Santiago 4 - Chuj San Sebastian Bible

Matz tac' tzqui chamc'ojlej qui b'a*r* yet' yolyib'n̈q'uinl tic

¹ ¿Eyojc am 'aj tzcot jun tzo'n̈ owl 'ay 'a e cal, yet' chichnc'ojlal? A yic tze nib'n 'och jun tzo'n̈ tas tze nib'j eyac' e gana yet'oc, ata tzpitzw 'elt jun tzo'n̈ owl cha.

² Tze nib'j 'och junc tas, palta matz 'ajx 'ayex. Yuj cha, tecn 'ayx 'oj e mil cham junc xo 'anma'. Caw 'aych e nab'en e nib'n 'och jun tzo'n̈ maysch'olnil, palta matz eyac' ganar yajx 'ayex. Yuj cha, tzlaj ex 'och 'ajc'ojlal 'ayex, tzlaj eya'nc owal. Matz 'ajx 'ayex, yujto matz e c'an 'a Dios.

³ Wach'xam tze c'ana, palta matz 'ajx 'ayex, yujto maysch'olnil tzeyutj e nab'en yic tze c'anni. Enani to 'oj 'ajxoc 'ayex, yic tze lajn 'a spatc jun tzo'n̈ maysch'olnil tze nib'j 'ochi.

⁴ 'Ay ex, 'icha junc 'ix, cojxn 'ajmulal tzsayq'ui, 'ixta 'ex 'a sat Dios. ¿Tom mant eyojcoc, to a yic tzqui chamc'ojlanec qui b'a yet' yolyib'n̈q'uinl tic, ax 'a Dios tzon̈ 'ochc 'ajc'ojlal? Yuj cha, tzann̈j mach tznib'j tz'och swach'c'ojloc yolyib'n̈q'uinl tic, ax 'a Dios tz'och 'ajc'ojlal.

⁵ ¿Tom tze na'a, to may yel'ch tas tzyal spaxti Dios 'a Ch'an̈ U'un̈ 'a 'aj tzyal 'ixtic: A Dios 'ix 'a'n 'och cajn Yespíritu 'ayn̈ junjn on̈. Caw wal tznib'j Yespíritu cha, to yic on̈cn̈ej 'a jun 'ejmn̈ej, xchi.

⁶ Yuj cha, yel xo niwn swach'c'ojlal tzyac' 'ayn̈ec. A Ch'an̈ U'un̈ tzaln pax 'ixtic: A Dios tzchac sb'a yet' eb' b'an̈quintac yeq'ui. Palta ax 'a eb' 'emmquilal yeq'ui, tzyac' swach'c'ojlal 'a eb', xchi.

⁷ Yuj cha, yiclumn̈ej cab' tzcutjec qui b'a 'a Dios. Te'n tzcutjec qui b'a 'a win diablo, toto 'ixta', 'oj 'at win 'elc 'ayn̈ec.

⁸ Qui nitzc 'och qui b'a 'a stz'ey Dios. To 'ixta', 'oj snitzch sb'a 'a qui tz'eyc jun xo. Palta ax xo maysch'olnil e nab'en, b'oc e b'eyb'al. Ax chab'c'ojlal eyaji, tojlb'tzejc e nab'en.

⁹ 'A'c 'och e b'a 'a cusc'ojlal. Ji'jmtac cab' eyoq'ui. 'O'n̈ec si'mb'il. 'Och cab' wan e tzewji, to tzex 'oq'ui. Meltzj cab' 'och e tzaljc'ojlal chi e cusc'ojlaloc.

¹⁰ Tzeyij 'ejm e b'a 'a sat Cajlil. Toto 'ixta', a 'oj eyi'n cha'an̈.

Matz tac' calnec peclal

¹¹ Ex wu'tac, ex wanab', man̈x eyal-lac e peclal. Toto tzcalc speclal junc quit creyenteal, mto tzqui b'eyc'ojlej, tzyal 'el'chi, a sley Dios tzcalc speclal, mto wan qui b'eyc'ojlani. Palta toto tzqui b'eyc'ojlejc sley Dios, man̈xtzac qui yicljec sley cha, wan ca'nec 'och qui b'a juezal.

¹² Palta cojxn jun mach b'ojnac jun ley, junn̈j juez, atn jun tztac' on̈ scolnec, tztac' pax satn 'el eb' 'anma smasnil. Yuj cha, an̈ec xo, ¿tom 'ay calnec quic qui b'eyc'ojlan eb' quit 'anma'il?

Man̈ cojcoquec, tas cajc q'uic'an

¹³ 'Ab'ec, 'ay ex wan eyaln 'ixtc ticnec: A ticnec, mto q'uic'an, 'oj qui 'atc 'a junc xo chon̈ab', jun ab'il 'oj cajc ta'. Ax qui mannec tas 'a cha, ax qui chon̈nec paxi, ax ca'nec ganar qui tumin, xcob' e chioc.

¹⁴ Palta 'in man̈ cojcoquec tas cajc q'uic'an. A qui q'uinlec 'a yolyib'n̈q'uinl tic, yajn̈ej tz'eq'ui. Lajn 'icha xob' lu'um, junn̈j rato tzlajw q'ue wa'an.

¹⁵ Yel xo wach' tzcalc 'ixtic: Toto tz'el 'a sc'ojl Cajlil, pitzn on̈c ta', 'oj qui b'oc jun tic, mto junc xo tas, xqui chiec.

¹⁶ Palta 'ayx ton̈j tzeyij chan̈ e b'a, tze b'an̈n e b'a. Jantcn̈ej eb' 'ixta tzyutj sb'an̈n sb'a, maysch'olnil tzyutj sb'a eb' 'a sat Dios.

¹⁷ Toto cojtquec tas wach' tznib'j Dios tzqui b'o'o, palta matz qui b'o paxi, to 'ixta', tz'och qui mulc 'a 'a.