Zacarías 4 - Chuj San Sebastian Bible

Jun sb'achnub'l cantil yet' chab' te olivo

¹ Xlajw cha, 'ix meltzj cot jun ángel 'ix paxtin wet' cha, xwul spitznc 'el in wayan̈, 'icha tz'aj yel swayn̈ junc mach waynac. 'Ix sc'anb'n 'ayn 'ixtic:

² ¿Tas tzela? xchi 'ayin. 'Ix waln 'ixtc 'a 'a: Tzwil jun sb'achnub'l cantil nab'a oro yet' jun yet'l aceite 'a yib'an̈. 'Aych uque cantil chi 'a sc'ab' jun sb'achnub'al cantil cha. A junjn cantil cha, 'ay stuboal tz'i'n b'ey yaceiteal.

³ 'Ay chab' te olivo 'ayc' 'a stz'ey jun sb'achnub'l cantil cha, jun te 'ay 'a swach', ax junx te 'ay 'a surito, xin chi 'a 'a.

⁴ Xin c'anb'n pax 'a jun ángel chi 'ixtic: Mamin, ¿tas wal tzyal 'el'ch jun tic? xin chi 'a 'a.

⁵ 'Ix yaln 'ixtc 'ayin: ¿Tom man̈ ojcoc tas tzyal 'el'ch jun? xchi. 'Ix waln 'a 'a: Man̈ wojcoc mamin, xin chi 'a 'a.

⁶ 'Ix yaln pax jun ángel chi 'ayn jun 'ejm xo: A Jehová tztac' yuj smasnil a tzaln jun tzo'n̈ paxti tic 'ixtc 'a win Zorobabel: Man̈ yujoc eb' soldado, man̈ yujoc pax yip junc mach, ax sta'n o'oj, palta yuj Wespíritu.

⁷ Wach'xam til wal yajltacl sb'o watut 'icha junc niwquil witz, palta a 'a sat ach Zorobabel, man̈ 'ajltacc 'oj 'aj sb'o'i. Ach wal 'oj a'ch q'uen niwquil q'uen niwn yel'ch 'oj q'ue 'a sjolm schicn watut cha, ya' sb'a ax eb' chon̈ab', wan yel yaw eb' yaln 'ixtic: Man̈x jantcoc swach'l yilx x'aji, ya' cab' Dios swach'c'ojlal 'a yib'an̈, 'oj xchic eb', xchi Dios, xchi jun ángel cha.

⁸ Xlajw cha, caw a Jehová 'ix aln 'ayn 'ixtic:

⁹ A Zorobabel a 'ix 'a'n 'ejm yipnub'al yich jun watut tic, a pax 'oj lajnc 'el'chi. 'Ixta to b'i'an, ax snachj 'el yuj eb' in chon̈ab', chajtlto an Jehová in, tztac' wuj smasnil, an ach in chec coti.

¹⁰ A jun tzo'n̈ eb' may yel'ch 'a sat yic 'ix 'el yich jun munljel cha, ax yic 'oj yilnc eb' to wan ya'n 'och Zorobabel plomo yic tztojlb'tzan 'och q'uen slajb' q'uen tz'och 'a watut cha, caw 'oj tzaljoc chan̈ eb', xchi Dios. Xlajw cha, 'ix yaln pax jun ángel chi 'ixtic: A uque cantil cha, a tzch'oxni 'icha to 'ay uque yol sat Jehová, yujto c'uxn tzyil smasnil yolyib'n̈q'uinal, xchi.

^11-12 Xin c'anb'n 'a 'ixtic: ¿Tas tzyal 'el'ch chab' te olivo cha, te 'ay 'a junjn smoch jun sb'achnub'l cantil cha? An̈jtona', ¿tas tzyal 'el'ch chab' sc'ab' te olivo to junn̈j yaj yet' chab' tubo nab'a oro 'aj tz'ejm aceite cha? xin chi 'a 'a.

¹³ 'Ix ta'w jun ángel chi 'ayn 'ixtic: ¿Tom man̈ ojcoc tas tzyal 'el'chi? xchi. —Man̈ wojcoc mamin, xin chi 'a 'a.

¹⁴ 'Ix yaln 'ayn 'ixtic: Atn chab' tic tzch'oxn cot chawn̈ eb' sic'b'il 'el yuj Yespíritu Jehová yic tzya'n servil eb' Dios, atn Yajl yaj 'a smasnil yolyib'n̈q'uinal, xchi jun ángel cha.