Santiago 1 - Chuj San Sebastian Bible

Tz'el yich scarta Santiago

¹ An tic, Santiago in. Ya'mal in servil Dios yet' 'a Cajlil Jesucristo. Tic tzwa't stzatzl e c'ojl ex lajchw macn̈ wit israelal, ex pucnc can 'at 'a junjn chon̈ab'.

A jun jelnal tzyac' Dios

² Ex wu'tac, ex wanab', a yic tzjaw jun tzo'n̈ tzann̈j prowalil 'ayex, caw tzaljan̈c si'mb'il.

³ 'Ay 'aj tzon̈ 'ajxec prowal, sec chequel toto yel tzca'c 'och qui c'olj 'a Dios. Palta cojquec, at wal ta tzwach' 'ajx qui te'nal.

⁴ Yuj cha, caw te'n tzeyutj e b'a eya'n 'och e c'ojl 'a Dios, sec 'oj swach' b'oc e nab'en. Toto 'ixta', caw tz'acn ex, caw wach'x 'a sat, may jac tas tzeyac' palta 'a sat.

⁵ Toto 'ayn̈ 'ayt palta qui jelnal, qui c'anc 'a Dios. 'Oj yac'a', yujto yelc'ojlal tzyac' 'ayn̈ec qui masnil, toto tzqui c'anc 'a 'a. Matz cot yowl 'ayn̈ec.

⁶ Palta a yic tzqui c'annec qui jelnal cha, yowlal tzca'c 'och 'a qui c'ojol to 'oj qui cha'. May cab' qui chab'c'ojlalec tzqui c'anni. Yujto 'icha tzq'ue'i tz'ejm yib'n̈ a mar tz'at b'alb'noc yuj 'ic', 'ixta eb' 'ay schab'c'ojlal.

⁷ Toto 'ay ex 'ixta ex, xe natlaji, to 'ay xon jac tas 'oj e cha 'a Cajlil.

⁸ A eb' 'ay schab'c'ojlal, caw man̈ te'noc jac snab'en eb', yujto 'ixta xon sb'eyb'al eb'.

⁹ Ax xo ex meb'a', tzaljan̈ec, yujto niwn eyel'ch 'a sat Dios.

¹⁰ Palta ax xo rico ex, toto tznachj 'el eyu'uj, to may eyel'ch 'a yol eyico', 'oj e tzalj jun xo. Yujto a eb' rico, 'icha yel snichte', 'ixta 'oj 'aj 'el'ch eb'.

¹¹ A yic tzjaw c'u, caw 'ay c'ac', tztacj 'ejm lojnjoc te yu'uj, yajn̈ej tzpucl snichte'. Man̈x 'a sch'olnil yilxi. 'Icha stacj 'ejm snichte cha, 'ixta 'oj 'aj eb' rico, yic wan smolb'tzan eb' stumin.

A yic tzon̈ 'ajxec prowal

¹² Toto tzca'c techjoc, yic tzon̈ 'ajxec prowal, caw wach' quiquec. Yujto a yic tox xlajw cajxec prowal, 'oj qui chac spac, atn qui q'uinlec 'a jun 'ejmn̈ej. Ya'jnac can Dios sti', chajtlto 'oj yac' jun tic 'a jantcn̈ej eb' 'ay schamc'ojlal 'a 'a.

¹³ A yic tzon̈ 'ajxec prowal 'a junc maysch'olnil, matz tac' calni, to a Dios tzon̈ 'a'nec prowal. Yujto a Dios, matz tac' yajx prowal 'a maysch'olnil. An̈jtona', may pax mach tzyac' prowal Dios.

¹⁴ Palta junjn on̈, yujn̈ej tastc tzqui nib'j 'ochi, tzon̈ 'ajx prowal. Yuj jun tzo'n̈ cha, tzmontchj 'at qui nab'en 'a maysch'olnil.

¹⁵ Ax 'a yic tzqui b'on jun tzo'n̈ maysch'olnil tzqui nib'j 'och cha, tzwach' 'och qui mul. Ax yic tzwach' juw 'el qui nab'en yuj qui mul cha, yujn̈ej cha, ax qui cham 'a jun 'ejmn̈ej.

¹⁶ Ex wu'tac, ex wanab', chamc'ojlb'ilx wu'uj. Caw man̈ e cha 'ixtxoc paxti e b'a.

¹⁷ A 'a satcha'an̈, ata tzcot jantcn̈ej tas wach' tz'ajx 'ayn̈ec 'a nab'an̈ej. Yet' pax jantcn̈ej jun tzo'n̈ siylab' caw wach', a Dios tz'a'n cot 'ayn̈ec. A b'ojnac jun tzo'n̈ tz'ec' 'a satcha'an̈, tzya'n 'emt sacq'uinl 'a quib'n̈ec. Palta wach'xam tzjelmj yilx jun tzo'n̈ cha, tz'och wewen 'a 'a, ax Dios, man̈ 'ichcta tz'aji. May 'aj tzjel snab'en jun 'ejmoc.

¹⁸ On̈ laj yac' 'aljoc 'a scha'ejmal yet' spaxti caw yel, yujto 'ixta x'el 'a sc'ojol. 'Ixta tzon̈ yutjec, sec wach' yel xo wal xajn on̈c yuj 'a yib'n̈ smasnil jun tzo'n̈ xo tas b'ob'il yu'uj.

Yowlal tzqui yicljec spaxti Dios

¹⁹ Ex wu'tac, ex wanab', chamc'ojlb'ilx wu'uj. Eyojc xon jun tzo'n̈ tic tzwal tic. Yuj cha, caw lista tzeyutj e b'a eyab'xni. Man̈ comnoc tzeyal eyic muc'uc. An̈jtona', man̈ comnoc tzcot eyowal.

²⁰ Yujto a yic tzcot cowlec, man̈oc 'icha tznib'j Dios wan qui b'oni, yujto tznib'j tojl tzcutjec qui b'eyb'al.

²¹ Yuj cha, 'actjec can jantcn̈ej tas tu 'a sat Dios, yet' smasnil maysch'olnil. Caw tze wach' 'a'j 'och e c'ojl 'a spaxti Dios 'a 'emmquilal, atn jun alb'ilx can 'ayex, yujto a spaxti tic, tztac' tzon̈ colchjec yu'uj.

²² Qui yiclquec tas tzyal spaxti Dios. Man̈toc ton̈j tzqui macljec cab'i'. Toto ton̈j tzqui macljec, mun wan quixtnec paxti qui b'a qui nan 'es.

²³ 'Ay eb' tzmaclni yab' tas tzyal spaxti Dios, palta matz yiclj eb'. A eb' cha, lajn eb' 'icha junc winc tzyil sat 'a junc nen.

²⁴ A yic tzlajw yiln win sat 'a junc nen cha, tz'at winac. Yajn̈ej tzsat sc'ojl winac, chajtl yilx sat cha.

²⁵ 'Ay jun ley caw tz'acan, a tzon̈ coln 'el 'a libre. Toto tzqui chamc'ojlej qui cuynec jun ley tic, toto matz sat qui c'ojlec 'a tas tzyala, tzqui yiclni, toto 'ixta', 'oj qui tzaljec 'a jantcn̈ej tas tzqui b'o'ec.

²⁶ Toto 'ayn̈ec tzqui na'a, to 'aych qui c'ojl 'a Dios, palta matz qui tench wan qui b'a 'a tas tzcala, nab'an̈ej tzqui na'a, to 'aych qui c'ojl 'a 'a. Mun tzquixtj paxti qui b'a qui nan 'ixta'.

²⁷ Palta 'oj wal junx tic. Toto 'ay eb' 'unn chamnc smam snun, yet' eb' 'ix chamnc yichmil 'ay scusc'ojlal, yowlal tz'at quilc eb', tzon̈ colwjec 'a eb'. An̈jtona', yowlal tzquijec 'el qui b'a 'a tzann̈j maysch'olnil 'ay 'a yolyib'n̈q'uinl tic. Toto 'ixta tzcutjec qui b'a, ax qui Mam Dios, tzyila to caw yel 'aych qui c'ojl 'a 'a.