Zacarías 9 - Chuj San Sebastian Bible

Yailal 'a yib'n̈ eb' 'ajc'ojol

¹ Atn jun tzo'n̈ paxti tic 'ix yalcn 'el Jehová, chajtlto 'oj ya' cot yailal 'a yol yic lum Hadrac yet' 'a yib'n̈ niwquil chon̈b' Damasco. Man̈ocn̈ej smasnil eb' yin̈tl Israel tzmaclj Dios yila', palta tzmaclj pax yil smasnil eb' chuc nacion̈al.

² Yuj cha, 'oj ya' cot yailal 'a yib'n̈ eb' 'aj Hamat, ata 'ay 'a stitc smacb'en Hadrac. 'Oj ya' cot pax yailal 'a yib'n̈ eb' 'aj Tiro yet' 'a eb' 'aj Sidón, wach'xam to caw jeln eb'.

³ A eb' 'aj Tiro cha, 'ix sb'o chan̈ eb' smuroal schon̈ab'. Xlajw cha, smolb'tzan eb' q'uen oro yet' q'uen plata, 'icha tz'aj chan̈ ch'ucn lum lum smontoaxi.

⁴ Palta ax Jehová 'oj 'i'n 'ec' smasnil 'a eb', 'oj julxoc can 'at sricoal eb' chi 'a yojl a mar. 'Oj n̈usxoc can tz'a jun schon̈b' eb' chi smasnil.

⁵ A yic 'oj yilnc chon̈b' Ascalón jun cha, caw 'oj xiwoc. 'Ixta pax chon̈b' Gaza, caw niwn 'oj 'aj yab'n syail. An̈jtona pax Ecrón, caw 'oj yab' syal si'mb'il, yujto 'oj sat 'ejm jun chon̈b' 'aych yipc sc'ojol. A chon̈b' Gaza cha, 'oj cancn 'a man̈x 'a sreyal, ax chon̈b' Ascalón, man̈x 'a junc 'anma 'oj can 'a 'a.

⁶ A chon̈b' Asdod, caln 'oj 'aj eb' 'anma yaj cajn 'a 'a. Yuj cha, tzyaln Jehová 'ixtic: 'Ixtnta 'oj wutc wi'n 'ejm sb'an̈quinal eb' filisteo.

⁷ Man̈x 'oj wac' schi eb' no chib'j 'ayt 'och schiq'uil, man̈x 'oj sc'ux eb' jun tzo'n̈ tas to 'ay yowlal sc'uxxi, 'icha yaln sleyal. Palta a 'a scal jun tzo'n̈ 'anma cha, 'ayt eb' 'oj canoc, 'oj 'ochcn eb' wico'oc. Lajn 'oj 'ajcn eb' 'icha eb' 'aj Judá. Ax eb' 'aj Ecrón, lajn 'oj 'ajcn eb' 'icha eb' jebuseo.

⁸ An xo tic, 'oj in coln̈j eb' in chon̈b' cha, ax in tan̈wni eb' 'a eb' soldado tz'ec' 'a tic. A eb' 'ixtm 'anma', man̈x 'oj 'ixtxoc in chon̈b' yuj eb'. An wal caw 'oj in tan̈wc in chon̈b' cha, xchi Dios.

A jun sReyl chon̈b' Israel 'oj jawoc

⁹ A Jehová tzaln 'ixtic: ¡Tzaljan̈c wal si'mb'il ex 'aj chon̈b' Sión! ¡B'itnan̈c 'a tzaljc'ojlal ex 'aj Jerusalén! 'Iltec wal sjaw e reyl 'ayex, caw tojl snab'en. A 'oj 'a'nc colnb'il. Caw 'emmquil sjawi, 'ay q'ue 'a yib'n̈ jun no quelm b'uru yune jun no 'axna.

¹⁰ A 'oj 'a'nc lajwc 'el scaruaje eb' yic Efraín, yet' schej eb' 'aj Jerusalén, atn no tz'at 'a owal, yet' syamc'ab' eb' yic owal. A jun rey chi 'oj alnc 'el junc'ojlal 'a smasnil nacion̈, ax ya'n yajlil 'a jun sti a mar, masnto 'a junx sti a', tzchaj 'at 'a sti a Éufrates, masnto 'aj tzlajw c'och sti lum lu'um.

'Oj q'uex c'och chon̈b' Israel

¹¹ Ex 'aj Jerusalén, yuj wal schic'l jun xajmb'al, yuj cha, wach' yaj in trato eyet'oc, 'oj ex wic' q'uet 'a yojl jun oln caw xab' yich 'aj may a a', 'aj preso eyaji.

¹² Ax 'icha preso eyaji, to an 'ayn xo 'och yipc e c'ojol, meltzjan̈c 'a 'aj wach' 'oj eyaji. Tzwal 'ayx ticnec, an 'oj wac' yaxilal 'a eyib'an̈. 'Ec'b'al 'oj wutc in pactzan 'ayx 'a yib'n̈ 'icha xeyab' syail.

¹³ 'Oj in c'anlb'oc Judá 'icha junc tzjuln 'at junc jul-lab' yic owal, ax Efraín 'oj in c'anlb'oc 'icha junc jul-lab'. Ax eb' 'aj Sión, 'oj in c'anlb'oc eb' 'icha wespada, yic 'oj wa'nc owl yet' eb' 'aj Grecia, xchi Dios.

¹⁴ A Jehová 'oj sch'ox sb'a 'a yib'n̈ schon̈ab'. 'Icha raya 'ixta 'oj yutc sjulwji. A Jehová Cajlil, 'oj yutz'c strompeta, ax yec' lemnjoc 'a scal chacxuxm'ic' 'a stojlal sur.

¹⁵ A Jehová tztac' yuj smasnil, a 'oj colwjoc 'a eb' schon̈ab'. A yet' smejech eb', ax ste'x 'ejm eb' chuc chon̈b'al yuj eb', 'oj 'ajxoc ganar eb' 'ajc'ojl yuj eb'. Caw 'oj ya'l eb' schon̈b' chi yaw 'a scal owal, 'icha eb' 'u'm 'an̈. 'Oj 'elcn schic'l eb' 'ajc'ojl chi yuj eb', 'icha wal tzyac' schic'l no xajmb'al 'ay 'a yol niwc waso yic tztob'x 'ejm 'a yib'n̈ sch'ac junc yet'l xajmb'al.

¹⁶ A wal 'a yic jun c'ul cha, a Jehová Dios, a 'oj colnc 'el schon̈ab', 'icha tzyutj junc 'ilm calnelu scoln 'el scalnelu. Caw wal tzictzni 'oj 'aj yilx eb' yic Dios 'a yol schon̈ab', 'icha wal q'uen q'uen man̈x jantcoc swach'l yilx 'aych 'a junc corona.

¹⁷ Man̈x jantcoc swach'il, caw wal wach' yilx 'oj 'aj eb' 'aj chon̈b' cha. Yujto 'oj yac' sobra 'ixm trigo yet' yal uva, yuj cha, caw wal wach' 'oj 'aj sq'uib' eb' quelem, yet' eb' cob'es.