Salmos 96 - Chuj San Sebastian Bible

SALMO 96 Jun 'ac' b'it tzb'itnax 'a Jehová

¹ Qui masnil an̈ cajn on̈ 'a sat lum lum tic, b'itn coyc 'a Jehová yet' junc 'ac' b'it.

² B'itn coyc 'a 'a, tzcalnec qui wach' paxti 'a 'a; 'a junjn c'u tzcalnec 'el yab'xil colnb'il tzyac'a.

³ Calc 'el yab'xil tas satjub'tac yilx b'ob'il yu'uj. Calc 'el 'a scal eb' chon̈ab' yet' 'a junjn nacion̈,

⁴ yujto a Jehová caw niwn yel'chi, smoj wal yalx wach' paxti 'a 'a. Yel xo 'ay smay 'a yib'n̈ jun tzo'n̈ comn dios.

⁵ A smasnil scomn diosal eb' chon̈ab', caw may jac yel'ch eb', al pax Jehová caw niwn yel'chi, yujto a b'ojnac satcha'an̈.

⁶ Caw tzictzni yilx yuj spoder, caw 'ayc' yet' spoder chi 'a yol scajnub'.

⁷ Ex 'anma yic junjn chon̈ab', alc wach' paxti 'a Jehová, yujto caw niwn yel'chi, caw wal 'ay spoder.

⁸ Alc wach' paxti 'a 'a, yujto niwn yel'chi. 'Ochn̈ec yet' eyofrenda 'a yamq'uil scajnub'.

⁹ 'A'c 'emmquilal 'a Dios yic tzex c'och 'a scajnub' wach' yilxi. 'Ay cab' xiwc'ojlal smasnil 'anma 'a yojltac.

¹⁰ Calc yab' smasnil nacion̈, to a Jehová rey toni. A 'ix b'on yolyib'n̈q'uinl tic, yuj cha matz 'ib'xi. Caw tojln̈ej tzyutj sb'eyc'ojlan smasnil chon̈ab'.

¹¹ Tzalj cab' satcha'an̈ yet' lum lum tic. 'El cab' yaw a mar yet' smasnil tas 'ay 'a junjn c'aj.

¹² Tzalj cab' chan̈ lum lum tz'awxi yet' tas 'ay 'a sat lu'um. 'Oj 'el yaw eb' te te 'ay 'a waymtac yuj tzaljc'ojlal

¹³ yic 'oj jawc Jehová. 'Oj jawc wul yac' yajlil 'a sat lum lum tic. 'Oj yac' yajlil 'a yib'n̈ smasnil chon̈ab', ax sb'eyc'ojlax eb' yuj 'a stojlal.