Santiago 5 - Chuj San Sebastian Bible

A tas 'oj 'aj eb' rico

¹ 'Ab'c ex rico. 'El cab' wecc'oc eyaw eyoc' ticnec, yujto caw niwn yailal 'oj jawc 'a eyib'an̈.

² A e ricoal, caw c'altac xo. Ax e pichul, olquintacx yuj no noc'.

³ 'Ixta pax e tumin, wach'xam oro, mto plata, caw c'uxmtacx 'a jun 'ejmn̈ej, man̈x 'a jac yopiso. Ax jun sc'uxmtacl cha, a 'oj ch'oxnc 'el e mul. 'Icha stz'a junc tas yuj c'ac', 'ixta 'oj 'aj e niwnal yu'uj. Jab'xoj sjaw jun slajb' tiempoal, palta in cojxn e ricoal 'aj tzeya'ch e nab'en e molb'tzani.

⁴ A eb' e majn xmunlj 'ayex, 'in ma'ix e toj eb', ton̈j xeyixtj paxti eb'. Yuj cha, tz'awj chan̈ eb' 'a e patic, tzyaln eb' e mul. Ax yaw eb' cha, tzc'och 'a Cajlil 'a satcha'an̈.

⁵ Caw wach' tzex 'ec' 'a yolyib'n̈q'uinl tic, caw b'ut'nn̈ej yol eyatut yet' jantcn̈ej tas. Toxn̈ej tz'ixtx eyu'uj. 'Icha junc wacx tz'ajx servil caw b'aq'uech, ax smilxi, 'ixta 'ex. Ton̈j tzeyac' e gana jab'oc.

⁶ Caw tzeya'ch yailal 'a yib'n̈ eb' tojl sb'eyb'al. 'Ay pax eb' tze mil chamoc. Palta toxn matz pac sb'a eb' 'ayex.

Ca'c techjoc qui tan̈wni sjaw Cajlil

⁷ Palta ax xo wu'tac, wanab', 'a'c niwnc'ojlal e tan̈wni, masnto 'oj jawc Cajlilec. 'Iltec eb' munljum, tztan̈wj eb' yel-l smunljel, atn jun sat caw 'ay tz'och yuj eb'. Tz'ec' jun b'ab'l n̈ab', masnto tzlajw 'ec' n̈ab'lq'uinal, palta tzyac' eb' niwnc'ojlal 'a smunljel cha.

⁸ 'Icha tzyutj sb'a eb' munljum cha, 'ixta tzeyutj e b'a eya'n niwnc'ojlal e tan̈wni sjaw Cajlilec. Te'n tzeyutj pax e b'a, yujto jab'xoj 'oj jawoc.

⁹ Ex wu'tac, ex wanab', man̈ eya'lac queja e b'a, sec wach' ma'oj e b'eyc'ojlaxi. Yujto jab'xoj 'oj jawc qui Juezalec.

¹⁰ A eb' schecb' Dios pecti', eb' aljnac 'el sb'i Cajlilec, techjnac yuj eb' yab'n syail, ya'jnac eb' niwnc'ojlal. Yuj cha, b'eylb'ejc sb'eyb'al eb' cha.

¹¹ Cojtac, a eb' ya'jnac techjoc, caw tzaljc'ojlal yaj eb' ticnec. 'Ay 'aj xeyab' yab'xil win Job. Caw te'n yutjnac sb'a yab'n syailal. Eyojtac, chajtl yutjnac pax Cajlil win 'a slajub'. Yujto a Cajlilec, caw tz'o'ch sc'ojl 'ayn̈ec. Caw tz'och pitz'n cusc'ojlal 'a cujec.

¹² Palta ex wu'tac, ex wanab', 'ay wal junx tas 'oj walb't 'ayex, yowlal 'oj eyicloc. Man̈ e comn locc sb'i Dios 'aj satcha'an̈, mto junc tas 'ay 'a yolyib'n̈q'uinl tic, man̈ e comn locc sb'i junc xo mach, mto junc xo tas. A yic tzex laj paxtini, N', xe chi, toto yel. Ma'ay, xe chi, toto man̈ yeloc. Cojxn jun tzo'n̈ tic tzeyala, sec wach' ma'oj 'ajxc 'och eyailal.

¹³ Toto 'ayx wan eyab'n syal ticnec, leslwan̈ec. Toto 'ayx 'ay pax e tzaljc'ojlal, b'itnan̈c 'a Dios.

¹⁴ Toto 'ayx ya eyaji, 'awtjec eb' anciano yic iglesia. Ax xo anciano ex, tzex leslwi yuj eb'. Tze succh aceite 'a eb' 'a sb'i Cajlil.

¹⁵ Toto tzeya'ch Dios 'a e c'ojol, tzex leslwi yuj eb' ya'ay cha, 'oj colchjoc 'el eb' 'a syailal. A Cajlilec, a 'oj 'a'nc b'oxc sc'ojl eb'. Toto 'ay smul eb' xlaj 'ochi, 'oj 'ajxoc lajwc can yuj Dios.

¹⁶ Yuj cha, tzlaj eyal-lac e paltail 'ayx junjn ex. Tzex laj leslwi pax eyuj junjn ex, sec wach' 'oj laj b'oxc e c'ojol. A eb' tojl xon sb'eyb'al, a yic tzleslwi eb' 'a Dios, caw 'ay yel'ch slesl eb' cha. Til wal tas tztac' yuj eb'.

¹⁷ A 'e'nc Elías 'a pecti', 'anman̈ej win 'icha on̈c tic. A yic sleslwi 'a smasnil sc'ojol, sec matz yac' n̈ab', nan̈l schan̈l ab'il man̈x 'ic yac' n̈ab' yu'uj.

¹⁸ At yic 'ix leslwi pax yuj jun n̈ab' cha, 'ixta to b'i'an xya'n paxi. Atta 'ix yaxb' pax chan̈ lum lum jun 'ejm xo.

¹⁹ Ex wu'tac, ex wanab', toto 'ay eb' 'a e cal, tzya'lj yi'n 'el snab'en 'a jun cuynb'il caw yel, comnoc 'ay ex, tze montj eb', sec tzya'ch wal eb' snab'en 'a jun 'ejm xo.

²⁰ Nachj cab' 'el jun tic eyu'uj. A eb' maysch'olnil tzyutj sb'eyb'al, toto tze montj can pax 'elt eb' 'a jun maysch'olnil cha, tzyal 'el'chi to wan e coln 'elt spixn eb' 'a yol sc'ab' chamel. Jantcn̈ej smul eb' cha, eyujn̈ej, ax yajx can lajwoc.