1 CORINTIOS 2 - Chatino Tataltepec

Ni cha' laca ngujui'i̱ ca'a̱ ngu' ji'i̱ Cristo lo crusi

¹ Cu'ma̱ tya'a ngusñi na cha' ji'i̱ Cristo, tyi'u ti' ma̱ ñi'ya̱ ngua'ni na' tya clyo, lo'o ndyalaa na' su ndi'i̱ ma̱ cha' chcui' na' lo'o ma̱ cha' tso'o nu cua nda ycui' Ndyosi lo'o na, cha' ji'i̱ Jesucristo bi'; ná quiña'a̱ tsa cha' tucui nchcui' na' lo'o cu'ma̱ li', si'i cha' nchca tsa na' nchcui' na' lo'o cu'ma̱ li'.

² Laja lo'o nguti'i̱ na' quichi̱ tyi ma̱, ngüiñi ti' na' cha' ná ta na' xi xa' la cha' lo'o ma̱ tsiya' ti; sca ti cha' ji'i̱ ycui' Jesucristo, la cui' Cristo nu ngujui'i̱ ca'a̱ ngu' ji'i̱ lo crusi, tsa bi' ti cha' nchcui' na' lo'o ma̱ li'.

³ Lo'o ndyalaa na' su ndi'i̱ ma̱, nguna'a̱ tya ti' na' ndu̱ na' li'; nchcua̱ tya na' cha' ngulacua tsa ti' na' ni cha' xacui̱ ma̱ 'na li'.

⁴ Lo'o nda na' cha' bi' lo'o ma̱, ná ngulana na' quiña'a̱ tsa cha' nu tyu'u tu'ba na', ná ngua'ni na' ñi'ya̱ nu ndu'ni ñati̱ nu nchca tsa chcui'. Pana cua nda ycui' Ndyosi juersa jna'; cua nchcui' na' lo'o ma̱ lcaa cha' nu cua nda Xtyi'i ycui' Ndyosi lo'o na', cha' caca cuayá' tso'o ti' ma̱.

⁵ Xqui'ya cña nu ngua'ni ycui' Ndyosi, bi' cha' ngusñi ma̱ cha' ji'i̱ Jesús li'; si'i xqui'ya sca cha' nu ngulo hique ti na' cha' nchca tsa jna'.

Sca cha' tso'o nu nti' ycui' Ndyosi chcui' Ni lo'o ñati̱

⁶ Masi jua'a̱, cua ntsu'u cha' tso'o nu nchcui' na lo'o ñati̱ nu nduna tso'o cha' ji'i̱ ycui' Ndyosi; cha' nu ngua'ya hique ycui' Ndyosi laca cha' bi', si'i sca cha' nu jlo ti' ñati̱ chalyuu. La cui' ti ná jlo ti' nu laca loo chalyuu cha' bi', masi cua lijya̱ tye cha' culo ngu' bi' cña.

⁷ Cua nda ycui' Ndyosi cha' tso'o bi' lo'o na cha' chcui' na lo'o ñati̱. Bilya caca cuayá' ti' ñati̱ chalyuu ji'i̱ cha' bi' tya sa'ni la, cha' ná nti' Ni cha' cuna ñati̱ nu ngua li'. Pana tya lo'o bilya tya' chalyuu, tya li' ngulacua ti' Ni ñi'ya̱ nu cua'ni Ni; ngua ti' ycui' Ndyosi cha' cua'ni lyaá Ni ji'na lo'o xñi na cha' ji'i̱ Jesús. Tlyu tsa cha' tso'o caca ji'na li'.

⁸ Ni sca ñati̱ nu laca loo chalyuu, ná ngua cuayá' ti' ngu' cha' bi'. Si ngua jlo ti' ngu' cha' bi', ñi'ya̱ nu ngua ti' ycui' Ndyosi cha' cua'ni Ni, ná ngujui'i̱ ca'a̱ ngu' bi' ji'i̱ Jesús lo crusi li', ycui' Jesús nu Xu'na na nu tlyu tsa cha' tso'o ntsu'u ji'i̱.

⁹ Ñi'ya̱ nu nscua cha' lo quityi cusu', jua'a̱ laca cha' bi'. Ndi'ya̱ nchcui' quityi bi': Cua ngua'ni cho'o ycui' Ndyosi cha' tso'o nu tyacua ji'i̱ ñati̱ nu ntsu'u tyiquee ji'i̱ ycui' Ni; laca bi' cha' nu bilya ña'a̱ ñati̱ chalyuu ji'i̱, cha' nu bilya cuna ñati̱ ji'i̱, ni ná ngulacua ti' ngu' cha' caca cha' bi'.

¹⁰ Pana nu na, ngu' tya'a ngusñi na cha' ji'i̱ Cristo, cua ngulu'u Ni ji'na ñi'ya̱ caca cha' tso'o bi' xqui'ya Xtyi'i ycui' Ni nu cua nda Ni cha' tyanu ne' cresiya ji'na. Tso'o tsa ndacha' loo Xtyi'i ycui' Ni ji'na lcaa cha' nu ntsu'u tyiquee ycui' Ndyosi cha' cua'ni Ni nde chalyuu, tso'o tsa jlo ti' na cha' bi' xqui'ya Xtyi'i ycui' Ni.

¹¹ Nu ñati̱ chalyuu na ni, hique ti na ntsu'u co'o lcaa cha' nu ntsu'u tyiquee na; sca ti ycui' na lo'o ycui' Ndyosi caca jlo ti' na lcaa cha' nu nclyacua ti' na. Lo'o jua'a̱ laca ycui' Ndyosi, sca ti Xtyi'i ycui' Ni jlo ti' lcaa cha' nu ntsu'u tyiquee Ni.

¹² Si'i sca cui'i̱ cuxi nu ntsu'u nde chalyuu ti laca Xtyi'i nu cua nda Ni cha' tyanu ne' cresiya ji'na juani; na cua nda Ni Xtyi'i ycui' Ni ji'na, cha' cua ngusñi na cha' ji'i̱ Ni. Lo'o jua'a̱ xqui'ya Xtyi'i ycui' Ni caca cuayá' ti' na lcaa cña tso'o nu ndu'ni Ni ne' cresiya ji'na.

¹³ Nu lo'o cacha' na cha' tso'o nu ji'i̱ ycui' Ndyosi bi' ji'i̱ ñati̱ ji'i̱ ycui' Ni, nu ngu' nu ntsu'u Xtyi'i ycui' Ni ne' cresiya ji'i̱, li' clyana na sca cha' nu chcui' na, sca cha' nu ta Xtyi'i ycui' Ni lo'o na; ná clyana na quiña'a̱ tsa cha' chcui' na ñi'ya̱ nu ndu'ni ñati̱ nu nchca tsa ji'i̱ ycui' ca ngu'.

¹⁴ Pana ñati̱ nu ná stu'ba cha' ji'i̱ lo'o ycui' Ndyosi ni, ná taca ca cuayá' ti' ngu' bi' ni sca cña nu ndu'ni ycui' Ndyosi cuentya ji'i̱ Xtyi'i ycui' Ni; ná nchca ca cuayá' ti' ngu' bi' ji'i̱ cha' bi' tsiya' ti. Sca ti si ntsu'u Xtyi'i ycui' Ndyosi ne' cresiya ji'na, li' caca cuayá' ti' na ni cha' laca bi', bi' cha' ná sca cha' laca nti' ngu' bi'.

¹⁵ Taca ca cuayá' ti' na ñi'ya̱ ndyu'u lcaa cha' si cua ntsu'u Xtyi'i ycui' Ndyosi ne' cresiya ji'na, lo'o li' ná taca xacui̱ ngu' xi xa' la cha' ji'na.

¹⁶ Ndi'ya̱ nscua lo quityi ji'i̱ ycui' Ndyosi: “¿Tilaca nchca cuayá' ti' ni cha' laca nu nda'ya hique ycui' Ndyosi? ¿Ha caca ji'na ta na sca cui̱i̱ lo'o Ni?” nacui̱ quityi. Pana nu na ni, xqui'ya Xtyi'i ycui' Ndyosi cua ngujui cha' ji'na ni cha' laca nu nclyacua ti' ycui' Cristo.