Zacarías 5 - Chuj San Sebastian Bible

Ch'an̈ un̈ tz'ec' quen̈cnoc

¹ 'Ay jun tzo'n̈ xo xch'oxx wil 'a 'icha waychil. 'Ix wil yec' quen̈n̈oc jun ch'an̈ un̈ tz'ib'b'il.

² Sc'anb'n jun ángel chi 'ayn 'ixtic: —¿Tas tzela? xchi. —Tzwil yec' quen̈cnoc jun ch'an̈ un̈ tz'ib'b'il, b'aln̈e metro ste'il, nan̈l yol metro sat, xin chi.

³ Xlajw cha, xyaln 'ayn 'ixtic: —A 'a ch'an̈, ata tz'ib'b'il jun yailal 'oj jawc 'a yib'n̈ smasnil eb' maysch'olnil sb'eyb'al 'a jun nacion̈ tic. Atn tic tz'ib'b'il 'a schapaq'uil: Jun pac' 'aj tzyal yuj smasnil eb' 'elc'um, ax 'a junx pac', ata tzyal yuj eb' 'a'm 'es, c'uxn 'oj satxoc 'el eb' 'a sat lum lu'um.

⁴ A Jehová tztac' yuj smasnil, a tzaln 'ixtic: An wal 'oj wa't jun yailal tic, sec wach' 'oj 'och 'a yol yatut eb' 'elc'um yet' eb' tzlocn in b'i yic tzya'n 'es, 'oj cann̈j jun yailal chi 'a junc n̈a cha, masnto 'oj lajwc 'ejm spatzb'il, man̈x 'a junc sq'uenal 'oj canoc, xchi Dios, xchi jun ángel cha.

Jun 'ix 'ix 'ay 'ejm 'a yol jun 'echtab'

⁵ Xlajwn̈ej cha, x'elt jun ángel tzpaxtin wet' cha, xyaln 'ayn 'ixtic: Tzcham wal eln jun wan sch'oxn sb'a cha, xchi 'ayin.

⁶ Xin c'anb'n 'a 'ixtic: ¿Tas jun cha? xin chi 'a 'a. Xyaln 'ayin: A jun tzch'ox sb'a cha, 'echtab'. A tzch'oxn cot smul eb' 'anma cajn 'a lum lum tic, xchi.

⁷ A jun 'echtab' cha, plomo 'ay q'ue smacloc. Ax yic xjacx chan̈ jun smac cha, 'ix jun wocn 'ejm 'a yojl jun 'echtab' cha.

⁸ 'Ix yaln jun ángel chi 'ayn 'ixtic: A jun 'ix tzel tic, atn mul tzch'ox coti, xchi. Xlajw cha, xyecn 'och sc'ab' 'a 'ix, 'ix 'ejm can pax 'ix 'a yojl jun 'echtab' cha. 'Ix smacn can pax yet' jun smac to plomo cha.

⁹ 'Ix wiln paxi, 'ay chawn̈ 'ix, 'ay sc'axl eb' 'icha no julm chay. 'Ix cot jen̈noc eb' xwul stza'nc eb' jun 'echtab' cha, 'ix 'atx jen̈noc eb' muc'uc.

¹⁰ Xlajw cha, xin c'anb'n 'a jun ángel tzpaxtin wet' cha: ¿'Ajtil tzyij 'at eb' jun 'echtab' cha? xin chi 'a 'a.

¹¹ 'Ix yaln 'ixtc 'ayin: To 'oj 'at eb' 'at sb'o jun yet'l 'a Babilonia. A yic 'oj lajwc sb'o jun yet'l eb' cha, ax sb'on 'och eb' jun 'echtab' chi 'a yib'n̈ sb'achnub'al, xchi.