Salmos 97 - Chuj San Sebastian Bible

SALMO 97 A Jehová Rey ton b'i'an

¹ A Jehová caw Rey 'a yolyib'n̈q'uinl tic, yuj cha tzalj cab' chan̈ smasnil eb' 'anma 'a eb' lum chon̈b' 'a sat lum tic yet' eb' cajn 'a stitc eb' a mar.

² A q'uic' 'asun, a oyn 'och 'a 'a. A yopiso caw te'n yaj yuj tojlal yet' yuj wach'il.

³ 'Ay jun c'ac' b'ab'l s'at yu'uj, a tzn̈usn smasnil eb' 'ajc'ojol.

⁴ A sletz'lomal, a chi tz'a'n sacq'uinl 'a yolyib'n̈q'uinl tic. Ax lum lum tic, caw tz'ib'x lum yiln 'ochi.

⁵ A eb' lum niwc witz, ton̈j tz'ulb'x 'ejm eb' lum 'a yojltac Jehová, atn syajlil smasnil yolyib'n̈q'uinal. 'Icha yulb'x no chab'ic', 'ixta tz'aj eb' lum yu'uj.

⁶ A satcha'an̈, a tzch'oxn 'el stojlal; ax eb' chon̈ab', caw tzyil eb' stzictznial.

⁷ 'Oj 'el sq'uixwel eb' tzyac' 'ejm sb'a 'a jun tzo'n̈ yechel, atn eb' tzb'an̈ sb'a yet' jun tzo'n̈ comn dios cha. Smasnil eb' tzalx 'och diosal, 'oj yac' 'ejm sb'a eb' 'a Jehová.

⁸ Mamin Jehová, a eb' 'aj Sión yet' eb' 'aj Judá, 'oj tzaljoc chan̈ eb' yic 'oj yab'nc eb' yab'xil a b'eyc'ojlal.

⁹ Mamin Jehová, Yajl ach 'a yib'n̈ smasnil yolyib'n̈q'uinl tic, 'ec'b'al el'ch 'a yib'n̈ jun tzo'n̈ tzalx 'och diosal.

¹⁰ An̈ec tzqui chamc'ojlej Jehová, qui yajc can 'el maysch'olnil. A eb' yiclum tzyutj sb'a 'a 'a, 'oj tan̈wxoc eb' yu'uj, a 'oj colnc 'el eb' 'a yol sc'ab' eb' tu snab'en cha.

¹¹ 'Oj yac' sacq'uinl 'a eb' tojl sb'eyb'al, ax ya'n tzaljc'ojlal 'a eb' 'anma wach' snab'en.

¹² Ex 'anma to wach' e nab'en, tzaljan̈c 'a Jehová. ¡Alc e wach' paxti 'a 'a!