Sofonías 2 - Chuj San Sebastian Bible

¹ Ex 'anma to may jac e q'uixwel, yam'tzejc e b'a, nac e b'a,

² ya' sb'a mantzac jaw jun c'u nab'ilx yuj Jehová. A jun c'u cha 'ay xo smay yalxi, yujto 'oj e sactzic can 'at yu'uj, 'icha tz'aj yutz'x 'at solcal trigo yuj 'ic'.

³ 'A'c 'och e b'a 'a yol sc'ab' Jehová e masnil, ax 'emmquilal tzeyutj e b'a eyiclni tojlal 'a yolyib'n̈q'uinl tic. B'oc stojlal, yet' pax 'emmquilal, sec toq'ue 'oj e colchj 'a yic 'oj jawc jun c'u yic 'oj ya'nc Jehová yowl sc'ojol.

Yailal 'oj jawc 'a yib'n̈ eb' nacion̈

⁴ A chon̈b' Gaza 'oj can 'a sictaquil, ax chon̈b' Ascalón, cusltac 'oj 'ajcni. C'ul wali, ax spechx 'el eb' cajn 'a Asdod, a pax eb' 'aj Ecrón, 'icha sto'x q'uet sch'an̈lyib' junc te', 'ixta 'oj 'aj eb'.

⁵ 'Oltacx wal ex cotnc 'a Creta, ex to cajn ex 'a sti a mar. A Jehová tox 'ix yala tas 'oj jawc 'a eyib'an̈, 'ix yal 'ixtic: 'Oj in satl Canaán atn schon̈b' eb' filisteo, man̈x xon junc 'anma 'oj can cajn ta'.

⁶ A jun chon̈b' 'ay 'a sti a mar cha, 'oj 'ochcn swalab'oc no cajb'en noc'. Ata 'oj sb'o chan̈ eb' 'ilm calnelu spat, yet' scol-l scalnelu eb', xchi Dios.

⁷ A eb' 'oj can to 'a eb' yin̈tl Judá, 'oj yic' eb' smacl lum ta'. Ata 'oj stan̈wc wa eb' scalnelu, ax 'a 'ac'wal, a 'a eb' te n̈a 'ay 'a Ascalón, ata 'oj way eb', yujto a Jehová sDiosal eb', a 'oj tan̈wnoc eb', ax yi'n pax q'ue'ch eb'.

⁸ A Jehová tztac' yuj smasnil, atn qui Diosalec an̈ israel on̈c tic, a tzaln 'ixtic: 'Ix wab' tas xyutj b'uchwjoc sb'a eb' moabita yet' eb' amonita 'a eb' in chon̈ab', yujto tznib'j eb' yi'cc slum eb' israel.

⁹ Yuj cha, an wal tzwal 'ixtic: A Moab, lajn 'oj 'ajcn 'icha Sodoma, ax chon̈b' Amón, lajn 'oj 'ajcn 'icha Gomorra, 'oj pac' chan̈ te q'uix 'a 'a. 'Oj 'ochcn sminasil 'atz'am. Caw cusltac 'oj 'ajcn 'a jun 'ejmn̈ej. A eb' in chon̈b' 'oj can to 'a eb' yin̈tl Judá cha, a eb' 'oj 'i'nc 'elt smasnil tas 'ay 'a eb' 'anma cha. A eb' 'oj 'ica'anc can slum eb' cha, xchi Dios.

¹⁰ Atn tic 'oj 'ajxoc spacc 'a eb' 'aj Moab yet' 'a eb' 'aj Amón yuj sb'an̈jb'ail, yuj pax sb'uchwjuml eb' 'a eb' schon̈b' Jehová tztac' yuj smasnil.

¹¹ Caw wal 'ay smay Jehová 'a eb'. 'Oj satxoc 'el smasnil sdiosal eb' 'aj tzyal sb'a 'a yolyib'n̈q'uinl tic. 'Intax a eb' 'anma cajn 'a jun tzo'n̈ xo nacion̈ 'a sc'axpil 'ec' sti a mar, 'oj yal sb'a eb' 'a Jehová 'aj cajn eb' cha.

¹² An̈jtona ex 'aj Etiopía, 'oj e lajw pax yuj yespada Jehová, ax e chami.

¹³ Ax ya'n 'at yailal 'a yib'n̈ eb' 'ay 'a stojlal norte yuj satn 'el eb' cajn 'a Asiria. A chon̈b' Nínive, caw cusltac xoj 'oj 'ajcn yu'uj, 'oj 'ochcn cusltac lumal.

¹⁴ 'Oj lan̈chjoc can 'ejm yatut eb'. Axn̈ej no cajb'en noc' yet' no calte'al noc' 'oj laj 'ec' 'a 'a. A no cujub' yet' no tonton, a no 'oj laj way 'a sjolmctac yoyl yatut eb', ax 'a swentnual, ata 'oj laj 'oc' 'elt no'. 'Oj 'em lan̈njoc yol sti spuertail. A te c'ute 'ay q'ue ya'ntelc yojol, 'oj can jacn yet'l te'.

¹⁵ 'Ixta wal 'oj 'aj jun chon̈b' may tas tzna cha, mun cob' tzyipc'ojlej sb'a sch'ocoj, tzyaln cob' eb' cajn 'a 'a, to may junc xo chon̈b' lajn yet'oc. Palta cusltac xoj 'oj 'ajcni, axn̈ej no calte'al noc' 'oj 'ec' 'a 'a. A eb' 'oj 'ec' 'a stz'ey, caw 'oj b'uchwjoc eb' 'a 'a.