Salmos 95 - Chuj San Sebastian Bible

SALMO 95 B'it yic tzaljc'ojlal 'a Jehová

¹ Cotn̈ec, b'itn coyc yet' qui tzaljc'ojlal 'a Jehová. B'itn coyc 'a qui Colmalec.

² 'Och coyc yet' qui wach' paxti 'a yojltac, tzqui b'itnanc b'it yic tzqui'nec chan̈ sb'i.

³ Yujto a Jehová Dios, caw niwn yel'chi, Rey 'a yib'n̈ jun tzo'n̈ xo comn dios.

⁴ A 'a yol sc'ab' 'ayc' jun tzo'n̈ xab'l yich lum lum tic. Yic pax yaj eb' lum niwc witz chan̈ yajb't ste'il.

⁵ A pax 'ay yic a mar, yujto a b'ojnac pax yet' spoder, sb'ojnac pax lum tacn̈ lum tic.

⁶ Cotn̈ec, 'em coyc cuman yic tzon̈ 'ochc 'emmquilal 'a Jehová, 'em coyc cumn 'a 'a, yujto a b'ojnacn̈ec.

⁷ Qui Diosalec yaji, an̈ec xo tic schon̈b' on̈ec. Yuj cha, 'icha to scalnelu cajec, tan̈b'iln̈ec yu'uj. Tzyal Dios 'ixtic: A ticnec toto tzeyab' tas tzwala,

⁸ to 'ixta', man̈ eyac' pitb'oc e b'a, 'icha ya'jnac eb' e mam eyichm 'a Meriba, 'icha pax yutjnac sb'a eb' 'a Masah yic 'ayc' 'eb' 'a lum cusltac lu'um.

⁹ Atnta ya'jnacn prowal eb' e mam eyicham, wach'xam yiljnac eb' tas satjub'tac yilx b'ob'il wu'uj.

¹⁰ Chawinc ab'il stzuntzjnac cot eb' 'anma chi wowal, yuj cha, waln 'ixtic: A eb' 'anma tic, chucchc 'aj 'aych snab'en eb', ma'ix ya'ch eb' sc'ojl 'a tas xwac' scuyu'.

¹¹ Yuj cha, 'a scal yowl in c'ojol, xwa'n in ti', to may b'a'n̈ 'oj 'och eb' 'iljoc wu'uj, xin xchi, xchi Dios.