1 CORINTIOS 11 - Chatino Tataltepec

¹ Bi' cha' cui'ya tso'o ma̱ cuentya ña'a̱ cña nu ndu'ni na', lo'o la cui' jua'a̱ cua'ni ma̱ li', cha' ñi'ya̱ laca cña nu ngua'ni Cristo, jua'a̱ laca cña nu ndu'ni na'.

Ñi'ya̱ cua'ni nu ngu' cuna'a̱ lo'o ndyu'u ti'i̱ ngu' lo'o na

² Cu'ma̱ tya'a ngusñi na cha' ji'i̱ Cristo, tso'o tsa ntsu'u tyiquee na' ña'a̱a̱ ji'i̱ ma̱, cha' xcui' ndyi'u ti' ma̱ 'na, lo'o jua'a̱ ndu'ni ma̱ lcaa lo cha' nu ngulu'u na' ji'i̱ ma̱.

³ Ndi'ya̱ nti' na' cha' caca cuayá' ti' ma̱: Ycui' Ndyosi laca loo ji'i̱ Cristo, lo'o jua'a̱ Cristo laca loo ji'i̱ lcaa ñati̱; la cui' jua'a̱ nu qui'yu laca loo ji'i̱ nu cuna'a̱.

⁴ Bi' cha' ná tyucua smalyu scua' que ngu' qui'yu ne' laa su ndyu'u ti'i̱ ma̱; masi chcui' yu lo'o ycui' Ndyosi, masi cacha' yu sca cha' ji'i̱ Ni ji'i̱ ñati̱, ná tyucua smalyu hique yu. Loo laca Cristo ji'i̱ yu, bi' cha' ná cua'ni tyucuaa ti' yu ji'i̱ Ni ñi'ya̱ si tyucua smalyu hique yu.

^5-6 Pana nu ngu' cuna'a̱ ni, tso'o si sta ngu' payu̱ hique ngu' lo'o ndyu'u ti'i̱ lcaa ngu' ne' laa; masi chcui' ngu' lo'o ycui' Ndyosi, masi cacha' ngu' sca cha' ji'i̱ ycui' Ndyosi ji'i̱ ñati̱, sta ngu' payu̱ hique ngu', cha' ná cua'ni tyucuaa ti' ngu' cuna'a̱ ji'i̱ clyo'o ngu' ca su ndyu'u ti'i̱ ngu' li', cha' loo la laca nu qui'yu ji'i̱ nu cuna'a̱. Nclyá cu'ma̱ quicha̱' hique nu cuna'a̱ nu ngua sa'a ji'i̱ ngu', cha' ca tyuju'u ti'; la cui' jua'a̱ stu'ba ti laca nu cuna'a̱ nu ná sta payu̱ hique ne' laa. Bi' cha' cu'ma̱ ngu' cuna'a̱, si ná nti' ma̱ cua'ni tyucuaa ti' ma̱ ji'i̱ nu ngu' qui'yu su ndyu'u ti'i̱ ma̱ lo'o ngu', tso'o la si tacu̱' ma̱ hique ma̱ li'; ná ntsu'u cha' ca tyuju'u ti' ma̱ li'.

⁷ Ná ntsu'u cha' tacu̱' ngu' qui'yu hique ngu', cha' ycui' Ndyosi ngüiñá ji'i̱ sca nu qui'yu tya clyo; ñi'ya̱ nu ña'a̱ ycui' Ni, jua'a̱ ña'a̱ ngüiñá Ni ji'i̱ nu qui'yu bi'. Pana xa' cha' laca ji'i̱ nu cuna'a̱, tso'o tsa ña'a̱ nu cuna'a̱ xqui'ya nu qui'yu.

⁸ Clyo ngüiñá ycui' Ndyosi ji'i̱ nu qui'yu, tiya' la li' ngüiñá Ni ji'i̱ nu cuna'a̱. Tyijya̱ sii' nu qui'yu ngulo Ni cha' ngüiñá Ni ji'i̱ nu cuna'a̱, si'i tyijya̱ nu cuna'a̱ ngulo ycui' Ndyosi lo'o ndya' nu qui'yu;

⁹ bi' cha' xqui'ya nu qui'yu ndya' nu cuna'a̱ nu ngua clyo, si'i xqui'ya nu cuna'a̱ ndya' nu qui'yu.

¹⁰ Tso'o la tyacu̱' hique nu cuna'a̱ lacua, cha' caca cuayá' ti' ngu' cha' ntsu'u nu laca loo ji'i̱ ngu'. Hasta nu xca̱ ji'i̱ ycui' Ndyosi nde cua̱ nu ndya'a̱ lo yuu su ndyu'u ti'i̱ ma̱, lo'o bi' caca cuayá' ti' cha' bi' li', lo'o ña'a̱ ngu' ji'i̱ ngu' cuna'a̱.

¹¹ Pana juani stu'ba ti ngusñi na cha' ji'i̱ Jesús, masi qui'yu na, masi cuna'a̱ na. Ná caja ñi'ya̱ tyi'i̱ nu qui'yu chalyuu si ná lo'o nu cuna'a̱; jua'a̱ nu cuna'a̱ ni, ná caja ñi'ya̱ tyi'i̱ chalyuu si ná lo'o nu qui'yu.

¹² Chañi cha' xqui'ya nu qui'yu ndya' nu cuna'a̱ tya clyo, pana la cui' jua'a̱ chañi cha' nu cuna'a̱ laca nu ndu'ni cala ji'i̱ nu qui'yu juani; lo'o jua'a̱ ycui' Ndyosi laca nu ndu'ni cha' tyu'ú tyucuaa lo ngu' bi' chalyuu.

¹³ Ycui' ca ma̱ cacha' liñi ma̱ 'na si tso'o nti' ma̱ cha' chcui' sca nu cuna'a̱ lo'o ycui' Ndyosi lo'o ntucua yaala ti hique nu cuna'a̱ bi'.

¹⁴ Nu na ñati̱ chalyuu na, cua jlo ti' na ñi'ya̱ ña'a̱ quicha̱' hique na. Jua'a̱ laca cha' ji'na, ntyuju'u tsa ti' na si tonu tsa quicha̱' hique nu qui'yu.

¹⁵ Si'i jua'a̱ nti' na lo'o nu cuna'a̱, tso'o tsa nti' na si tyucui̱ quicha̱' hique nu cuna'a̱. Cua'nijo'o quicha̱' hique ngu' ji'i̱ ngu', cha' ná ca tyuju'u ti' ngu'.

¹⁶ Si chcui' cuxi ngu' xqui'ya cha' ndyacu̱' hique ngu', tso'o si caca cuayá' ti' ngu' bi', cha' sca ti cuayá' ndu'ni ya ñi'ya̱ nu ndu'ni lcaa ñati̱ ji'i̱ Jesucristo lcua ti quichi̱ tyi ngu'.

Cha' cuxi nu ndyaca nu lo'o ndyacu ngu' si̱i̱ nu ngulu'u Jesús ji'na cha' cua'ni na

¹⁷ Chaca cha' nscua na' re, cha' caca cuayá' ti' ma̱ cha' ná ndiya ti' na' cña nu ndyu'ni ma̱ lo'o ndyu'u ti'i̱ ma̱ cha' cacu ma̱ si̱i̱ nu ngulu'u Jesús ji'na cha' cua'ni na. Cua nscua cha' caca tso'o cresiya ji'i̱ ma̱ li', nu lo'o cacu ma̱ si̱i̱ bi'; pana xa' ña'a̱ ndyu'ni bi' lo'o ma̱, ndyu'ni ñu'u̱ bi' ji'i̱ cresiya ji'i̱ ma̱ juani.

¹⁸ Nacui̱ ngu' cha' ná tso'o ndu'ni ma̱ su ndyu'u ti'i̱ ma̱ cha' cacu ma̱ si̱i̱ bi'. Xi xa' ca ña'a̱ ndu'ni sa scaa ma̱, nacui̱ ngu'. Cua jlo ti' na' cha' la cui' jua'a̱ ndyaca lo'o cu'ma̱ si nti'.

¹⁹ Si jua'a̱ ná stu'ba ntsu'u cha' ji'i̱ ma̱ lo'o tya'a ma̱, chañi tiya' la li' taca ca cuayá' ti' na tilaca nu chañi ca ndaquiya' cha' ji'i̱ Jesús.

²⁰ Pana ná tso'o cha' nga'aa ndu'ni ma̱ si̱i̱ ñi'ya̱ tya'a si̱i̱ nu ngulu'u ycui' Jesús ji'na, cha' cua'ni na nu lo'o ndyu'u ti'i̱ ma̱ lo'o tya'a ma̱ li'.

²¹ Lo'o ndyalaa hora cacu ma̱, li' yala ti ndacu ma̱ si̱i̱ ji'i̱ ycui' ti ma̱, ná nda ma̱ tyempo tsiya' ti cacu xa' la tya'a ma̱; bi' cha' ntsu'u ngu' tya'a ma̱ nu ná ndyiji cacu tso'o, lo'o jua'a̱ ntsu'u xa' la ngu' nu hasta nchca cu'bi ngu', cha' quiña'a̱ tsa na ngusñi ngu' ndyi'o ngu'.

²² Taca cacu ma̱ co'o ma̱ to' tyi ma̱ si ntyute' tsa ma̱. Pana ñi'ya̱ nu ndu'ni ma̱ juani, na ndu'ni ñu'u̱ ma̱ ji'i̱ tya'a ndi'i̱ ma̱, tya'a ngusñi ma̱ cha' ji'i̱ ycui' Ndyosi, ña'a̱ cuayá' nda ma̱ cha' tyuju'u ti' ji'i̱ ngu' ti'i tya'a ngusñi ma̱ cha' ji'i̱ Jesús. Ná tyiquee' cua ngua cuayá' ti' ma̱ na laca nu nti' na' chcui̱' lo'o ma̱ juani, cha' nga'aa ntsu'u cha' tso'o nu caca chcui̱' lo'o ma̱ tsiya' ti cuentya ji'i̱ cha' bi'.

Si̱i̱ nu ngulu'u Jesús nu Xu'na na cha' cacu na

²³ Ndi'ya̱ cha' nclyu'u na' ji'i̱ ma̱, la cui' cha' nu ndyuna na' lo'o nchcui' ñati̱ nu ngua tsa'a̱ ji'i̱ ycui' nu Xu'na na tya clyo: La cui' talya nu lo'o ndyujui' ngu' cresiya ji'i̱ Jesús, laja lo'o tya ndi'i̱ ñati̱ bi' lo'o Jesús, li' ndaya' Jesús ji'i̱ xlyá,

²⁴ ndya yu xlya'be ji'i̱ ycui' Ndyosi Sti na, lo'o li' ngusa'be yu xlyá bi'; li' nacui̱ Jesús ji'i̱ tya'a ndya'a̱ yu: “Jacu ma̱ xlyá re; ñi'ya̱ nti' cuaña' na', jua'a̱ nti' xlyá re. Cuentya ji'i̱ ma̱ laca cha' nu chcube' na' lo crusi, bi' cha' tyi'u ti' ma̱ 'na lo'o cacu ma̱ xlyá re”, nacui̱ Jesús ji'i̱ ngu' bi'.

²⁵ Tiya' la li' lo'o cua ndye ngua'ni ngu' si̱i̱, li' ndaya' Jesús ji'i̱ vaso; ndi'ya̱ nacui̱ yu ji'i̱ ngu' li': “Lo'o co'o ma̱ na nu ntsu'u ne' vaso re, li' tyi'u ti' ma̱ cha' tyalú tañi na' xqui'ya qui'ya nu ntsu'u ji'i̱ lcaa ñati̱, cha' jua'a̱ quiñi cha' ji'i̱ ycui' Ndyosi Sti na' lo'o ngu'. Lo'o co'o ma̱ na re, tyi'u ti' ma̱ 'na li'”, nacui̱ Jesús ji'i̱ ngu'.

²⁶ Bi' cha' lcaa quiya' lo'o cacu ma̱ xlyá bi', lo'o co'o ma̱ na nu ntsu'u ne' vaso bi', ña'a̱ cuayá' nu ca̱a̱ Jesús chaca quiya', liñi culu'u ma̱ ji'i̱ ñati̱ cha' ngujuii Jesús lo crusi xqui'ya na.

Ñi'ya̱ nu nga'a̱ cha' cacu na si̱i̱ bi'

²⁷ Ndi'ya̱ ndyaca li': ntsu'u qui'ya ji'na lo'o ycui' Ndyosi, si ná tyucui tyiquee na cacu na co'o na si̱i̱ ji'i̱ ycui' Ni; na ndu'ni cuxi na ji'i̱ ycui' nu Xu'na na li', cha' ná ndyi'u tso'o ti' na cha' nda Jesús ji'i̱ tyucui ña'a̱ ycui' ca yu ngujui'i̱ ca'a̱ ngu' ji'i̱ yu lo crusi, cuati ndyalú tañi yu lo crusi lo'o ngujuii yu jua'a̱ xqui'ya na.

²⁸ Bi' cha' ntsu'u cha' culacua tso'o ti' na lo'o cacu na si̱i̱ bi'; li' tyucui tyiquee na cacu na xlyá bi', co'o na na nu ntsu'u ne' vaso bi'.

²⁹ Si ná culacua tso'o ti' na ni cha' laca nu ndacu na ji'i̱, ni cha' laca nu ndyi'yu na ji'i̱, li' ntsu'u qui'ya ji'na lo'o ycui' Ndyosi, cha' ná ndyi'u ti' na ji'i̱ ycui' Jesús, lo'o jua'a̱ ná ntsu'u ti' na ji'i̱ tya'a na nu stu'ba ndyu'ni tlyu na ji'i̱ Ni.

³⁰ Bi' cha' quiña'a̱ tsa cu'ma̱ nchca quicha ma̱, lo'o jua'a̱ nchca ñu'u̱ ti' ma̱, lo'o jua'a̱ ntsu'u cu'ma̱ nu ndyijii tsiya' ti;

³¹ pana si culacua tso'o ti' na tya clyo lo'o cacu na si̱i̱ bi', ná ntsu'u cha' ca tyaala Ni ji'na jua'a̱ li'.

³² Nchca tyaala Ni ji'na juani, lo'o jua'a̱ nchcube' Ni ji'na xqui'ya cha' cuxi nu ndyu'ni na, cha' tiya' la lo'o cua ndye chalyuu ná tsaa na ca bilyaa lo'o ñati̱ nu ná ndaquiya' ji'i̱ Ni tsiya' ti.

³³ Cu'ma̱ tya'a ngusñi na cha' ji'i̱ Jesús, tyi'u ti' ma̱ cha' bi' lo'o tyu'u ti'i̱ ma̱ cha' cua'ni ma̱ si̱i̱ bi'; jatya ma̱ xi ji'i̱ tya'a ma̱ cha' stu'ba ti xana cacu ma̱ lo'o lcaa tya'a ma̱.

³⁴ Si ntsu'u ma̱ nu ntyute' ma̱, jacu ma̱ tyaja to' tyi ti ma̱ clyo. Lo'o li' nga'aa cua'ni cuxi ma̱ lo'o tyu'u ti'i̱ ma̱, li' ná ntsu'u cha' caca tyaala Ni ji'i̱ ma̱. Lo'o ca̱a̱ na', taca quiñi nu xa' la cha' bi' ji'na lo'o cu'ma̱ li'.