Zacarías 8 - Chuj San Sebastian Bible

'Oj scha Jerusalén wach'l jun 'ejm xo

¹ A Jehová tztac' yuj smasnil, a 'ix aln jun tzo'n̈ paxti tic 'ixtic:

² Caw wal 'ay yowl in c'ojl yuj tas tz'aj yixtx Sión.

³ 'Oj in meltzj pax 'a Jerusalén, yic tzin 'aj cajn 'a jun 'ejm xo. 'Ixta to b'i'an, a Jerusalén cha, 'oj scuch Chon̈b' Yiclum. Ax jun tzaln wic an Jehová in, tztac' wuj smasnil, 'oj scuch Tzaln Cojxn̈ej in 'ay wico'.

⁴ A eb' 'ichmtac winac yet' eb' chichmtac 'ix, 'oj 'em wocn eb' jun 'ejm xo 'a plas 'a Jerusalén. C'occhtexn̈ej 'oj 'ec' eb', yujto 'ichmtac 'anma eb'.

⁵ A scayeal jun chon̈b' cha, caw wal 'oj b'ut'joc 'el yuj eb' winc 'unin, yet' eb' 'ix 'unn 'oj laj tajnc ta'.

⁶ Ax tic ex can to 'a in chon̈b' tic, tzam e na'a to 'ajltac sb'o jun tzo'n̈ tic, palta an xo tic, may yajltacl sb'o wu'uj, an Jehová in tztac' wuj smasnil.

⁷ An 'oj in col-l in chon̈b' 'a yol sc'ab' jun tzo'n̈ nacion̈ 'a stojlal 'aj tzq'uel c'u yet' 'a stojlal 'aj tz'em c'u.

⁸ Ax wi'n cot eb' 'a Jerusalén tic yic tzcajn pax eb' jun 'ejm xo. 'Oj 'och eb' in chon̈b'oc, an xo 'oj wochx sDiosalc eb'. 'Oj wac' yajlil 'a yib'n̈ eb' 'a stojlal, 'icha yaj waln cani, xchi Dios.

⁹ A Jehová tztac' yuj smasnil, a tzaln 'ixtic: Te'n tzeyutj e b'a, ex to wan eyab'n jun tzo'n̈ paxti 'ix yalcn 'el eb' in checb' 'a yictax x'ejm yipnub'al yich watut sb'o'i, an Jehová in tztac' wuj smasnil.

¹⁰ Yujto a 'a yaln̈tax cha, may 'aj wach' tzcot stojl eb' winc tzmunlji yet' stojl no chej tzc'anlb'axi. Yujn̈ej eb' 'ajc'ojol, yuj cha, may junc'ojlal 'a scal eb' tz'elt b'eyc'oc. An xwa'ch eb' 'ajc'ojlal 'a jun tzo'n̈ xo eb'.

¹¹ Palta ax ticnec, an Jehová in tztac' wuj smasnil, an tzwala, to a jantcto eb' 'anma xcan 'a jun chon̈b' tic, man̈x 'oj in b'o 'icha tas in b'ojnac 'a eb' 'a yic yaln̈taxi.

¹² 'Oj can eb' 'a junc'ojlal. A yuva eb', caw wal 'oj yac' sat. A slum eb', yel xo wach' 'oj yutc ya'n sb'a'al. A satcha'an̈ a 'oj 'a'nc cot chicb'cha'an̈. An xo 'oj wac' smasnil jun tzo'n̈ chi 'a eb' 'anma tzcan to 'a jun chon̈b' tic.

¹³ 'Icha 'ajnc e b'inax ex 'aj Judá, yet' ex 'aj Israel 'a scatb' paxti eb' chon̈ab'. Ax ticnec, 'oj ex in col-li, ax e b'inax 'a swach'il. ¡Caw man̈ ex xiwoc! ¡Te'n tzeyutj e b'a! xchi Dios.

¹⁴ A Jehová tztac' yuj smasnil a tzaln 'ixtic: 'Ix in nalb'ej wa'n 'och syailal eb' e mam eyicham, yic stzuntzn cot eb' wowal. A tas xin na cha, 'ix wac' 'el'choc.

¹⁵ 'Ixta pax ticnec, tox xin na'a, to a wach'ilal a 'oj in b'o 'a Jerusalén yet' 'a Judá. Yuj cha, caw man̈ ex xiwoc.

¹⁶ Atn jun tzo'n̈ tic yowlal 'oj e b'o ax tic: Tzex paxtin junjn ex wal 'a yel 'a eb' eyit 'anma'il, tojl tzeyutj e b'eyc'ojlwi, tzeya'n eyip eyoch 'a junc'ojlal junjn ex,

¹⁷ man̈ e nalb'oc eya'n tu nab'enal 'a eb' eyit 'anma'il, man̈ eyac' 'es 'ayx junjn ex. An Jehová in, an tzwala, to caw wal tzin yaj jun tzo'n̈ b'eyb'al cha, xchi Dios.

¹⁸ A Jehová tztac' yuj smasnil, a 'ix aln 'ayn 'ixtic:

¹⁹ A c'ajb'c'ojlal tzeyac' 'a yic schan̈l 'uj, 'a yic yol 'uj, 'a yic yucl 'uj yet' 'a yic slajn̈il 'uj, 'oj meltzjoc can 'och jun tzo'n̈ chi 'a q'uin̈al, yet' 'a tzaljc'ojlalil 'a eb' yin̈tl Judá. Yuj cha, 'a'c 'och e b'a 'a stojlal yet' 'a junc'ojlal.

²⁰ Til to wal eb' eyit chon̈b' cajn 'a jun tzo'n̈ xo niwc chon̈b' 'a najat, 'oj jawc 'a Jerusalén tic.

²¹ A eb' cajn 'a junc chon̈ab', 'oj yal eb' 'a eb' cajn 'a junc xo chon̈b' 'ixtic: Coyc calc qui b'a 'a Jehová tztac' yuj smasnil, sec tzyac' syaxilal 'ayn̈ec, 'oj xchic eb'. Ax jun tzo'n̈ xo eb', 'oj yal eb' 'ixtic: 'Oj qui 'atc pax junx an̈ec tic, 'oj xchic eb'.

²² Man̈x yalnb'ilc jun tzo'n̈ xo chuc chon̈b'al to caw wal 'ay yip 'oj jawc 'a Jerusalén, yic tzwul ya'nc eb' 'emmquilal 'a 'ayn an Jehová in tic, yuj sc'ann pax eb' in yaxilal 'a yib'an̈.

²³ A 'a yic jun c'ul cha, lajn̈wan̈ eb' chuc chon̈b'al 'oj 'och yamn 'a spichl junc israel, ax yaln eb' 'a 'ixtic: Tzqui nib'j tzon̈ 'at eyet'oc, yujto 'ix cab'i chajtlto 'a Dios 'aych eyet' ax tic, 'oj xchic eb', xchi Dios.