1 CORINTIOS 7 - Chatino Tataltepec

¿Ha tso'o la si caja clyo'o na?

¹ Juani scua na' xi cha', cha' xacui̱ na' cha' ji'i̱ ma̱ cuentya ji'i̱ quityi nu nguscua ma̱, nu ndyalaa slo na' tsubi' ti. Nu na ngu' qui'yu, tso'o la si ná caja clyo'o na; tyanu na jua'a̱ ti, nti' na'.

² Pana nde chalyuu su ndi'i̱ na, ntsu'u tsa cha' suba' nu ndu'ni ngu' lo'o ngu' cuna'a̱; bi' cha' ni na' ji'i̱ ma̱ cha' tso'o la si lcaa ñati̱ caja clyo'o ngu', caja sca nu cuna'a̱ ji'i̱ sca nu qui'yu, lo'o jua'a̱ nu cuna'a̱ caja qui'yu ji'i̱.

³ Nga'a̱ cha' tyi'i̱ tso'o nu qui'yu lo'o clyo'o yu, ñi'ya̱ nu nga'a̱ cha' caca; lo'o jua'a̱ nu cuna'a̱ ni, nga'a̱ cha' tyi'i̱ tso'o lo'o clyo'o ñi'ya̱ nu nga'a̱ cha' caca.

⁴ Bi' cha' nga'aa culo sca nu cuna'a̱ cña ji'i̱ ycui' ca si cua ngujui clyo'o, cha' nu qui'yu laca loo ji'i̱; lo'o jua'a̱ nu qui'yu, nga'aa si'i ycui' ca yu nu culo cña ji'i̱ yu lo'o cua ngujui clyo'o yu, cha' nu cuna'a̱ laca loo ji'i̱ yu li'.

⁵ Ná tso'o si tyeje tacui tyu̱u̱ tsa̱ nu ná ndi'i̱ ma̱ lo'o clyo'o ma̱; sca ti si tyu'utsu' ma̱ xi ji'i̱ tya'a ma̱ cha' caja xi tyempo chcui' ma̱ lo'o ycui' Ndyosi Sti ma̱. Lo'o nteje tacui cha' bi', xa' tyi'i̱ ma̱ lo'o clyo'o ma̱ li', ñi'ya̱ nu ndi'i̱ ti ma̱. Si ná cua'ni ma̱ jua'a̱, ná tyiquee' quiñu'u̱ cha' ji'i̱ ma̱ lo'o clyo'o ma̱ cha' ná nchca talo ma̱ tyu̱u̱ tsa̱. Lo'o li' cua'ni nu xña'a̱ ngana ji'i̱ ma̱.

⁶ Ná ñacui̱ ma̱ cha' nclyo na' cña ji'i̱ ma̱ cha' caja clyo'o ma̱; nde laca sca cha' nu nda ti na' lo'o ma̱,

⁷ cha' cuentya jna' tso'o la si tyanu ngu' ycui' ti ngu' ñi'ya̱ nu ndi'i̱ na', jua'a̱ nti' na'. Pana xi xa' ca ña'a̱ ndu'ni ycui' Ndyosi lo'o scaa ñati̱, cha' cua nda ycui' Ndyosi chacuayá' ñi'ya̱ tyi'i̱ scaa na; tsaca lo ña'a̱ ndi'i̱ tsaca ñati̱, chaca lo ña'a̱ ndi'i̱ chaca ñati̱, tsa ña'a̱ chacuayá' nu nda Ni ji'na.

⁸ Nde laca cha' nu ta na' lo'o cu'ma̱ nu bilya caja clyo'o ma̱, cuati jua'a̱ lo'o ngu' tya'a na nu ndyanu ti'i ti: tso'o la caca ji'i̱ ma̱ si tyi'i̱ ma̱ ñi'ya̱ nu ndi'i̱ ti na', nti' na'.

⁹ Sca ti si ná talo ma̱ tyi'i̱ ma̱ jua'a̱ ti, tso'o la si caja clyo'o ma̱ li', cha' ná tso'o si quiñu'u̱ ti' na cha' xcui' ndijña tyiquee na ji'i̱ ñati̱ nu caca clyo'o na.

¹⁰ Nu cu'ma̱ nu ndi'i̱ lo'o clyo'o ma̱ ni, ndi'ya̱ cña ntsu'u cha' cua'ni ma̱; ni si'i cuentya jna' ngulo na' cña re ji'i̱ ma̱, ndi'ya̱ cña nclyo ycui' Ndyosi nu Xu'na na ji'i̱ ma̱: Ná xtyanu ti'i̱ cu'ma̱ ngu' cuna'a̱ ji'i̱ clyo'o ma̱.

¹¹ Si cua nguxtyanu ma̱ ji'i̱ nu qui'yu, nga'a̱ cha' tyanu ma̱ ycui' ti ma̱, sca ti si tyaja'a̱ ma̱ tyaa ma̱ lo'o clyo'o ma̱ chaca quiya'. Lo'o jua'a̱ cu'ma̱ ngu' qui'yu, ná ntsu'u chacuayá' ji'i̱ ma̱ cha' culo'o ma̱ ji'i̱ clyo'o ma̱.

¹² Nu juani ta na' sca cha' lo'o cu'ma̱ ngu' qui'yu tya'a ngusñi na cha' ji'i̱ Jesús, nu ntsu'u clyo'o ma̱ nu tya lyiji xñi cha' ji'i̱ Jesús; si tyaja'a̱ bi' tyi'i̱ bi' ñi'ya̱ nu ndi'i̱ ti lo'o ma̱, tso'o li'. Ná ntsu'u chacuayá' ji'i̱ ma̱ cha' culo'o ma̱ ji'i̱ nu cuna'a̱ bi' cha' tyaa ngu'. Na' laca̱ nu ngulo na' cña bi' ji'i̱ ma̱; masi ná ndu̱ ycui' Ndyosi lo'o na', pana sca ti cuayá' ndyu'u cha' bi'.

¹³ La cui' ti cha' ta na' lo'o cu'ma̱ ngu' cuna'a̱ tya'a na nu ntsu'u clyo'o ma̱ nu bilya xñi cha' ji'i̱ Jesús, tya'a cha' nu ngusñi ma̱: ná tso'o culo'o ma̱ ji'i̱ nu qui'yu clyo'o ma̱ si tya ndi'i̱ tso'o ti ngu' lo'o ma̱.

¹⁴ Ntucuá ycui' Ndyosi ji'i̱ cha' nu nchcui' ngu' cuna'a̱ bi' lo'o ycui' Ni cuentya ji'i̱ clyo'o ngu', tso'o cha' bi' cuentya ji'i̱ ycui' Ndyosi cha' clyo'o laca ngu'. Lo'o jua'a̱ nu ngu' cuna'a̱ nu tya lyiji xñi cha' ji'i̱ Jesús, tya'a cha' nu cua ngusñi clyo'o, ntucuá ycui' Ndyosi ji'i̱ cha' nu nchcui' nu qui'yu bi' lo'o ycui' Ni cuentya ji'i̱ clyo'o ngu'; tso'o cha' bi' cuentya ji'i̱ Ni cha' clyo'o laca ngu'. Nga'a̱ cha' caca jua'a̱ xqui'ya nu sube sñi' ma̱. Nga'aa laca ngu' sube bi' ñi'ya̱ nu laca sñi' xa' ñati̱ nu ná ndaquiya' ji'i̱ ycui' Ndyosi tsiya' ti, cha' cua ngusñi Ni cuentya ji'i̱ nu sube bi' xqui'ya cu'ma̱.

¹⁵ Sca ti cha' ji'i̱ ñati̱ nu ná ntaja'a̱ xñi cha' ji'i̱ Jesús bi', si cua nti' ngu' xtyanu ngu' ji'i̱ clyo'o ngu', si lya' ti' ngu' ji'i̱ clyo'o ngu' cha' ngusñi clyo'o ngu' cha' ji'i̱ Jesús, li' ta ma̱ chacuayá' cha' tyaa ngu' nu ná ngusñi cha' ji'i̱ Jesús bi'. Nu ngu' tya'a na nu ngusñi cha' ji'i̱ Jesús, masi qui'yu, masi cuna'a̱, cua ntsu'u chacuayá' ji'i̱ ma̱ cha' xtyanu ma̱ ji'i̱ clyo'o ma̱, sca ti si jua'a̱ ti taca tyi'i̱ ma̱ ti̱ ti chalyuu. Cua nti' ycui' Ndyosi cha' tyi'i̱ tso'o na chalyuu.

¹⁶ Cu'ma̱ ngu' cuna'a̱, ná tyiquee' xñi clyo'o ma̱ cha' ji'i̱ Jesús xqui'ya cu'ma̱ cha' jlya ti' ma̱ ji'i̱ Jesús; clyaá yu bi' ji'i̱ nu xña'a̱ li'. La cui' jua'a̱ cu'ma̱ ngu' qui'yu, ná tyiquee' xñi clyo'o ma̱ cha' ji'i̱ Jesús xqui'ya cha' jlya ti' ma̱ ji'i̱ Jesús; clyaá cho' ji'i̱ nu cuxi li'.

Ná ndulo tsa cha' ji'i̱ ycui' Ndyosi na ca laca scaa na

¹⁷ Nu lo'o tya lyiji cusubi ycui' Ndyosi ji'na, tya li' cua laca nda Ni ji'na ñi'ya̱ nu tyi'i̱ scaa na chalyuu. Ycui' Ndyosi laca nu nda chalyuu ji'na tya clyo, lo'o jua'a̱ ycui' Ni laca nu ngusubi ji'na cha' xñi na cha' ji'i̱ Ni juani. Tya la cui' chalyuu bi' laca nu ntsu'u ji'na juani, la cui' ña'a̱ chalyuu nu ngujui ji'na tya clyo; pana juani tyucui tyiquee na ndi'i̱ na chalyuu. La cui' ti cha' nchcui' na' lo'o ngu' lcua ti quichi̱ su ndi'i̱ ngu' nu ngusñi cha' ji'i̱ Cristo.

¹⁸ Ñi'ya̱ nti' ngu' judío ni, lo'o ngusñi ngu' cha' ji'i̱ Jesús xqui'ya cha' ngusubi Ni ji'i̱ ngu', ná tso'o si caca tyuju'u ti' ngu' cha' ngusi'yu ñati̱ quiji̱ ngu' cha' laca ngu' judío; ntsu'u cha' tyanu ngu' ñi'ya̱ nu ña'a̱ ti ngu' lo'o ngua cuañi' ngu'. Ngu' xa' nasiyu̱ ni, ná ntsu'u cha' ji'i̱ ngu' cha' xi'yu quiji̱ ngu' jua'a̱, nu lo'o xñi ngu' bi' cha' ji'i̱ Jesús; ná ntsu'u cha' cua'ni ngu' ñi'ya̱ nu ndu'ni ngu' judío, tyanu ngu' ñi'ya̱ nu ndi'i̱ ti ngu' li'.

¹⁹ Ná ndu'ni cha' cuentya ji'i̱ ycui' Ndyosi, masi ngulacua̱ na jua'a̱, masi ná ngulacua̱ na jua'a̱; nu ndu'ni cha' cuentya ji'i̱ ycui' Ndyosi laca cha' cua'ni na cña nu nclyo Ni ji'na.

²⁰ Bi' cha' juani ña'a̱ ti tya nga'a̱ cha' tyi'i̱ na chalyuu, ñi'ya̱ ndi'i̱ ti na tya lo'o ngusubi Ni ji'na cha' caca na ñati̱ ji'i̱.

²¹ Ná ndu'ni cha' masi msu nu ngüi'ya ñati̱ laca ma̱ nu lo'o ngusubi Ni ji'i̱ ma̱, pana tso'o laca si caja nu ta caya' cha' tyu'u ma̱ laja ti.

²² Ñati̱ nu jua'a̱ tya ntsu'u xu'na ngu' nu lo'o cua ngusubi ycui' Ndyosi ji'i̱ ngu', juani ndi'i̱ tso'o ti ngu' bi', xqui'ya cha' cua ngusñi ngu' bi' cha' ji'i̱ Jesús; masi ña'a̱ ti tya laca ngu' ñati̱ ji'i̱ xu'na ngu', taca taquiya' ngu' bi' ji'i̱ cha' nu nchcui' ycui' Ndyosi juani. Lo'o jua'a̱ nu ngu' msu nu ndi'i̱ tso'o ti ni, lo'o cusubi Cristo ji'i̱ ngu' bi', la cui' jua'a̱ caca ngu' bi' msu ji'i̱ ycui' Ndyosi.

²³ Quiña'a̱ tsa cha' tso'o ngua'ni ycui' Ndyosi cuentya ji'na, cha' ngulaá ma̱ ji'i̱ nu xña'a̱; bi' cha' ná ta ma̱ chacuayá' ji'i̱ ñati̱ chalyuu ti nu nti' cua'a ji'i̱ ma̱ cha' ná tyi'i̱ tso'o ti ma̱.

²⁴ Cu'ma̱ tya'a ngusñi na cha' ji'i̱ Cristo, ndi'ya̱ clyacua ti' scaa ma̱: nga'a̱ cha' tyi'i̱ ma̱ chalyuu ñi'ya̱ nu ndi'i̱ ti ma̱ nu lo'o ngusubi Jesús ji'i̱ ma̱ tya clyo, ña'a̱ ti tya xñi tso'o ti ma̱ cha' ji'i̱ ycui' Ndyosi.

²⁵ Bilya ta ycui' nu Xu'na na cha' lo'o na' ñi'ya̱ cua'ni ñati̱ nu ntucua ycui' ti, si caja clyo'o ngu', si ná caja clyo'o ngu'; bi' cha' cuentya jna' ti, ta na' xi cha' lo'o ma̱. Taca xñi ma̱ cha' jna', xqui'ya cha' lo'o na' ngua'ni tya'na ti' Ni 'na; bi' cha' ndyu'ni na' cña ji'i̱ Ni.

²⁶ Lye tsa laca chalyuu juani, ndyacua tsa cha' ti'í ji'na; bi' cha' tso'o la si tyanu na ñi'ya̱ nu ndi'i̱ ti na, nti' na'.

²⁷ Si ntsu'u clyo'o ma̱, tyi'i̱ tso'o ma̱ lo'o lacua, ná culo'o ma̱ ji'i̱; si ndi'i̱ ma̱ ycui' ti ma̱, ná culana ma̱ ji'i̱ ñi'ya̱ nu caca clyo'o ma̱, nti' na'.

²⁸ Pana la cui' ti cha', si'i qui'ya laca masi caja clyo'o ma̱; lo'o jua'a̱ sca nu cuna'a̱ nu bilya caja clyo'o, si'i qui'ya laca masi caja clyo'o bi'. Tsa bi' ti cha' ndube ti' na' ji'i̱ ma̱, lcaa ña'a̱ cha' ti'í nu caca ji'i̱ ma̱ nde loo la su ndi'i̱ ma̱ chalyuu. Ná nti' na' cha' quiña'a̱ tsa cha' ti'í tyacua ji'i̱ ma̱ xqui'ya cha' ntsu'u clyo'o ma̱, xqui'ya cha' ndi'i̱ sñi' ma̱ li'.

²⁹ Cu'ma̱ tya'a ngusñi na cha' ji'i̱ Jesús, ndi'ya̱ laca cha' nu ta na' lo'o ma̱: Tya xti tya tyempo tya lijya̱ ji'na chalyuu. Bi' cha' cua'ni yala ma̱ su ndi'i̱ ma̱ chalyuu; masi ntsu'u clyo'o ma̱, si'i xcui' cha' ji'i̱ clyo'o ma̱ tyu'u tyiquee ma̱;

³⁰ masi nxi'ya ma̱, ná ñacui̱ ma̱ cha' xñi'i̱ ti' ma̱; masi nxtyí ma̱, ná ñacui̱ ma̱ cha' chaa tsa ti' ma̱; masi cui'ya ma̱ sca yu'ba, ná culacua ti' ma̱ cha' tsa cu' ti na ji'i̱ ma̱ laca bi';

³¹ masi ntsu'u tsa cha' tso'o ji'i̱ ma̱ nde chalyuu, ná culiji tsa ma̱ tyempo ji'i̱ ma̱ xqui'ya cha' tso'o bi'. Cua lijya̱ ti tye tyucui ña'a̱ chalyuu, lo'o jua'a̱ lcaa na nu ntsu'u chalyuu nga'a̱ cha' tye cha' bi'.

³² Cua nti' na' cha' ná caca xa' la cha' ji'i̱ ma̱, cha' jua'a̱ xqui'ya cha' bi' ná caca cua'ni tso'o ma̱ cña. Cu'ma̱ ngu' qui'yu nu bilya caja clyo'o ma̱, taca cua'ni ma̱ tsa lo ti cña ji'i̱ ycui' Ndyosi li'; cua'ni ma̱ ñi'ya̱ nu nti' ycui' nu Xu'na na cha' cua'ni na li'.

³³ Pana nu cu'ma̱ nu ntsu'u clyo'o ma̱, cua ntsu'u tsa cña ji'i̱ ma̱ cha' caja ñi'ya̱ nu tyiji̱ yu'u ji'i̱ ma̱ chalyuu, cha' cua'ni ma̱ ñi'ya̱ nu tso'o la nti' clyo'o ma̱. Tucua lo cha' ntsu'u tyiquee ma̱ li'.

³⁴ Lo'o jua'a̱ cu'ma̱ ngu' cuna'a̱ nu ntucua ycui' ti, lo'o jua'a̱ nu cuañi' nu bilya caja clyo'o, taca cua'ni ma̱ tsa lo ti cña ji'i̱ ycui' nu Xu'na na; jua'a̱ caca ma̱ ñati̱ ji'i̱ ycui' Ndyosi tyucui ña'a̱ tsaca ma̱, tyucui tyiquee ma̱. Pana nu cu'ma̱ nu cua ntsu'u clyo'o ma̱, cua ntsu'u tsa cha' ndube ti' ma̱ cha' caja ñi'ya̱ nu tyiji̱ yu'u ji'i̱ ma̱ chalyuu, cha' cua'ni ma̱ ñi'ya̱ nu tso'o la nti' clyo'o ma̱.

³⁵ Nti' tsa na' cha' xtyucua na' ji'i̱ cu'ma̱, bi' cha' nda na' cha' bi' lo'o ma̱. Si'i na ndaca'a na' ji'i̱ ma̱ cha' ná caja clyo'o ma̱, cha' ntsu'u cha' cua'ni ma̱ ñi'ya̱ nu tso'o la cuentya ji'i̱ sa scaa ma̱. Na cua nti' na' cha' tyucui tyiquee ma̱ cua'ni ma̱ cña ji'i̱ ycui' Ndyosi, lo'o li' ná caja nu cua'ni ñu'u̱ tyucui̱i̱ nu cua ngulu'u Jesús ji'i̱ ma̱.

³⁶ Tso'o si ta sti nu cuna'a̱ cuañi' chacuayá' caja clyo'o sñi', si'i qui'ya laca bi'. Cua ndyalaa ti' cho', cua la cui' tyempo caja clyo'o. Nga'a̱ cha' cua'ni sti nu cuna'a̱ ñi'ya̱ nu tso'o la nti' yu cuentya ji'i̱ sñi'; ná ntsu'u qui'ya ji'i̱, masi caja clyo'o sñi'.

³⁷ Pana la cui' ti tso'o cua'ni xa' la ngu' tya'a ma̱, nu tso'o la nti' masi ná caja clyo'o sñi' tsiya' ti. Ná tso'o si tatsaa ngu' ji'i̱ sca ñati̱ cha' ta ji'i̱ sñi' cha' caja clyo'o lo'o sñi' ngu'. Ntsu'u chacuayá' ji'i̱ sca ñati̱ cha' cua'ni ñi'ya̱ nu tso'o la nti' yu cuentya ji'i̱ sñi' yu.

³⁸ Jua'a̱ laca cha' cuentya ji'i̱ nu cuna'a̱ cuañi' tya'a ma̱; tso'o si ta ma̱ ji'i̱ sñi' ma̱ cha' caja clyo'o lo'o xa' ñati̱, lo'o jua'a̱ sca ti cuayá' tso'o ndu'ni ñati̱ nu ná nda ji'i̱, nti' na'.

³⁹ Cu'ma̱ ngu' cuna'a̱ nu cua ngujui clyo'o ma̱, ná ntsu'u chacuayá' caja clyo'o lo'o chaca ñati̱ laja lo'o tya lu'ú clyo'o ma̱. Sca ti si cua ngujuii nu qui'yu ji'i̱ ma̱, ca li' ntsu'u chacuayá' caja clyo'o ma̱ chaca quiya'. Taca caja clyo'o ma̱ li' chaca quiya' lo'o cua ña'a̱ ca nu qui'yu nu nti' ma̱, sca ti si lo'o yu bi' laca ñati̱ tya'a ngusñi na cha' ji'i̱ Jesús.

⁴⁰ Pana nti' na' cha' tso'o la tyu'u tyiquee ma̱ si ná caja clyo'o ma̱, si tyanu ma̱ ycui' ti ma̱. Jua'a̱ nclyacua ti' na', cha' Xtyi'i ycui' Ndyosi nacui̱ 'na cha' chcui' na' jua'a̱, nti' na'.