Zacarías 6 - Chuj San Sebastian Bible

A chan̈e caruaje yic owal

¹ 'Ay pax junx tas 'ix ch'oxx wil 'a 'icha waychil. 'Ix wil yelt chan̈e caruaje yic owl 'a snan̈l chab' tzaln to nab'a bronce.

² A jun b'ab'l caruaje cha, chac e no chej to'jnac; ax jun schab'il, q'uic' e no chej to'jnac.

³ Jun yoxil, sac e no chej to'jnac, ax jun schan̈il, tz'ib'quintac e no chej chi to'jnac.

⁴ Xlajw cha, xin c'anb'n 'ixtc 'a jun ángel tzpaxtin wet' cha: Mamin, ¿tas tzyal 'el'ch junx tic? xin chi 'a 'a.

⁵ Ax jun ángel cha, 'ix yaln 'ixtc 'ayin: A jun tzo'n̈ tic, tz'at eb' 'a schan̈paq'uil 'aj tzcot 'ic', yic xlajw yelt eb' 'a yojltac jun Yajl 'a smasnil yolyib'n̈q'uinal.

⁶ A jun caruaje toc'b'il yuj e no q'uic' chej cha, ata tz'at 'a jun nacion̈ 'ay 'a stojlal norte, ax jun caruaje toc'b'il yuj e no sac chej cha, ata tz'at 'a jun nacion̈ 'ay 'a stojlal 'aj tz'em c'u. Ax junx caruaje toc'b'il yuj e no tz'ib'quintac chej cha, ata tz'at 'a jun nacion̈ 'ay 'a stojlal sur, xchi jun ángel cha.

⁷ A jun tzo'n̈ chej caw wal 'ay yip cha, tznib'j eb' tz'at yil smasnil yolyib'n̈q'uinal. 'Ix yaln jun ángel chi 'a e no 'ixtic: 'Ixquec, 'at 'iltec smasnil yolyib'n̈q'uinal, xchi. 'Ix 'at e no'.

⁸ Xlajw cha, x'awj jun ángel chi 'ayn 'ixtic: 'Ilt nab'an, yuj wal jun caruaje 'ix 'at 'a jun nacion̈ 'ay 'a stojlal norte, ax yoch wan yowl sc'ojl Jehová 'a yib'n̈ jun nacion̈ cha, xchi.

X'och yopiso Josué

⁹ A Jehová, a 'ix aln jun tzo'n̈ paxti tic 'ayin:

¹⁰ Chaj junc ofrenda 'a eb' paxn̈cta 'a Babilonia, eb' xit'nc 'icha presoal 'a jun nacion̈ cha: atn Heldai, Tobías yet' Jedaías. Tzlajwn̈ej cha, tzach 'at 'a yatut Josías, win yunnal Sofonías.

¹¹ A yet' q'uen plata yet' q'uen oro 'oj a cha 'a eb' cha, a yet' tza b'o junc corona. Tzlajw cha, tza'n q'ue 'a sjolm Josué sat ya'mal 'och sti eb' 'anma 'ayin, atn win yunnal Josadac.

¹² Tzaln 'a 'ixtic: A Jehová tztac' yuj smasnil, a tzaln 'ixtic: 'Ay jun in checb' 'oj 'eltoc 'a scal eb' yin̈tl Isaí, 'oj 'ajxoc sb'ic Swol, 'oj yic' wal yip 'a 'aj 'ayc' cha, 'oj sb'ox chan̈ sjel watut.

¹³ Caw a 'oj b'onc sjel watut cha, 'oj b'inaxc wal si'mb'il. 'Oj 'em wocn ya'n reyl 'a sdespacho, ax 'a smoch sdespacho cha, ata 'oj 'em wocn jun ya'mal 'och sti eb' 'anma 'a Dios, junxn̈ej yaj snab'en eb' schawn̈il.

¹⁴ Ax jun corona 'oj a b'o cha, 'icha snanb'il cot watut 'oj 'ajcni yic tznax cot yuj Helem, Tobías, Jedaías yet' Hen yunnal Sofonías, xa chi 'a 'a, xchi Dios 'ayin.

¹⁵ 'Oj cot eb' 'anma 'a najat, yic tzcolwj eb' wul sb'onc sjel yatut Jehová eyet'oc. 'Ixtnta 'oj 'aj snachj 'el eyu'uj, chajtlto a Jehová tztac' yuj smasnil, a 'in checn cot wul wal 'ayex. A jun tic, 'oj 'el'choc, toto 'oj e cha eyab'i', ax eyiclni tas tzyal Jehová qui Diosalec.