1 CORINTIOS 4 - Chatino Tataltepec

Cristo laca nu nda cña bi' ji'i̱ Pablo lo'o ji'i̱ tya'a ndya'a̱ yu cña

¹ Nga'a̱ cha' tyi'u ti' ma̱ cha' cña ji'i̱ ycui' Cristo ndyu'ni ya. Na ndi'ya lo ya cña cha' culu'u ya ji'i̱ ñati̱ lcaa cha' nu cua ngulu'u ycui' Ndyosi ji'i̱ ya; sca cha' nu bilya cuna ñati̱ chalyuu tsiya' ti, bi' laca cha' nu culu'u ya ji'i̱ ngu'.

² Lo'o ñati̱ nu cui'ya loo sca cña ni, lcaa tsa̱ nga'a̱ cha' tyi'u ti' ngu' ji'i̱ lcaa cña nu culo xu'na ngu' ji'i̱ ngu'.

³ Cuentya jna', ná ntsi̱i̱ na' ji'i̱ ma̱, ná ntsi̱i̱ na' ji'i̱ cua ña'a̱ ca cha' nu chcui' ma̱ jna'; masi chcui' cua ña'a̱ ca ñati̱ chalyuu jna', ná ntsi̱i̱ na' ji'i̱ ngu' tsiya' ti. Ná sca cha' cuxi ntsu'u jna' si nti' ngu' sta ngu' qui'ya 'na, nti' na';

⁴ lo'o jua'a̱ cuentya ji'i̱ ycui' Ndyosi, ná ntsu'u cha' cuxi nu ngua'ni na', nti' na'. Pana ná ñacui̱ na' cha' ná ntsu'u cha' sta Ni qui'ya 'na tsiya' ti, sca ti ycui' Ndyosi nu Xu'na na taca cua'ni cuayá' Ni jna' ca lo'o tye chalyuu.

⁵ Lo'o jua'a̱ cu'ma̱, ná yala tsa clyacua ti' ma̱ cha' sta ma̱ qui'ya ji'i̱ sca ñati̱; jatya ma̱ ña'a̱ cuayá' ca̱a̱ ycui' nu Xu'na na, bi' laca nu cua'ni cuayá' ji'i̱ ca ta'a na. Li' culotu̱ Ni ji'i̱ lcaa cha' cuxi nu ntsu'u cuaana ti ne' cresiya ji'na, masi sca cha' nu ná nti' na cacha' na ji'i̱ tya'a ñati̱ chalyuu na. Jua'a̱ cacha' Ni lcaa cha' nu ntsu'u ne' cresiya ji'i̱ lcaa ñati̱ chalyuu, lo'o li' ta Ni nu tso'o ji'na, cua ña'a̱ ca cha' tso'o nu ñacui̱ Ni cha' tyacua ji'i̱ scaa na.

⁶ Nchcui' na' cha' bi' lo'o cu'ma̱ cha' taca tyi'i̱ tso'o ti ma̱. Cua nchcui' tsa na' ji'i̱ tyucuaa ya, na' lo'o Apolos, cha' taca culacua xi ti' ma̱ ñi'ya̱ ntsu'u cha' ji'i̱ ya; jua'a̱ caca cuayá' ti' ma̱ cha' ná tso'o xñi ma̱ xi xa' la cha', nu si'i ñi'ya̱ nu nscua lo quityi cha' ji'i̱ ycui' Ndyosi. Ná tso'o cha' chcui' tso'o ma̱ lo'o sca yu tya'a ya nu lca'a̱ tsa ma̱ ji'i̱, lo'o li' cua'ni xña'a̱ ma̱ lo'o chaca yu tya'a ya.

⁷ ¿Ni cha' laca cha' ndulo tsa cha' ji'i̱ ycui' ma̱ cuentya ji'i̱ ma̱, pana ná ndube ti' ma̱ ji'i̱ xa' ñati̱? Ycui' Ndyosi cua nda lcaa na nu ntsu'u ji'i̱ ma̱, lcaa cña nu nchca ji'i̱ ma̱; bi' cha' lacua ná ntsu'u cha' cua'ni tyucuaa ti' ma̱ ji'i̱ tya'a ma̱. Si'i xqui'ya cña nu ndyu'ni ycui' ma̱ ngutsa'a̱ chalyuu ji'i̱ ma̱, xqui'ya ycui' Ndyosi cua laca ma̱ ñi'ya̱ nu laca ma̱ juani.

⁸ Ndu'ni ma̱ cha' ndulo tsa cha' ji'i̱ ycui' ma̱, nga'aa ntsu'u na nu lyiji ji'i̱ ma̱ tsiya' ti, nti' ma̱; ndyu'ni ma̱ ñi'ya̱ nu ndu'ni ngu' culiya', ndi'i̱ ma̱ ñi'ya̱ ndi'i̱ nu laca loo chalyuu. Lo'o cuare ni, si'i ñati̱ tlyu laca ya, nti' ma̱. Pana si chañi cha' laca ma̱ loo ji'i̱ ya, ¿ha ná ta ma̱ chacuayá' masi caca stu'ba xi cha' ji'i̱ ya lo'o ma̱ li', cha' lo'o ya caca ya ñati̱ tlyu li'?

⁹ Nti' na' cha' cua nguxtyanu ycui' Ndyosi ji'i̱ cuare, masi clyo ngulo Ni cña ji'i̱ ya cha' tsaa ya tyijyu' cha' chcui' ya cha' ji'i̱ Ni; pana nu juani tyanu chu̱' la ya ji'i̱ lcaa ngu' tya'a na, ñi'ya̱ laca preso nu tyiquee' ntajatya cha' cujuii ngu' ji'i̱. Cua laca ya sca cuxe', masi ña'a̱ ñati̱ chalyuu ji'i̱ ya, masi xca̱ nu ntsu'u ji'i̱ ycui' Ndyosi nde cua̱ ña'a̱ ji'i̱ ya.

¹⁰ ¡Xqui'ya ycui' Cristo tonto tsa ya tu'ni! Lo'o cu'ma̱ ni, nti' ma̱ cha' tso'o tsa jlo ti' ma̱ cha' ji'i̱ Cristo. ¡Xti la cña nchca ji'i̱ cuare, nguula la cña nchca ji'i̱ cu'ma̱ nti' ma̱! ¡Chiya'a̱ la ndu'ni ngu' lo'o cuare tu'ni; chi̱ la ndu'ni ngu' loo cu'ma̱!

¹¹ Masi la cui' tyempo juani ti ntsu'u quiya' lo'o ná ndyiji na cacu ya, ná ndyiji na co'o ya, masi late' cusu̱ lacu' ya ntsu'u quiya'; ntyiji'i̱ ngu' ji'i̱ ya, ni ná ntsu'u tyi cua, xcui' na ndya'a̱ yu'u ti ya.

¹² Ti'i̱ tsa cña nu ndu'ni ya cha' caja ñi'ya̱ nu tyiji̱ yu'u ji'i̱ ya chalyuu. Nu lo'o ti'í tsa cha' nu nda ngu' lo'o ya, ná nsacui̱ tu'ba ya ji'i̱ ngu'; tso'o ti nchcui' ya lo'o ngu' li'. Lo'o ndu'ni lya' ti' ngu' ji'i̱ ya, ndalo ya li'; ná nsacui̱ ya' ya ji'i̱ ngu' tsiya' ti.

¹³ Masi chiya'a̱ tsa nchcui' ngu' lo'o ya, ndalo tyiquee ya ji'i̱ ngu' li', nxaala' ya cha' ji'i̱ ngu'. Masi juani ña'a̱ ti tya ndyu'ni cuxi ñati̱ lo'o cua, ñi'ya̱ si laca ya nana' nu ndyanu lo hitya yuu; ñi'ya̱ nti' sca nguti nu nchcua̱a̱ ngu', jua'a̱ laca ya cha' ná ntsu'u cuentya ya tsiya' ti, ndu'ni ngu' lo'o tya'a ngu'.

¹⁴ Lo'o nscua na' quityi re, ná nti' na' cha' ca tyuju'u ti' ma̱; tsa bi' ti cha' nti' na' cha' cua'a na' ji'i̱ ma̱ cha' ná cua'ni tyixi ma̱ lo'o ya. Na tyaca'a cu'ma̱ jna' ñi'ya̱ si laca ma̱ sñi' na'.

¹⁵ Ntsu'u tsa ngu' tya'a ntsu'u cha' ji'na lo'o Cristo nu taca xtyucua ngu' ji'i̱ ma̱, pana sca ti na' ndu'ni na' ñi'ya̱ nu ndu'ni sti ma̱, cha' ndye ndacha' na' cha' tso'o nu cua nda Jesucristo lo'o na ji'i̱ ma̱; xqui'ya na' ngusñi ma̱ cha' ji'i̱ Jesús.

¹⁶ Bi' cha' juani nchcui' tsa na' lo'o ma̱ cha' cua'ni ma̱ ñi'ya̱ nu cua na'a̱ ma̱ cha' ndu'ni na'.

¹⁷ Juani nda na' ji'i̱ yu Timoteo lijya̱ yu ca su ndi'i̱ ma̱, cha' laca nu Timoteo bi' ñi'ya̱ laca sca sñi' na', cha' tyaca'a tsa yu 'na; jua'a̱ tso'o tsa ngusñi yu cha' ji'i̱ Jesucristo. Lcaa se'i̱ su ndya'a̱ na' slo taju ñati̱ ji'i̱ Jesús nu ndi'i̱ sca quichi̱, ca bi' nclyu'u na' ña'a̱ cha' tso'o nu nga'a̱ cha' cua'ni na chalyuu nu lo'o cua ngusñi na cha' ji'i̱ Jesucristo; jua'a̱ ndu'ni na' tyucui tyempo xqui'ya Jesucristo. Lo'o Timoteo cacha' yu ji'i̱ ma̱ cha' jua'a̱ ndu'ni na'.

¹⁸ ¿Ni cña ndu'ni xi ngu' tya'a ma̱ nu lye tsa ndu'ni tyucuaa ti' ji'i̱ tya'a ma̱? Ná ca̱a̱ na' ca quichi̱ Corinto slo ma̱, nti' ma̱.

¹⁹ Pana ná cube ti' ma̱, ca̱a̱ na' yala ti ca su ndi'i̱ ma̱ chacuayá' ji'i̱ ycui' Ndyosi nu Xu'na na. Lo'o li' quijeloo cha' ji'i̱ ma̱ jna', nu lo'o ña'a̱ na' ñi'ya̱ ndyu'ni nu ngu' tyixi bi'; si'i na ntucuá na' ji'i̱ ngu' xqui'ya cha' nu nda ti ngu' bi' li'.

²⁰ Ná taca tyatí̱ yu'u na cha' ji'i̱ ycui' Ndyosi cha' laca Ni loo ji'na si na nchcui' ti na cha' ji'i̱ Ni; na cua nti' Ni cha' cua'ni na cña ji'i̱ Ni, tsa ña'a̱ cña nu ndu'ni ycui' Ni.

²¹ Cua jlo ti' na' cha' tso'o la caca ji'i̱ ma̱ si tso'o ti tyu'u tyiquee na' ña'a̱ na' ji'i̱ ma̱ lo'o tyalaa na' ca slo ma̱; tso'o la si tso'o ti chcui' na' lo'o cu'ma̱ li'. Ná tso'o ca ti' ma̱ si ta na' cha' cusu̱u̱ lo'o ma̱ li'.