Santiago 3 - Chuj San Sebastian Bible

A tas tzyal qui ti'

¹ Ex wu'tac, ex wanab', comnoc man̈ niwnoc ex tzeya'ch e b'a cuywjumal. Yujto eyojtac, an̈ cuywjum on̈c tic, yel xo wal niwn 'oj qui b'eyc'ojlaxc yuj Dios.

² Yujto qui masnil, til wal 'ejm tz'och qui mulc 'a Dios. Toto may 'aj tz'och qui mulc yuj tas tzcala, caw wach'n̈ec 'a sat Dios, tztac' qui tennec pax 'och wan qui niwnal smasnil.

³ A yic tzca'nec 'och sfreno junc chej, yujn̈ej jab' sfreno cha, tz'atn̈j qui'nec 'at no 'a 'aj tzquij 'ati.

⁴ Q'uinloc 'ay junc barco caw niwquil, tz'at yuj junc 'ic' caw ow. Palta yujn̈ej jab' sch'umlab'il chi tzch'um win 'et'jnac cha, tz'atn̈j 'a 'ajtil tznib'j win tzyij 'ati.

⁵ An̈jtona', 'ixta pax qui ti'ec. Jab' wali, palta til wal tzann̈j tas tztac' yu'uj. Q'uinloc 'ay jac snich c'ac' ticnec, tz'elcn 'a junc tzalan. Wach'xam caw jab', palta til wal tas tz'a yu'uj.

⁶ 'Icha jun c'ac' cha, 'ixta qui ti'ec. Smasnil jun tzo'n̈ maysch'olnil 'a yolyib'n̈q'uinl tic, tztac' yu'uj. A qui ti'ec, junn̈j yaj yet' qui niwnalec, palta a tz'i'n 'at qui niwnalec 'a maysch'olnil. Caw tzyij cot cusc'ojlal 'a quib'n̈ec 'a smasnil tiempo. Yujto a jun tzo'n̈ maysch'olnil tzyal qui ti'ec, a 'a infierno tzcoti.

⁷ A junjn c'aj no noc', no ch'ic, no chan, no chay, yet' e no chan̈e yoc, tzca'c ganar qui yamnec e no'. Yet' 'a pecti', ya'jnac ganar eb' 'anma syamn e no'.

⁸ Palta may junc mach tztac' syamn 'och wan sti yaln maysch'olnil. A qui ti'ec, caw maysch'olnil, matz tac' stenchx 'och wa'an. Caw lajn 'icha junc chan 'ay svenenoal sti', tzcham 'anma yu'uj.

⁹ A yet' qui ti'ec, tzcalc wach' paxti 'a Cajlil, atn qui Mam Dios. Palta a pax yet' qui ti'ec, tzqui c'anc cot yowl sc'ojl Dios 'a yib'n̈ eb' quit 'anma'il, palta a b'ojnac pax eb'. 'Icha wal Dios, 'ixta xyutj eb'.

¹⁰ Junn̈j qui ti tzqui c'anlb'ej caln wach' paxti 'a Dios, tzqui c'anlb'an pax 'a maysch'olnil. Palta ex wu'tac, ex wanab', caw man̈ smojc qui b'onec 'ixta'.

¹¹ Q'uinloc 'ay junc spac'b'a ticnec, ¿tom tzq'uel a wach', tzq'uel pax a c'achi'?

¹² Yet' pax junx tic, q'uinloc 'ay junc snun higo, ¿tom mansn sat tzyac'a? Mto 'ay pax junc snun uva, ¿tom higo sat tzyac'a? 'Ixta pax junc spac'b'a c'achi', matz tac' sq'uel a a wach' 'a 'a.

A jun jelnal tzcot 'a satcha'an̈

¹³ Toto 'ayx caw jeln ex, toto tznachj 'el junc tas eyu'uj, yowlal caw wach' tzeyutj e b'eyb'al. 'Ixta 'oj eyutc e ch'oxn 'eli, to 'emmquil tzeyutj e b'on smasnil tas yuj e jelnal 'a sat Dios.

¹⁴ Palta caw man̈ e b'an̈ e b'a yuj e jelnal 'a sat Dios, toto tzex comn chichni, toto cojxn̈ej eyic tze nib'j tzeyala, tze nib'n ax xoj tzeyac' mandar. Toto 'ixta tzeyutj e b'a, caw wan eya'n 'es yuj jun e b'eyb'al cha, yujto matz eyiclj jun cuynb'il caw yel.

¹⁵ Toto 'ixta tzeyutj e b'a, a jun e jelnal cha, man̈oc 'a satchan̈ tzcoti, palta yic yolyib'n̈q'uinl tic, yic comn 'anma'. A jun e jelnal cha, yic win diablo.

¹⁶ Yujto tzann̈j 'aj 'ay eb' cojxn̈ej yic tznib'j yala', tznib'j eb' axn̈ej tz'a'n mandar, ata tz'och somc'ojlal yuj eb', tz'och pax smasnil maysch'olnil.

¹⁷ Palta ax jun jelnal tzcot 'a satcha'an̈, man̈ 'ichcta tz'aji. Toto 'aych jun jelnal tic 'ayn̈ec, may qui paltailec 'a sat Dios, junc'ojlal xoj tzcutjec qui b'a. 'Emmquilal tzcutjec qui b'a. Yiclum on̈cn̈ej 'a junc tas. Caw tz'o'ch qui c'ojlec 'a eb' quit 'anma'il, 'ela tzlaj cutquec qui b'a 'a eb'. Man̈ qui chab'c'ojloquec eb' quit 'anma'il, man̈ chab'satoc tzcutjec pax qui b'a 'a eb'.

¹⁸ Toto cojxn junc'ojlal tzqui b'o'ec, 'oj qui chac spac qui tojl b'eyb'al cha.