Zacarías 7 - Chuj San Sebastian Bible

C'ajb'c'ojlal to man̈ yeloc

¹ A 'a yic schan̈l c'u yoch sb'aln̈il 'uj, (atn jun 'uj tzcuch Quisleu), yic schan̈l ab'il yoch Darío reyal, a yic cha, 'ix paxtin Jehová 'ayn an Zacarías in tic.

² A 'a yic jun tiempoal cha, a eb' 'aj Bet-el 'ix checn cot Sarezer, Regem-melec, yet' jun tzo'n̈ xo eb' winc ajun yet' eb' yic xjaw eb' 'a yatut Dios yuj wul yalnc sb'a eb' 'a Jehová jun tztac' yuj smasnil.

³ Xwul sc'anb'noc eb' 'ixtc 'a eb' schecb' Dios, yet' 'a eb' ya'mal 'och sti eb' 'anma': ¿An̈j 'ijnoc am tzca'ch te pichl n̈achtac yic cusc'ojlal on̈, tzon̈ 'och pax am 'a c'ajb'c'ojlal 'a yotquil 'uj yic junjn ab'il, yic tzqui nan cot sma'nb'il 'ejm yatut Dios, 'icha xon tzqui b'o'ec, masnto ticnec? xchi eb'.

⁴ Xlajw cha, ax Jehová tztac' yuj smasnil, a 'ix aln 'ayn 'ixtic:

⁵ Al 'ixtc 'a smasnil eb' 'anma 'a jun nacion̈ tic, yet' 'a eb' ya'mal 'och sti eb' 'ayin: Ax tic, 'ayx 70 ab'il xo e c'ojl e b'eylb'an eya'n 'och te pichl n̈achtac yic cusc'ojlal, yic tzex 'och pax 'a c'ajb'c'ojlal 'a yotquil 'uj yet' 'a yucl 'uj 'a junjn ab'il, palta ¿tom yujto 'ay wel'ch 'a e sat, yuj cha, tze b'on jun tzo'n̈ cha?

⁶ A yic tzex wa'i yet' yic tzeyu'n tas tzeyuq'uej, cojn yuj eya'n tzaljoc e c'ojl 'a mun yol eyico' tze b'oni.

⁷ A tas tzwal 'ayx ticnec, atn jun tzo'n̈ in checnb'il wa'jnac yal-l eb' in checb' 'a yic pecti', yic 'ayc' Jerusalén 'a junc'ojlal, yic niwn 'anma 'ayc' 'a 'a, niwn pax chon̈b' oyn 'och 'a 'a, yet' 'a yol smacb'en Neguev, yet' pax 'a lum niwc pan̈an, 'ayn̈j 'anma cajn ta', xchi Dios, xa chi 'a eb', xchi 'ayin.

⁸ 'Ix paxtin pax Jehová 'ayn an Zacarías in tic, xyaln 'ixtic:

⁹ Atn jun tzo'n̈ tic waljnac 'a eb' in chon̈b' 'a yic pecti': Tojl cab' tzeyutj e b'eyc'ojlwi, wach' tzeyutj e nab'en, 'o'ch cab' e c'ojl 'ayx junjn ex.

¹⁰ Man̈ eyixtc eb' 'ix 'ix chamnc yichmil, eb' meb'a 'unn chamnc xo smam, eb' chuc chon̈b'al, yet' eb' meb'a'. Man̈ e nalb'oc eya'n tu nab'enal 'ayx junjn ex, xin chi 'a eb'.

¹¹ Palta ma'ix yal sc'ojl eb' chon̈b' chi syiclej. Chuc 'aj q'ueln can 'at eb' smasnil, 'icha to chacn̈ xyutj sb'a eb'.

¹² Caw pit xyutj eb' snab'en, 'icha stzatzl q'uen yax q'ue'en, sec wach' matz chaj eb' yab' cuynb'il yet' checnb'il 'ix wal 'a eb', atn jun tzo'n̈ yaljnac 'el eb' in checb' yuj Wespíritu 'a yic pecti'. Yuj cha, caw niwn xcot yowl in c'ojol.

¹³ 'Ix waln 'ixtic: 'Icha wal 'ix yutj sb'a eb', ma'ix schaj eb' yab' 'ayn an Jehová in, yic in paxtin 'a eb', an̈jtona 'ixta 'in pax jun xo, a yic 'ix tew eb' 'ayin, ma'in ta'w 'a eb'.

¹⁴ Yuj wal cha, xwa'n sactzic eb' 'icha tzyutj chacxuxm'ic' junc tas. 'Ix 'atcn eb' 'a jun tzo'n̈ nacion̈ to man̈ yojcoc eb'. Ax schon̈b' eb', cusltac x'ajcni. Man̈x 'a junc mach xcan cajn 'a 'a. A schon̈b' eb' cha, caw wach' yilxi, palta yuj smul eb' 'ix cancn 'a cusltaquil, xchi Dios.