Sofonías 1 - Chuj San Sebastian Bible

A sc'ul yowl sc'ojl Dios

¹ An Sofonías in tic, yunnal in Cusi, yixchicn in Gedalías, win yunnal Amarías, schab'l 'ichicn Ezequías. A yic 'aych win Josías yunnal Amón reyl 'a Judá, ata xyal Jehová 'ayn 'ixtic:

² 'Oj in satl smasnil tas 'ay 'a sat lum lu'um.

³ 'Oj in satl eb' 'anma', no noc', no ch'ic, yet' no chay. 'Oj wac' syailal eb' 'anma maysch'olnil sb'eyb'al, ax wa'n lajwc 'el smasnil 'anma 'a sat lum lu'um.

⁴ 'Oj wa'ch syailal eb' 'aj Judá yet' smasnil eb' cajn 'a Jerusalén. Man̈x 'a eb' 'oj yal sb'a 'a jun comn dios tzcuch Baal. 'Oj in satl eb' ya'mal 'och sti eb' 'anma 'a sdiosal cha, man̈x 'a 'aj 'oj b'inaxc eb' 'a jun chon̈b' tic.

⁵ 'Oj in satl pax smasnil eb' tzlaj q'ue 'a yib'n̈ span̈nil yatut yic tzlaj yalnc sb'a eb' 'a jun tzo'n̈ c'anal, yet' eb' tzlaj 'em cuman yic tzlaj slocn eb' in b'i, palta tzloc pax eb' sb'i jun comn dios tzcuch Milcom.

⁶ An̈jtona 'oj in satl pax eb' tzyij 'el snab'en 'ayin, atn eb' matz jaw 'ayn an Jehová in tic, yic tzwul sc'anb'noc eb' junc snab'en.

⁷ Sictac tzex 'aj 'a wojltac an Jehová Yajl in tic, yujto jab'xoj sjaw jun c'u yic 'oj wa'nc yowl in c'ojol. Tox 'ix wac' lista jun tzo'n̈ xajmb'al. Tox 'ix in si'l pax eb' 'awtb'il cot wac wet'oc.

⁸ A 'a yic jun c'u yic b'eyc'ojlal cha, 'oj wa'ch yailal 'a yib'n̈ eb' yajal, 'a yib'n̈ yunnal eb' rey, yet' 'a yib'n̈ smasnil eb' tzb'eylb'an sb'eyb'al eb' chuc chon̈b'al.

⁹ An̈jtona', 'oj wa'ch pax syailal eb' cob' tz'a'n 'emmquilal 'ayin, 'icha tzyutj eb' chuc chon̈b'al ya'n 'emmquilal 'a sdiosal, to tz'och eb' 'a yol yet'l sdiosal chi yet' siylab', atn tas tzyij eb' 'a spatquil 'elc'al yet' 'a 'ixtj 'anma'il.

¹⁰ An Jehová in an tzwala: A 'a yic jun c'ul cha, til wal 'oj 'ab'xoc yoch 'aw 'a spuertail yic no chay, yet' pax 'a junx stz'acb' chon̈b' tot b'ob'il. 'Oj 'ab'xoc pax yel yaw eb' 'anma yuj c'acp 'oj laj cot lan̈njoc 'a lum tzalctac.

¹¹ A mach cajn 'a yol chon̈b' 'a 'aj 'ay tas tzlaj chon̈xi, 'el cab' yaw, yujto 'oj cham smasnil eb' chon̈wjum. An̈jtona eb' tz'a'n q'uen tumn majnil, 'oj cham pax eb'.

¹² A 'a jun tiempoal cha, 'oj in tzictajc smasnil 'anma cajn 'a chon̈b' Jerusalén. 'Oj wa'ch syailal eb' 'anma may jac tas tzna'a, tzlaj cob' yaln eb' 'ixtic: A Jehová toc 'ay tas tzpactzej 'ayn̈ 'a wach'il, matz pactzej pax 'ayn̈ yet' yailal, xchi eb'.

¹³ Yuj cha, a smasnil sricoal eb', 'oj 'ijxoc 'eq'ui, ax sma'x lan̈chjoc can yatut eb'. 'Oj cob' sb'o chan̈ eb' yatut, palta man̈xtoc a eb' 'oj cajnoc. 'Ojt cob' yawc eb' te uva, palta man̈xtoc a eb' 'oj 'u'nc yalil te', xchi Dios.

¹⁴ Caw jab'xoj sjaw jun c'u yic 'oj ya'nc Jehová yowl sc'ojol. A jun c'u cha, caw wal niwn yel'chi, la'n xo yaji, yelc'ojlal sjawi. 'Ab'ec, a wal 'a yic jun c'ul cha, a eb' soldado to caw te'n cob' yip, 'oj 'oc' eb' yuj xiwc'ojlal.

¹⁵ A jun c'u cha, yic ton wal yowl sc'ojl Dios, yic yailal yet' cusc'ojlal. A yic cha, 'oj ma'xoc can 'ejm lan̈chjoc chon̈ab', cusltac xoj 'oj 'ajcni. 'Oj 'och q'uic'q'uinal, 'oj 'och q'ui'l 'asun, caw q'uic'q'uinl 'oj 'ajcni.

¹⁶ A 'a yic jun c'ul cha, sc'ul wal yutz'x trompeta yic owal. Caw 'oj 'el yaw eb' soldado ya'n owl 'a jun tzo'n̈ chon̈b' wach' yajch smuroal, eb' to 'ay't strorreal 'a cha'an̈.

¹⁷ A Jehová a tzaln 'ixtic: 'Oj wa'ch wal eb' 'anma 'a somc'ojlal. Yuj cha, lajn 'oj 'aj yec' eb' 'icha eb' matz 'uj yilni, yujto x'och smul eb' 'ayin. A schic'l eb', tzanxn̈ej 'aj 'oj 'elcn 'a sat lu'um, ax sq'uecn b'uln sniwnal eb' 'icha stza no noc', xchi Dios.

¹⁸ A wal 'a jun c'u yic 'oj ya'nc Jehová yowl sc'ojl cha, caw ma'oj colchjoc 'el eb' 'anma yuj q'uen oro, mto yuj q'uen plata, yujto yuj yowl sc'ojl cha, 'oj satl smasnil nacion̈. Wal 'a yajn̈ej ax slajw 'el smasnil 'anma 'a yolyib'n̈q'uinl tic, 'icha tz'aj junc tas satl yuj c'ac'.