1 CORINTIOS 8 - Chatino Tataltepec

¿Ha cacu na sca na nu cua nscua slo jo'ó?

¹ Nde scua na' chaca cha' nu tsaa slo ma̱, cha' ca cuayá' ti' ma̱ ni cha' ndyu'ni ma̱ lo'o ndacu ma̱ msta̱ nu cua ngusta ngu' slo jo'ó tya clyo. Ntsu'u cu'ma̱ nu ñacui̱ ma̱: “Cua jlo ti' ya, cua nda ya cuentya cha' ná ntsu'u cha' tacati ji'i̱ jo'ó jua; taca cacu ya msta̱ bi'”, ñacui̱ ma̱. Chañi tsa cha' bi'. Pana tyixi cua'ni na lo'o tya'a ñati̱ na nu lo'o chcui' na jua'a̱. Sca ti si ntsu'u tyiquee na ña'a̱ na ji'i̱ tya'a ñati̱ na, si cube ti' na ji'i̱ ngu' bi', ca li' taca xtyucua na ji'i̱ ngu'.

² Nu lo'o ndu'ni na lo'o ngu' cha' cua jlo ti' na sca cha', cha' cua laca ngua tsa'a̱ na sca cha', cha' tyixi nda na lo'o ngu' li'. Laca bi' ñi'ya̱ si ná jlo ti' na tsiya' ti, si bilya ca tsa'a̱ na tso'o ti sca cha' nu nga'a̱ tsa cha' ca tsa'a̱ na.

³ Pana si tso'o ntsu'u tyiquee na ña'a̱ na ji'i̱ ycui' Ndyosi, tyuloo Ni ji'na li', tyu'u cha' ji'i̱ Ni lo'o na li'.

⁴ Tso'o lacua. Ta na cha' lo'o tya'a na si tso'o cuentya ji'i̱ ycui' Ndyosi cha' cacu na msta̱ nu cua ngusta ngu' slo jo'ó tya clyo. Cua jlo ti' na ñi'ya̱ nu laca sca lcui̱ jo'ó, lcui̱ ti laca bi'. Ná tyaca̱' ña'a̱ na sca na nu lu'ú, ñi'ya̱ nu ña'a̱ lcui̱ jo'ó bi'. Sca ti ycui' Ndyosi Sti na ntsu'u chalyuu.

⁵ Chañi cha' quiña'a̱ tsa jo'ó ntsu'u chalyuu, lo'o jua'a̱ nde cua̱ ntsu'u xa' la jo'ó, ntucua bi' cuentya ji'i̱ ñati̱ chalyuu. Ndu'ni ngu' ji'i̱ jo'ó bi', cha' laca bi' jo'ó cuentya ji'i̱ ngu'; ndu'ni ngu' cha' laca bi' xu'na ngu'.

⁶ Pana nu ñati̱ tya'a ntsu'u cha' ji'na lo'o Jesús, sca ti ycui' Ndyosi Sti na jlya ti' na ji'i̱ tsiya' ti; la cui' ti jua'a̱ sca ti ycui' Jesucristo nu Xu'na na ngusñi na cha' ji'i̱. Ngüiñá Ni tyucui ña'a̱ chalyuu, xqui'ya Jesús ndya' lcaa lo na; cuentya ji'i̱ ycui' Jesús laca lcaa lo na nu ntsu'u chalyuu, lo'o jua'a̱ xqui'ya ycui' Jesús ndi'i̱ na chalyuu.

⁷ Pana ná lcaa ñati̱ nchca cuayá' ti' cha' bi'. Ntsu'u ngu' tya'a ngusñi na cha' ji'i̱ Jesús nu ná nchca cacu sca na nu cua nscua slo jo'ó tya clyo. Nu ngua tya sa'ni la, cua ngui'i̱ tsa ngu' bi' ji'i̱ jo'ó bi'; lo'o juani ña'a̱ ti tya ntsu'u ti' ngu' bi' cha' na cacu jo'ó laca na nu cacu ngu' bi'. Bi' cha' ná ndalo ngu' bi' tsiya' ti cha' cacu ngu' cuaña' nu ngua msta̱ bi'; cha' cuxi laca cha' bi' cuentya ji'i̱ ngu' bi'.

⁸ Masi jlo ti' na cha' sca na cacu na ni, si'i bi' laca nu ndu'ni cha' tso'o la na cuentya ji'i̱ ycui' Ndyosi. Si'i na caca tso'o la na, masi cacu na ji'i̱; lo'o jua'a̱ ná sca cha' caca ji'na, masi ná cacu na ji'i̱.

⁹ Bi' cha' cui'ya ma̱ cuentya ñi'ya̱ cua'ni ma̱ slo ngu' nu tya nclyacua tsa ti' bi'. Ntsu'u chacuayá' ji'na cha' cacu na cua ña'a̱ ca na tu'ni; pana ná tyiquee' tyu'utsu' ngu' bi' ji'i̱ tyucui̱i̱ liñi si ná tso'o ti cua'ni ma̱ slo ngu', si cacu ma̱ msta̱ nu nscua slo jo'ó tya clyo.

¹⁰ Ndi'ya̱ cha' caca lo'o ñati̱ nu tya quiña'a̱ tsa nclyacua ti' ji'i̱ na nu nscua slo jo'ó bi' li'. Nti' ngu' cha' cua jlo tso'o ti' ma̱ lcaa cha' ji'i̱ Jesús. Nu lo'o ña'a̱ ngu' ji'i̱ ma̱ cha' nga'a̱ ma̱ slo jo'ó, ndacu ma̱ na laca nu nscua slo jo'ó, lo'o ngu' cua'ni ngu' ñi'ya̱ nu ndyu'ni ma̱ nti' ngu' li', masi cha' cuxi laca bi' cuentya ji'i̱ ngu'.

¹¹ Lo'o jua'a̱ caca cuxi ji'i̱ ngu' li', chcuna' tyucui̱i̱ ji'i̱ ngu' xqui'ya cu'ma̱ nu cua jlo ti' ma̱ cha' liñi ji'i̱ ycui' Ndyosi. Tso'o la tyi'u ti' ma̱ cha' lo'o xqui'ya ngu' bi' ngujuii Cristo.

¹² Cha' cuxi ndyu'ni ma̱ lo'o ycui' Cristo li', xqui'ya cha' ngua'ni ma̱ cha' cuxi bi' lo'o ngu' tya'a ngusñi ma̱ cha' ji'i̱ Ni; na ndyu'ni ñu'u̱ ma̱ ji'i̱ ycui' ngu' li', xqui'ya cha' tya nclyacua tsa ti' ngu' bi'. Ná talo ngu' bi' si ña'a̱ ngu' cha' ndu'ni ma̱ jua'a̱.

¹³ Lo'o jua'a̱ na', tso'o la masi ná cacu na' cuaña' nu cua nscua slo jo'ó, cha' jua'a̱ ná cua'ni ngu' tya'a na' cha' cuxi xqui'ya na' li'. Ná nti' na' cha' tyu'utsu' ngu' tya'a na' ji'i̱ tyucui̱i̱ liñi.