1 CORINTIOS 14 - Chatino Tataltepec

¿Ha chcui' na cha'cña ji'i̱ xa' ñati̱ laja lo'o ndyu'ni tlyu na ji'i̱ ycui' Ndyosi?

¹ Cua'ni ma̱ cha' xcui' tso'o tyu'u tyiquee ma̱ ña'a̱ ma̱ ji'i̱ tya'a ñati̱ ma̱ lacua. Lo'o jua'a̱ jña ma̱ chacuayá' ji'i̱ ycui' Ndyosi cha' taca cua'ni ma̱ la cui' cña nu nda Xtyi'i ycui' Ni ji'na. Pana lo'o chaca cña ntsu'u nu ndulo tsa ji'i̱ ma̱, cha' ca tsa'a̱ ma̱ ta ma̱ cha' lo'o ñati̱, lcaa ña'a̱ cha' nu cua nti' ycui' Ndyosi cha' ta Ni lo'o ngu' bi'.

² Sca ñati̱ nu nchcui' cha'cña ji'i̱ xa' ñati̱ laja lo'o ndyu'u ti'i̱ ti ma̱ ni, si'i lo'o cu'ma̱ nchcui' yu, cha' ná nchca cuayá' ti' ma̱ ni cha' nda yu; sca ti lo'o ycui' Ndyosi nchcui' yu bi', cha' Xtyi'i ycui' Ndyosi ndu'ni cha' ta yu sca cha' nu ná nga'a̱ cha' cuna ngu' tya'a ma̱.

³ Xa' la ñati̱ nu ndacha' liñi sca cha' nu nda Ni lo'o ngu', lo'o cu'ma̱ nchcui' ñati̱ bi'. Taca xtyucua ngu' bi' ji'i̱ ma̱ cha' taquiya' tso'o la ma̱ cha' ji'i̱ Ni, taca cua'ni ngu' cha' tyatí̱ la tyiquee ma̱ ji'i̱ cha' bi'; jua'a̱ taca cua'ni ngu' cha' tyi'i̱ ti̱ ti tyiquee ma̱ li'.

⁴ Tso'o tsa cuentya ji'i̱ ycui' ca ngu' nu nchca nchcui' cha'cña ji'i̱ xa' ñati̱, cha' ndyatí̱ la ti' tyiquee ycui' ca ngu' ji'i̱ ycui' Ndyosi; pana tso'o la ndu'ni ñati̱ nu ndacha' liñi sca cha' nu cua nda ycui' Ndyosi lo'o ñati̱ bi' ji'i̱ tya'a ngu', cha' ndu'ni ngu' cha' tyatí̱ la ti' tyiquee lcaa ngu' tya'a ndu'ni tlyu ma̱ ji'i̱ ycui' Ndyosi.

⁵ Jua'a̱ na', tso'o nti' na' si lcaa cu'ma̱ caca chcui' ma̱ cha'cña ji'i̱ xa' ñati̱; pana cña nu ndulo la cha' ji'i̱ ma̱ laca si ta ma̱ cha' lo'o tya'a ma̱, la cui' cha' nu cua nti' ycui' Ndyosi chcui' Ni lo'o ma̱. Tso'o la si jua'a̱ taca ta ma̱ cha' lo'o tya'a ma̱; ná ntsu'u cha' chcui' ma̱ cha'cña ji'i̱ xa' ñati̱ li', sca ti ca si ntsu'u chaca ngu' nu taca ji'i̱ xtyacui cha' bi' cha' caca cuayá' ti' tya'a ndyu'u ti'i̱ ma̱. Li' tso'o la tyatí̱ ti' tyiquee ngu' tya'a ma̱.

⁶ Lo'o tyalaa na' su ndi'i̱ ma̱, si'i na xtyucua na' ji'i̱ ma̱ si xcui' cha'cña ji'i̱ xa' ñati̱ chcui' na' lo'o ma̱; taca xtyucua na' ji'i̱ ma̱ sca ti si caja sca cha' 'na, sca cha' nu cua nti' ycui' Ndyosi ta Ni lo'o ma̱. Sca ti si culu'u liñi na' ji'i̱ ma̱ cha' ca tsa'a̱ tso'o la ma̱ cha' ji'i̱ Ni, jua'a̱ taca xtyucua na' ji'i̱ ma̱ li'.

⁷ Cua ña'a̱ ca chcua̱ musca, masi cui'chcua̱, masi rube, nga'a̱ cha' cula'á tso'o na ji'i̱ cha' cuna tso'o ngu' ni ji̱i̱ laca nu ndañi bi'.

⁸ Jua'a̱ sendaru ni, ná tsaa ngu' cusu̱u̱ si ná cañi cui̱i̱ cula'á cui'chcua̱ nu xi'yane ji'i̱ ngu'.

⁹ La cui' jua'a̱ laca lo'o cu'ma̱, ná caca cuayá' ti' ngu' ni cha' nti' ma̱ ta ma̱ lo'o ngu' si ná liñi chcui' ma̱ cha'cña ji'i̱ ngu' lo'o ngu'; lo'o cui'i̱ ti nchcui' ma̱ si ná nchcui' ma̱ cha'cña jua'a̱.

¹⁰ Chañi cha' quiña'a̱ tsa lo cha'cña nchcui' ñati̱ chalyuu, lo'o jua'a̱ ntsu'u scaa lo ñati̱ nu nduna sca lo cha'cña.

¹¹ Pana si ná nduna na sca cha' nu nchcui' sca ñati̱ slo na, li' culacua ti' na cha' ngu' xta laca yu; ná ntsu'u cha' ji'na lo'o yu bi' li', masi tya'a quichi̱ tyi na laca yu.

¹² Cua jlo ti' na' cha' nti' tsa ma̱ cha' caca cua'ni ma̱ cua ña'a̱ ca cña nu nda Xtyi'i ycui' Ndyosi ji'na; bi' cha' jña la ma̱ chacuayá' ji'i̱ ycui' Ndyosi cha' taca ji'i̱ ma̱ cua'ni ma̱ lcaa lo cña tso'o, cua ña'a̱ ca cña nu xtyucua ji'i̱ ngu' tya'a ngusñi ma̱ cha' ji'i̱ Jesús ca bi', cha' tyatí̱ la ti' tyiquee ngu'.

¹³ Tso'o lacua, si nchca chcui' na cha'cña ji'i̱ xa' la ñati̱, pana tso'o la si jña na chacuayá' ji'i̱ ycui' Ndyosi cha' caca cuayá' ti' na ni cha' nda na lo'o ngu'.

¹⁴ Ndi'ya̱ ndyaca si cha'cña ji'i̱ xa' ñati̱ chcui' na nu lo'o ndu'ni tlyu na ji'i̱ ycui' Ndyosi: Chañi cha' ne' cresiya ji'na nchcui' na lo'o Ni tu'ni, pana ni ycui' na, ná nchca cuayá' ti' na ni cha' nda na.

¹⁵ Ndi'ya̱ cua'ni na lo'o cua'ni tlyu na ji'i̱ Ni lacua: Taca chcui' na lo'o Ni cha' ji'na ti, sca cha' nu ntsu'u ne' cresiya ji'na, pana nga'a̱ cha' caca cuayá' ti' na ni cha' nda na slo ngu' tya'a na; la cui' jua'a̱ nu lo'o cula tu'ba na ji̱i̱ ji'i̱ ycui' Ndyosi, cula tu'ba na cha' ji'na ti tu'ni, pana lo'o ndu'ni cha' caca cuayá' ti' na ñi'ya̱ ndyu'u cha' nu nchcui' ji̱i̱ bi'.

¹⁶ Si ná cua'ni na jua'a̱, li' ná caja ñi'ya̱ ñacui̱ ngu' cha': “Jua'a̱ caca cha' lacua”, lo'o ndye nchcui' na li'. Cua ña'a̱ ca ñati̱ nu ndi'i̱ slo na ni, si cha' ji'na ti laca cha' nu chcui' na lo'o ndu'ni tlyu na ji'i̱ ycui' Ndyosi, nga'aa caja ñi'ya̱ chcui' ngu' li', cha' ná nchca cuayá' ti' ngu' ni cha' nda na, masi tso'o tsa ta na xlya'be ji'i̱ ycui' Ndyosi.

¹⁷ Ná tyiquee' tso'o tsa nchcui' na lo'o Ni, pana cha' nu nchcui' na bi' ná xtyucua ji'i̱ xa' la ngu' tya'a na tsiya' ti.

¹⁸ Tso'o tsa nti' na' ña'a̱a̱ ji'i̱ ycui' Ndyosi cha' nchca 'na nchcui' na' cha'cña ji'i̱ xa' la ñati̱; nchca la jna', xti la cha' nchca ji'i̱ cu'ma̱, nti' na'.

¹⁹ Pana nu lo'o ndyu'u ti'i̱ na cha' cua'ni tlyu na ji'i̱ ycui' Ndyosi, nti' na' cha' tso'o la si chcui' na' lo'o ma̱ sca tucua ti si'yu cha' nu nchca cuayá' ti' ma̱ cha' ca tsa'a̱ la ma̱ li'; ná ndulo cha' ji'i̱ ma̱ masi chcui' na' tii mil tya'a si'yu cha' nu nchcui' xa' ñati̱ nu ná nduna ma̱ ji'i̱ tsiya' ti, ná sca cha' laca bi'.

²⁰ Cu'ma̱ tya'a ngusñi na cha' ji'i̱ Cristo, tso'o la si ná jlo ti' ma̱ tsiya' ti na ca laca sca cha' cuxi; ñi'ya̱ laca nu sube, jua'a̱ caca ma̱ cha' ná jlo ti' ngu' sube cha' bi'. Pana nga'aa culacua ti' ma̱ ñi'ya̱ nu nclacua ti' nu sube; juani culacua tso'o ti' ma̱, ñi'ya̱ nclacua ti' ngu' cusu'.

²¹ Ndi'ya̱ cha' nda quityi cusu': “Chcui' na' lo'o ñati̱ re”, nacui̱ ycui' Ndyosi, “ta na' ji'i̱ xa' ñati̱ ca xa' nasiyu̱ tyijyu' la cha' ca̱a̱ ngu' chcui' lo'o ngu' re; pana masi cua'ni na' jua'a̱, ná xñi ngu' re cha' 'na”. Jua'a̱ nacui̱ ycui' Ndyosi nu Xu'na na.

²² Ntsu'u quiya' nu ndu'ni Ni cha' caca chcui' ngu' cha'cña ji'i̱ xa' ñati̱ cha' cube ti' ñati̱ nu bilya xñi cha' ji'i̱ Ni. Ná ntsu'u cha' caca jua'a̱ xqui'ya ngu' nu cua ngusñi cha' ji'i̱ ycui' Ni; pana lo'o ta na sca cha' nu cua nda Ni lo'o ñati̱, bi' laca cuentya ji'i̱ ngu' tya'a ngusñi na cha' ji'i̱ Jesús, si'i cuentya ji'i̱ ñati̱ nu bilya xñi cha' bi'.

²³ Ná tyiquee' tyalaa xi xa' la ñati̱ ca su ndyu'u ti'i̱ ma̱, ngu' nu bilya xñi cha' ji'i̱ Jesús, jua'a̱ ngu' nu si'i tya'a ndyu'ni tlyu ma̱ ji'i̱ ycui' Ndyosi laca ngu'. Si tyalaa ngu' bi' su ndyu'u ti'i̱ ma̱ tsa tlyu ti, lo'o li' ña'a̱ ngu' ji'i̱ ma̱ cha' xcui' cha'cña ji'i̱ xa' ñati̱ nchcui' ma̱, li' ñacui̱ ngu' bi' cha' cua ngua loco ma̱.

²⁴ Xa' ña'a̱ caca si xcui' cha' nu cua nda ycui' Ndyosi lo'o ma̱ laca cha' nu chcui' ma̱ lo'o tya'a ma̱; nu lo'o tyalaa ngu' su ndyu'u ti'i̱ ma̱, si ngu' nu bilya xñi cha' ji'i̱ Jesús, nu si'i tya'a ndyu'ni tlyu ma̱ ji'i̱ ycui' Ndyosi laca ngu', li' ca tyuju'u ti' ngu' bi' ji'i̱ qui'ya nu ntsu'u ji'i̱ ngu', nu lo'o cuna ngu' cha' nu nchcui' ma̱. Li' caca cuayá' ti' ngu' cha' cuxi tsa laca ycui' ngu',

²⁵ ycui' ca ti ngu' caca cuayá' ti' lcaa cha' cuxi nu ntsu'u yacu̱' ti ne' cresiya ji'i̱ ngu'. Lo'o jua'a̱ tyatu̱ sti̱' ngu' li' cha' cua'ni tlyu ngu' ji'i̱ ycui' Ndyosi, ñacui̱ ngu' cha' chañi cha' ndi'i̱ Xtyi'i ycui' Ndyosi lo'o cu'ma̱.

Tso'o ti cua'ni na lo'o tya'a na lo'o tyu'u ti'i̱ na cha' cua'ni tlyu na ji'i̱ ycui' Ndyosi

²⁶ Cu'ma̱ tya'a ngusñi na cha' ji'i̱ Jesús, ndi'ya̱ cua'ni ma̱ nu lo'o tyu'u ti'i̱ ma̱ lo'o tya'a ma̱: Tyatu̱ tsaca ma̱ cha' cacha' ni ji̱i̱ caca nu cula tu'ba ma̱ cuentya ji'i̱ ycui' Ndyosi; cuati tyatu̱ chaca nu culu'u cha' ji'i̱ ycui' Ni ji'i̱ tya'a ma̱; lo'o li' chcui' tsaca ngu' sca cha' nu nti' Ni ta Ni lo'o ma̱; lo'o jua'a̱ taca ta ma̱ xi cha' lo'o cha'cña ji'i̱ xa' ñati̱, si lo'o nchca ji'i̱ ma̱ xtyacui ma̱ cha' bi', cha' caca cuayá' ti' lcaa ñati̱ nu nga'a̱ ca ndacua. Lcaa ña'a̱ nu cua'ni ma̱ ntsu'u cha' tyatí̱ la ti' tyiquee lcaa ñati̱ tya'a ndyu'u ti'i̱ ma̱.

²⁷ Nu lo'o chcui' ma̱ cha'cña ji'i̱ xa' ñati̱ ni, li' tso'o masi tucua sna tya'a ti ma̱ chcui' ma̱, sa scaa ti ma̱ chcui' ma̱ li'. Cuayá' tsa jua ti ngu'. Lo'o jua'a̱ nga'a̱ cha' caja sca nu xtyacui cha' bi', cha' caca cuayá' ti' lcaa ma̱;

²⁸ pana si ná caja sca nu xtyacui cha' bi', li' tso'o la masi ná chcui' ma̱ cha'cña ji'i̱ xa' ñati̱ laja lo'o ndyu'u ti'i̱ ma̱. Sca ti tso'o si chcui' ma̱ cha'cña bi' ca su ntucua ma̱ ycui' ti ma̱. Sca ti ycui' Ndyosi caca cuayá' ti' cha' bi' li'.

²⁹ Lo'o chcui' ma̱ sca cha' nu cua nti' Ni ta Ni lo'o ngu' tya'a ma̱ ni, li' chcui' tucua sna tya'a ti ma̱; nu xa' la ñati̱ tya'a ndi'i̱ ma̱ ca ndacua, culacua ti' ma̱ si liñi ca ndyu'u cha' nu nchcui' tya'a ma̱.

³⁰ Lo'o li' si ta Ni sca cha' lo'o chaca ñati̱ nu nga'a̱ lo'o ma̱ ca ndacua, tso'o la si cua'a ma̱ ji'i̱ nu nchcui' clyo, cha' xutacui cha' nu nchcui' yu.

³¹ Lcaa tya'a ma̱ nu cua ngujui sca cha' ji'i̱ ma̱, sca cha' nu cua nti' Ni ta Ni lo'o ma̱, tso'o si chcui' sa scaa ma̱ li' lacua, cha' ca tsa'a̱ ma̱ ca ta'a ma̱ cha' bi', lo'o li' caca tlyu la tyiquee ma̱.

³² Cu'ma̱ nu nchcui' lo'o ngu' sca cha' nu cua nda ycui' Ndyosi lo'o ma̱, ycui' ca ma̱ nga'a̱ cha' cua'a ma̱ ji'i̱ ycui' ma̱, cha' ná tyeje tacui ma̱ chacuayá' ji'i̱ scaa ma̱.

³³ Nti' Ni cha' tso'o ti cua'ni na lo'o tya'a na lo'o tyu'u ti'i̱ na, ná tso'o nti' Ni si lye tsa nguixa' nu ndu'ni na. Ndi'ya̱ ndu'ni ca ta'a ngu' tya'a ngusñi na cha' ji'i̱ Jesús scaa quichi̱, nu lo'o ndyu'u ti'i̱ ngu':

³⁴ Ná nda ngu' chacuayá' chcui' ngu' cuna'a̱ ca su ndyu'ni tlyu ngu' ji'i̱ ycui' Ndyosi; nga'a̱ cha' tucuá nu cuna'a̱ cha' nu nchcui' nu qui'yu, cha' jua'a̱ cña ngulo Ni ji'i̱ ngu' cha' cua'ni ngu'.

³⁵ Ca toni'i̱ taca xcuane nu cuna'a̱ ji'i̱ clyo'o si ntsu'u sca cha' nu nti' ngu' cha' caca cuayá' ti' ngu'. Si'i cha' tso'o laca si chcui' sca nu cuna'a̱ laja su ndyu'u ti'i̱ ngu'.

³⁶ Nga'a̱ cha' tyi'u ti' ma̱ cha' si'i cu'ma̱ laca nu ya̱a̱ nchcui' cha' ji'i̱ ycui' Ndyosi nu ngua su clyo, ni si'i ngu' tya'a quichi̱ tyi ti ma̱ nu cua ndyuna cha' bi' tya clyo.

³⁷ ¿Ha ntsu'u chacuayá' ji'i̱ ma̱ cha' chcui' ma̱ cha' nu cua nda ycui' Ndyosi lo'o ngu' nti' ma̱? ¿Ha ji'i̱ cu'ma̱ ti cua nda Ni Xtyi'i ycui' Ni cha' cua'ni ma̱ cña ji'i̱ Ni? Cua'a̱ jyaca̱ ma̱ lacua; cña nu nclyo na' ji'i̱ ma̱ lo'o nscua na' quityi re, chacuayá' ji'i̱ ycui' Ndyosi laca cña bi',

³⁸ bi' cha' ná tucuá ma̱ cha' ji'i̱ ñati̱ nu ná ntaja'a̱ taquiya' ji'i̱ cha' re.

³⁹ Jua'a̱ caca lacua, cu'ma̱ tya'a ngusñi na cha' ji'i̱ Jesús, jña ma̱ chacuayá' ji'i̱ ycui' Ndyosi cha' caca chcui' ma̱ lcaa cha' ji'i̱ Ni nu cua nti' Ni cha' ta Ni lo'o ñati̱. La cui' jua'a̱ tso'o laca si ná cua'a ma̱ ji'i̱ ñati̱ nu nchcui' cha'cña ji'i̱ xa' ñati̱.

⁴⁰ Tsa bi' ti cha', xcui' tso'o ti cua'ni ma̱ lo'o tyu'u ti'i̱ ma̱ lo'o tya'a ma̱; liñi ti cua'ni ma̱, ñi'ya̱ nu nga'a̱ cha' caca.