Salmos 98 - Chuj San Sebastian Bible

SALMO 98 Alj wach' paxti yuj sb'eyc'ojlal Dios

¹ B'itn coyc 'a Jehová yet' junc 'ac' b'it, yujto caw satjub'tac yilx tas tzb'o'o. 'Ix yac' ganar owal, yujto caw 'ay spoder.

² 'Ix yac' 'ojcaxc 'eli to Colwjum, 'ix sch'ox yil jun tzo'n̈ niwc nacion̈, to tojl tzyutj sb'onyaj junc tas.

³ Caw wal 'ayn̈j 'ec' schamc'ojlal yet' stojlal 'a qui calc an̈ israel on̈c tic. Smasnil 'anma 'a yolyib'n̈q'uinal tic 'ix yil eb' scolwj qui Diosalec quet'oc.

⁴ B'itn coyc 'a Jehová yet' qui tzaljc'ojlal. Jantc on̈c cajn on̈c 'a sat lum lum tic, ca'c wal tzaljoc qui c'ojl qui b'itnanec jun tzo'n̈ b'it tic.

⁵ B'itn coyc 'a Jehová yet' arpa, b'itn coyc yet' jun tzo'n̈ son ch'an̈ 'aych 'a 'a.

⁶ B'itn coyc yet' qui tzaljc'ojlal 'a yojltac qui Reyal. B'itn coyc yet' jun tzo'n̈ yamc'ab' tz'utz'xi, 'icha trompeta yet' no cacha.

⁷ B'itn cab' chan̈ a mar yet' smasnil tas 'ay 'a yojl a', b'itn cab' chan̈ yolyib'n̈q'uinl tic yet' smasnil eb' cajn 'a 'a.

⁸ A eb' a niwc a', q'ue cab' wan chel-loc eb' a'. Ax eb' lum niwc witz, jun lajnn̈ej cab' tzyutj eb' lum yawj chan̈ yuj tzaljc'ojlal 'a yojltac Jehová,

⁹ yujto tzjaw wul yac' yajlil 'a sat lum lum tic. A 'oj yac' yajlil 'a yib'n̈ smasnil chon̈b' 'a yolyib'n̈q'uinl tic. 'Oj sb'oyaj eb' 'anma 'a stojlal yet' 'a swach'il.