1 CORINTIOS 10 - Chatino Tataltepec

Ná cua'ni tlyu na ji'i̱ cua ña'a̱ ca lcui̱ jo'ó

¹ Cu'ma̱ tya'a ngusñi na cha' ji'i̱ Jesús, tya nti' na' cacha' na' ji'i̱ ma̱ chaca quiya' ñi'ya̱ ngua ji'i̱ jyo'o cusu' ji'na, nu lo'o nguta'a̱ ngu' lo'o jyo'o Moisés nu ngua sa'ni. Ndacui sca coo nde cua̱ su nguta'a̱ ngu' bi', cha' ná ña'a̱ ngu' xña'a̱ bi' ji'i̱ ngu'. Tso'o ti nteje tacui ngu' bi' cla'be lo hitya su naa Tyujo'o Nga'a, ngutu'u ngu' chaca tsu' li'.

² Coo nu ndacui bi', lo'o jua'a̱ hitya tyujo'o bi', bi' laca nu ngua'ni cha' ngusñi ngu' cha' ji'i̱ Moisés; bi' cha' ngutu'u lca'a̱ ngu' ji'i̱, ñi'ya̱ laca cha' lo'o tyucuatya na cuentya ji'i̱ Jesús.

³ Ycui' Ndyosi laca nu nda na ndyacu ca ta'a ngu' bi';

⁴ la cui' jua'a̱ ngujui na ndyi'o lcaa ngu' bi', cha' ycui' Ndyosi laca nu cua nda lcaa na bi' ji'i̱ ngu'. Sca quee tlyu nu nga'a̱ ca sii' cua'a̱, ca quiya' quee bi' ngutu'u hitya nu ndyi'o ngu'. Ycui' Ndyosi laca nu nda hitya nu ndyi'o ngu' bi', cha' masi tya li' nguta'a̱ ycui' Cristo lo'o ngu' bi', nguna'a̱si̱i̱ Ni ji'i̱ ngu' su nguta'a̱ ngu'.

⁵ Masi jua'a̱ ngua'ni ycui' Ndyosi, ná ntaja'a̱ ngu' bi' taquiya' ngu' cha' ji'i̱ Ni tsiya' ti. Bi' cha' ngua taja ti' Ni ji'i̱ ngu' li', nguxtyanu ti'i̱ Ni ji'i̱ ngu'; ca lo nati̱' btyi bi' ngujuii ngu' li', ndyanu tyijya̱ ngu' bi' to' tyucui̱i̱ bi'.

⁶ Lo'o jua'a̱ na, taca tyi'u ti' na ñi'ya̱ nu ngua'ni jyo'o cusu' bi' nu ngua sa'ni. Ná tso'o si xcui' na tyu'u tyiquee na ji'i̱ cha' cuxi, cha' la cui' jua'a̱ ngua'ni ngu' bi' tya li'.

⁷ La cui' ti ná tso'o cha' cua'ni tlyu na ji'i̱ lcui̱ jo'ó, ñi'ya̱ nu ngua'ni ngu' bi'. Ndi'ya̱ nchcui' cha' nu nscua lo quityi cusu' cha' ji'i̱ ñati̱ bi': “Tsa cu' ti ndya'a̱ ngu' ji̱i̱. Na ndi'i̱ ti ngu' ndyacu ngu' ndyi'o ngu' lo'o tya'a ngu', li' ndatu̱ ti ngu' cha' quijya ngu' lo'o tya'a ngu'”, nacui̱ lo quityi bi'.

⁸ La cui' ti ná tso'o cha' cua'ni suba' na lo'o xa' cuna'a̱, ñi'ya̱ nu ngua'ni ngu' bi' li'. ¿Ñi'ya̱ ngua li'? Sca ti tsa̱ ngujuii calaa ntucua sna mil tya'a ñati̱ bi' xqui'ya cha' cuxi bi'.

⁹ Jua'a̱ ná tso'o cha' xtyí lo'o ti na ji'i̱ ycui' Ndyosi nu Xu'na na, cha' quiña'a̱ tsa cha' clyu ti' ngüi'ya Ni ji'na. Jua'a̱ ngua'ni ngu' bi' nu ngua sa'ni, li' ngusu'ba Ni cuaña lijya̱ cha' ndyujuii ni' ji'i̱ ngu' bi'.

¹⁰ La cui' ti cha' ná ntsu'u cha' chcui' cuxi na ji'i̱ ycui' Ndyosi. Cua ntsu'u xi jyo'o cusu' bi' nu ngua'ni ngu' jua'a̱, lo'o li' ndye ngu' ndyujuii Ni ji'i̱ ngu' bi', cha' nda Ni sca xca̱ lijya̱ nu ndyujuii ji'i̱ ngu' bi'.

¹¹ Lcaa cha' tlyu bi' ngua ji'i̱ jyo'o cusu' bi' nu ngua sa'ni, cha' caja ñi'ya̱ tyi'u ti' xa' ñati̱ nde loo la na laca nu ngua ji'i̱ jyo'o cusu' bi', ni cha' laca ngua ji'i̱ ngu' bi' jua'a̱. Lo'o jua'a̱ tya nscua cha' bi' lo quityi cha' cube ti' na ji'i̱ cha' bi'. Cua ngulala ti tye chalyuu su ndi'i̱ na juani;

¹² bi' cha' tso'o si cube ti' ma̱ cha' ná tyu'utsu' ma̱ ji'i̱ tyucui̱i̱ nu liñi ca, si nti' ma̱ cha' tso'o ti tyi'i̱ cresiya ji'i̱ ma̱, cha' ná tyacua sca cha' cuxi ji'i̱ ma̱ tsiya' ti.

¹³ Lcaa quiya' lo'o tyacua sca cha' cuxi ji'i̱ ma̱, ná cube ti' ma̱ li', la cui' jua'a̱ ndyaca ji'i̱ cua ña'a̱ ca ñati̱ chalyuu. Pana ná cube ti' ma̱, ña'a̱ ycui' Ndyosi ji'na; lcaa cña nu nacui̱ Ni cha' cua'ni Ni cuentya ji'na, ndu'ni Ni cña bi'. Ná ta Ni chacuayá' cha' tyiji̱loo sca cha' cuxi ji'i̱ ma̱ ña'a̱ cuayá' nu nga'aa caca xtyanu ma̱ ji'i̱; pana la cui' hora lo'o cua cñilo'o ti cha' cuxi bi' ji'i̱ ma̱, li' xtyucua Ni ji'i̱ ma̱ cha' ná cua'ni ma̱ ji'i̱, lo'o li' taca clyaá ma̱ ji'i̱ cha' cuxi bi'.

¹⁴ Cu'ma̱ tya'a tso'o na, ntsu'u tsa tyiquee na' ña'a̱ na' ji'i̱ ma̱, bi' cha' nchcui' tsa na' lo'o ma̱ juani cha' ná cua'ni tlyu ma̱ tsiya' ti ji'i̱ lcui̱ jo'ó ji'i̱ ngu', nga'aa tsaa ma̱ su ntucua bi'.

¹⁵ Nti' na' cha' nduna tso'o ma̱, cua laca nclyacua tso'o ti' ma̱ nti' na', bi' cha' nchcui' na' lo'o ma̱ jua'a̱. Taca cui'ya ma̱ cuentya cha' chañi laca cha' nu nda na' lo'o ma̱ juani.

¹⁶ Lo'o ndyu'u ti'i̱ na stu'ba ti lo'o ngu' tya'a ngusñi na cha' ji'i̱ Jesús ndyi'yu na, lo'o jua'a̱ ndacu na li'; jua'a̱ ndu'ni na xqui'ya cha' ngulacua̱ Jesús ji'i̱ cha' bi' tya clyo. Bi' cha' clyo nda na tsa xlya'be ji'i̱ ycui' Ndyosi xqui'ya cña nu ngua'ni Jesús bi'. Lo'o ndyi'yu na vino bi', li' stu'ba ntsu'u cha' ji'na lo'o ycui' Jesús lo'o lcaa ngu' tya'a na, nu lo'o ntsu'u ti' na cha' cua ndyalu tañi ycui' Jesús lo'o ngujuii Ni lo crusi xqui'ya na. Lo'o ndacu na xlyá bi', la cui' jua'a̱ li', stu'ba ntsu'u cha' ji'na lo'o Jesús lo'o lcaa ngu' tya'a na, nu lo'o ntsu'u ti' na cha' nda Jesús ji'i̱ tyucui ña'a̱ ycui' ca cha' ngujuii Ni lo crusi xqui'ya na.

¹⁷ Sca ti ycu' xlyá nscua lo mesa su ndacu na stu'ba ti; lo'o ndya'be xlyá bi', li' ndyiji na cacu ca ta'a na, masi tyu̱u̱ tsa tya'a na. Tsa tlyu ti ndi'i̱ na cha' stu'ba ti laca na ñati̱ ji'i̱ Jesús.

¹⁸ Cui'ya ma̱ xi cuentya ñi'ya̱ nu ndu'ni ngu' judío. Ndya'a̱ lo'o ngu' ji'i̱ msta̱ cha' sta ngu' ji'i̱ lo mesa su ndu'ni tlyu ngu' ji'i̱ ycui' Ndyosi. Lo'o li' ntsu'u nu laca cña ne' laa bi', nu ndacu na nu ngua msta̱ bi'. Ntsu'u cha' ji'i̱ nu ndyacu msta̱ bi' lo'o ycui' Ndyosi, cha' xqui'ya Ni ntucua mesa bi'.

¹⁹ Xa' ña'a̱ ndu'ni ngu' xa' tsu' lo'o lcui̱ jo'ó ji'i̱ ngu'. Lo'o ngu' bi' nsta ngu' cuaña' lo mesa cha' caca msta̱ ji'i̱ jo'ó ji'i̱ ngu'. ¿Ha tso'o la chacuayá' ntsu'u ji'i̱ lcui̱ jo'ó bi' lacua? Ná ntsu'u cha' ji'i̱ bi' tsiya' ti. Stu'ba ti ña'a̱ cuaña' msta̱ bi' lo'o xa' la cuaña'.

²⁰ Ndi'ya̱ laca cha' lo'o ndu'ni tlyu ngu' ji'i̱ jo'ó bi': Si'i ji'i̱ ycui' Ndyosi ndu'ni tlyu ngu' bi', ji'i̱ tyu̱u̱ lo cui'i̱ xña'a̱ ndu'ni tlyu ngu' lo'o ndu'ni ngu' jua'a̱. Lo'o cu'ma̱ ni, ná tso'o cua'ni tya'a ma̱ lo'o cui'i̱ xña'a̱ bi'.

²¹ Ná tso'o co'o ma̱ cuentya ji'i̱ cui'i̱ xña'a̱ bi', lo'o li' co'o ma̱ na nu cua nda Jesús nu Xu'na na cha' co'o na. Ná tso'o tsiya' ti cha' bi'; ni ná tso'o cacu ma̱ cuentya ji'i̱ cui'i̱ xña'a̱ bi', li' nde loo la cacu ma̱ cuentya ji'i̱ Jesús nu Xu'na na.

²² ¿Ha nti' na cha' ca chi̱i̱ ti' ycui' Ndyosi nu Xu'na na ña'a̱ Ni ji'na? ¿Ha nchca la ji'na que ycui' Ndyosi lacua, nti' na?

Cube ti' na ji'i̱ xa' ñati̱, si'i xcui' cha' ji'i̱ ycui' ca na cube ti' na

²³ Chañi tsa cha' nu nchcui' ñati̱: “Ntsu'u chacuayá' cua'ni na cua ña'a̱ ca cha' nu nti' ti na cua'ni na”, nacui̱ ngu'. Pana ntsu'u xi cha' nu ndu'ni na nu ná taca xtyucua ji'na tsiya' ti. Chañi cha' taca cua'ni na ñi'ya̱ nu nti' ti na, pana si'i lcaa cha' bi' ndu'ni cha' xñi tso'o na cha' ji'i̱ ycui' Ndyosi.

²⁴ Nga'a̱ cha' culacua ti' na ñi'ya̱ nu caca tso'o la cha' ji'i̱ xa' ñati̱, si'i xcui' na cuentya ji'na ti culacua ti' na.

²⁵ Taca cacu ma̱ lcaa na ndacu nu nchca caya' ni'i̱ lcaya'; ná sca culacua ti' ma̱ na ca laca bi', si tso'o, si ná tso'o laca bi' cuentya ji'i̱ ma̱.

²⁶ Ycui' Ndyosi Sti na ca ji'i̱ tyucui ña'a̱ chalyuu, lo'o jua'a̱ la cui' Ni ngüiñá Ni lcaa lo na nu ntsu'u chalyuu.

²⁷ Ná cube ti' ma̱ si chcui' sca ñati̱ lo'o ma̱ cha' cacu ma̱ xi slo ngu', masi sca ñati̱ nu ná ntsu'u cha' ji'i̱ lo'o ycui' Ndyosi laca bi'. Tso'o si tsaa ma̱ slo ngu' bi' si nti' ma̱ lacua. Lo'o li' cacu ma̱ ji'i̱ na laca nu ta ngu' ji'i̱ ma̱; ná ntsu'u cha' cube ti' ma̱ ji'i̱ na bi', si tso'o, si ná tso'o laca bi' cuentya ji'i̱ ma̱.

²⁸ Sca ti si cacha' sca ñati̱ tya'a ndyacu ma̱ cha' msta̱ nu nscua slo jo'ó laca nu cuaña' nu ndyacu ma̱ bi', li' ná tso'o cha' cacu ma̱ ji'i̱. Tso'o la si cui'ya ngu' bi' cuentya cha' cuxi laca na bi' cuentya ji'i̱ ma̱, cha' caca jlo ti' ngu' cha' ná ntsu'u cha' cacu ma̱ na bi' lo'o ngusñi ma̱ cha' ji'i̱ Jesús.

²⁹ Cu'ma̱ cua jlo ti' ma̱ cha' bi'. Chaca yu bi' tya lyiji caca cuayá' tso'o ti' yu, bi' cha' ná nti' na cha' tyu'utsu' yu ji'i̱ tyucui̱i̱ liñi si ña'a̱ yu cha' ndyacu ma̱ na bi'. Ná tyiquee' ñacui̱ ma̱ 'na li': “¿Ni cha' laca xcui' cuentya ji'i̱ xa' ñati̱ culacua ti' na'? Ntsu'u chacuayá' cua'ni na' ñi'ya̱ nu nti' na' cua'ni na'.

³⁰ Si nda tsa na' xlya'be ji'i̱ ycui' Ndyosi cuentya ji'i̱ na ndacu na', ¿ni cha' laca chcui' ñati̱ cha' cuxi 'na lo'o ndacu na' ji'i̱ lacua?” ñacui̱ ma̱ 'na.

³¹ Tso'o lacua masi cacu ma̱, masi co'o ma̱, masi cua'ni ma̱ lcua ti lo cña nu ndyu'ni ma̱, pana tyi'u ti' ma̱ ji'i̱ ycui' Ndyosi laja lo'o cua'ni ma̱ lcaa cña bi', cha' caca cuayá' ti' ngu' li' cha' tso'o tsa laca cha' ji'i̱ ycui' Ndyosi, la cui' cha' nu cua ngusñi ma̱.

³² Ná ta ma̱ chacuayá' tyu'utsu' ni tsaca ngu' ji'i̱ tyucui̱i̱ liñi ji'i̱ Cristo; ni ngu' judío, ni ngu' xa' tsu' nu si'i ngu' judío laca, ni tsaca ñati̱ tya'a ngusñi ma̱ cha' ji'i̱ ycui' Ndyosi, ná tso'o tsiya' ti si tyú ngu' ya' nu xña'a̱.

³³ Lcaa su ndyu'ni na' cña ndube ti' na' ji'i̱ xa' ñati̱, si caca tso'o cresiya ji'i̱ ngu' lo'o cua'ni na' cña bi'. Si'i na tyacua cha' tso'o ji'i̱ ycui' ca na', nti' na' cha' caca tso'o cresiya ji'i̱ cua ña'a̱ ca ñati̱, cha' caja ñi'ya̱ clyaá ngu' ji'i̱ nu cuxi li'.