1 CORINTIOS 6 - Chatino Tataltepec

Nu lo'o ntsu'u cha' cusu̱u̱ ji'na lo'o tya'a ñati̱ na

¹ Cu'ma̱ tya'a ngusñi na cha' ji'i̱ Jesús, nu lo'o ndyaca sca cha' cusu̱u̱ ji'i̱ ma̱ lo'o tya'a ñati̱ ma̱, ¿ha tso'o la cha' ndya'a̱ ma̱ slo bese, nti' ma̱? ¿Ha tso'o nti' ma̱ cha' ndya'a̱ ma̱ slo ñati̱ nu ná ndaquiya' ji'i̱ ycui' Ndyosi tsiya' ti? ¿Ha ná tso'o la si tsaa ma̱ slo ngu' tya'a ngusñi ma̱ cha' ji'i̱ Jesús? Jua'a̱ taca ca ti̱ cha' ji'i̱ ma̱ lo'o tya'a ma̱ li'.

² Cua jlo ti' ma̱ cha' cua nscua cha' ycui' na cua'ni cuayá' na ji'i̱ lcaa ñati̱ chalyuu lo'o cua tye ti cha', cha' cua ntsu'u cha' ji'na lo'o ycui' Ndyosi. Si jua'a̱ caca cña nu cua'ni ma̱ ca tiya' la, ¿ha ná caca ji'i̱ ma̱ cua'ni cuayá' ma̱ ji'i̱ sca cha' xca ti nde chalyuu juani?

³ Lo'o jua'a̱ nu ngu' xca̱ ji'i̱ ycui' Ndyosi ca nde cua̱, nda ma̱ cuentya cha' lo'o ngu' bi' nga'a̱ cha' cua'ni cuayá' na ji'i̱; bi' cha' ycui' ca na taca xquiñi na sca cha' nu ndyaca ji'na lo'o tya'a na nde chalyuu.

⁴ Lo'o ndyaca sca cha' cusu̱u̱ ji'i̱ ma̱ lo'o tya'a ma̱, ná tso'o tsaa lo'o ma̱ ji'i̱ tya'a ma̱ cha' caca cuayá' ji'i̱ ma̱ slo xa' ñati̱ nu ná stu'ba cha' ji'i̱ lo'o tya'a ngusñi ma̱ cha' ji'i̱ Jesús.

⁵ Nscua na' cha' re cha' caca tyuju'u ti' ma̱ slo ycui' Ndyosi. ¿Ha ná ntsu'u ni tsaca ngu' tya'a ma̱ nu nchca cuayá' ti' ñi'ya̱ caca xquiñi cha' ji'i̱ ma̱ lo'o tya'a ma̱?

⁶ Pana xa' tsa ña'a̱ ndu'ni ma̱ ca jua. Masi ñati̱ tya'a ngusñi ma̱ cha' ji'i̱ Jesús, ndya'a̱ lo'o ma̱ ji'i̱ ca slo ngu' nu ná ndaquiya' ji'i̱ ycui' Ndyosi tsiya' ti, cha' cua'ni cuayá' ngu' bi' ji'i̱ ngu' tya'a ma̱.

⁷ Nu lo'o ntsu'u cha' cusu̱u̱ ji'i̱ ma̱ lo'o tya'a ma̱, li' hora ti caca cuayá' ti' na cha' tya lyiji xñi tso'o ma̱ cha' ji'i̱ Jesús. ¿Ha ná tso'o la, masi ta ma̱ chacuayá' cha' caca cha' cuxi bi' ji'i̱ ma̱ jua'a̱ ti? ¿Ha ná tso'o la, masi cuaana ngu' cha' tso'o nu ntsu'u ji'i̱ ma̱ jua'a̱ ti?

⁸ Pana si'i na tso'o la ndu'ni ma̱; cha' cuxi ndyu'ni ma̱ lo'o ycui' ngu' tya'a ngusñi ma̱ cha' ji'i̱ Jesús, hasta ntyucuaana ma̱ na nu ntsu'u ji'i̱ tya'a ma̱.

⁹ Jlo ti' na cha' ná lo'o ñati̱ cuxi taca tsaa ca su tlyu ca su laca ycui' Ndyosi loo. Tso'o si liñi tsa caca cuayá' ti' ma̱ cha' ná tsaa ngu' cuxi ca su tso'o bi': ñati̱ nu suba' tsa ndu'ni lo'o tya'a, lo'o jua'a̱ ñati̱ nu ndu'ni tlyu ji'i̱ lcui̱ jo'ó ti, lo'o jua'a̱ ñati̱ nu ntsu'u cha' ji'i̱ lo'o clyo'o xa' ñati̱, jua'a̱ nu ngu' qui'yu nu ndu'ni suba' lo'o tya'a qui'yu ti ngu',

¹⁰ lo'o jua'a̱ nu cuaana, lo'o jua'a̱ nu nxlyaá na nu ntsu'u ji'i̱ tya'a ngu', lo'o jua'a̱ nu cu'bi, lo'o jua'a̱ nu nchcui' cha' cuxi ji'i̱ tya'a ngu', lo'o jua'a̱ nu cuxi ti ndu'ni ngana ji'i̱ tya'a ngu', ná tsaa chca ñati̱ cuxi bi' ca su tso'o su ntucua ycui' Ndyosi.

¹¹ Lo'o jua'a̱ ntsu'u xi cu'ma̱ nu ngua'ni ma̱ la cui' tya'a cha' cuxi bi' tya sa'ni la; pana cua xa' ña'a̱ ndu'ni ma̱ juani, cha' cua ngüityi̱ Jesús lcaa qui'ya nu ntsu'u ji'i̱ ma̱ tya li', cua ndyatí̱ ma̱ cuentya ji'i̱ ycui' Ndyosi li'. Cua ngüiñi cha' ji'i̱ ma̱ lo'o ycui' Ndyosi nu lo'o ngusñi ma̱ cha' ji'i̱ ycui' Jesucristo nu Xu'na na, lo'o li' cua nda Ni Xtyi'i ycui' Ni cha' tyanu ne' cresiya ji'i̱ ma̱.

Ña'a̱ tsaca tyucui ña'a̱ na laca na ji'i̱ ycui' Ndyosi

¹² Ntsu'u quiya' nchcui' ñati̱: “Ntsu'u chacuayá' 'na cha' cua'ni na' cua ña'a̱ ca cha', ñi'ya̱ nu nti' na' cha' cua'ni na'”, nacui̱ ngu'. Chañi cha' ji'i̱ ngu', pana ntsu'u cha' nu cua'ni na nu ná ntsu'u su xtyucua ji'na. Lo'o na, taca ñacui̱ na cha' ntsu'u chacuayá' ji'na cha' cua'ni na ñi'ya̱ nu nti' ti na cua'ni na; pana ná tso'o si qui'i̱ tsa na ji'i̱ sca cha' nu ndu'ni na ña'a̱ cuayá' nu nga'aa caca xtyanu na ji'i̱.

¹³ Ntsu'u chaca cha' nu nchcui' ñati̱: “Taca cacu na lcua ti lo na nu nti' na cacu na”, nacui̱ ngu', “bi' cha' ntsu'u quiji̱ ne' na cha' cua'ni cha'á̱ na bi' lo'o na cacu na”, nacui̱ ngu'. Chañi cha' bi', pana sca ti cuayá' cua'ni tye ycui' Ndyosi ji'i̱ na ndacu na lo'o jua'a̱ ji'i̱ cuaña' ycui' na. La cui' jua'a̱ cua ngüiñá ycui' Ndyosi ji'i̱ tyucui ña'a̱ na lijya̱ na chalyuu, pana si'i cha' culiji ti cuaña' na lo'o ndu'ni suba' na lo'o ñati̱, si'i xqui'ya cha' bi' ngüiñá Ni ji'na; cha' caca na ñati̱ ji'i̱ ycui' Ni, cha' caca Ni nu Xu'na na, bi' cha' cua nda ycui' Ndyosi ji'na lijya̱ na chalyuu.

¹⁴ Tlyu tsa cha' ngua'ni ycui' Ndyosi lo'o Jesús nu Xu'na na lo'o ngua'ni Ni cha' cua ndyu'ú yu chaca quiya', ngulo Ni ji'i̱ yu ca su ntsiya yu ngujuii. La cui' jua'a̱ tlyu tsa cha' caca lo'o cua'ni Ni cha' tyu'ú na chaca quiya', qui'ya Ni ji'na tyaa lo'o Ni ji'na ca lo'o tye chalyuu.

¹⁵ Cristo ca ji'i̱ tyucui ña'a̱ tsaca ma̱ lacua, stu'ba ti ntsu'u cha' ji'i̱ ma̱ lo'o nu xa' la ñati̱ tya'a ngusñi na cha' ji'i̱ Cristo. Lo'o laca na ñati̱ ji'i̱ Cristo ni, ¿ha caca sa'a na ji'i̱ sca nu cuna'a̱ calle ti? Ná tso'o cua'ni na jua'a̱ tsiya' ti.

¹⁶ ¿Ha ná jlo ti' ma̱ cha' stu'ba ti tyiquee na, sca ti tañi na lo'o ñati̱ bi', si tyu'u cha' ji'na lo'o, masi sa'a ti na ji'i̱? La cui' jua'a̱ cha' nscua lo quityi cha' jo'ó nu ndi'ya̱ nchcui': “Laca nu tyucuaa ngu' bi' ñi'ya̱ si laca ngu' sca ti ñati̱”. Jua'a̱ nchcui' quityi bi'.

¹⁷ La cui' jua'a̱ caca ji'na lo'o tyu'u cha' ji'na lo'o Jesús nu Xu'na na; nchca stu'ba cha' ji'na lo'o Jesús li', cha' ntsu'u Xtyi'i ycui' Ni ne' cresiya ji'na.

¹⁸ Bi' cha' ná cua'ni suba' ma̱ lo'o xa' ñati̱. Cua ña'a̱ ca qui'ya nu ntsu'u ji'na, ná cua'ni ñu'u̱ bi' ji'i̱ ycui' na; pana lo'o cala' na ji'i̱ xa' ñati̱ nu si'i ñati̱ ji'na, ycui' ca na cua'ni ñu'u̱ na ji'na li'.

^19-20 ¿Ha ná nda ma̱ cuentya cha' tyaca'a tsa ma̱ ji'i̱ ycui' Ndyosi, xqui'ya cha' nda Ni Xtyi'i ycui' Ni nu ndyanu ne' cresiya ji'i̱ ma̱? Nga'aa si'i cuentya ji'i̱ ycui' ti ma̱ ndya'a̱ ma̱, cuentya ji'i̱ ycui' Ndyosi laca ma̱. Quiña'a̱ tsa cha' tso'o ngua'ni Ni cuentya ji'na cha' ngulaá ma̱ ji'i̱ nu cuxi, cha' laca ma̱ ñati̱ ji'i̱ ycui' Ni; bi' cha' cua'ni tlyu ma̱ ji'i̱ ycui' Ndyosi lcaa su ndya'a̱ ma̱, tyi'u ti' ma̱ ji'i̱ Ni, lo'o jua'a̱ tyucui tyiquee ma̱ cua'ni ma̱ lcaa cña nu culo ycui' Ni ji'i̱ ma̱.