ scu̱' ngu'. Bi' cha' ntsu'u chacuayá' ji'i̱ ya cha' caja na nu tyiji̱ yu'u ji'i̱ ya chalyuu. Jua'a̱ ni na' ji'i̱ ngu' bi'.

⁸ Nchcui' na' re ñi'ya̱ nu laca cha' ji'i̱ ñati̱ chalyuu, ñi'ya̱ nu ndyiji na ndacu ngu'; pana la cui' jua'a̱ nchcui' cha' nu nscua lo quityi ji'i̱ ycui' Ndyosi, cha' jo'ó nu nguscua Moisés tya sa'ni.

⁹ Ndi'ya̱ nchcui' lo quityi bi': “Ná xca̱' ma̱ tu'ba toro lo'o nxatá ni' nguata trigo cha' tyu'u si'yu bi'”. Jua'a̱ cha' nchcui' lo quityi bi'. Ni si'i cha' ji'i̱ toro ti nchcui' ycui' Ndyosi, cha' tya'na ti' Ni ji'i̱ ni' cha' caja xi tyempo cacu ni';

¹⁰ lo'o cha' ji'i̱ ya nchcui' Ni, ji'i̱ cuare nu ndya'a̱ ya tyijyu' cha' chcui' ya cha' ji'i̱ ycui' Ndyosi lo'o ñati̱. Ñi'ya̱ nu laca ji'i̱ ngu' nu nclya'a yuu lo'o toro, ñi'ya̱ nu laca ji'i̱ ngu' nu ndu'ni clacua, jua'a̱ laca ji'i̱ ya; lo'o cuare ntsu'u chacuayá' ji'i̱ ya cha' jña ya xi cha' tso'o nu ntsu'u ji'i̱ ngu' nu lo'o cua ndye cña ji'i̱ ya.

¹¹ Nu cña nu ndyu'ni ya cuentya ji'i̱ ma̱ ni, si'i sca cña nu taca ña'a̱ ma̱ ji'i̱ laca bi', ne' cresiya ji'i̱ ma̱ ndyaca cña bi'; pana taca tyi'u ti' ma̱ ji'i̱ ya, na laca nu lyiji ji'i̱ ya cha' tyiji̱ yu'u ji'i̱ ya nde chalyuu.

¹² Xa' la tya'a ndyu'ni ya cña ndyiji na laca nu lyiji ji'i̱ ngu' nu lo'o nda ma̱ xi xcaya' ngu' bi'. ¿Ha ná tso'o si la cui' ti cha' caja ji'i̱ ya, ñi'ya̱ nu ndyiji ji'i̱ ngu' bi'? Tsa bi' ti cha', ná ndijña ya cha' tso'o bi' ji'i̱ ma̱ tsiya' ti. Ndalo tsa ya ji'i̱ cua ña'a̱ ca cha' ti'í nu ndyacua ji'i̱ ya, cha' ná nti' ya tsiya' ti tacu̱' ya ji'i̱ cha' tso'o ji'i̱ Cristo nu nchcui' ya lo'o ma̱, cha' ná cuna ñati̱ ji'i̱ cha' bi'.

¹³ Ná tyiquee' cua jlo ti' ma̱ ñi'ya̱ nu ndyaca ji'i̱ nu laca cña ne' laa tlyu ji'i̱ ngu' judío. ¿Ha si'i la cui' ti ne' laa bi' ndyiji na ndacu ngu' bi'? Ndyiji na cacu sti jo'ó ne' laa bi' nu tsa cu' ti nxñi msta̱ nu ndya'a̱ lo'o ngu' ne' laa, cha' taqui̱ lyiji ngu' ji'i̱ lo mesa ji'i̱ ycui' Ndyosi; sa yu'be ti msta̱ bi' caja ji'i̱ sti jo'ó bi' cha' cacu ngu'.

¹⁴ Lo'o cuare, lo'o ncliji chalyuu ji'i̱ ya su ndya'a̱ ya tyijyu' cha' nchcui' ya cha' tso'o nu ji'i̱ ycui' Ndyosi lo'o ñati̱, tso'o si ta ngu' xi na tyiji̱ yu'u ji'i̱ ya chalyuu.

¹⁵ Pana ná ngüijña na' na cacu na' ji'i̱ ngu' tsiya' ti lcaa se'i̱ su ndya'a̱ na'. La cui' jua'a̱ ná nscua na' quityi re cha' jña na' na cacu na' ji'i̱ cu'ma̱, cha' ná xñi na' na nu ta ngu' 'na masi cajaa ycui' na'; tso'o la nti' na' cha' ndu'ni na' cña re jua'a̱ ti, ná lo'o caya'.

¹⁶ Ná tso'o si tyucuaa ti' na' ji'i̱ ma̱ xqui'ya cha' ndya'a̱ na' nchcui' na' cha' tso'o nu ji'i̱ Jesús lo'o ñati̱, na cua ngua'a̱ loo Ni 'na cha' cua'ni na' cña bi'. Tlyu tsa cha' ti'í caca 'na si ná chcui' na' cha' ji'i̱ Jesús lo'o ñati̱.

¹⁷ Nu lo'o cua'ni na' sca cña cuentya 'na ti, ndu̱ ti' na' cha' caja xcaya' na' li'. Pana xa' ña'a̱ cña laca cña nu nda Ni 'na; na cua ndyanu cña bi' 'na cha' bi' ti cña cua'ni na', cha' cua ndatsaa Ni 'na cha' cua'ni na' ji'i̱. Bi' cha' ndyu'ni na' cña bi'.

¹⁸ ¿Ha ná caja xcaya' na' li'? Chañi cha' caja bi' 'na, pana xa' lo na laca bi' li'; laca cha' tso'o tsa ntsu'u tyiquee na' nu lo'o nchcui' na' cha' tso'o ji'i̱ Jesús lo'o ñati̱. Bi' cha' tso'o tsa nti' na', masi ná nda ngu' xcaya' na'. Ná nti' na' jña na' xcaya' na' ji'i̱ ma̱, masi ntsu'u chacuayá' cha' jña na' cha' bi' ji'i̱ ma̱, laja lo'o ndyu'ni na' cña ji'i̱ ycui' Ni.

¹⁹ Ntsu'u chacuayá' cua'ni na' ni cña laca nu nti' na' cua'ni na'. Ná tucui ndatsaa 'na cha' cua'ni na' cña ji'i̱ ngu' nquicha'; pana nti' na' cha' quiña'a̱ la ñati̱ xñi ngu' cha' ji'i̱ Cristo, bi' cha' nda na' chacuayá' ji'i̱ cua ña'a̱ ca ngu' cha' tatsaa ngu' 'na.

²⁰ Nu lo'o nga'a̱ na' slo ngu' judío, li' ndyu'ni na' ñi'ya̱ nu ndu'ni lcaa ngu' judío, cha' xñi la ngu' judío cha' ji'i̱ Cristo. Nchcui' na' cha' ji'i̱ Jesús lo'o ngu' bi', bi' cha' ñi'ya̱ nu ndu'ni ngu' judío lo'o tya'a ngu', jua'a̱ ndu'ni na' slo ngu', masi nga'aa ntsu'u cha' taquiya' na' ji'i̱ cha' cusu' ji'i̱ ngu' bi', nu cña nu nguscua jyo'o Moisés lo quityi cha' cua'ni ngu' bi' tya sa'ni la. Pana laca cha' cua nti' na' cha' quiña'a̱ la ñati̱ bi' xñi ngu' cha' ji'i̱ Cristo.

²¹ Ngu' xa' tsu' ni, ná nga'a̱ cha' taquiya' ngu' ji'i̱ cha' nu laca ji'i̱ ngu' judío. Bi' cha' ñi'ya̱ si laca na' ñati̱ tya'a ngu', jua'a̱ ndi'i̱ na' lo'o ngu' xa' tsu' li', cha' tso'o la xñi ngu' bi' cha' ji'i̱ Cristo. Laja li' ndaquiya' na' lcaa cha' nu nda ycui' Ndyosi Sti na lo'o na, cha' jua'a̱ nga'a̱ cha' caca si taquiya' na ji'i̱ Cristo.

²² Lo'o li', lo'o ndi'i̱ na' lo'o ngu' tya'a ngusñi na cha' ji'i̱ Jesús nu tya lyiji jlya tso'o ti' ngu' cha' ji'i̱ Jesús, ñi'ya̱ si stu'ba ti cha' laca 'na lo'o ngu', jua'a̱ ndi'i̱ na' lo'o ngu' li', cha' cuna la ngu' bi' cha' ji'i̱ Cristo. Lcua ti lo cña cua'ni na' cha' tyaja'a̱ la ñati̱ xñi ngu' cha' ji'i̱ Cristo.

²³ Jua'a̱ ndu'ni na' lcua ti se'i̱ su ndya'a̱ na', cha' nchcui' na' lo'o ngu' cha' tso'o ji'i̱ Jesús. Cua nti' na' cha' ñi'ya̱ ndyaca tso'o ne' cresiya 'na xqui'ya cha' bi', la cui' jua'a̱ caca tso'o ne' cresiya ji'i̱ lcaa ñati̱.

²⁴ Ndi'ya̱ laca cña nu nda Ni 'na, ñi'ya̱ ndyaca lo'o cua'ni ngu' sca posta lo'o nxna ngu'. Tyu̱u̱ tya'a ngu' xna ngu' stu'ba ti li', masi sca ti yu tyiji̱loo ji'i̱ ca ta'a ngu' su tye cha' bi'. La cui' jua'a̱ caca lo'o na, nga'a̱ cha' tsa cu' ti cua'ni na cña ña'a̱ cuayá' nu tye chalyuu ji'na.

²⁵ Lo'o cua xna ti ngu' sca posta ni, ná taquiya' ngu' ji'i̱ sca cha' nu cua'a ji'i̱ ngu' cha' ná xna tso'o ngu'; talo ngu' ña'a̱ cuayá' nu tyiji̱loo ngu' ji'i̱ tya'a ngu', cha' cua'ni ngu' ngana. Su cua ndye, li' caja xi cha' tso'o ji'i̱ ngu' nu ngua'ni ngana bi', masi xti ti tyempo talo cha' bi', pana xa' ña'a̱ cha' ndyaca lo'o na. Lye tsa ndyu'ni cña ti' na lcaa hora, ña'a̱ cuayá' ta Ni sca cha' tso'o ji'na, sca cha' nu ná nga'a̱ cha' tye tsiya' ti.

²⁶ Lo'o na', ñi'ya̱ laca sca ñati̱ nu nxna posta, jua'a̱ ndu'ni na' nde chalyuu; liñi tsa nxna na' ña'a̱ cuayá' tyalaa na' su ndye tyucui̱i̱. La cui' ñi'ya̱ laca si nxu̱u̱ tya'a na' lo'o ndacu̱' ti na', ná nducu̱ na' ndacu̱' na' lo cui'i̱ ti.

²⁷ Nchcube' na' ji'i̱ ycui' ca na', cha' talo chalyuu 'na, cha' ná xtyanu ti'i̱ Ni 'na tsiya' ti. Quiña'a̱ tsa cha' cua ngulu'u na' ji'i̱ xa' ñati̱ cuentya ji'i̱ ycui' Ni, lo'o jua'a̱ ntsu'u cha' taquiya' ycui' na' ji'i̱ cha' bi'.